1, 2. Wehpaat wi ku fain protekshan tudeh?

IMAJIN dat wahn day yu di waak goh hoam ahn di skai staat tu blak op, tonda staat tu klap, ahn laitnin di flash aal bowt. Den, wahn hevi rayn kohn dong. Soh yu staat tu luk fi shelta. Fi shoar yu wahn feel gud wen yu fain sohnweh weh sayf ahn jrai!

² Wi di fays sohnting nayli laik dat tudeh. Di kandishanz rong wi di geh wos. Yu mait aks yuself doh, ‘Wehpaat Ah ku fain protekshan?ʼ Di Baibl seh dat wi ku chros Jehoava, bikaaz hihn da wi shelta ahn protekshan. (Psalm 91:2) Soh, Jehoava ku gi wi protekshan eena dis werl weh ful op a prablemz, an ih gi wi wahn wandaful hoap fi di fyoocha.

3. How Jehoava ku protek wi?

³ How Jehoava ku protek wi? Ih ku help wi deel wid eni prablem weh wi ga, ahn hihn way moa powaful dan enibadi weh mait chrai hert wi. Eevn if sohnting bad hapm tu wi, Jehoava wahn geh rid a da prablem eena di fyoocha. Di Baibl seh: “Kip unuself eena di lov a Gaad.” (Jood 21) Wi need fi stay kloas tu Jehoava if wi waahn ih help wi eena dehnya haad taimz. Bot how wi ku du dat?

4, 5. How Jehoava shoa dat ih lov wi?

⁴ If wi waahn stay kloas tu Jehoava, wi haftu stap  ahn tink bowt humoch ih lov wi. Tink bowt aal weh ih du fi wi aredi. Ih gi wi wahn byootiful ert ahn put aal kaina difrent plaant an animal een deh. Ih gi wi food ahn waata fi liv. Eena di Baibl, Gaad teech wi ih naym ahn weh kaina persn hihn. Bot di graytis way ih shoa ih lov fi wi da wen ih sen ih Son, Jeezas, fi ded fi wi. (Jan 3:16) Ahn bikaaz a weh Jeezas du, wi ga wahn wandaful hoap fi di fyoocha.

⁵ Jehoava don set op ih Kingdom, er govament, weh wahn soon geh rid a aala wi sofarin. Dis Kingdom wahn mek di ert wahn paradais. Evribadi wahn liv eena pees ahn hapinis fareva. (Psalm 37:29) Wat da wahn nada way how Jehoava shoa ih lov fi wi? Ih teech wi di bes way fi liv rait now. Ih eevn tel wi fi pray tu ahn, an ih aalwayz redi fi lisn tu wi. Soh, Jehoava shoa humoch ih lov wi fi chroo!

6. How yoo ku shoa Jehoava dat yu apreeshiayt ih lov?

⁶ How yu ku shoa Jehoava dat yu apreeshiayt ih lov? Tel ahn tanks fi evriting weh ih du fi yu. Ih reeli sad tudeh fi si humoch peepl noh ga no apreeshiayshan. Da mi di saym ting wen Jeezas mi deh pahn di ert. Wahn taim wen ih mi heel ten man weh mi ga leprosi, onli wan a dehn ton rong ahn tank ahn. (Look 17:12-17) Wi fi chrai bee laik di wan man weh tank Jeezas. Wi mos aalwayz tel Jehoava tanks.

7. Humoch wi shuda lov Jehoava?

⁷ Wi need fi shoa Jehoava humoch wi lov ahn. Jeezas mi tel ih disaipl dehn fi lov Jehoava wid dehn hoal haat, hoal soal, ahn hoal main. (Reed Machyu 22:37.) Weh dis meen?

8, 9. How wi ku shoa Jehoava dat wi lov ahn?

 ⁸ Enibadi ku seh dehn lov Jehoava. Bot if wee lov hihn wid wi hoal haat, soal, ahn main, wi wahn reeli shoa it. (Machyu 7:16-20) Di Baibl tel wi dat if wi lov Gaad, wi wahn obay ih komanment dehn. Yu tink dat haad fi du? No, kaaz “weh hihn koman wi fi du noh haad.”​—Reed 1 Jan 5:3.

