1. How wi ku laan bowt di fyoocha?

YU EVA wach di nyooz pahn TV er lisn tu it pahn di rayjo ahn wanda if tingz wahn geh wos dan how ih stan now? Wi si soh moch wikidnis tudeh dat sohn peepl bileev di werl wahn soon en. Yu tink dat da chroo? Yu tink wi ku fain owt weh wahn hapm eena di fyoocha? Yes, kaaz Jehoava ku pridik di fyoocha. Wee kyaahn du dat. Gaad tel wi eena di Baibl weh wahn hapm tu wi ahn di ert.​—Isaiah 46:10; Jaymz 4:14.

2, 3. Weh Jeezas disaipl dehn mi waahn noa, ahn how Jeezas ansa dehn?

² Wen di Baibl taak bowt di en a di werl, ih noh meen dat di Ert wahn geh dischrai. Ih meen di en a wikidnis. Jeezas mi teech peepl dat di Kingdom a Gaad wahn rool oava di ert. (Look 4:43) Ih disaipl dehn mi waahn noa wen Gaad Kingdom mi wahn staat rool, soh dehn aks ahn: ‘Tel wi, da wen aala dehnya ting wahn hapm? Ahn weh wahn hapm fi mek wi noa dat da taim fi yu kohn bak, ahn fi di werl kohn tu wahn en?ʼ (Machyu 24:3) Jeezas neva noa di egzak dayt, bot ih tel dehn weh mi wahn hapm jos bifoa di en a di werl. Weh Jeezas mi seh wahn hapm, di hapm rait now!

³ Eena dis chapta wi wahn si proof dat wi di liv eena di laas dayz a dis werl. Fos, wi need fi laan bowt  wahn waar weh mi hapm da hevn soh dat wi ku andastan wai tingz di geh soh bad dong ya pahn di ert.

4, 5. (a) Weh mi hapm da hevn rait afta Jeezas staat rool az king? (b) Weh Revilayshan 12:12 seh mi wahn hapm pahn ert afta Jeezas kik owt Saytan fahn hevn?

⁴ Eena Chapta 8 wi mi laan dat Jeezas staat rool az king da hevn eena 1914. (Daniel 7:13, 14) Di buk a Revilayshan tel wi weh hapm: ‘Den wahn waar brok owt eena hevn. Maikl [er, Jeezas] an ih aynjel dehn mi-di fait di jragan [er, Saytan], ahn di jragan mi-di fait bak wid ih oan aynjel dehn.ʼ * Saytan an ih deemon dehn mi looz di waar, ahn Jeezas chroa dehn dong pahn di ert. Imajin how hapi di aynjel dehn da hevn mosi mi feel! Bot how bowt di peepl dong ya pahn di ert? Di Baibl seh dat ih wahn bee wahn taim a chrobl fi aala wi dong ya. Wai? Bikaaz di Devl beks, “ih noa seh dat ih ga jos lee bit a taim lef.”​—Revilayshan 12:7, 9, 12.

⁵ Di Devl di kaaz wahn lata chrobl pahn di ert. Ih beks bad bikaaz Gaad wahn soon geh rid a hihn. Mek wi si weh Jeezas seh mi wahn hapm eena di laas dayz.​—Pleez goh da Noat 24 da di en a dis buk.

6, 7. How Jeezas prafesi bowt waar ahn staavayshan di kohn chroo?

⁶ Waar. Jeezas mi seh: “Lata difrent nayshan ahn kingdom wahn waar gens wan anada.” (Machyu 24:7) Eena fi wee taim, moa peepl ded joorin waar  dan eni ada taim eena hischri. Wahn ripoat fahn di Worldwatch Institute shoa wi dat sins 1914, moa dan 100 milyan peepl ded eena waar. Dis da chree taimz moa peepl dan weh mi ded joorin aala di waar dehn weh mi hapm bifoa di yaa 1914. Jos tink bowt aal weh peepl mi gaan chroo bikaaz a waar!

⁷ Staavayshan. Jeezas mi seh: “Peepl wahn di staav aal oava.” (Machyu 24:7) Eevn doa moa food deh nowadayz, lata peepl stil noh ga inof fi eet. Wai? Bikaaz dehn noh ga moni fi bai food er dehn noh ga pees a lan fi du wahn lee plantayshan. Oava wan bilyan peepl liv pahn les dan wan dala U.S. fi di day. Di World Health Organization seh dat wan a di reezn wai milyanz a pikni ded evri yaa da bikaaz dehn noh ga inof food fi kip dehn helti.

