1, 2. Weh eech wan a wi haftu disaid, ahn wai?

FAHN yu stodi a di Baibl yu laan dat wahn lata peepl seh dehn di wership Gaad, bot akchwali dehn di teech ahn du tingz weh Gaad hayt. (2 Korintyanz 6:17) Dat da wai Jehoava seh dat wi haftu get owta faals rilijan, er ‘Babilan di Grayt.’ (Revilayshan 18:2, 4) Soh eech wan a wi haftu disaid if wi wahn serv Gaad how hihn seh, er if wi wahn serv ahn fi wee oan way.

² If yu don kom owta faals rilijan, dat gud. Bot maybi deep eensaid yu mait stil waahn injai sohn selibrayshan ahn kostom fahn faals rilijan. Mek wi taak bowt som a dehnya tingz ahn si wai ih impoatant dat wi ga Jehoava tinkin pahn dehn.

3. (a) Wai sohn peepl fain it soh haad fi stap yooz aidol fi wership Gaad? (b) Weh di Baibl seh bowt aidol?

³ Fi yaaz sohn peepl yooz aidol fi wership Gaad. If yoo da-mi laik dat, yu mait tink ih rang fi wership Gaad widowt dehn. Bot memba, Jehoava teech wi how fi wership hihn. Ahn di Baibl seh dat Jehoava noh waahn wi yooz aidol fi wership ahn.​—Reed Aks 17:29, 30; Psalm 115:4-8; Isaiah 42:8; 1 Jan 5:21.

4. (a) Wai wi noh fi chrai pleez wi ded relitiv dehn? (b) Wai Jehoava tel ih peepl noh fi chrai taak wid di ded?

⁴ Sohn peepl mait spen lata taim, enerji, ahn moni  di chrai pleez dehn ded relitiv dehn. Dehn mait eevn lef food fi dehn da di bering grong. Bot wi mi laan dat ded peepl kyaahn help wi er hert wi. Dehn noh di liv sohnweh els. Akchwali, ih daynjaros fi chrai kantak dehn, bikaaz if wi geh wahn mesij wi mait tink da fahn di ded persn, bot reeli da fahn di deemon dehn. Dat da wai Jehoava mi tel di Izrelait dehn noh fi chrai taak wid di ded er ga eniting fi du wid ada kaina spiritizm.​—Deuteronomy 18:10-12; pleez goh da Noat 26 ahn 31 da di en a dis buk.

5. Weh ku help yu stap yooz aidol fi wership Gaad ahn fi stap chrai pleez yu ded relitiv dehn?

⁵ Weh ku help yu stap yooz aidol fi wership Gaad ahn fi stap chrai pleez yu ded relitiv dehn? Yu need fi reed di Baibl soh yu ku reeli andastan how Gaad feel bowt dehn tingz—dehn disgostin an ih hayt dehn. (Deuteronomy 27:15) Pray tu Jehoava evri day, aks ahn fi help yu ga fi hihn tinkin ahn fi wership hihn eena di rait way. (Isaiah 55:9) Fi shoar Jehoava wahn gi yu di schrent yu need fi geh rid a eniting eena yu laif weh ga fi du wid faals wership.

6. How Disemba 25 geh fi bee di day weh moas peepl selibrayt az Jeezas bertday?

⁶ Krismos da wan a di bigis haliday dehn rong di werl. Moas peepl tink dat Jeezas mi baan pahn da day. Bot Krismos da paat a faals wership. Wahn encyclopedia eksplayn dat di paygan peepl dehn da Roam yoostu selibrayt di bertday a di son [weh deh eena di skai] pahn Disemba 25. Di cherch leeda dehn mi waahn  moa paygan peepl bee Kristyanz, soh eevn doa Jeezas neva baan pahn Disemba 25, dehn disaid fi selibrayt it pahn da dayt. (Look 2:8-12) Jeezas disaipl dehn neva selibrayt Krismos. Di buk, Sacred Origins of Profound Things eksplayn dat 200 yaaz afta Jeezas mi baan, “nobadi mi noa, an onli lee bit a peepl mi eevn kay, bowt di egzak dayt wen ih mi baan.” Krismos selibrayshan mi staat bowt 300 yaaz afta Jeezas mi liv pahn di ert.

