1, 2. (a) Wai yu kyaahn seh dat yu noa peepl weh faymos jos bikaaz yu noa dehn naym? (b) Weh peepl bileev bowt Jeezas?

WAHN lata faymos peepl deh eena di werl tudeh. Yu mait eevn noa di naym a som a dehn. Bot dat noh meen seh yu reeli noa dehn. Yu noh mait noa evri lee ting bowt dehn laif, ahn di kaina persn dehn.

² Fi shoar yu don hyaa bowt Jeezas aredi, eevn doa ih mi liv pahn di ert bowt 2,000 yaaz agoa. Bot moas peepl noh noa wahn lat bowt Jeezas. Sohn peepl seh dat hihn da-mi wahn gud man. Som seh hihn da-mi wahn prafit, an adaz bileev dat hihn da Gaad. Weh yoo tink?​—Pleez goh da Noat 12 da di en a dis buk.

3. Wai ih impoatant fi mek yu noa di chroot bowt Jehoava Gaad ahn Jeezas Krais?

³ Ih impoatant fi mek yu noa di chroot bowt Jeezas. Dis da bikaaz di Baibl seh: ‘Fi liv fareva meen dat dehn fi noa yoo, di onli chroo Gaad, ahn Jeezas Krais, di wan weh yoo mi sen.ʼ (Jan 17:3, JNT) Soh, if yu noa di chroot bowt Jehoava ahn Jeezas, yu ku liv fareva eena wahn paradais pahn di ert. (Jan 14:6) Ahn, wen yu noa di chroot bowt Jeezas ih ku help yu eevn now, bikaaz hihn set di bes egzampl fi wee pahn how fi chreet peepl ahn how fi liv wi laif. (Jan 13:34, 35) Eena Chapta 1, wi mi laan di chroot bowt Gaad. Now wi wahn laan weh di Baibl teech bowt Jeezas.

4. Weh di werd “Mesaiya” ahn di werd “Krais” meen?

⁴ Lang bifoa Jeezas mi baan pahn di ert, Jehoava mi pramis eena di Baibl dat ih mi wahn sen di Mesaiya, er Krais. Di taitl “Mesaiya” da wahn Heebroo werd, ahn “Krais” da wahn Greek werd. Dehndeh too taitl meen “Anointid Wan”​—wahn persn weh Gaad pik fi wahn speshal pozishan. Di Mesaiya wahn mek aala Gaad pramis dehn kohn chroo. Bot bifoa Jeezas mi baan, wahn lata peepl mi-di wanda, ‘Da hoo wahn bee di Mesaiya?ʼ

5. Yu tink Jeezas disaipl dehn mi bileev dat hihn da-mi di Mesaiya?

⁵ Jeezas disaipl dehn mi noa dat Jeezas da-mi di Mesaiya weh Jehoava mi pramis fi kohn pahn di ert. (Jan 1:41) Fi egzampl, Saiman Peeta mi tel Jeezas: “Yoo da di Krais.” (Machyu 16:16) How wee ku noa fi shoar dat Jeezas da di Mesaiya?

6. How Jehoava mi help hombl peepl fi noa hoo da di Mesaiya?

⁶ Lang bifoa Jeezas mi baan, Gaad prafit dehn mi rait dong lata prafesi bowt di Mesaiya. Dis mi help lata peepl fi noa hoo mi wahn bee di Mesaiya. How dis ku help wi tudeh? Sopoaz yu fi goh da wahn bizi bos terminal fi pik op sohnbadi weh yu neva meet bifoa. If dehn wuda diskraib da persn fi yu, ih wuda bee eeziya fi mek yu fain ahn, rait? Da jos laik dat Jehoava mi yooz di prafit dehn fi seh weh di Mesaiya mi wahn du ahn weh mi wahn hapm tu ahn. Wen dehndeh prafesi mi kohn chroo, ih mi help hombl peepl fi noa dat Jeezas da di Mesaiya.

