1, 2. Weh mirakl Peeta ahn Jan mi du kloas tu di templ gayt weh dehn kaal Byootiful?

 DA-MI wahn brait ahn soni day, ahn di big krowd a faytful Jooz ahn Jeezas disaipl dehn mi-di goh da di templ fi “di aftanoon pryaaz.” a (Aks 2:46; 3:1) Peeta ahn Jan mi deh monks di krowd ahn dehn mi deh pahn dehn way tu di templ gayt weh dehn kaal Byootiful. Oava di lowd naiz ahn di komoashan eena di templ, wahn man mi-di hala di bayg fi moni. Hihn mi oava 40 yaaz oal, an ih mi kripl fan ih baybi.—Aks 3:2; 4:22.

² Az Peeta ahn Jan mi-di goh eena di templ, di man staat tu bayg dehn fi moni. Wen di apasl dehn stap fronta di man, hihn mi-di hoap fi geh moni fahn dehn. Bot Peeta tel ahn: “Ah noh ga silva ner goal, bot Ah wahn gi yu weh Ah gat. Ah di tel yu, eena di naym a Jeezas Krais di Nazareen, get op ahn waak!” Imajin how sopraiz di peepl mi sopraiz wen dehn si Peeta di hoal di man han ahn help ahn fi stan op fi di fers taim eena ih laif! (Aks 3:6, 7) Yoo ku picha di man di luk dong pan ih fut ahn chrai waak fi di fers taim? Noh wanda hihn jomp rong ahn staat tu prayz Gaad!

 3. Weh amayzin gif Peeta mi gi di krowd ahn di man weh ih mi heel?

³ Di krowd mi eksaitid ahn dehn ron gaahn meet Peeta ahn Jan da di waakway eena di templ. Da dis veri plays wehpaat Jeezas mi teech wahn krowd, Peeta mi-di eksplayn how da mirakl mi pasabl. (Jan 10:23) Hihn aafa dehn ahn di man weh ih heel wahn gif weh ga way moa valyu dan silva er goal. Dis gif da neva jos fi mek dehn geh heel eena wahn fizikal way, bot ih mi gi dehn di apachooniti fi ripent ahn geh fergivnis fi dehn sin dehn, ahn fi bee wahn disaipl a Krais, “di Cheef Leeda weh Gaad chooz fi gi laif.”—Aks 3:15.

 4. (a) Weh di powaful peepl mi chrai du afta Peeta ahn Jan mi heel di man? (b) Weh too kweschan wi wahn ansa?

⁴ Wat a day! Wahn kripl man mi staat waak, ahn towznz a peepl mi  geh di apachooniti fi geh heel eena wahn spirichwal way. Dehnya peepl kuda mi andastan Gaad wil ahn how dehn ku liv eena wahn way weh hihn aksep. (Kol. 1:9, 10) Bikaaz a weh mi hapm da day, powaful peepl ton gens Krais falowaz ahn chrai fi stap dehn fahn obay Jeezas koman fi preech. (Aks 1:8) Dehnya powaful peepl mi tink dat Peeta ahn Jan da-mi “man wid onli wahn baysik ejukayshan.” Bot weh wi ku laan fahn how Peeta ahn Jan mi preech tu di krowd? b (Aks 4:13) How wi ku shoa korij laik dehn too faytful apasl an ada disaiplz wen dehn mi-di fays persikyooshan?

 5. Weh wi laan fahn di way how Peeta mi taak tu di krowd?

⁵ Peeta ahn Jan mi stan op fronta di krowd eevn doa dehn mi noa dat som a dehn saym peepl mi bayg fi mek dehn kil Jeezas. (Maak 15:8-15; Aks 3:13-15) Peeta mi shoa lata korij wen hihn mi seh dat di kripl man mi geh heel eena Jeezas naym. Hihn neva frayd fi tel di krowd dat dehn mi rispansabl fi Jeezas det. Bot Peeta neva beks wid dehn, bikaaz hihn mi noa dat “dehn neva noa weh [dehn] mi-di du.” (Aks 3:17) Hihn mi eevn kaal dehn “bradaz” wen hihn mi-di taak tu dehn bowt di gud nyooz a di Kingdom. Ahn hihn mek dehn noa dat if dehn ripent ahn put fayt eena Krais, Jehoava wahn fergiv dehn sin ahn “rifresh dehn.” (Aks 3:19) Saym way soh, wee need fi ga korij ahn noh frayd fi preech bowt wen Gaad wahn bring jojment. Bot wi noh waahn ofen er joj adaz. Insted, wi waahn bee kain tu dehn ahn si dehn az wi fyoocha bradaz ahn sistaz. Ahn laik Peeta, mek wi foakos moa pahn di gud nyooz a di Kingdom.