7. Wai chroo Kristyanz noh selibrayt Krismos?

⁷ Wahn lata peepl noa dat Krismos da wahn paygan haliday, ahn dat eevn di chradishan dehn, laik di lata paati ahn di kostom fi gi wan anada gif, kohn fahn paygan wership. Fi egzampl, bowt 350 yaaz agoa da England ahn difrent paat a America, dehn neva yoostu alow peepl fi selibrayt Krismos bikaaz da wahn paygan haliday. Dehn mi yoostu ponish enibadi weh mi selibrayt it. Bot az taim gaan aan, peepl staat tu selibrayt Krismos agen. Wai chroo Kristyanz noh selibrayt Krismos? Bikaaz dehn waahn pleez Gaad eena evriting weh dehn du.

8, 9. Wai di erli Kristyan dehn neva selibrayt bertday?

⁸ Wahn nada selibrayshan fi wahn lata peepl da fi dehn oan bertday. Di Baibl onli taak bowt too bertday, ahn da neva peepl weh mi-di serv Jehoava. (Genesis 40:20; Maak 6:21) Di reezn wai peepl yoostu selibrayt dehn bertday da-mi fi aana dehn faals gaad. Dat da wai di erli Kristyan dehn mi bileev dat fi selibrayt enibadi bertday “da-mi wahn paygan kostom.”​—The World Book Encyclopedia.

 ⁹ Di Roaman ahn Greek peepl dehn mi bileev dat eech persn baan pahn di bertday a wahn sertn gaad. Dehn mi bileev dat fi mek sombadi geh protekshan fahn da gaad deh joorin ih laiftaim, dehn wuda haftu selibrayt dehn oan bertday.

10. Wai chroo Kristyanz noh selibrayt bertday?

¹⁰ Yoo tink dat Jehoava aksep eni selibrayshan weh kohn fahn faals rilijan? (Isaiah 65:11, 12; 1 Korintyanz 10:20) No, ih wuda neva du dat. Dat da wai wee noh selibrayt bertday er eni ada haliday weh kohn fahn faals rilijan.

11. Wai sohn peepl selibrayt di haliday dehn? Weh shuda bee di moas impoatant ting tu yoo?

¹¹ Sohn peepl noa dat Krismos ahn di ada haliday dehn kohn fahn faals rilijan, bot dehn noh kay, dehn stil selibrayt dehn. Dehn tink dat di haliday dehn da wahn gud taim fi get tugeda wid famili ahn frenz. Dat da how yoo feel? Ih noh rang fi waahn spen taim wid yu famili. Da Jehoava mi put di famili tugeda eena di fos plays, an ih waahn wi ga wahn gud rilayshanship wid dehn. (Ifeezhanz 3:14, 15) Bot, wee need fi foakos moa pahn pleez Jehoava dan fi chrai pleez wi famili ahn frenz ahn selibrayt di faals rilijos haliday dehn. Dats wai di apasl Paal seh: “Chrai fi fain owt weh pleez di Laad.”​—Ifeezhanz 5:10.

12. Weh kaina haliday Jehoava noh aksep?

¹² Wahn lata peepl feel dat ih noh mata weh wahn haliday kohn fram, bot Jehoava noh feel da way. Hihn noh aksep eni haliday weh kohn fahn faals rilijan er  weh prayz op wahn persn er konchri. Fi egzampl, di Eejipshan dehn mi ga lata selibrayshan fi dehn faals gaad. Afta di Izrelait dehn lef Eejip, dehn mi kapi wan a dehn paygan selibrayshan ahn seh da “wahn festival tu Jehoava.” Bot Jehoava mi ponish dehn fi du dat. (Exodus 32:2-10) Wi fi du weh di apasl Paal seh: ‘Noh ga notn fi du wid eniting weh doti.ʼ​—Reed 2 Korintyanz 6:17.

13. Wat da sohn kweschan yu mait ga wen yu mek op yu main fi stap selibrayt di haliday dehn?

¹³ Wen yu mek op yu main fi stap selibrayt di haliday dehn, yu mait ga lata kweschan, laik: Weh fi du if di peepl dehn weh Ah werk wid aks mi wai Ah noh selibrayt Krismos wid dehn? Weh fi du if sombadi gi mi wahn Krismos gif? Er wat if mi marij paadna waahn Ah selibrayt di haliday dehn wid ahn? How Ah ku help mi pikni dehn fi noh feel sad dat wi noh wahn selibrayt di haliday dehn er dehn bertday nohmoh?

