1, 2. Weh Jehoava waahn fi di famili?

JEHOAVA GAAD mi marid di fos kopl. Di Baibl tel wi dat ih mek di fos uman ahn “bring ahn tu di man.” Adam mi soh hapi dat ih seh: “Dis da boan fahn mai boan ahn flesh fahn mai flesh.” (Genesis 2:22, 23) Dis tel wi dat Jehoava waahn marid peepl bee hapi.

² Ih sad dat wahn lata peepl noh noa weh ih feel laik fi ga wahn hapi famili laif. Bot, di Baibl ga lata advais weh wahn help evribadi eena di famili fi bee hapi ahn fi injai deh rong wan anada.​—Look 11:28.

3, 4. (a) How wahn hozban fi chreet ih waif? (b) Wai ih impoatant fi hozban ahn waif fagiv wan anada?

³ Di Baibl seh dat wahn gud hozban fi chreet ih waif wid lov ahn rispek. Pleez reed Ifeezhanz 5:25-29. Wahn hozban fi aalwayz chreet ih waif eena wahn lovin way. Ih fi protek ahn an luk afta ahn. Ih noh fi beet ih waif er tel ahn tingz weh ku hert ahn.

⁴ Bot weh wahn hozban fi du wen ih waif mek wahn mistayk? Di Baibl seh: “Unu hozban, unu fi lov unu waif ahn noh abyooz dehn.” (Koloashanz 3:19) Soh unu hozban, memba dat unu mek mistayk tu. An if unu waahn Gaad fagiv unu, unu haftu fagiv unu waif. (Machyu 6:12, 14, 15) Wen wahn hozban ahn waif wilin fi fagiv wan anada, ih wahn help dehn fi ga wahn hapi marij.

5. Wai wahn hozban fi aana ih waif?

 ⁵ Jehoava ekspek di hozban fi aana ih waif. Wahn hozban need fi fain owt weh ih ku du fi help ih waif. Ih fi provaid food ahn kloaz far ahn. Ih fi tek di taim fi taak wid ih waif ahn chrai andastan how shee feel. Dis da sohnting veri seeryos kaaz if ih noh chreet ih waif gud, Jehoava mait noh lisn tu ih pryaaz. (1 Peeta 3:7) Tu Jehoava, enibadi weh lov hihn impoatant tu hihn. Ih noh mata if dehn da man er uman. Hihn noh shoa fayvritizm.

6. Weh di Baibl meen wen ih seh wahn hozban ahn waif da “wan”?

⁶ Jeezas mi seh dat wahn hozban ahn waif da ‘noh too nohmoh, bot wan.ʼ (Machyu 19:6) Dis meen dat dehn wahn bee laayal tu wan anada ahn dehn noh wahn cheet pahn wan anada. (Proverbs 5:15-21; Heebrooz 13:4) Wahn hozban ahn waif fi tek kayr a eech ada sekshwal needz. (1 Korintyanz 7:3-5) Wahn hozban fi memba dat ‘nobadi hayt ih oan badi, insted ih feed ahn tek kayr a it.ʼ Soh ih fi lov ahn cherish ih waif kaaz dis da weh shee reeli waahn fan ahn.​—Ifeezhanz 5:29.

7. Wai wahn famili need wahn hed?

⁷ Evri famili need fi ga wahn hed, sombadi fi gaid di famili soh dat tingz ku ron smood. Da 1 Korintyanz 11:3 di Baibl seh: “Krais da di hed a evri man, ahn di hozban da di hed a di waif, ahn Gaad da di hed a Krais.”

8. How wahn waif ku shoa dat ih ga lata rispek fi ih hozban?

⁸ Da chroo dat evri hozban mek mistayk. Bot wen  wahn waif sopoat ih hozban disizhan dehn ahn werk lang wid ahn, tingz goh gud fi di hoal famili. (1 Peeta 3:1-6) Di Baibl seh: “Evri waif fi rispek ih hozban.” (Ifeezhanz 5:33) Sopoaz wahn hozban noh ga di saym bileef laik ih waif. Shee fi stil ga lata rispek far ahn. Di Baibl seh: “Unu marid uman, evri wan a unu, unu fi put unu hozban fos. Den if som a unu hozban noh du weh di Werd a Gaad seh, yu ku win ahn oava fi bileev eena Krais jos bai di way yu bihayv. Yu noh wahn eevn haftu seh wan werd tu ahn, bikaaz ih wahn si how yoo liv wahn kleen laif ahn wan weh aana Gaad.” (1 Peeta 3:1, 2) Wahn waif gud egzampl ku help ih hozban fi andastan ahn rispek fi shee bileef ahn rilijan.

9. (a) Weh wahn waif fi du if shee noh agree wid ih hozban? (b) Weh advais Taitos 2:4, 5 gi tu wahn waif?