8, 9. How Jeezas prafesi bowt ertkwayk ahn dizeez di kohn chroo?

⁸ Ertkwayk. Jeezas mi prafesai:  ‘Lata big ertkwayk wahn deh.ʼ (Look 21:11) Wi ku ekspek fi hyaa bowt lata ertkwayk evri yaa. Sins di yaa 1900, moa dan too milyan peepl ded bikaaz a ertkwayk. An eevn doa teknalaji ku help pridik wahn ertkwayk bifoa ih hapm, lata peepl stil ded.

⁹ Dizeez. Jeezas mi prafesai dat “lata dizeez” wahn deh. Terabl dizeez wahn spred faas ahn kil lata peepl. (Look 21:11) Eevn doa dakta laan how fi chreet lata siknis, dehn stil kyaahn kyoar som a dehn. Wan ripoat seh dat milyanz a peepl ded fahn dizeez laik TB, malayrya, kyansa, ahn kolera evri yaa. An eena di laas 40 yaaz dehn fain moa dan 30 nyoo dizeez, ahn som a dehn dizeez noh ga no kyoar.

10. How 2 Timoti 3:1-5 di kohn chroo tudeh?

¹⁰ Eena 2 Timoti 3:1-5, di Baibl seh: “Joorin di laas dayz, wi wahn ga sohn terabl taimz.”  Di apasl Paal mi seh how peepl wahn bihayv eena di laas dayz. Ih mi seh dat peepl

• wahn lov dehnself [er, selfish]

• wahn lov moni

• noh wahn pay main tu dehn payrents

• wahn prowd

• noh wahn kay bowt nobadi

• wahn kyaahn kanchroal dehnself

• wahn goh wail if ada peepl get eena dehn way

• wahn lov plezha moa dan lov Gaad

• wahn play laik dehn di fala Gaad, bot dehn noh waahn Gaad ga no powa eena dehn laif

11. Weh Psalm 92:7 seh wahn hapm tu bad peepl?

¹¹ Yu tink wahn lata peepl ak laik dis wehpaat yoo liv? Aal oava di werl, lata peepl goh aan laik dat. Bot Gaad wahn soon du sohnting bowt it. Ih pramis wi: “Wen di wikid sprowt laik graas an aala  dehn wan weh du rang praspa, da den dehn wahn geh dischrai fareva.”​—Psalm 92:7.

12, 13. Weh Jehoava teech wi joorin di laas dayz?

¹² Di Baibl seh dat eena di laas dayz, di werl wahn ful op a payn ahn sofarin. Bot ih seh dat gud tingz wahn hapm tu.

¹³ Gaad help wi fi andastan di Baibl. Di prafit Danyel mi rait bowt di laas dayz. Ih mi seh: ‘Eena di taim a di en, wi wahn ga lata chroo nalij.ʼ (Daniel 12:4) Dis meen dat joorin di laas dayz Gaad wahn help ih peepl andastan di Baibl beta. Hihn di du dis sins 1914. Fi egzampl, ih teech wi di meenin a ih naym, di reezn wai ih mek di ert, di chroot bowt di ransom, weh hapm tu wi wen wi ded, ahn di hoap a di rezorekshan. Wi laan dat onli Gaad Kingdom ku fiks aala fi wee prablem dehn. Wi eevn laan how wi ku bee hapi ahn how wi ku liv eena wahn way weh mek Gaad hapi. Weh Gaad servant dehn di du wid weh dehn laan? Wahn nada prafesi gi wi di ansa.​—Pleez goh da Noat 21 ahn 25 da di en a dis buk.

14. Wehpaat di gud nyooz a di Kingdom di geh preech, ahn da hoo di du it?

¹⁴ Di preechin werk. Jeezas mi seh dat eena di laas dayz “di Gud Nyooz bowt di kingdom a hevn wahn geh preech oava di hoal werl.” (Machyu 24:3, 14) Jehoava Witnisiz di preech di gud nyooz bowt di Kingdom eena moa dan 230 difrent plays, an eena moa dan 700 langwij. Wi di help peepl fahn evri ‘nayshan ahn chraibʼ fi andastan wat da di Kingdom ahn weh  ih wahn du fi evribadi. (Revilayshan 7:9) Wi du dis fi free. Eevn doa lata peepl hayt wi ahn persikyoot wi, notn ku stap di preechin werk, jos laik weh Jeezas mi prafesai.​—Look 21:17.

