1, 2. Hoo da som a Jehoava fren?

HOO yoo wuda pik az yu fren? Sombadi yu laik. Sombadi yu get lang wid ahn weh get lang wid yoo. Sombadi weh kain ahn ga wayz weh yu laik.

² Jehoava Gaad mi pik sohn hyoomanz fi bee ih fren. Fi egzampl, Aybraham da-mi ih fren. (Isaiah 41:8; Jaymz 2:23) Jehoava mi laik Dayvid tu; ih seh dat Dayvid da-mi ‘wahn man weh kloas tu ih haat.ʼ (Aks 13:22) Ahn di prafit Danyel mi “veri preshos” tu Jehoava.​—Daniel 9:23.

3. Wai Jehoava kaal Aybraham, Dayvid, ahn Danyel fi hihn fren?

³ How Aybraham, Dayvid, ahn Danyel geh fi bee Jehoava fren? Jehoava mi tel Aybraham: “Yu lisn tu mi vais.” (Genesis 22:18) Jehoava da fren wid enibadi weh obay ahn. Hihn da-mi fren wid wahn hoal nayshan a peepl. Jehoava tel di nayshan a Izrel: “Obay mi vais, an Ah wahn bee unu Gaad, an unu wahn bee mi peepl.” (Jeremiah 7:23) Soh if yu reeli waahn bee Jehoava fren, yu need fi obay ahn.

4, 5. How Jehoava pramis fi protek ih fren dehn?

⁴ Di Baibl seh dat Jehoava di luk fi wayz “fi shoa ih schrent tuwaadz dehn wan weh di serv ahn wid  dehn hoal haat.” (2 Chronicles 16:9) Da Psalm 32:8, Jehoava pramis ih fren dehn: “Ai wahn gi yu andastandin ahn teech yu di way yu fi goh. An Ah wahn kip mi aiy pahn yu wen Ah di gi yu advais.”

⁵ Wahn powaful enimi waahn stap wi fahn bee Gaad fren. Bot Jehoava waahn protek wi. (Reed 1 Peeta 5:7.) Wi serv Jehoava wid aala wi haat bikaaz hihn da wi fren. Wi laayal tu ahn eevn wen wi di goh chroo haad taimz. Ahn wi feel jos laik how di apasl Paal mi feel bowt Jehoava. Hihn mi seh: “Di Laad da di Wan weh di help mi; Ai noh wahn frayd fi notn.” (Heebrooz 13:6) How Saytan chrai stap wi fahn bee Gaad fren?

6. Weh Saytan klaym bowt aal hyoomanz?

⁶ Eena Chapta 11 wi mi laan dat Saytan chalenj Jehoava. Ih klaym seh dat Gaad tel lai ahn dat ih neva waahn Adam ahn Eev disaid fi dehnself weh rait ahn weh rang. Di buk a Job seh dat Saytan akyooz aal hyoomanz hoo waahn bee Gaad fren. Saytan klaym dat wi di serv Gaad bikaaz a weh wi ku geh fan Ahn, noh bikaaz wi lov Ahn. Saytan eevn klaym dat ih ku mek enibadi ton gens Gaad. Mek wi si weh wi ku laan fahn Joab ahn how Jehoava mi protek ahn.

7, 8. (a) Hoo da Joab? (b) Weh Saytan mi seh bowt Joab?

⁷ Hoo da Joab? Hihn da-mi wahn gud man weh mi liv bowt 3,600 yaaz agoa. Jehoava mi seh dat joorin da taim, nobadi mi deh pahn di ert laik Joab.  Hihn mi ga lata rispek fi Gaad, an ih mi hayt weh bad. (Job 1:8) Joab da-mi Jehoava chroo fren.

⁸ Saytan klaym dat Joab mi-di serv Gaad bikaaz a weh ih geh fan Ahn. Saytan tel Jehoava: “Da neva yoo put wahn fens rong ahn, ih hows, an evriting weh ih gat? Yu don bles evriting weh ih du, an ih ga lata animal aal oava di lan. Bot, jos fi wahn chaynj, schrech owt yu han ahn schraik evriting weh ih gat, ahn yu wahn si how ih insolt yu ahn ton ih bak pahn yu.”​—Job 1:10, 11.

9. Weh Jehoava alow Saytan fi du?

⁹ Memba, Saytan akyooz Joab dat ih di serv Jehoava onli fi weh ih ku geh fan Ahn. Ih klaym seh dat ih ku geh Joab fi stap serv Jehoava. Bot Gaad neva agree wid Saytan, soh Ih alow ahn fi tes Joab. Dis mi wahn proov if Joab reeli lov Jehoava an if hihn da Gaad fren.