⁹ Wen wi obay Jehoava, wi feel hapi ahn satisfai. (Isaiah 48:17, 18) Bot weh wahn help wi fi stay kloas tu Jehoava? Mek wi si.

10. Wai yu fi kantinyu laan bowt Jehoava?

¹⁰ How yu mi geh fi bee Jehoava fren? Yu stodi a di Baibl help yu fi geh fi noa Jehoava beta ahn fi bee frenz wid hihn. Dis frenship da laik wahn faiya weh yu waahn kip di bon. Jos laik how faiya need wud fi bon, yu need fi kantinyu laan bowt Jehoava fi kip yu frenship wid hihn schrang.​—Proverbs 2:1-5.

11. How di teechinz fahn di Baibl wahn mek yu feel?

¹¹ Kantinyu fi stodi di Baibl ahn yu wahn laan tingz weh reeli toch yu haat. Noatis how too a Jeezas disaipl mi feel wen Jeezas mi-di eksplayn sohn prafesi fahn di Baibl tu dehn. Dehn seh: “Bwai, yoo neva feel wahn waam feelin eena yu haat wen ih mi-di taak tu wi pahn di road, wen ih mi-di eksplayn di Skripcha tu wi?”​—Look 24:32.

12. Weh ku hapm tu wi lov fi Gaad?

¹² Wen yu mi fos geh fi andastan di Baibl, yu mosi  mi feel di saym way laik di disaipl dehn. Yu stodi a di Baibl mi help yu fi geh fi noa Jehoava ahn fi lov ahn. Bot, dis lov ku geh koal.​—Machyu 24:12.

13. How wi ku kip wi lov fi Jehoava schrang?

¹³ Wans yu da fren wid Gaad, yu need fi werk haad fi kip da frenship schrang soh ih noh geh koal. Yu haftu kantinyu laan bowt hihn ahn Jeezas. Tink bowt weh yu di laan ahn how yu ku yooz it eena yu laif. (Jan 17:3) Wen yu reed er stodi di Baibl, aks yuself: ‘Weh dis teech mi bowt Jehoava? Wai Ai fi lov hihn wid aala mi haat ahn soal?ʼ​—1 Timoti 4:15.

14. How pryaa ku help wi fi kip wi lov fi Jehoava schrang?

¹⁴ Wen yu ga wahn gud fren, yu taak tu ahn aal di taim, ahn dis kip unu frenship schrang. Jos laik dat, wen wi aalwayz taak tu Jehoava eena pryaa, wi kip  wi lov fi hihn schrang. (Reed 1 Tesaloanyanz 5:17.) Da wahn privilij fi taak tu Jehoava chroo pryaa. Soh wi mos aalwayz taak tu hihn fahn wi haat. (Psalm 62:8) Wi noh fi seh wi pryaaz fahn memri, bot tink bowt weh wi di seh ahn meen it. Soh, if wi kantinyu stodi di Baibl ahn pray fahn wi haat, wi wahn kip wi lov fi Jehoava schrang.

15, 16. How yoo feel bowt di preechin werk?

¹⁵ If wi waahn stay kloas tu Jehoava wi need fi taak tu ada peepl bowt weh wi di laan. Da wahn wandaful privilij fi taak tu ada peepl bowt Jehoava. (Look 1:74, 75) Ahn da wahn rispansabiliti weh Jeezas mi gi aal chroo Kristyanz. Aala wi haftu preech di gud nyooz bowt Gaad Kingdom. Yoo staat aredi?​—Machyu 24:14; 28:19, 20.

¹⁶ Di apasl Paal mi feel dat di preechin werk mi preshos; hihn mi kaal it wahn ‘chrezha.ʼ (2 Korintyanz 4:7) Di moas impoatant werk yu ku du da fi taak tu peepl bowt Jehoava ahn weh hihn waahn fi wee ahn fi di ert. Dis da wan way how yu serv Jehoava, ahn hihn apreeshiayt weh yu du far ahn. (Heebrooz 6:10) Di preechin werk ku help yoo ahn di wan dehn weh lisn tu yu fi ga wahn kloas frenship wid Jehoava ahn fi geh evalastin laif. (Reed 1 Korintyanz 15:58.) Yu tink eni ada werk deh weh wahn mek yu feel soh hapi?