14. Weh yu ku du if sombadi tel yu “Meri Krismos!” er “Hapi Nyoo Yaa!”?

¹⁴ Ih impoatant dat yu yooz kaman sens wen yu disaid weh fi seh ahn du eech taim. Fi egzampl, if peepl tel yu “Meri Krismos!” er “Hapi Nyoo Yaa!” yu noh need fi ignoar dehn. Jos seh, “Tank yu.” Bot sopoaz sombadi waahn noa moa? Yu ku eksplayn wai yu noh selibrayt wahn haliday. Memba fi bee kain ahn shoa rispek. Di Baibl seh: “Wen unu di taak wid dehn, taak tu dehn eena wahn nais ahn inchrestin way weh wahn mek dehn waahn yehr moa. Ahn yu wahn kohn fi noa  how fi gi di rait ansa tu evribadi.” (Koloashanz 4:6) Maybi yu ku eksplayn dat yu laik spen taim wid peepl ahn dat yu noh main fi gi wahn gif er aksep wan, bot dat yu chooz fi noh selibrayt di haliday dehn.

15. Weh yu ku du if sombadi gi yu wahn Krismos gif er wahn bertday gif?

¹⁵ Weh yu ku du if sombadi gi yu wahn Krismos gif er wahn bertday gif? Di Baibl noh ga wahn lis a roolz, bot ih seh fi du di rait ting ahn kip wahn gud kanshans. (1 Timoti 1:18, 19) Maybi di persn weh gi yu di gif noh noa dat yu noh selibrayt di haliday. Er ih mait seh, “Ah noa dat yu noh selibrayt di haliday, bot Ah stil waahn gi yu dis lee gif.” Eeda way, yu ku disaid if yu wahn tek di gif er nat. Bot wateva yu disaid, mek shoar yu kanshans klayr fronta Gaad. Wi noh waahn du eniting weh wuda hert wi frenship wid hihn.

16. Weh yu ku du if yu famili waahn selibrayt di haliday dehn?

¹⁶ Weh yu ku du if yu famili waahn selibrayt di haliday dehn? Yu noh haftu aagyu wid dehn. Memba dat dehn ga di rait fi disaid weh dehn waahn du. Soh bee kain ahn rispek dehn disizhan jos laik how yu waahn dehn rispek fi yoo wan. (Reed Machyu 7:12.) Bot sopoaz yu famili waahn yu spen taim wid dehn joorin di haliday, weh yu ku du? Wel, bifoa yu disaid weh yu wahn du, pray tu Jehoava fi help yu mek di rait disizhan. Tink bowt it ahn du sohn risaach. Memba, yu aalwayz waahn pleez Jehoava.

17. Weh yu ku du soh dat yu pikni dehn noh feel lef owt wen dehn si ada peepl di ga fon joorin di haliday dehn?

¹⁷ Weh yu ku du soh dat yu pikni dehn noh feel lef  owt wen dehn si ada peepl di ga fon joorin di haliday dehn? Wel, evri now ahn den, plan sohnting speshal fi dehn. Yu kud eevn sopraiz dehn wid sohn gif. Ahn wan a di bes gif yu kuda eva gi yu pikni dehn da yu taim ahn lov.

18. Wai wi fi goh da di meetin dehn weh Jehoava Witnisiz gat?

¹⁸ If wi waahn pleez Jehoava, wi haftu lef faals rilijan ahn di kostom ahn haliday dehn weh kohn fan it. Bot wi need fi wership Gaad eena di way weh hihn waahn tu. Wan way fi du dis da fi goh da di meetin dehn a Jehoava Witnisiz evri week. (Reed Heebrooz 10:24, 25.) Dehnya meetin da wahn impoatant paat a chroo wership. (Psalm 22:22; 122:1) Wi kud inkorij wan anada wen wi meet tugeda.​—Roamanz 1:12.

19. Wai ih impoatant fi tel ada peepl bowt weh yu di laan fahn di Baibl?

¹⁹ Wahn nada way fi shoa dat wi waahn wership Gaad di rait way da fi tel ada peepl weh wi di laan fahn di Baibl. Wahn lata peepl feel schres owt bowt di wikidnis rong dehn. Maybi yu noa sombadi weh feel da way. Tel dehn bowt di wandaful hoap fi di fyoocha. Di moa yu kohn da di meetin dehn a Jehoava Witnisiz ahn tel ada peepl bowt weh yu di laan fahn di Baibl, yu wahn fain owt dat yu noh mis eni paat a faals rilijan ahn di kostom dehn weh kohn fan it. Jehoava wahn bles yu haad werk fi chrai wership hihn eena di rait way. Ahn dis wahn mek yu feel reeli hapi.​—Malachi 3:10.