1. Wai wi need fi laan bowt di aynjel dehn?

JEHOAVA waahn wi noa bowt fi hihn famili. Di aynjel dehn da paat a fi hihn famili. Di Baibl kaal dehn “Gaad son.” (Job 38:7) Weh dehn du? How dehn mi help peepl eena di paas? Ahn how dehn help wi now?​—Pleez goh da Noat 8 da di en a dis buk.

2. Da hoo mek di aynjel dehn, ahn da humoch a dehn deh?

² Wi need fi noa hoo mek di aynjel dehn. Koloashanz 1:16 seh dat afta Jehoava mek Jeezas, Ih mek “evriting weh deh eena hevn ahn weh deh pahn ert.” Dis inklood di aynjel dehn. Bot da humoch a dehn deh? Di Baibl tel wi dat honjridz a milyanz a aynjel deh.​—Psalm 103:20; Revilayshan 5:11.

3. Weh Job 38:4-7 tel wi bowt di aynjel dehn?

³ Di Baibl tel wi dat Jehoava mek di aynjel dehn bifoa ih mi mek di ert. Eena di buk a Job ih tel wi dat dehn mi onli hapi wen Gaad mi mek di ert. Di aynjel dehn da-mi wahn kloas famili weh wership Jehoava tugeda.​—Job 38:4-7.

4. How wi noa dat di aynjel dehn inchrestid eena hyoomanz?

⁴ Fahn way bak, di aynjel dehn mi aalwayz inchrestid eena hyoomanz ahn weh Gaad waahn fi wee ahn fi di ert. (Proverbs 8:30, 31; 1 Peeta 1:12) Dehn mi onli sad wen Adam ahn Eev disobay Gaad. Dehn  eevn moa sad nowadayz fi si dat wahn lata peepl di du di saym ting. Bot wen sombadi chaynj ahn ton tu Gaad, di aynjel dehn hapi. (Look 15:10) Di aynjel dehn inchrestid eena evribadi weh di serv Gaad. Jehoava yooz fi hihn aynjel dehn fi help an protek ih servant dehn pahn di ert. (Heebrooz 1:14) Mek wi luk pahn sohn egzampl.

5. How di aynjel dehn mi help Gaad peepl eena di paas?

 ⁵ Jehoava mi sen too aynjel fi help Lat an ih famili fi get dehn owta Sadam ahn Gomora bifoa ih mi dischrai di siti dehn. (Genesis 19:15, 16) Yaaz layta, sohn man chroa Danyel eena wahn deep hoal weh mi gat een sohn laiyan. Bot di laiyan dehn neva hert ahn bikaaz “Gaad mi sen ih aynjel ahn shet di mowt a di laiyan dehn.” (Daniel 6:22) Wen di apasl Peeta mi deh eena prizn, Jehoava sen wahn aynjel fi free ahn. (Aks 12:6-11) Sohn aynjel mi help Jeezas tu wen hihn mi deh pahn di ert. Fi egzampl, afta ih mi geh baptaiz, ‘di aynjel dehn mi kohn ten tu ahn.ʼ (Maak 1:13) Ahn jos bifoa dehn mi kil Jeezas, wahn aynjel ‘schrentn ahn.ʼ​—Look 22:43.

6. (a) How wi noa dat di aynjel dehn help Gaad peepl tudeh? (b) Wat da sohn kweschan wi wahn ansa now?

⁶ Tudeh, di aynjel dehn noh apyaa tu hyoomanz. Bot Gaad stil yooz dehn fi help ih servant dehn. Di Baibl seh: “Di aynjel a Jehoava di kyamp aal rong dehn wan weh di fyaa Hihn, an ih sayv dehn.” (Psalm 34:7) Wai wi need protekshan? Bikaaz wi ga sohn powaful enimi weh waahn hert wi. Bot da hoo dehn, ahn weh dehn kohn fram? How dehn di chrai hert wi? Fi ansa dehndeh kweschan, mek wi si weh mi hapm jos afta Gaad mek Adam ahn Eev.

7. Weh Saytan di du wid moas peepl op tu now?

⁷ Eena Chapta 3 wi mi laan bowt wahn aynjel weh gaan gens Gaad ahn mi waahn rool oava adaz. Di Baibl kaal ahn Saytan di Devl. (Revilayshan 12:9) Saytan waahn ada peepl goh gens Gaad tu. Hihn mi chrik  Eev, an eva sins den hihn di chrik lata peepl. Bot, sohn peepl mi stay faytful tu Jehoava laik Aybl, Eenak, ahn Noawa.​—Heebrooz 11:4, 5, 7.

8. (a) How sohn aynjel geh fi bee deemonz? (b) How di deemonz dehn servaiv di flod?

