1, 2. Wai yoo tink dat pryaa da wahn privilij, ahn wai wi need fi noa weh di Baibl teech bowt it?

DI ERT soh smaal wen yu kompyaa it tu di yoonivers. Wen Jehoava luk dong pahn di ert, tu hihn, evribadi luk laik sohn lee jrap a waata fahn wahn bokit. (Psalm 115:15; Isaiah 40:15) Eevn doa wi soh smaal, Psalm 145:18, 19 seh: “Jehoava noh deh faar fahn di wan dehn weh di kaal pahn hihn wid chroot. Ih satisfai di dizaiya a di wan dehn weh fyaa hihn; ih hyaa dehn krai fi help, an ih sayv dehn.” Soh Jehoava, di almaiti Kriyayta, waahn bee kloas tu wee, an ih waahn lisn tu wi pryaaz. Dat da wahn privilij fi chroo!

² Jehoava wahn lisn tu wi if wi taak tu hihn eena di rait way. How wi ku du dat? Mek wi si weh di Baibl seh bowt pryaa.

3. Wai yu fi pray tu Jehoava?

³ Jehoava waahn yu pray, er taak, tu ahn. How wi noa dat? Pleez reed Filipiyanz 4:6, 7. Now stap ahn tink bowt dat fi wahn lee bit. Di Kriyayta a di yoonivers reeli kay bowt yoo an ih waahn yu tel ahn bowt yu prablem dehn ahn how yu reeli feel.

4. How pryaa ku schrentn yu frenship wid Jehoava?

⁴ Pryaa ku schrentn yu frenship wid Jehoava.  Wen peepl weh da frenz taak aal di taim bowt tingz weh deh pahn dehn main, ahn how dehn tink ahn feel, dehn frenship geh schranga. Da di saym ting hapm wen yu pray tu Jehoava. Chroo di Baibl, hihn tel yu bowt how ih tink ahn feel, an ih tel yu weh ih wahn du eena di fyoocha. Yu ku tel ahn how yu feel deep dong eena yu haat. Di moa yu du dis, yu frenship wid Jehoava wahn geh schranga.​—Jaymz 4:8.

5. How wi noa dat Gaad noh ansa evribadi pryaaz?

⁵ Jehoava noh ansa evribadi pryaaz. Ih mi tel di Izrelait dehn: “Eevn doa yu aafa op lata pryaaz, Ah noh di lisn; yu han dehn ful op a blod.” (Isaiah 1:15) Soh if wi noh kyaaful, wi ku du tingz weh Jehoava hayt, an ih noh wahn ansa wi pryaaz.

6. Wai ih impoatant fi ga fayt? How yu ku proov dat yu ga fayt?

 ⁶ If wi waahn Jehoava ansa wi pryaaz, wi haftu ga fayt eena ahn. (Maak 11:24) Di apasl Paal seh: “Nobadi kyaahn pleez Gaad if dehn noh ga fayt eena ahn, kaa enibadi weh waahn kohn tu Gaad haftu bileev dat hihn deh, ahn dat Gaad wahn gi gud tingz tu dehn wan weh saach far ahn wid aala dehn haat.” (Heebrooz 11:6) Bot wi kyaahn jos seh dat wi ga fayt. Wi need fi obay Jehoava evri day ahn proov dat wi ga fayt eena ahn.​—Reed Jaymz 2:17.

7. (a) Wai wi fi bee hombl ahn shoa rispek wen wi pray tu Jehoava? (b) How wi ku shoa dat wi sinsyaa wen wi pray?

⁷ Wi fi bee hombl ahn shoa rispek wen wi pray tu Jehoava. If wi mi-di taak tu wahn king er wahn prezident, wi wuda shoa rispek tu dehn. Wel, Jehoava da di Almaiti Gaad, soh wi need fi bee eevn moa hombl ahn shoa eevn moa rispek tu hihn. (Genesis 17:1; Psalm 138:6) Ahn wi need fi bee sinsyaa wen wi pray tu Jehoava. Wi noh fi jos ratl aaf wahn hoal lata ting oava an oava agen; pray fahn wi haat.​—Machyu 6:7, 8.

8. Wat els wi need fi du wen wi di pray bowt sohnting?

⁸ Wen wi pray bowt sohnting, wi need fi du evriting wi kud fi werk lang wid wi pryaaz. Fi egzampl, if wi di pray tu Jehoava fi gi wi weh wi need fi di day, wi kyaahn bee layzi an ekspek Jehoava fi jrap evriting eena wi lap ahn noh werk far it. Wi haftu wilin fi werk haad ahn tek wateva lee jab wi ku du. (Machyu 6:11; 2 Tesaloanyanz 3:10) Er seh wi pray tu Jehoava fi help wi stap du sohnting weh rang. Wel, wi need fi stay weh fahn eni sichuwayshan weh wi mait  fays da temtayshan. (Koloashanz 3:5) Mek wi ansa sohn kweschan bowt pryaaz weh peepl aks aal di taim.

