CHAPTA 9
“Gaad Chreet Evribadi di Saym Way”
Kristyanz staat preech tu peepl fahn ada nayshanz
Dis chapta bays pahn Aks 10:1–11:30
1-3. Weh Gaad mi mek Peeta si eena ih vizhan, ahn wai ih impoatant fi mek wi andastan weh da vizhan meen?
DA MI di yaa 36 C.E. ahn Peeta mi deh da Japa, wahn siti fronta di see. Da mi wahn hat day ahn Peeta mi deh pan tap a di flat roof a di hows di pray. Hihn mi stay da Japa fi sohn dayz wid wahn man weh naym Saiman, hoo mi liv kloas tu di see an ih yoostu mek leda fahn animal skin. Moas Jooz wuda neva stay wid sombadi weh du dis kaina werk, soh di fak dat Peeta mi stay da fi hihn hows shoa dat Peeta neva prejudis. a Bot Jehoava mi waahn Peeta andastan dat Hihn chreet evribadi di saym way, soh ih teech ahn wahn impoatant lesn.
2 Wail Peeta mi-di pray, hihn si wahn vizhan. Eena di vizhan, ih mi si sohnting weh luk laik wan big linen sheet weh mi gat een aal kaina animal weh, akaadn tu di Laa, di Jooz neva mi fi eet. Ahn jos fi si dehndeh animal da-mi sohnting shakin fi eni Joo. Wahn vais fahn hevn tel ahn fi kil wan a dehndeh animal an eet it. Bot Peeta ansa: “Ai neva eet eniting weh noh kleen ahn weh noh hoali.” Di vais fahn hevn tel ahn chree taimz: “Gaad don seh dehnya tingz hoali, soh stap seh dehnya tingz noh kleen.” (Aks 10:14-16) Peeta mi feel kanfyooz an ih mi wanda weh aala dat mosi mi meen, bot Jehoava mi help ahn andastan it. Mek wi si how.
3 Wi need fi andastan weh Peeta vizhan meen, bikaaz ih teech wi sohnting impoatant bowt how Gaad si peepl. An az chroo Kristyanz, wi kyaahn gi wahn gud witnis bowt Gaad Kingdom if wi noh si peepl di saym way Gaad si dehn. Fi mek wi andastan di meenin a weh Peeta mi si, mek wi luk pahn weh mi hapm bifoa an afta Peeta si dis vizhan.
Aks 10:1-8)
“Aalwayz di pray” (4, 5. Hoo da-mi Kerneelyos, ahn weh hapm wen ih mi-di pray?
4 Peeta neva ga no aidyaa weh mi hapm di day bifoa da Seezareeya. Wahn man weh naym Kerneelyos mi geh wahn vizhan tu. Hihn mi deh bowt 30 mailz naat a Japa. Kerneelyos da-mi wahn aafisa eena di Roaman aami ahn hihn mi “wership Gaad.” b Hihn mi tek gud kayr a ih famili, an “evribadi eena ih hows mi wership Gaad.” Kerneelyos da neva wahn Joo an ih neva fala di Jooish rilijan. Bot stilyet, hihn mi shoa kainis tu Jooz weh mi poa, an ih wuda gi dehn moni er ada gifs. Hihn mi hombl an ih mi “aalwayz di pray.”—Aks 10:2.
5 Bowt chree aklak eena di aftanoon, Kerneelyos mi-di pray wen ih geh wahn vizhan. Wahn aynjel tel ahn: “Gaad hyaa aala yu pryaaz, ahn hihn noatis how yu help owt poa peepl, an ih memba yu.” (Aks 10:4) Den Kerneelyos du weh di aynjel tel ahn, an ih sen som a ih mesinjaz fi goh luk fi Peeta. Kerneelyos mi wahn bee di fers persn fahn ada nayshanz weh mi wahn ton Kristyan.
6, 7. (a) Gi wahn ekspeeryens weh shoa dat Jehoava ansa di pryaaz a dehn wan weh reeli waahn noa moa bowt ahn. (b) Weh wi laan fahn dehnya kaina ekspeeryens?
6 Yu tink Gaad ansa di pryaaz a peepl weh reeli hombl ahn weh waahn laan bowt Ahn? Mek wi luk pahn di egzampl a wahn laydi fahn Albania. Wahn sista mi gi shee Di Wachtowa weh mi ga wahn aatikl bowt how fi rayz pikni. c Dis da weh shee tel di sista: “Yu noh wahn bileev mi, bot Ai jos mi-di pray tu Gaad fi help mi rayz mi too daata. Fi shoar hihn sen yu! Weh yu tel mi toch mi haat ahn da egzakli weh Ah mi need!” Di laydi an ih daata dehn staat stodi di Baibl, ahn laytaraan ih hozban staat stodi tu.