10. How Saytan mi atak Joab, ahn weh Joab du?

¹⁰ Saytan mi mek sohn bad peepl teef er kil aala Joab animal. Den ih kil moas a Joab servant dehn. Pahn di en, Saytan kil aala Joab ten pikni eena wahn staam. Joab laas evriting. Bot ih mi stay laayal tu Jehoava. “Chroo aala dis, Joab neva sin er akyooz Gaad a eniting rang.”​—Job 1:12-19, 22.

11. (a) Wat els Saytan mi du tu Joab? (b) Weh Joab du?

¹¹ Saytan neva stap deh. Ih chalenj Gaad ahn seh: “Schraik ih boan ahn flesh, ahn fi shoar ih wahn insolt yu ahn ton ih bak pahn yu.” Soh Saytan gaahn hed ahn mek Joab geh sik wid wahn  paynful dizeez. (Job 2:5, 7) An agen Joab stay laayal tu Jehoava. Ih mi seh: “Ah noh wahn giv op mi laayalti, eevn if Ah haftu ded!”​—Job 27:5.

12. How Joab mi proov dat Saytan laiyad?

¹² Joab neva noa weh Saytan mi tel Gaad da hevn, er wai ih mi-di sofa wahn lat. Ih mi eevn tink dat da Jehoava mi-di put ahn chroo aala dehn chraiyalz. (Job 6:4; 16:11-14) Bot eevn doa ih mi-di tink laik dat, Joab stay laayal tu Jehoava ahn proov dat Saytan laiyad. Joab mi chooz fi lov Gaad bikaaz hihn da-mi Gaad fren. Ih neva serv Gaad fi weh ih kuda mi geh fan ahn!

13. Weh mi hapm bikaaz Joab mi stay laayal?

¹³ Eevn doa Joab neva noa weh mi-di hapm da hevn, ih stay laayal tu Gaad ahn proov dat Saytan da wahn eevl persn. Jehoava mi bles Joab bikaaz hihn da-mi wahn laayal fren.​—Job 42:12-17.

14, 15. Weh Saytan seh bowt aal hyoomanz?

¹⁴ Saytan stil di akyooz aala Jehoava servant. Ih klaym seh dat wi di serv Gaad fi weh wi ku geh fan Ahn. Saytan seh: “Wahn man wahn giv op evriting weh ih gat fi sayv ih laif.” (Job 2:4) Soh Saytan mi-di akyooz evribadi, man ahn uman, dat dehn di serv Gaad fi weh dehn ku geh fan Ahn. Da noh onli Joab ih mi-di taak bowt. Honjridz a yaaz afta Joab mi ded, Saytan stil mi-di insolt Jehoava an akyooz ih servant dehn. Wi noa dis bikaaz Proverbs 27:11 seh: “Mi son, bee waiz, ahn mek Ah feel hapi eena mi haat, soh dat Ah ku ansa di wan weh di insolt mi.”

 ¹⁵ Yu ku proov dat Saytan laiyad if yu chooz fi obay Jehoava ahn bee Ih laayal fren. Eevn if yu need fi mek sohn big chaynj eena yu laif fi bee Gaad fren, ih wahn bee di bes disizhan yu eva mek! Dis da wahn seeryos disizhan. Saytan klaym dat yoo noh wahn bee laayal tu Gaad wen yu ga prablemz. Hihn noh waahn wi bee laayal tu Gaad, soh ih chrai chrik wi. How ih du dis?

16. (a) Wat da sohn wayz Saytan yooz fi chrai stap peepl fahn serv Jehoava? (b) How di Devl mait chrai stap yoo fahn serv Jehoava?

¹⁶ Saytan yooz aal kaina difrent wayz fi chrai stap wi fahn serv Jehoava. Hihn da “laik wahn laiyan weh di roar; ih di waak rong slai-wan di si hoo ih kud eet op.” (1 Peeta 5:8) Noh bee sopraiz wen yu fren dehn, famili, er adaz chrai stap yu fahn stodi di Baibl ahn fahn du weh rait. Yu mait feel laik sombadi di atak yu fi chroo. * (Jan 15:19, 20) Saytan mek fi hihnself luk “laik wahn aynjel a lait.” Soh ih mait chrai chrik wi fi disobay Jehoava. (2 Korintyanz 11:14) Wahn nada way Saytan chrai stap wi fahn serv Jehoava da fi mek wi tink wi noh gud inof fi serv Gaad.​—Proverbs 24:10.