7. Wat da too prafesi weh proov dat Jeezas da di Mesaiya?

 ⁷ Mek wi luk pahn too prafesi bowt di Mesaiya. Di fos wan da weh di prafit Maika mi prafesai 700 yaaz bifoa Jeezas mi kohn dong pahn di ert. Ih mi seh dat di Mesaiya mi wahn baan da wahn lee tong weh naym Betlihem. (Micah 5:2) Ahn da rait deh Jeezas mi baan fi chroo! (Machyu 2:1, 3-9) Di sekant wan da-mi wahn prafesi fahn Danyel. Ih mi seh dat di Mesaiya mi wahn staat ih werk eena di yaa 29 C.E. (Daniel 9:25) Wahn lat moa prafesi deh weh proov dat Jeezas da di Mesaiya weh Jehoava mi pramis.​—Pleez goh da Noat 13 da di en a dis buk.

8, 9. Wen Jeezas mi geh baptaiz, weh mi hapm fi proov dat hihn da di Mesaiya?

⁸ Jehoava mek it klayr tu evribadi dat Jeezas da di Mesaiya. Gaad mi pramis fi giv Jan di Baptis wahn sain soh dat hihn kuda mi noa hoo di Mesaiya wahn bee. Eena 29 C.E., wen Jeezas gaan da di Jaadn riva fi mek Jan baptaiz ahn, Jan mi si di sain. Di Baibl tel wi weh mi hapm: ‘Afta Jeezas don geh baptaiz an ih kom op owta di waata, sayhn taim hevn oapm op an ih si di Hoali Spirit di kohn dong jos laik wahn dov. Ahn sayhn taim wahn vais fahn hevn seh, “Yoo da mi Son weh Ah onli lov, an Ah onli pleez wid yu.”ʼ (Machyu 3:16, 17) Weh Jan mi si ahn hyaa mi mek ih noa dat Jeezas da-mi di Mesaiya. (Jan 1:32-34) Pahn da day, wen Jehoava mi poar owt ih spirit pahn Jeezas, ih mi-di anoint ahn az di Mesaiya. Hihn da-mi di wan weh Gaad mi pik fi bee di Leeda ahn King.​—Isaiah 55:4.

 ⁹ Aala di difrent Baibl prafesi dehn, Jehoava oan vais fahn hevn, ahn di sain weh ih mi gi Jan wen Jeezas mi geh baptaiz proov dat Jeezas da di Mesaiya. Bot weh Jeezas mi kohn fram? Ahn weh kaina persn hihn? Mek wi si weh di Baibl seh.

10. Weh di Baibl seh bowt Jeezas laif bifoa ih mi kohn dong pahn di ert?

¹⁰ Di Baibl teech wi dat Jeezas mi liv da hevn lang bifoa ih mi kohn dong pahn di ert. Maika mi seh dat di Mesaiya da fahn way way bak. (Micah 5:2) Wahn lata taim, Jeezas ihself mi seh dat hihn mi liv da hevn bifoa  ih mi baan az wahn hyooman. (Reed Jan 3:13; 6:38, 62; 17:4, 5.) Jeezas mi ga wahn speshal rilayshanship wid Jehoava eevn bifoa ih mi kohn dong pahn di ert.

11. Wai Jeezas soh preshos tu Jehoava?

¹¹ Jeezas preshos tu Jehoava. Wai Gaad feel dis way bowt hihn? Bikaaz Gaad mi mek Jeezas lang bifoa ih mi kriyayt eniting an enibadi els. Di Baibl seh dat “eevn bifoa Gaad mi mek eniting ataal, Krais mi deh.” * (Koloashanz 1:15) Wahn nada reezn wai Jeezas preshos tu Jehoava da bikaaz hihn da di onli wan weh Gaad mi mek bai ihself. Dat da wai hihn da di ‘wan an onli Son [er, di onli-bigatn].ʼ (Jan 3:16) Jeezas da di onli wan weh Jehoava mi yooz fi mek evriting els. (Koloashanz 1:16) Ahn Jeezas da di onli wan weh di Baibl kaal “di Werd,” bikaaz Jehoava mi yooz hihn fi gi inschrokshan ahn mesij tu di aynjel ahn hyooman dehn.​—Jan 1:14.

