1. Wai Gaad mi mek hyoomanz?

GAAD ga wahn speshal reezn wai ih mek wi. Hihn mi mek di fos man ahn uman, Adam ahn Eev, fi liv eena wahn byootiful gyaadn. Hihn mek dehn fi ga pikni, fi mek di hoal ert wahn paradais, ahn fi main di animal dehn.​—Genesis 1:28; 2:8, 9, 15; pleez goh da Noat 6 da di en a dis buk.

2. (a) How wi noa dat Gaad wahn mek aala fi hihn pramis dehn kohn chroo? (b) Weh kaina peepl wahn liv pahn di ert, ahn fi how lang?

² Yu tink wi wahn eva liv eena wahn paradais? Jehoava seh: “Da mee mi seh it, ahn da mee wahn du it.” (Isaiah 46:9-11; 55:11) Hihn wahn du weh ih mi seh ih wahn du, ahn notn wahn stap ahn. Jehoava seh dat ih mek di ert fi wahn reezn; ih “neva mek it fi notn.” (Isaiah 45:18) Hihn waahn peepl fi liv aal oava di ert. Weh kaina peepl Gaad waahn fi liv ya, ahn fi how lang? Di Baibl seh: “Di raichos [er, obeedyant] wan dehn wahn inherit di ert, ahn dehn wahn liv fareva pan it.”​—Psalm 37:29; Revilayshan 21:3, 4.

3. Bikaaz peepl geh sik ahn ded, weh yu mait aks yuself?

³ Bot tudeh peepl geh sik ahn ded. Eena wahn lata konchri, dehn fait ahn kil op wan anada. Fi shoar, dis da neva di reezn wai Gaad mi mek wi. Soh, weh mi hapm, ahn wai? Onli di Baibl ga di ansa.

4, 5. (a) Da hoo mi yooz wahn snayk fi taak tu Eev eena di gyaadn a Eedn? (b) How wahn aanis persn ku chaynj ahn bee wahn teef?

⁴ Di Baibl tel wi dat Gaad ga wahn enimi. Da enimi da “Saytan,” ahn da hihn mi yooz wahn snayk fi taak tu Eev eena di gyaadn a Eedn. (Revilayshan 12:9; Genesis 3:1) Hihn mi mek ih luk laik da di snayk mi-di taak.​—Pleez goh da Noat 7 da di en a dis buk.

⁵ Soh da weh Saytan kohn fram? Yu tink hihn da-mi laik dat fahn di biginin? No! Hihn da-mi wahn aynjel da hevn wen Gaad mi-di geh di ert redi fi Adam ahn Eev. Bot dis aynjel mi chaynj ahn mek ihself Saytan di Devl. (Job 38:4, 7) Weh wuda mek wahn aynjel du dis? Wel, tink bowt how wahn aanis persn ku chaynj ahn bee wahn teef. Ih neva baan laik dat. Bot, ih waahn sohnting weh da noh fi hihn. Ih kip di tink bowt it, ahn di moa ih tink bowt it, di moa ih waahnt it. Den, az soon az ih geh wahn chaans, ih teef it. Soh, da hihn mek ihself wahn teef.​—Reed Jaymz 1:13-15; pleez goh da Noat 8 da di en a dis buk.

6. How wahn aynjel ton Gaad enimi?

⁶ Mek wi reed bowt weh mi hapm tu da aynjel. Afta Jehoava mi mek Adam ahn Eev, ih tel dehn fi ga pikni ahn “ful op di ert.” (Genesis 1:27, 28) Da aynjel mosi mi tink tu ihself, ‘Aala dehndeh peepl kuda di wership mee insteda Jehoava!ʼ Di moa ih mi tink bowt it, di moa ih mi waahn weh da fi Jehoava. Da aynjel mi waahn peepl fi wership ahn. Soh ih yooz wahn lai fi fool Eev. (Reed Genesis 3:1-5.) Wen hihn mi du dat, da den ih mek ihself Saytan di Devl, Gaad enimi.