9. Da hoo wi fi pray tu? Weh Jan 14:6 teech wi bowt pryaa?

⁹ Da hoo wi fi pray tu? Jeezas mi teech ih falowaz fi pray tu “fi wee Faada weh deh da hevn.” (Machyu 6:9) An ih mi seh: ‘Da mee da di way, di chroot, ahn di laif. Di onli way peepl ku kohn tu Gaad di Faada da fi kohn chroo mee.ʼ (Jan 14:6) Soh wi fi pray onli tu Jehoava chroo Jeezas. Weh dis meen? Wel, if wi waahn Jehoava ansa wi pryaaz, wi need fi shoa rispek fi di speshal pozishan weh Jehoava mi gi Jeezas. Laik weh wi mi laan, Jeezas mi kohn dong pahn di ert fi sayv aala wi fahn sin ahn det. (Jan 3:16; Roamanz 5:12) Jehoava mi pik Jeezas fi bee di Joj ahn di Hai Prees weh ku fergiv wi sin dehn.​—Jan 5:22, 23; Heebrooz 6:20.

10. Yu tink wi need fi deh eena wahn speshal pozishan wen wi pray? Eksplayn yu ansa.

¹⁰ Yu tink wi need fi deh eena wahn speshal pozishan wen wi pray? No, Jehoava noh seh wi haftu neel dong, sidong, er stan op wen wi pray. Di Baibl teech wi dat wi ku taak tu Jehoava eena eni pozishan weh shoa rispek fi hihn. (1 Chronicles 17:16; Nehemiah 8:6; Daniel 6:10; Maak 11:25) Jehoava waahn wi taak tu ahn wid rispek ahn fahn wi haat. Dat da weh moa impoatant tu hihn. Wi ku seh wahn lowd er sailent pryaa eniway weh wi deh, er enitaim joorin di day er nait. Wen wi pray tu Jehoava, wi ku  chros dat hihn wahn hyaa wi eevn wen nobadi els hyaa wi.​—Nehemiah 2:1-6.

11. Wat da sohn tingz wi ku taak tu Jehoava bowt?

¹¹ Weh wi ku pray fa? Wi ku pray fi eniting az lang az da akaadn tu fi hihn wil. Di Baibl seh: “If wi aks ahn eniting akaadn tu weh hihn waahn [er, fi hihn wil], ih lisn tu wi.” (1 Jan 5:14) Wi ku pray bowt persnal tingz. Wen wi pray tu Jehoava, da laik wi di taak tu wahn kloas fren. Wi ku tel Jehoava eniting weh deh pahn wi main an eena wi haat. (Psalm 62:8) Wi ku aks ahn fi gi wi ih hoali spirit fi help wi du di rait tingz. (Look 11:13) Wi ku aks ahn fi di wizdom fi mek gud disizhan, ahn wi ku pray fi di schrent fi deel wid eni prablem weh wi fays. (Jaymz 1:5) Wi need fi aks Jehoava fi fergiv wi sin dehn. (Ifeezhanz 1:7) Wi fi pray fi adaz, laik wi famili ahn wi bradaz ahn sistaz eena di kangrigayshan.​—Aks 12:5; Koloashanz 4:12.

12. Weh fi bee di moas impoatant tingz eena wi pryaaz?

¹² Weh fi bee di moas impoatant tingz eena wi pryaaz? Jehoava ahn fi hihn wil need fi bee di moas impoatant tingz eena wi pryaaz. Wi fi tank ahn fahn wi haat fi evriting weh ih du fi wi. (1 Chronicles 29:10-13) Wi noa dis bikaaz wen Jeezas mi deh pahn di ert, ih teech ih disaipl dehn fi pray. (Reed Machyu 6:9-13.) Eena da pryaa, Jeezas mi seh dat di fos ting wi need fi pray fa da fi kip Gaad naym hoali. Den ih seh fi pray fi Gaad Kingdom kohn ahn mek evribadi pahn di ert obay Gaad, er du fi hihn wil. Den, afta wi pray fi dehnya chree impoatant tingz,  wi ku pray fi wi persnal needz. Wen wi put Jehoava ahn fi hihn wil fos eena wi pryaaz, wi di shoa wat da di moas impoatant tingz tu wee.

13. How lang wi pryaaz fi bee?

¹³ How lang wi pryaaz fi bee? Di Baibl noh seh. Wi pryaaz ku bee shaat er lang, dipendin pahn weh wi di pray bowt. Fi egzampl, wi mait seh wahn shaat pryaa bifoa wi eet bot wahn langa wan wen wi di tel  Jehoava tanks er wi di tel ahn bowt di tingz wi di wori bowt. (1 Samuel 1:12, 15) Wi noh need fi seh lang pryaaz jos fi shoa aaf fronta peepl, laik weh sohn rilijos leedaz mi du wen Jeezas mi deh pahn di ert. (Look 20:46, 47) Jehoava noh waahn hyaa pryaaz laik dehndeh. Hihn waahn wi pray fahn wi haat.