12. How wi noa dat Jeezas ahn Gaad da noh di saym persn?

¹² Sohn peepl bileev dat Jeezas ahn Gaad da di saym persn. Bot di Baibl noh teech dat. * Di Baibl seh dat Gaad mi mek Jeezas, soh dis meen dat Jeezas neva egzis bifoa dat. Bot Jehoava, hoo mek evriting, da fahn fareva eena di paas tu fareva eena di fyoocha. (Psalm 90:2) Jeezas neva chrai fi bee Gaad. Di Baibl teech wi dat di Faada grayta dan di Son. (Reed Jan 14:28; 1 Korintyanz 11:3.) Onli Jehoava da “Gaad Almaiti.”  (Genesis 17:1) Hihn da di graytis ahn moas powaful persn eena di hoal yoonivers.

13. Wai di Baibl seh dat ‘Jeezas da egzakli laik Gaadʼ?

¹³ Jehoava an ih Son, Jeezas, mi werk said bai said fi bilyanz a yaaz. Dehn mi mek di son, di moon, di staar dehn, an ada tingz. Dehn mi mek di aynjel dehn tu. Fi shoar Jeezas an ih Pa mi ga wahn speshal rilayshanship wid wan anada! (Jan 3:35; 14:31) Jeezas kapi ih Pa wayz soh gud dat di Baibl seh dat ‘hihn da egzakli laik Gaad.ʼ​—Koloashanz 1:15.

14. How Jehoava preshos Son mi baan az wahn baybi?

¹⁴ Jehoava preshos Son mi wilin fi lef hevn ahn kohn dong pahn di ert fi baan az wahn hyooman. How dat mi hapm? Jehoava mi du wahn mirakl ahn tek di laif a ih Son da hevn ahn put it eena di woom a wahn verjin naym Mayri dong ya pahn di ert. Eena dis way, Jeezas neva need wahn hyooman pa. Soh Mayri mi baan wahn perfek lee baybi bwai, ahn shee mi naym ahn Jeezas.​—Look 1:30-35.

15. How yu ku geh fi noa Jehoava beta?

¹⁵ Yu ku laan wahn lat bowt Jeezas laif ahn di kaina persn hihn wen yu reed di Gaspl dehn​—Machyu, Maak, Look, ahn Jan. Bikaaz Jeezas da jos laik ih Pa, weh yu reed eena di Gaspl dehn wahn ku help yu geh fi noa Jehoava beta. Dat da wai Jeezas mi seh: “Enibadi weh don si mee don si mai Faada tu.”​—Jan 14:9.

16. Wat da-mi di mayn ting weh Jeezas mi teech bowt? Weh ih mi get ih teechin dehn fram?

¹⁶ Lata peepl mi kaal Jeezas “Teecha.” (Jan 1:38;  13:13) Wan a di mayn ting dehn weh Jeezas mi teech bowt da-mi ‘di gud nyooz a di Kingdom.ʼ Wat da di Kingdom? Da Gaad govament da hevn weh wahn bring lata blesin fi di wan dehn weh obay Gaad. (Machyu 4:23) Evriting weh Jeezas mi teech bowt da fahn Gaad. Jeezas mi seh: “Di ting dehn weh Ai di teech da noh fahn mee, bot dehn kohn fahn di Wan weh sen mee.” (Jan 7:16) Hihn mi noa dat Jehoava waahn peepl fi hyaa di gud nyooz dat Gaad Kingdom wahn rool oava di ert.

17. Wehpaat Jeezas yoostu goh preech? Wai ih mi werk soh haad fi preech ahn fi teech ada peepl?

¹⁷ Wehpaat Jeezas yoostu goh preech? Eniway ih mi fain peepl. Ih mi preech eena di tong ahn siti dehn, di vilij ahn di maakit dehn, di templ ahn sinagag, ahn da peepl hows. Ih neva sidong ahn wayt fi mek peepl kohn tu ahn. Ih gaan luk fi dehn. (Maak 6:56; Look 19:5, 6) Jeezas mi werk haad ahn spen lata taim an enerji di teech peepl. Ih mi du dis bikaaz ih mi noa dis da weh Gaad waahn ih du ahn bikaaz ih mi aalwayz obay ih Pa. (Jan 5:30; 8:29) Wahn nada reezn wai Jeezas mi preech da bikaaz ih haat mi gaan owt tu peepl. (Reed Machyu 9:35, 36.) Hihn kuda mi si dat di rilijos leeda dehn neva mi-di teech di peepl di chroot bowt Gaad an ih Kingdom. Soh ih mi waahn help az moch peepl az ih kud fi hyaa di gud nyooz.