7. (a) Wai Adam ahn Eev mi ded? (b) Wai wee geh oal ahn ded?

 ⁷ Adam ahn Eev disobay Gaad ahn eet di froot. (Genesis 2:17; 3:6) Dehn mi sin gens Jehoava, an az taim paas, dehn ded, jos laik weh Jehoava seh mi wahn hapm tu dehn. (Genesis 3:17-19) Bikaaz wi da Adam ahn Eev pikni, wi da sinaz, soh wee ded tu. (Reed Roamanz 5:12.) Mek wi luk pahn wahn egzampl fi si wai wee da sinaz. Mek wi seh yu di bayk wahn loaf a bred eena wahn pan weh mash een pahn wan said. Aala di bred dehn weh yu bayk eena da pan wahn shayp laik di pan tu. Wen Adam disobay Gaad, ih ton wahn sina. Bikaaz aala wi da Adam pikni, aala wi da sinaz, er wi “damij,” jos laik di bred dehn weh bayk eena da pan. Ahn bikaaz aala wi da sinaz, wi geh oal ahn ded.​—Roamanz 3:23; pleez goh da Noat 9 da di en a dis buk.

8, 9. (a) Weh Saytan mi waahn Adam ahn Eev fi bileev? (b) Wai Jehoava neva kil di chree a dehn pahn di spat?

⁸ Wen Adam ahn Eev mi sin gens Gaad, da Saytan mi deh bihain it. Di chree a dehn ton gens Gaad ahn disobay ahn. Saytan mi waahn Adam ahn Eev fi bileev dat Jehoava di tel dehn lai, ahn dat ih neva waahn weh gud fi dehn. Saytan mi-di seh dat hyoomanz noh need Gaad fi tel dehn weh fi du, ahn dat Adam ahn Eev ku disaid fi dehnself weh rait fahn weh rang. Soh weh Jehoava du? Ih kuda mi kil di chree a dehn pahn di spat. Bot dat wudn a mi proov dat da Saytan da di laiyad wan.

⁹ Soh, Jehoava neva kil dehn pahn di spat. Insteda dat, ih gi hyoomanz taim fi rool dehnself. Dis wuda proov dat Saytan laiyad ahn dat Jehoava noa weh gud fi wi. Wi wahn laan moa bowt dat eena Chapta 11. Bot weh yu tink bowt weh Adam ahn Eev mi du? Yu tink dat  mi rait, dat dehn mi bileev Saytan ahn disobay Gaad? Evriting weh Adam ahn Eev mi ga da-mi fahn Jehoava. Ih mi mek wahn byootiful gyaadn fi dehn, ih tel dehn fi main di animal dehn, an ih mi mek dehn perfek. Bot Saytan neva du eniting gud fi dehn. If yoo da-mi Adam er Eev, weh yoo wuda mi du?

10. Weh impoatant disizhan aala wi haftu mek?

 ¹⁰ Now, wee deh eena di saym sichuwayshan. Ih op tu wee fi disaid hoo wi wahn lisn tu, eeda Jehoava er Saytan. Wi laif pen pan it. If wi obay Jehoava, wi wahn proov dat Saytan laiyad. (Psalm 73:28; reed Proverbs 27:11.) Onli wahn lee bit a peepl eena dis werl di obay Gaad. In fak, da noh eevn hihn di rool dis werl. Bot if da noh Gaad, den da hoo?

11, 12. (a) Wai Saytan kuda mi aafa Jeezas aala di nayshan dehn a di werl? (b) Wat da sohn skripcha weh shoa dat da Saytan di rool dis werl?