15. (a) Yoo bileev dat wi di liv eena di laas dayz, ahn wai? (b) Weh wahn hapm tu dehn wan weh obay Jehoava ahn tu dehn wan weh disobay ahn?

¹⁵ Yoo bileev dat wi di liv eena di laas dayz? Wahn lata Baibl prafesi bowt di laas dayz di kohn chroo. Jehoava wahn soon stap di preechin a di gud nyooz, ahn den “di en” wahn kom. (Machyu 24:14) Wat da di en? Da wen Gaad wahn geh rid a wikidnis da Armagedon. Jehoava wahn yooz Jeezas an ih powaful aynjel dehn fi dischrai enibadi weh disobay Hihn an ih Son. (2 Tesaloanyanz 1:6-9) Afta dat, Saytan an ih deemon dehn noh wahn fool op peepl nohmoh. An evribadi weh waahn obay Gaad an aksep ih Kingdom wahn si aala Gaad pramis dehn kohn chroo.​—Revilayshan 20:1-3; 21:3-5.

16. Weh yoo need fi du sins di en deh soh kloas?

¹⁶ Saytan wikid werl wahn soon geh dischrai. Soh ih veri impoatant dat wi aks wiself, ‘Weh Ai need fi du?ʼ Jehoava waahn yu laan az moch az yu kud fahn di Baibl. Soh yu need fi bee seeryos bowt yu stodi a di Baibl. (Jan 17:3) Jehoava Witnisiz ga meetin evri week fi help peepl andastan di Baibl. Chrai kohn da di meetin dehn evri week. (Reed Heebrooz 10:24, 25.) If yu laan dat yu need fi mek sohn chaynj, noh frayd fi mek dehn. Wen yu du dat, yu rilayshanship  wid Jehoava wahn geh schranga ahn yu wahn geh kloasa tu hihn.​—Jaymz 4:8.

17. Wai moas peepl wahn bee sopraiz wen di en kom?

¹⁷ Di apasl Paal mi seh dat wen di wikid wan dehn geh dischrai, moas peepl noh wahn di ekspek it. Ih seh da day “wahn kohn jos laik wahn teef.” (1 Tesaloanyanz 5:2) Jeezas mi prafesai dat wahn lata peepl wahn chooz fi ignoar di sain a di laas dayz. Ih seh: ‘Sayhn laik how tingz mi stan eena Noawa dayz, da rait soh ih wahn bee wen di Son a Man kohn bak [er, di laas dayz]. Eena dehn dayz bifoa di flod, peepl mi-di eet op ahn jrink op laik notn, ahn dehn mi-di geh marid ahn soh, rait op tu di veri day wen Noawa gaan eena di aak. Dehn neva noa weh kech dehn til wen di flod kohn ahn wash aala dehn weh. Da rait soh ih wahn bee wen di Son a Man kohn bak.ʼ​—Machyu 24:37-39.

18. Weh Jeezas mi waan wi bowt?

¹⁸ Jeezas mi waan dat wi noh fi mek tingz laik ‘jronkinis ahn di woriz a dis laifʼ dischrak wi. Bikaaz di en wahn kohn sodn-wan, “laik wahn chrap.” Ih seh: ‘Da Day wahn kohn pahn evribadi weh liv pahn di hoal ert. Soh, deh pahn unu gyaad aal di taim. Pray dat unu wahn ga di schrent fi goh chroo aala dehn ting weh wahn hapm, ahn dat unu noh wahn frayd fi stan op fronta di Son a Man.ʼ (Look 21:34-36) Wai ih soh impoatant fi mek wi lisn tu Jeezas waanin? Bikaaz Saytan wikid werl wahn soon geh dischrai. Onli peepl hoo du weh Jehoava ahn Jeezas waahn dehn du, wahn servaiv di en ahn liv fareva eena di nyoo werl.​—Jan 3:16; 2 Peeta 3:13.