7 Dehnya kaina ekspeeryens hapm wahn lat aal rong di werl. Soh wi kyaahn seh ih hapm jos bai chaans. Weh dis teech wi? Fers, Jehoava ansa di pryaaz a hombl peepl weh waahn laan moa bowt ahn. (1 Ki. 8:41-43; Ps. 65:2) Ahn sekant, di aynjelz di sopoat wi eena di preechin werk.—Rev. 14:6, 7.
‘Peeta Mi-Di Chrai Figa Owt Weh di Vizhan Meenʼ (Aks 10:9-23a)
8, 9. Weh Gaad mi tel Peeta chroo di hoali spirit, ahn weh Peeta mi du?
8 Peeta stil mi deh pahn di rooftap an ih mi-di “chrai figa owt weh di vizhan meen” wen chree mesinja fahn Kerneelyos reech da Saiman hows. (Aks 10:17) Yu tink Peeta, hoo chree taimz mi rifyooz fi eet food weh Jooz neva alow fi eet, wuda bee wilin fi goh da di hows a wahn man weh da noh wahn Joo? Gaad mi yooz ih hoali spirit fi help ahn noa weh fi du eena da sichuwayshan. Dis da weh ih tel ahn: “Chree man di luk fi yu. Soh goh dongstayz ahn goh lang wid dehn, noh tink twais bowt it, bikaaz da mee mi sen dehn.” (Aks 10:19, 20) Fi shoar di vizhan bowt di big linen sheet weh Peeta mi si mi help ahn fala weh Gaad mi tel ahn chroo di hoali spirit.
9 Wen Peeta fain owt dat wahn aynjel mi tel Kerneelyos fi sen dehnya mesinja fi luk far ahn, Peeta invait dehn eena di hows ahn dehn “stay deh wid ahn az ih ges.” (Aks 10:23a) Bikaaz Peeta mi-di andastan wat da Gaad wil, hihn staat tu chaynj di way ih tink. Dis shoa dat Peeta da-mi wahn obeedyant apasl.
10. How Jehoava di help ih peepl tudeh, ahn weh kweschanz wi shuda aks wiself?
10 Eevn op tu tudeh, Jehoava di help ih peepl andastan ih wil lee bit bai lee bit. (Prov. 4:18) Ahn Hihn yooz ih hoali spirit fi gaid di “faytful ahn waiz slayv.” (Mach. 24:45) Sohntaim, wi geh wahn klayra andastandin a sertn Baibl chroots er wi wuda chaynj di way wi du tingz az wahn aaganaizayshan. Soh, ih wuda gud fi aks wiself: ‘Ai wilin fi chaynj mi tinkin? Ai hapi fi fala dehnya dairekshan?ʼ
Peeta “Koman fi Mek Dehn Geh Baptaiz” (Aks 10:23b-48)
11, 12. Weh Peeta du wen ih reech da Seezareeya, ahn weh lesn hihn mi laan?
11 Di day afta Peeta geh di vizhan, hihn, siks Jooish bradaz fahn Japa, ahn di chree mesinjaz fahn Kerneelyos gaahn da Seezareeya. (Aks 11:12) Kerneelyos mi-di wayt fi Peeta. Soh bai di taim di ten a dehn reech, Kerneelyos mi don gyada tugeda “ih relitiv dehn ahn kloas frenz,” hoo da neva Jooz. (Aks 10:24) Peeta du sohnting weh hihn tink ih wuda neva du bifoa. Hihn gaan eena di hows a wahn man weh neva serkomsaiz an ih seh: “Unu noa dat ih gens di laa fi mek wahn Joo taak wid wahn man fahn wahn nada rays er eevn goh op tu ahn, an yet Gaad shoa mee dat Ai noh fi seh dat nobadi noh kleen er hoali eena Gaad sait.” (Aks 10:28) Bai den, Peeta mi andastan dat di vizhan neva jos di taak bowt weh kaina food ih shuda eet er noh eet. Bot dat ih aalso shuda neva seh dat “nobadi noh kleen er hoali eena Gaad sait,” nat eevn wahn persn fahn ada nayshanz.