⁹ Weh wahn waif ku du wen shee noh agree wid ih hozban? Shee ku seh how shee feel eena wahn way  weh shoa rispek. Fi egzampl, Sayra mi seh sohnting weh Aybraham neva laik, bot Jehoava tel Aybraham: “Lisn tu ahn.” (Genesis 21:9-12) Wen wahn hozban mek wahn disizhan weh noh goh gens di Baibl, ih waif fi sopoat ahn. (Aks 5:29; Ifeezhanz 5:24) Wahn gud waif wahn tek kayr a ih famili. (Reed Taitos 2:4, 5.) Wen ih hozban an ih pikni si how haad shee di werk fi dehn, dehn wahn ga lat moa lov ahn rispek far ahn.​—Proverbs 31:10, 28.

10. Weh di Baibl seh bowt separayshan ahn divoas?

¹⁰ Sohntaim sohn kopl disaid fi separayt er divoas bifoa dehn eevn chrai werk owt dehn prablemz. Bot, di Baibl seh dat “wahn waif noh sopoas tu lef ih hozban” ahn dat “wahn hozban noh fi divoas ih waif.” (1 Korintyanz 7:10, 11) Bot di prablem ku geh soh bad dat wahn kopl mait separayt, bot dis da wahn seeryos disizhan. * How bowt divoas? Di Baibl gi onli wan reezn fi geh wahn divoas, ahn dat da if wahn hozban er waif cheet ahn ga seks wid sombadi weh da noh ih marij paadna.​—Machyu 19:9.

11. Weh di pikni dehn need di moas fahn dehn payrents?

¹¹ Payrents, unu need fi spen az moch taim az unu kud wid unu pikni. Dehn need unu. Bot weh dehn need di moas da fi mek unu teech dehn bowt Jehoava.​—Deuteronomy 6:4-9.

12. Weh payrents need fi du fi protek dehn pikni?

¹² Saytan werl di geh moa ahn moa wikid, ahn  moa peepl deh rong nowadayz weh wuda waahn hert wi pikni dehn, eevn abyooz dehn sekshwali. Fi sohn payrents, dis da noh wahn eezi tapik fi taak bowt. Bot payrents need fi waan dehn pikni bowt peepl laik dat, ahn tel dehn how fi avoid dehn. Payrents, unu haftu protek unu pikni dehn. *​—1 Peeta 5:8.

13. How payrents fi teech dehn pikni?

¹³ Payrents ga di rispansabiliti fi teech dehn pikni how fi bihayv. How yu ku du dis? Yu need fi chrayn  dehn. Wen yu karek dehn, yu noh haftu rof dehn op er bee kruwil. (Jeremiah 30:11) Soh neva disiplin yu pikni dehn wen yu beks. Yu noh waahn yu werdz bee laik “wahn stab fahn wahn soad” ahn hert dehn. (Proverbs 12:18) Teech yu pikni dehn fi andastan wai dehn need fi bee obeedyant.​—Ifeezhanz 6:4; Heebrooz 12:9-11; pleez goh da Noat 30 da di en a dis buk.

14, 15. Wai pikni need fi obay dehn payrents?

¹⁴ Jeezas mi aalwayz obay ih Faada, eevn wen ih neva eezi. (Look 22:42; Jan 8:28, 29) Jehoava waahn di pikni dehn fi obay dehn payrents tu.​—Ifeezhanz 6:1-3.

¹⁵ Eevn if yu feel laik ih haad fi mek yu obay yu payrents, memba dat wen yu obeedyant, Jehoava ahn yu payrents hapi wid yu. *​—Proverbs 1:8; 6:20; 23:22-25.

16. (a) How Saytan chrai temp yong peepl fi du weh bad? (b) Wai ih impoatant fi chooz frenz weh lov Jehoava?

¹⁶ Di Devl ku yooz yu frenz an ada yong peepl fi temp yu fi du rang. Ih noa dat ih noh eezi fi tel yu frenz no. Fi egzampl, Jaykop daata weh mi naym Daina mi ga sohn frenz weh neva lov Jehoava. Dis mi kaaz lata chrobl fi shee an ih famili. (Genesis 34:1, 2) If yu fren dehn noh lov Jehoava, dehn ku temp yu fi du sohnting weh Jehoava hayt. Ahn dis wuda hert yoo, yu famili, ahn Gaad. (Proverbs 17:21, 25) Dat da  wai ih impoatant dat yu chooz frenz weh lov Jehoava.​—1 Korintyanz 15:33.

17. Weh rispansabiliti eech persn gat eena di famili?

¹⁷ Wen evribadi eena di famili du weh Gaad ekspek dehn fi du, dehn stay owta chrobl an avoid lata prablem. Soh if yu da wahn hozban, lov yu waif ahn chreet ahn wid lov. If yu da wahn waif, rispek, lisn, ahn werk lang wid yu hozban. Fala di egzampl a di waif weh Proverbs 31:10-31 taak bowt. If yu da wahn payrent, teech yu pikni dehn fi lov Gaad. (Proverbs 22:6) If yu da wahn pa, gaid yu famili ahn mek shoar “dat evriting goh gud” eena yu hoam. (1 Timoti 3:4, 5; 5:8) An if yu da wahn pikni, obay yu payrents. (Koloashanz 3:20) Memba dat evribadi eena di famili mek mistayk, soh hombl unuself an aks wan anada fi fagivnis. Di Baibl gat een gaidans fahn Jehoava fi eech persn eena di famili.