14. How aafn wi fi pray, ahn weh dis teech wi bowt Jehoava?

¹⁴ How aafn wi fi pray? Jehoava waahn wi taak tu hihn evri day. Di Baibl seh dat wi fi “pray aal di taim,” “neva stap pray,” ahn “pray joorin di day ahn joorin di nait.” (Roamanz 12:12; 1 Tesaloanyanz 5:17; 1 Timoti 5:5) Jehoava aalwayz redi fi lisn tu wi.  Wi ku tank ahn evri day fi ih lov an ih kainis. Wi ku aks ahn fi gaid wi, schrentn wi, ahn komfert wi. If wi apreeshiayt di privilij wi ga fi pray tu Jehoava, wi wahn yooz evri chaans wi geh fi taak tu ahn.

15. Wai wi fi seh “aymen” da di en a wahn pryaa?

¹⁵ Wai wi fi seh “aymen” da di en a wahn pryaa? Bikaaz da wahn way fi shoa dat wi meen weh wi seh. (Psalm 41:13) If sombadi di seh wahn poblik pryaa, di Baibl teech wi dat ih gud fi seh “aymen” wen di pryaa don, eeda tu wiself er owt lowd, fi shoa dat wi agree wid weh di persn seh.​—1 Chronicles 16:36; 1 Korintyanz 14:16.

16. Yu tink Gaad ansa wi pryaaz, ahn wai?

¹⁶ Yu tink Gaad ansa wi pryaaz? Yes, bikaaz di Baibl kaal hihn “di Wan weh hyaa wi pryaaz.” (Psalm 65:2) Soh Jehoava hyaa an ansa di sinsyaa pryaaz a milyanz a peepl, an ih ansa dehn eena lata difrent wayz.

17. How Jehoava yooz ih aynjel an ih servant dehn pahn di ert fi ansa wi pryaaz?

¹⁷ Jehoava yooz ih aynjel an ih servant dehn pahn di ert fi ansa wi pryaaz. (Heebrooz 1:13, 14) Wahn lata egzampl deh bowt peepl hoo mi pray fi andastan di Baibl er fi noa Gaad. Den noh lang afta dat, wan a Jehoava Witnisiz vizit dehn. Egzampl laik dehndeh shoa dat di aynjel dehn di tek paat eena di preechin a di “Gud Nyooz” weh di hapm aal oava di ert. (Reed Revilayshan 14:6.) Ahn, wahn lata wi pray tu Jehoava bowt wahn spesifik prablem er sohnting weh wi  need, ahn den geh help fahn wan a wi Kristyan bradaz er sistaz.​—Proverbs 12:25; Jaymz 2:16.

18. How Jehoava yooz ih hoali spirit ahn di Baibl fi ansa wi pryaaz?

¹⁸ Jehoava yooz ih hoali spirit fi ansa wi pryaaz. Wen wi pray fi help fi deel wid wahn prablem, ih ku yooz ih hoali spirit fi gi wi di gaidans ahn schrent wi need. (Koloashanz 1:11) Jehoava yooz di Baibl fi ansa wi pryaaz ahn fi help wi mek gud disizhan. Wen wi reed di Baibl, wi mait kohn kraas sohn skripcha weh wahn help wi. Er, Jehoava ku yooz wahn persn fi gi wahn koment da wan a wi meetin dehn, an ih mait bee egzakli weh wi need fi hyaa. Er, ih ku yooz wahn elda eena di kangrigayshan fi seh sohnting inkorijin fahn di Baibl tu wi.​—Galayshanz 6:1.

19. Wai wi mait feel laik Jehoava noh di ansa wi pryaaz?

¹⁹ Sohntaim wi mait wanda, ‘Wai Jehoava noh di ansa mi pryaaz?ʼ Memba, hihn noa wen ahn how fi ansa wi pryaaz, an ih noa weh wi need. Wi mait haftu pray fi wahn lee wail fi shoa dat wi reeli meen weh wi seh ahn fi shoa dat wi ga fayt eena ahn. (Look 11:5-10) Sohntaim Jehoava ansa wi pryaaz eena wahn way weh wi noh di ekspek. Fi egzampl, wi mait pray bowt wahn prablem, bot insteda geh rid a di prablem, ih mait gi wi di schrent fi deel wid it.​—Reed 2 Korintyanz 4:7.

20. Wai wi fi pray aal di taim?

²⁰ Soh, da wahn privilij fi pray tu Jehoava! Wee noa dat hihn wahn lisn tu wi. (Psalm 145:18) Ahn di moa wi pray fahn wi haat, di schranga wi frenship wid Jehoava wahn get.