“Kerneelyos mi-di ekspek dehn, soh ih kaal ih relitiv dehn ahn kloas frenz tugeda.”—Aks 10:24
12 Evribadi da Kerneelyos hows mi wilin fi hyaa weh Peeta mi ga fi seh. Dis da weh Kerneelyos mi seh: “Aala wi deh ya fronta Gaad fi hyaa weh Jehoava koman yu fi tel wi.” (Aks 10:33) Jos imajin how yoo wuda feel if sombadi shoa soh moch inchres fi waahn laan bowt Jehoava! Weh Peeta mi du? Hihn staat aaf wid dehnya powaful werdz: “Now Ai andastan fi chroo dat Gaad chreet evribadi di saym way. Ahn hihn aksep enibadi weh fyaa Gaad ahn du weh rait, noh mata weh nayshan dehn kohn fram.” (Aks 10:34, 35) Peeta mi laan dat Gaad chreet evribadi di saym way; ih noh joj nobadi fi dehn kolcha, dehn skin kala, er di konchri weh dehn kohn fram. Soh Peeta preech tu dehn bowt Jeezas minischri, det, an ih rezorekshan.
13, 14. (a) Wai di baptizm a di peepl fahn ada nayshanz eena 36 C.E. da-mi wahn impoatant taim eena hischri? (b) Wai wi noh fi joj peepl weh wi preech tu?
13 Sohnting hapm weh mi neva hapm bifoa. “Wail Peeta mi stil di taak,” Gaad mi poar owt ih hoali spirit pahn “peepl fahn ada nayshanz.” (Aks 10:44, 45) Dis da di onli taim di Baibl menshan dat peepl geh di hoali spirit bifoa dehn geh baptaiz. Peeta mi andastan dat Gaad mi aksep dehnya peepl az ih servants, soh hihn “koman fi mek dehn geh baptaiz.” (Aks 10:48) Wen dehnya peepl weh da neva Joo geh baptaiz ahn ton Kristyan eena 36 C.E., dat da-mi di taim wen di nayshan a Izrel mi stap bee Gaad speshal peepl. (Dan. 9:24-27) Soh dat da wen Peeta yooz di terd ahn laas kee fahn di “keez fi di Kingdom.” (Mach. 16:19) Dis kee mi gi di peepl weh da neva Joo ahn weh neva serkomsaiz di apachooniti fi bee anointid ahn fi rool da hevn.
14 Az wi preech di gud nyooz tudeh, wee noa dat “Gaad noh shoa no fayvritizm.” (Roam. 2:11) Fi Hihn wil da fi mek “aal kaina peepl geh sayv.” (1 Tim. 2:4) Soh wi shuda neva joj peepl bays pahn how dehn luk. Da fi wee rispansabiliti fi preech bowt Gaad Kingdom tu evribadi, noh mata dehn skin kala, dehn kolcha, weh dehn kohn fram, er weh dehn bileev eena.
“Dehn Stap Aagyu . . . ahn Dehn Prayz Gaad” (Aks 11:1-18)
15, 16. (a) Wai som a di Jooish Kristyanz mi staat tu kritisaiz Peeta? (b) How Peeta mi eksplayn wai ih mi baptaiz peepl weh da neva Joo?
15 Peeta mi soh eksaitid fi goh da Jeroosalem fi tel di bradaz weh mi hapm da Seezareeya. Bot di bradaz da Jeroosalem mi don hyaa bowt how peepl a ada nayshanz mi-di “aksep di werd a Gaad” bifoa Peeta kuda eevn tel dehn bowt it. Soh lee bit afta Peeta reech, “peepl weh mi stik tu di laa bowt serkomsizhan staat tu kritisaiz ahn.” Dehn mi beks bad wid Peeta bikaaz ih mi “gaan eena di hows a peepl weh noh serkomsaiz [an ih] eevn eet wid dehn.” (Aks 11:1-3) Di prablem da neva dat peepl fahn ada nayshanz mi geh fi bee falowaz a Krais. Insted, dehnya Jooz mi bileev dat fi mek peepl fahn ada nayshanz wership Gaad, dehn mi haftu obay di Laa weh Jehoava gi Moaziz, weh inklood serkomsizhan. Ih mi klyaa dat ih mi haad fi mek dehnya Jooish Kristyanz stap obay di Laa weh Gaad gi Moaziz.