¹¹ Jeezas mi noa da hoo reeli di rool dis werl. Wahn taim, Saytan mi shoa Jeezas ‘aala di nayshan dehn a di werl, an ih mek ih si how grayt ahn byootiful dehn mi stan.ʼ Den ih mi pramis Jeezas sohnting. Ih mi tel ahn seh: “Ai wahn gi yu aala dis weh yu si ya. Aal weh yu hafu du da bow dong ahn wership mee.” (Machyu 4:8, 9; Look 4:5, 6) Aks yuself, ‘If di nayshan dehn da neva fi Saytan, yu tink ih kuda mi chrai gi dehn tu Jeezas?ʼ No. Soh da Saytan oan aala di nayshan dehn.

¹² Yu mait di wanda doh: ‘Da how kom Saytan da di roola a dis werl? Da noh Jehoava di Almaiti Gaad mi mek di yoonivers?ʼ (Revilayshan 4:11) Yes, da hihn mi mek it fi chroo, bot Jeezas mi seh dat Saytan da “di wan weh di rool dis werl.” (Jan 12:31; 14:30; 16:11) Di apasl Paal mi kaal Saytan “di gaad a dis werl.” (2 Korintyanz 4:3, 4) Ahn di apasl Jan mi seh dat “di hoal werl deh anda di powa a di eevl wan.”​—1 Jan 5:19.

13. Wai wi need wahn nyoo werl?

¹³ Dis werl di geh moa ahn moa daynjaros. Wi si  wahn lata waar ahn vailens rong wi. Wi si wahn lata hipokrit ahn peepl weh korop. Hyoomanz kyaahn geh rid a aala dehnya prablem, noh kay how haad dehn chrai. Bot Gaad wahn soon geh rid a aala di wikidnis rong wi joorin fi hihn waar, weh di Baibl kaal Armagedon. Den, Gaad wahn mek dis ert wahn Paradais. Ih pramis wahn beta laif fi aala wi.​—Revilayshan 16:14-16; pleez goh da Noat 10 da di en a dis buk.

14. Da hoo Gaad mi pik fi bee di King a fi Hihn Kingdom? Weh di Baibl mi prafesai bowt Jeezas?

¹⁴ How Gaad wahn bring een dis nyoo werl? Ih wahn yooz fi hihn Kingdom, er govament, da hevn fi du it. Jehoava pik Jeezas fi bee di King a dis Kingdom. Fahn way bak, di Baibl mi prafesai dat Jeezas wahn bee di “Prins a Pees” ahn dat fi hihn govament wahn neva stap rool. (Isaiah 9:6, 7) Jeezas mi teech ih falowaz fi pray fi dis govament wen ih mi seh: “Kohn kohn set op yu kingdom, ahn mek evribadi obay yu pahn ert jos laik how evribadi obay yu da hevn.” (Machyu 6:10) Eena chapta 8, wi wahn laan dat Gaad Kingdom wahn bee di onli govament weh wahn rool oava di ert. (Reed Daniel 2:44.) Den, Gaad Kingdom wahn mek di ert wahn byootiful paradais.​—Pleez goh da Noat 11 da di en a dis buk.

15. Wat da di “nyoo ert”?

¹⁵ Di Baibl seh: “Gaad pramis wi wahn nyoo hevn ahn wahn nyoo ert wehpaat jostis wahn deh. Wi reeli di luk faawod tu dis.” (2 Peeta 3:13; Isaiah 65:17) Sohntaim wen di Baibl taak bowt “di ert,” ih di taak bowt di peepl dehn weh liv pan it. (Genesis 11:1) Soh di raichos  “nyoo ert” wahn bee evribadi weh obay Gaad ahn weh hihn bles.

16. Wat da di gif weh Gaad wahn gi tu dehn wan weh wahn liv eena fi hihn nyoo werl? Weh wi mos du fi geh da gif?

¹⁶ Jeezas mi pramis dat dehn wan weh liv eena Gaad nyoo werl wahn geh evalastin laif. (Jan 4:14) Weh wi mos du fi geh dis gif? Pleez reed Jan 20:31 ahn Jaymz 1:22-25 fi fain owt weh wi need fi du. Di Baibl tel wi weh laif wahn bee laik eena di Paradais rait ya pahn di ert. Mek wi si.