⁸ Eena Noawa dayz, sohn aynjel gaan gens Jehoava ahn lef dehn hoam da hevn fi kohn liv az hyoomanz pahn di ert. Wai dehn mi du dis? Di Baibl tel wi dat dehn mi waahn geh marid tu di uman dehn. (Reed Genesis 6:2.) Bot ih mi rang fi mek dehn du dat. (Jood 6) Moas a di peepl dehn weh mi-di liv joorin da taim geh korop ahn vailent jos laik di wikid aynjel dehn. Soh Jehoava disaid fi bring wahn flod ahn dischrai aala dehn. Bot hihn sayv dehn wan weh mi faytful tu hihn. (Genesis 7:17, 23) Di wikid aynjel dehn gaan bak da hevn fi servaiv di Flod. Di Baibl kaal dehn wikid aynjel deemonz. Dehn mi gaan gens Gaad ahn jain op wid Saytan, soh reeli, dehn mi pik Saytan az dehn roola.​—Machyu 9:34.

9. (a) Weh hapm tu di deemon dehn wen dehn gaan bak da hevn? (b) Weh wi wahn taak bowt now?

⁹ Bikaaz di wikid aynjel dehn gaan gens Jehoava, hihn neva aksep dehn bak eena ih famili. (Jood 6) Deemonz kyaahn chaynj intu hyoomanz agen, bot dehn stil di ‘fool op peepl.ʼ (Revilayshan 12:9; 1 Jan 5:19) Mek wi si how dehn chrik, er fool op, lata peepl.​—Reed 2 Korintyanz 2:11.

10. How di deemon dehn chrik peepl?

¹⁰ Di deemon dehn chrik peepl eena lata wayz. Sohn peepl kantak di deemon dehn bai dehnself, er  dehn geh sombadi els fi du it fi dehn. Dehn wuda yooz wahn oabya-man er oabya-uman. Eni kantak wid di deemon dehn da spiritizm. Bot di Baibl tel wi fi stay weh fahn eniting weh ga fi du wid di deemon dehn. (Galayshanz 5:19-21) Wai wi fi stay weh fahn dehn? Bikaaz dehn wahn chrai chrik wi soh dat dehn ku chrap ahn kanchroal wi, di saym way how wahn honta yooz wahn chrap fi kech animal.​—Pleez goh da Noat 26 da di en a dis buk.

11. Wai ih rang fi pridik di fyoocha?

¹¹ Wahn neks chrik weh dehn yooz da fi gi sombadi di powa fi pridik di fyoocha. Di persn mait yooz horoskoap, luk fi sainz, reed kyaad, yooz wahn kristal baal, er reed sombadi paam. Lata peepl tink dat dehn kyaahn geh hert fahn dehnya tingz, bot dehn veri daynjaros. Eena di Baibl, wi ku reed wahn egzampl weh shoa how di deemon dehn ahn peepl weh pridik di fyoocha werk tugeda. Aks 16:16-18 taak bowt wahn lee gyal weh mi ga “wahn eevl spirit eena ahn weh mek ih kuda mi tel di fyoocha.” Afta di apasl Paal tek owt di deemon fahn di lee gyal, shee kudn pridik di fyoocha nohmoh.

12. (a) Wai ih daynjaros fi chrai kantak di ded? (b) Wai Gaad servant dehn noh tek paat eena sohn kostom weh ga fi du wid di ded?

¹² Di deemon dehn yooz wahn nada chrik fi chrap peepl. Dehn chrai mek wi bileev dat wi ku taak tu sombadi weh ded ahn dat da persn liv sohnweh els. Dehn waahn wi bileev dat dehn wan weh ded ku kantak wi er hert wi. Fi egzampl, seh wahn persn fren er famili memba ded, da persn mait goh tu wahn oabya-man er oabya-uman fi taak tu di ded persn.  Di oabya-man er oabya-uman mait seh sohnting inchrestin bowt di fren er famili memba weh ded ahn dehn mait eevn taak laik di ded persn. (1 Samuel 28:3-19) Wahn lata finaral kostom bays pahn di bileef dat ded peepl liv sohnweh els. Dehn mait du sertn tingz da wahn wayk weh rang, hoal wahn servis evri yaa pahn di day da persn mi ded, er lef food da di bering grong. Wen Kristyanz noh tek paat eena dehnya kostom, dehn famili er di peepl eena di ayrya weh dehn liv mait kritisaiz dehn, insolt dehn, er mait shon dehn. Bot Kristyanz noa dat dehn wan weh ded noh liv sohnweh els. Wi kyaahn taak wid dehn, ahn dehn kyaahn hert wi. (Psalm 115:17) Soh bee kyaaful. Neva chrai kantak di ded er di deemon dehn, ahn neva tek paat eena dehndeh kostom.​—Reed Deuteronomy 18:10, 11; Isaiah 8:19.