16 How Peeta mi eksplayn wai hihn mi baptaiz peepl weh da neva Joo? Akaadn tu Aks 11:4-16, hihn menshan foa tingz weh mi mek hihn noa fi shoar dat Gaad mi-di gaid ahn: (1) Gaad mi mek ih geh wahn vizhan da Saiman hows (Vers 4-10); (2) di hoali spirit mi tel ahn weh fi du (Vers 11, 12); (3) wahn aynjel mi vizit Kerneelyos (Vers 13, 14); ahn (4) di hoali spirit mi kohn pahn peepl weh da noh Joo. (Vers 15, 16) Peeta finish aaf ih speech wid wahn inchrestin kweschan: “If Gaad mi gi dehn di saym free gif weh hihn mi gi wee weh bileev eena di Laad Jeezas Krais, da hoo mee soh fi get eena Gaad way?”—Aks 11:17.
17, 18. (a) Weh disizhan di Jooish Kristyanz mi haftu mek afta dehn hyaa weh Peeta mi eksplayn? (b) Wai ih noh aalwayz eezi fi stay yoonaitid eena di kangrigayshan? (c) Weh kweschanz wi need fi aks wiself?
17 Afta dehn Jooish Kristyanz mi hyaa weh Peeta mi eksplayn, dehn mi need fi mek wahn disizhan. Yu tink dehn wuda bee wilin fi stap joj peepl fahn ada nayshanz ahn welkom dehn az dehn bradaz ahn sistaz? Di akonk tel wi: “Wen dehn hyaa dis, dehn stap aagyu wid Peeta, ahn dehn prayz Gaad ahn seh: ‘Soh den, ih playn fi si dat Gaad waahn di peepl fahn ada nayshanz ripent ahn geh laif.ʼ” (Aks 11:18) Sins dehn mi wilin fi chaynj dehn tinkin, dehn pazitiv atichood mi help di kangrigayshan fi stay yoonaitid.
18 Nowadayz, ih ku bee haad fi mek Jehoava servants stay yoonaitid bikaaz dehn da “peepl fahn owta aala di nayshan dehn ahn chraib ahn rays ahn peepl weh taak difrent langwij.” (Rev. 7:9) Wahn lata kangrigayshan tudeh ga peepl fahn difrent konchri, rays, ahn kolcha. Wi need fi aks wiself: ‘Ai eezi fi joj peepl bikaaz dehn difrent? Ai mek op mi main fi noh chreet mi bradaz ahn sistaz laik if Ai beta dan dehn bikaaz a mi skin kala, mi kolcha, mi rays, er weh Ah kom fram?ʼ Memba di mistayk dehn weh Peeta (Seefas) mi mek wahn fyoo yaaz afta di fers groop a peepl weh da neva Joo mi ton Kristyan? Bikaaz adaz mi luk dong pahn peepl weh da neva Joo, Peeta “kot dehn aaf” ahn Paal mi haftu karek Peeta tinkin. (Gal. 2:11-14) Soh wi need fi bee veri kyaaful fi noh tink dat wee beta dan adaz bikaaz dehn difrent fahn wee.
“Wahn Lata Peepl Mi Bileev” (Aks 11:19-26a)
19. Hoo di Jooish Kristyanz da Antiyak mi staat preech tu, ahn wat da-mi di rizolt?
19 Afta dehn mi laan wat da Gaad wil, yu tink Jeezas falowaz mi staat tu preech tu peepl fahn ada nayshanz? Noatis weh mi hapm da Antiyak eena Siriya. d Dehn mi ga wahn big groop a Jooz weh mi liv deh, ahn dehn neva ga no kaina prablemz wid peepl fahn ada nayshanz. Soh Antiyak da-mi wahn nais teritori fi preech tu peepl weh da neva Joo. Rait deh, sohn Jooish Kristyanz mi staat preech di gud nyooz tu “peepl weh taak di Greek langwij.” (Aks 11:20) Dis mesij da neva onli fi Jooz weh taak di Greek langwij, bot da mi aalso fi peepl weh neva serkomsaiz. Jehoava mi bles di preechin werk, ahn “wahn lata peepl mi bileev.”—Aks 11:21.
20, 21. How Baarnabas mi shoa dat ih hombl, ahn how wee ku kapi fi hihn egzampl eena wi minischri?
20 Di bradaz da Jeroosalem mi sen Baarnabas da Antiyak fi help preech di gud nyooz. Bot dehn mi ga lata peepl weh mi waahn laan, soh Baarnabas mi wahn need help. Ahn hoo beta dan Saal, sins hihn mi wahn bee di apasl tu di nayshanz? (Aks 9:15; Roam. 1:5) Yu tink Baarnabas mi si Saal az kompetishan? Non ataal! Insted, hihn mi hombl an ih mi noa dat ih mi need help. Soh Baarnabas gaahn da Tarsos fi pik op Saal ahn kehr ahn da Antiyak fi mek ih help ahn. Dehn werk tugeda fi wahn yaa di bil op an inkorij di kangrigayshan.—Aks 11:22-26a.