17. Wai wi obay Jehoava?

¹⁷ Wen wi obay Jehoava, wi proov dat Saytan laiyad. Weh wahn help wi fi obay ahn? Di Baibl seh:  “Yu fi lov di Laad yu Gaad wid aala yu haat, ahn wid aala yu soal, ahn wid aala yu main, ahn wid aala yu schrent.” (Maak 12:30) Wi obay Jehoava bikaaz wi lov ahn. Wen wi lov fi Jehoava groa, wi wahn du eniting ih aks wi fi du. Di apasl Jan mi seh dat wen wi lov Gaad ‘wi wahn obay weh ih koman wi fi du; ahn weh ih koman wi fi du noh haad.ʼ​—1 Jan 5:3.

18, 19. (a) Wat da sohn tingz weh Jehoava tel wi noh fi du? (b) How wi noa Jehoava noh wahn aks wi fi du sohnting wi kyaahn du?

¹⁸ Bot wat da sohn tingz weh Jehoava tel wi noh fi du? Sohn egzampl deh eena di baks “ Hayt Weh Jehoava Hayt.” Fi di biginin, yu mait tink dat som a dehn tingz noh soh bad. Bot wen yu reed di skripcha dehn ahn tink bowt dehn, yu wahn andastan wai ih waiz fi obay Jehoava laa dehn. Yu mait eevn  feel dat yu need fi mek sohn chaynj eena yu laif. Eevn doa dis ku bee haad sohntaim, if yu mek dehn chaynj yu wahn injai di pees ahn hapinis weh kohn fahn Gaad. (Isaiah 48:17, 18) How wi noa ih pasabl fi mek dehn chaynj?

¹⁹ Jehoava neva aks wi fi du notn weh wi kyaahn du. (Deuteronomy 30:11-14) Az wahn reel fren, hihn noa wi beta dan wi noa wiself. Hihn noa wi schrent ahn wi weeknis dehn. (Psalm 103:14) Di apasl Paal inkorij wi wen ih seh: ‘Gaad faytful, ahn hihn noh wahn mek di taim a testin geh soh bad dat unu kyaahn bayr it. Bot wen di tes kohn, Gaad wahn gi unu di schrent fi stan it, an ih wahn shoa unu wahn way owta it.ʼ (1 Korintyanz 10:13) Wi noa fi shoar dat Jehoava wahn aalwayz gi wi di  schrent fi du weh rait. Hihn wahn gi yu di “powa” fi deel wid yu chraiyalz.​—2 Korintyanz 4:7.

20. Wat da som a Jehoava wayz yoo wuda waahn kapi, ahn wai?

²⁰ If wi waahn bee Jehoava fren, wi haftu stap du weh rang. (Roamanz 12:9) Bot wi need fi du moa, wi need fi lov weh Jehoava lov. Eena Psalm 15:1-5 (Reed) wi ku fain owt weh Gaad frenz wuda lov. Jehoava fren dehn kapi fi hihn wayz ahn ga fayt. Dehn shoa ‘lov, hapinis, pees, payshens, kainis, chreet peepl gud, ahn kanchroal dehnself.ʼ​—Galayshanz 5:22, 23.

21. How yu ku ga di kaina wayz weh Gaad lov?

²¹ How yu ku ga dehn kaina wayz? Yu need fi laan weh Jehoava lov. Yu ku du dis wen yu reed ahn stodi di Baibl. (Isaiah 30:20, 21) Di moa yu du dis, di moa yu wahn lov hihn. Ahn di moa yu lov fi hihn groa, yu wahn waahn obay ahn.

22. Weh wahn bee di rizolt if yu obay Jehoava?

²² Di chaynj dehn weh yu mek eena yu laif da laik wen yu tek aaf doti kloaz ahn put aan kleen kloaz. Di Baibl seh dat yu need fi ‘giv op da way a laif wid dehndeh bad habitʼ ahn put aan di “nyoo self.” (Koloashanz 3:9, 10) Ih noh mait bee eezi, bot wen wi mek dehn chaynj an obay Jehoava, ih pramis fi giv wi “wahn lata blesin.” (Psalm 19:11) Soh chooz fi obay Jehoava ahn proov dat Saytan laiyad. Ahn noh jos serv Jehoava bikaaz a weh ih pramis yu, bot bikaaz yu reeli lov ahn. Den yu wahn bee Jehoava fren!