17. Wai di preechin werk soh impoatant rait now?

¹⁷ Di preechin werk reeli impoatant rait now. Wi  need fi “preech di Werd” ahn “noh let op ataal.” (2 Timoti 4:1, 2) Peepl need fi hyaa bowt Gaad Kingdom. Di Baibl seh: “Di day a Jehoava di kohn! Ih deh kloas an ih di kohn faas-wan!” Ih wahn soon deh ya! (Zephaniah 1:14; Habakkuk 2:3) Jehoava wahn soon dischrai Saytan ahn dis wikid werl. Bot bifoa dat hapm, peepl need fi noa bowt it soh dat dehn ku chooz fi serv Jehoava.

18. Wai wi shuda wership Jehoava lang wid wi bradaz ahn sistaz?

¹⁸ Jehoava waahn wi wership hihn lang wid wi bradaz ahn sistaz. Di Baibl seh: “Ahn mek wi inkorij wan anada fi shoa lov ahn du gud. Ahn noh mek wi mek it wahn habit fi noh meet tugeda laik weh som a dehn du. Insteda dat, wi shuda inkorij wan anada moa, now dat wi si dat di Day wen di Laad fi kohn bak di kohn kloasa ahn kloasa.” (Heebrooz 10:24, 25) Wi need fi du wi bes fi goh da di meetin dehn. Wen wi dehdeh, ih gi wi wahn apachooniti fi inkorij ahn schrentn wan anada.

19. Wat ku help wi fi lov wi Kristyan bradaz ahn sistaz?

¹⁹ Da di meetin dehn, yu ku fain lata gud frenz weh wahn help yu fi wership Jehoava. Yu wahn meet bradaz ahn sistaz fahn aal difrent kolcha hoo di du dehn bes fi wership Jehoava, jos laik yoo. Dehn noh perfek soh dehn wahn mek mistayk, bot wen dat hapm, fagiv dehn. (Reed Koloashanz 3:13.) Aalwayz luk fi di gud eena wi Kristyan bradaz ahn sistaz, bikaaz if yu du dat, ih wahn help yu fi lov dehn ahn fi geh kloasa tu Jehoava.

20, 21. Wat da di reel laif?

²⁰ Jehoava waahn aala fi hihn fren dehn ga di bes laif eva. Di Baibl teech wi dat wi laif eena di fyoocha noh wahn bee laik how ih deh tudeh.

²¹ Eena di fyoocha, wi wahn liv fareva, noh jos fi 70 er 80 yaaz. Wi wahn injai evalastin laif eena perfek helt, pees, ahn hapinis eena wahn byootiful paradais. Dat da weh di Baibl kaal ‘di chroo laif [er, di reel laif].ʼ Jehoava pramis dat ih wahn gi wi dis kaina laif, bot wi haftu du evriting wi kud fahn now fi “hoal aan” tu it.​—1 Timoti 6:12, 19.

22. (a) How wi ku “hoal aan” tu di reel laif? (b) Wai wi noh dizerv evalastin laif?

²² How wi ku “hoal aan” tu di reel laif? Wi need fi praktis weh wi laan fahn di Baibl ahn ‘du gud aal di taim.ʼ (1 Timoti 6:18) Wi noh dizerv evalastin laif; da wahn free gif fahn Jehoava. Pahn wi oan, wi kyaahn geh evalastin laif. Da wahn gif fahn Jehoava weh hihn gi tu aala ih faytful servant fi shoa ih lov tu wi. (Roamanz 5:15) Wi Faada da hevn reeli waahn wi geh dis gif.

23. Wai wi need fi mek di rait chois dehn now?

²³ Aks yuself, ‘Ai di wership Gaad eena di way how hihn waahn?ʼ If yu si dat yu need fi mek sohn chaynj, noh wayt, mek dehn rait away. Wen wi chros eena Jehoava ahn du evriting wi kud fi obay ahn, hihn wahn protek wi. Ih wahn kip aala ih faytful servant dehn sayf eena di laas dayz a Saytan wikid werl. Den Jehoava wahn mek shoar dat wi liv  eena Paradais fareva, jos laik how ih mi pramis. Soh, yoo ku ga di reel laif if yu mek di rait chois dehn now!