17, 18. How wi noa dat pees wahn deh aal oava di ert ahn dat wi wahn feel sayf?

¹⁷ Nohmoh wikidnis, waar, kraim, ahn vailens wahn deh. No wikid peepl wahn di liv pahn di ert. (Psalm 37:10, 11) Gaad “wahn put wahn en tu aala di waar dehn eena di hoal ert.” (Psalm 46:9; Isaiah 2:4) Di ert wahn ful op a peepl weh lov Gaad an obay ahn. Wi wahn ga pees fareva.​—Psalm 72:7.

¹⁸ Jehoava peepl wahn feel sayf. Eena di paas, wen di Izrelait dehn mi obay Gaad, dehn mi feel sayf bikaaz hihn mi protek dehn. (Leviticus 25:18, 19) Eena di fyoocha Paradais, wi noh wahn feel frayd fi notn er nobadi. Wi wahn aalwayz feel sayf!​—Reed Isaiah 32:18; Micah 4:4.

19. How wi noa dat lata food wahn deh eena Gaad nyoo werl?

¹⁹ Lata food wahn deh. “Plenti a grayn wahn deh pahn di ert; pahn di tap a di mongtin ih wahn di oavafloa.” (Psalm 72:16) Jehoava, “wi Gaad, wahn bles wi,” ahn “di ert wahn projoos lata food.”​—Psalm 67:6.

20. How wi noa dat di ert wahn bee wahn paradais?

²⁰ Di hoal ert wahn bee wahn paradais. Peepl wahn ga byootiful hows ahn gyaadn. (Reed Isaiah  65:21-24; Revilayshan 11:18.) Di hoal ert wahn bee byootiful laik di gyaadn a Eedn. Jehoava wahn mek shoar wi aalwayz ga weh wi need. Di Baibl seh bowt Gaad: “Yu oapm yu han ahn gi wi evriting weh wi waahn.”​—Psalm 145:16.

21. How wi noa dat hyoomanz ahn di animal dehn wahn liv tugeda eena pees?

²¹ Hyoomanz ahn di animal dehn wahn liv tugeda eena pees. Di animal dehn noh wahn atak wi nohmoh. Di lee pikni dehn noh wahn frayd needa, noh eevn rong di animal dehn weh daynjaros tudeh.​—Reed Isaiah 11:6-9; 65:25.

22. Weh Jeezas wahn du fi di wan dehn weh sik?

²² Nobadi wahn geh sik. Wen Jeezas mi deh pahn di ert, ih mi heel wahn lata peepl. (Machyu 9:35; Maak 1:40-42; Jan 5:5-9) Bot wen Gaad Kingdom staat rool oava di hoal ert, fi wee King, Jeezas, wahn heel aala wi. Nobadi wahn eva seh: “Ah sik.”​—Isaiah 33:24; 35:5, 6.

23. Weh Gaad wahn du fi di wan dehn weh ded?

²³ Di wan dehn weh ded wahn liv agen. Gaad pramis dat ih wahn rezorek milyanz a peepl weh ded. Dis meen di wan dehn weh raichos ahn di wan dehn weh noh raichos.​—Reed Jan 5:25; Aks 24:15.

24. How yoo feel bowt laif eena Paradais?

²⁴ Aala wi haftu chooz if wi waahn laan bowt Jehoava ahn serv hihn, er if wi waahn du wi oan ting. Bot, if wi chooz fi serv Jehoava, wi wahn ga wahn wandaful fyoocha. Wen wahn man mi aks Jeezas fi noh faget ahn afta ih mi ded, Jeezas mi pramis ahn: “Yu wahn deh wid mi eena Paradais.” (Look 23:43) Mek wi laan moa bowt Jeezas Krais ahn si how hihn wahn mek aala di wandaful pramis dehn fahn Gaad kohn chroo.