21 How wee ku shoa dat wi hombl eena wi minischri? Wi need fi aksep dat wi kyaahn du evriting pahn wi oan. Aala wi ga difrent skilz ahn weeknis. Som Kristyanz du gud pahn infaamal witnisin er di preech fahn hows tu hows. Bot dehn mait fain it haad fi du ritern vizits er fi staat Baibl stodiz. If yoo waahn du beta eena som paat a di minischri, yu shuda praabli aks sohnbadi fi help yu. If yu du dat, yu wahn geh fi bee wahn beta teecha a di Baibl ahn yu wahn injai yu servis eevn moa.—1 Kor. 9:26.
“Sen Help tu di Bradaz” (Aks 11:26b-30)
22, 23. How di bradaz da Antiyak mi shoa dat dehn lov dehn bradaz ahn sistaz, ahn how wee du di saym ting tudeh?
22 Antiyak da-mi di fers plays weh “chroo di gaidans a Gaad, dat peepl staat kaal di disaipl dehn Kristyanz fi di fers taim.” (Aks 11:26b) Dat da-mi wahn gud naym weh Gaad gi dehn bikaaz dehn mi liv dehn laif laik how Krais mi teech dehn. Di peepl a di nayshanz weh mi ton Kristyanz ahn di Jooish Kristyanz mi lov wan anada. How wi noa dis? Mek wi si weh mi hapm joorin di taim a wahn grayt famin rong 46 C.E. e Wahn famin wuda afek moasli poa peepl hoo noh ga lata moni er ekschra food. An ih luk laik lata Jooish Kristyanz weh mi liv da Judeeya mi poa ahn mi need help joorin dis famin. Soh wen di bradaz fahn Antiyak, eevn dehn wan weh da neva Joo, mi hyaa bowt di famin, dehn “sen help tu di bradaz da Judeeya.” (Aks 11:29) Yu kuda mi si di lov weh dehn mi ga fi dehn bradaz ahn sistaz!
23 Gaad peepl du di saym ting tudeh. Wen wi hyaa dat wi bradaz ahn sistaz fahn ada konchriz er eena wi oan konchri need help, wi moa dan hapi fi help dehn owt eena eni way wi kud. Di Branch Komiti dehn wuda hori aaganaiz sohn Dizaasta Rileef Komiti soh dat wi ku help wi bradaz ahn sistaz weh geh afektid bai harikayn, ertkwayk, sunami, er eni nachral dizaasta. Wen wi help wi bradaz ahn sistaz, wi shoa dat wi reeli lov dehn.—Jan 13:34, 35; 1 Jan 3:17.
24. How wee ku shoa dat wi andastan di meenin a Peeta vizhan?
24 Az chroo Kristyanz, wi noa dat ih impoatant fi laan fahn di vizhan weh Peeta mi geh pahn di rooftap da Japa. Jehoava, di Gaad weh wi wership, da wahn Gaad weh noh shoa no fayvritizm. Da fi hihn wil dat wi gi wahn gud witnis bowt fi hihn Kingdom tu adaz, noh mata weh dehn kohn fram, dehn kolcha, skin kala, er how peepl vyoo dehn. Soh, wi waahn preech tu evribadi weh waahn lisn ahn gi dehn di apachooniti fi serv Jehoava.—Roam. 10:11-13.
Wen wi bradaz need help, wi moa dan hapi fi help dehn
a Sohn Jooz yoostu luk dong pahn peepl weh werk wid leda bikaaz da taip a werk mi ga fi du wid ded animal ahn dehn skin, ahn dehn mi kansida dat disgostin. Sayka dat, di Jooz neva alow dehnya peepl fi goh eena di templ, ahn dehn werk plays mi haftu deh bowt 70 fut fahn wahn tong. Dat da praabli wan reezn wai Saiman hows mi deh “bai di see.”—Aks 10:6.
b Reed di baks weh naym “ Kerneelyos ahn di Roaman Aami.”
c Di aatikl weh naym “Reliable Advice for Raising Children,” deh eena di Novemba 1, 2006, kapi a Di Wachtowa, payj 4 tu 7.
d Reed di baks weh naym “ Antiyak Eena Siriya.”
e Akaadn tu di Jooish hischri raita Joseefos, dis “grayt famin” mi hapm joorin di rool a Empera Klaadiyos (41-54 C.E.).