18. Weh yu laik di moas bowt Jeezas?

¹⁸ Jeezas mi lov peepl ahn shoa dat ih mi kay bowt dehn. Ih mi kain tu peepl, ahn dehn neva frayd fi taak tu ahn. Eevn di lee pikni dehn mi laik deh wid  ahn. (Maak 10:13-16) Ih mi aalwayz deel wid peepl eena wahn fyaa way. Ih neva laik it wen peepl du tingz weh noh rait ahn tek advantij a adaz. (Machyu 21:12, 13) Bak den, peepl neva yoostu chreet di uman dehn wid rispek. Di uman dehn neva ga no raits. Bot Jeezas mi aalwayz chreet dehn wid aana ahn rispek. (Jan 4:9, 27) Jeezas mi reeli hombl tu. Wahn taim, ih mi wash ih apasl dehn fut, sohnting weh onli wahn slayv wuda mi du.​—Jan 13:2-5, 12-17.

19. Gi wahn egzampl weh shoa dat Jeezas mi noa weh peepl mi reeli need ahn dat ih mi waahn help dehn.

¹⁹ Jeezas mi noa egzakli weh peepl mi reeli need, an ih mi aalwayz waahn help dehn. Dis mi playn fi si wen ih mi yooz di powa a Gaad fi heel peepl. (Machyu 14:14) Fi egzampl, wahn man weh mi ga leprosi mi kom op tu Jeezas ahn tel ahn seh: “Sa, if yoo waahn, yoo ku heel mi.” Jeezas haat gaan owt tu di man kaaz ih kuda mi si dat ih mi-di sofa ahn dat ih mi deh eena lata payn. Ih mi feel soh sari far ahn, soh ih help di man. Jeezas schrech owt ih han ahn toch di man, ahn tel ahn seh: “Yes, man, Ah waahn heel yu. Yu heel!” (Maak 1:40-42) Yoo kud imajin how da man mosi mi feel?

20, 21. How Jeezas mi set di bes egzampl fi shoa wi how fi obay Gaad?

²⁰ Jeezas mi aalwayz obay Gaad. Ih set di bes egzampl fi wi. Noh mata weh mi hapm er weh ih enimi dehn mi du tu ahn, hihn mi faytful tu ih Pa. Fi egzampl, Jeezas neva sin wen Saytan mi chrai temp ahn. (Machyu 4:1-11) Som a Jeezas oan famili neva  bileev dat hihn da-mi di Mesaiya. Dehn mi seh dat ih mi-di looz ih main, bot Jeezas mi kantinyu fi du weh Gaad mi tel ahn fi du. (Maak 3:21) Wen ih enimi dehn mi chreet ahn bad, Jeezas neva chrai hert dehn bak, ih obay Gaad.​—1 Peeta 2:21-23.

²¹ Eevn wen Jeezas mi sofa wahn kruwil ahn terabl det, ih stil mi stay faytful tu Jehoava. (Reed Heebrooz 2:9.) Imajin aal weh ih mi haftu gaan chroo di day ih mi ded. Dehn mi ares ahn, dehn mi akyooz ahn dat ih mi disrispek Gaad, ahn di korop joj dehn mi kandem ahn. Di peepl dehn mi laaf aata ahn, di soalja dehn mi taacha ahn, ahn dehn mi nayl ahn pahn wahn stayk. Wen ih mi-di ded ih hala owt  haad-wan ahn seh: “Evriting don now.” (Jan 19:30) Chree dayz afta Jeezas mi ded, Jehoava bring ahn bak tu laif ahn giv ahn wahn spirit badi. (1 Peeta 3:18) Wahn fyoo weeks layta, Jeezas gaan bak da hevn an ‘ih sidong pahn di rait han said a Gaad,ʼ ahn wayt pahn Gaad fi mek ahn King.​—Heebrooz 10:12, 13.

22. Weh hoap wi ga now bikaaz Jeezas mi stay faytful tu ih Pa?

²² Bikaaz Jeezas mi stay faytful tu ih Pa, now wi ga di hoap fi liv fareva eena wahn paradais rait ya pahn di ert, jos laik weh Jehoava mi waahn fahn di biginin. Eena di neks chapta, wi wahn laan how Jeezas det mek it pasabl fi mek wi liv fareva.