13. How ih benifit peepl fi noa di chroot bowt di deemon dehn?

¹³ Di deemon dehn noh onli chrik peepl bot dehn fraitn dehn tu. Saytan an ih deemon dehn noa dat dehn ga wahn “lee bit a taim lef” bifoa Gaad geh rid a dehn, soh dehn geh moa vailent. (Revilayshan 12:12, 17) Bot, towznz a peepl weh yoostu frayd fi dehn noh frayd nohmoh. Weh mi help dehn?

14. Laik di Kristyanz eena di dayz a di apasl dehn, how wi ku free wiself fahn di deemonz?

¹⁴ Di Baibl tel wi how fi fait di deemon dehn ahn how fi kip free fahn dehn. Fi egzampl, sohn peepl eena di siti a Efisos mi ga kantak wid di deemonz  bifoa dehn mi laan di chroot. How dehn mi stap dis praktis? Di Baibl seh: “Som a dehn wan weh mi-di du oabya er blak majik bring dehn blak majik buk dehn ahn bon dehn op eena poblik.” (Aks 19:19) Bikaaz dehn mi waahn bee Kristyanz, dehn bon op aala dehn buk bowt majik. Enibadi weh waahn serv Jehoava tudeh need fi du di saym ting ahn geh rid a eniting weh ga fi du wid spiritizm—tingz laik majik buk, horoskoap, moovi, myoozik, gaym, goas stoari, er eniting weh mek di deemonz er majik luk laik fon. Ih ku eevn bee tingz weh peepl put eena dehn hows fi protek dehn fahn eevl. Er, ih ku bee di bileef dat if wahn blak kyat waak kraas di road sohnting bad wahn hapm, er if yu tai wahn red schring pahn wahn baybi han ih wahn protek ahn.​—1 Korintyanz 10:21.

15. Wat els wi need fi du fi protek wiself fahn Saytan an ih deemon dehn?

¹⁵ Yaaz afta di Kristyan dehn da Efisos mi bon op dehn majik buk, di apasl Paal seh dat dehn mi stil ‘di fait gens di eevl spirit dehn.ʼ (Ifeezhanz 6:12) Soh eevn doa dehn mi don bon op dehn buk, di deemon dehn stil mi-di chrai hert dehn. Wat els dehn mi need fi du? Di apasl Paal tel dehn: “Mek unu fayt eena Jeezas Krais bee laik wahn sheel.” (Ifeezhanz 6:16) Jos laik how wahn sheel protek wahn soalja eena waar, wi fayt ku protek wi. If wi chros dat Jehoava ku protek wi, wi wahn ku fait gens Saytan an ih deemon dehn.​—Machyu 17:20.

16. How wi ku mek wi fayt eena Jehoava schranga?

¹⁶ How wi ku mek wi fayt eena Jehoava schranga? Wi need fi reed di Baibl evri day ahn laan fi pen pahn  hihn fi protekshan. If wi ga schrang fayt eena Jehoava, Saytan an ih deemon dehn wahn kyaahn hert wi.​—1 Jan 5:5.

17. Wat da wahn neks ting weh wahn protek wi fahn di deemon dehn?

¹⁷ Di Kristyanz da Efisos mi liv eena wahn siti weh mi ful op a spiritizm. Soh wat els dehn mi need fi du? Di apasl Paal mi tel dehn: “Neva stap pray.” (Ifeezhanz 6:18) Dehn mi need fi aks Jehoava fi protek dehn aal di taim. How bowt wee? Wel, wi liv eena wahn werl weh ful op a spiritizm tu. Soh wi need fi aks Jehoava fi protek wi, ahn wi need fi yooz fi hihn naym wen wi pray. (Reed Proverbs 18:10.) If wi kip aan di aks Jehoava fi protek wi fahn Saytan, Jehoava wahn ansa wi pryaaz.​—Psalm 145:19; Machyu 6:13.

18, 19. (a) How wi ku win di fait gens Saytan an ih deemon dehn? (b) Weh kweschan wi wahn ansa eena di neks chapta?

¹⁸ If wi geh rid a evriting eena wi laif weh ga fi du wid spiritizm ahn pen pahn Jehoava fi protek wi, wi ku fait Saytan an ih deemon dehn. Wi noh need fi frayd fi dehn. (Reed Jaymz 4:7, 8.) Jehoava way moa powaful dan di deemon dehn. Ih mi ponish dehn eena Noawa day, an eena di fyoocha ih wahn dischrai dehn. (Jood 6) Memba, wi noh di fait Saytan an ih deemon dehn bai wiself. Jehoava di yooz fi hihn aynjel dehn fi protek wi. (2 Kings 6:15-17) Wid Jehoava help, wi noa wi ku win dis fait.​—1 Peeta 5:6, 7; 2 Peeta 2:9.

¹⁹ Bot wai Gaad noh dischrai Saytan an ih deemon dehn yet if dehn di kaaz soh moch sofarin? Wi wahn fain owt eena di neks chapta.