 6. How Peeta ahn Jan mi shoa dat dehn hombl?

⁶ Di apasl dehn mi hombl. Dehn neva tek di kredit fi di mirakl dehn weh dehn mi du. In fak, Peeta mi tel di peepl: “Wai unu di luk pahn wee laik if da bai fi wee oan powa er bikaaz wee di serv Gaad dat dis man di waak?” (Aks 3:12) Peeta ahn di ada apasl dehn mi noa dat aal di gud rizolts eena dehn minischri da-mi bikaaz a Gaad powa, noh dehn oan. Dis mi help dehn fi bee hombl, ahn dehn gi aal di kredit ahn prayz tu Jehoava ahn Jeezas.

7, 8. (a) Weh apachooniti wi ku aafa peepl? (b) How di pramis dat “evriting wahn bee nyoo agen” di kohn chroo tudeh?

⁷ Wi aalso need fi bee hombl wen wi di tek paat eena di preechin werk. Af koars, Gaad spirit noh di gi Kristyanz di powa fi heel peepl eena wahn fizikal way. Bot, wi ku stil help peepl ga fayt eena Gaad ahn Krais ahn ga di apachooniti fi mek Jehoava fergiv dehn sin ahn rifresh  dehn. Evri yaa, towznz a peepl aksep dis gif ahn geh fi bee baptaiz disaiplz a Krais.

⁸ Wee di liv eena di taim wen “evriting wahn bee nyoo agen,” laik weh Peeta mi taak bowt. Weh Gaad mi pramis “chroo ih prafit dehn” mi kohn chroo wen Gaad Kingdom staat rool da hevn eena 1914. (Aks 3:21; Ps. 110:1-3; Dan. 4:16, 17) Lee bit afta dat, Krais mi staat tu help fi hihn disaiplz fi bring bak chroo wership pahn ert. Sayka dat, milyanz a peepl geh fi liv eena wahn spirichwal paradais. Dehn don geh rid a dehn oal way a laif ahn dehn “put aan di nyoo way a laif . . . akaadn tu [Gaad] wil.” (Ifee. 4:22-24) Jos laik how Gaad spirit mi heel di man weh mi kripl, saym way soh, da Gaad spirit help peepl chaynj ahn staat tu wership hihn. Soh wen wi di teech peepl, wi need fi bee laik Peeta ahn ga korij ahn yooz Gaad Werd eena wahn waiz way. Wen wi help sohnbadi fi bee wahn disaipl a Jeezas, da noh bikaaz a fi wee powa, da bikaaz a Jehoava powa.

9-11. (a) How di Jooish rilijos leeda dehn mi riyak tu weh Peeta ahn Jan mi seh? (b) Weh Peeta ahn Jan mi mek op dehn main fi du?

⁹ Di krowd mi eksaitid ahn naizi bikaaz a Peeta speech ahn bikaaz a di man weh mi geh heel weh mi-di jomp op ahn showt. Soh di kyaptin a di templ, hoo mi rispansabl fi kip peepl sayf eena di templ, ahn di cheef prees dehn kohn kwik-wan fi si weh mi-di goh aan. Dehnya man da-mi praabli Sadyusee, weh da-mi wahn rich politikal groop weh mi inkorij peepl fi ga pees wid di Roamanz. Dehn mi rijek di laa dehn weh di Farisee dehn mi onli lov, ahn dehn neva bileev eena di rezorekshan. c Dehn mi beks wen dehn fain Peeta ahn Jan di teech wid korij bowt Jeezas rezorekshan da di templ!

¹⁰ Di Sadyusee dehn mi chroa Peeta ahn Jan eena jayl ahn jreg dehn fronta di Jooish Sopreem Koat di neks day. Dehndeh prowd roola mi tink dat dehn beta dan di peepl ahn dehn mi luk pahn Peeta ahn Jan laik “dehn da-mi man wid onli wahn baysik ejukayshan” weh noh ga no rait fi teech da di templ. Soh wen dehn mi si Peeta ahn Jan di taak wid korij, dehn mi sopraiz ahn kanfyooz bikaaz dehnya man neva stodi da wahn faymos rilijos skool. Weh mi mek Peeta ahn Jan teech dis way? Wan reezn da-mi bikaaz “dehn yoostu goh rong goh preech wid Jeezas.” (Aks 4:13) Fi dehn Maasta mi teech wid lata atariti, noh laik di skraib dehn.—Mach. 7:28, 29.

¹¹ Sins di koat mi ga lata powa oava di peepl, dehn mi aada di apasl dehn fi stap preech. Jos wahn fyoo weeks erliya, da saym koat mi seh dat Jeezas mi “dizerv fi ded.” (Mach. 26:59-66) Bot dat neva mek Peeta  ahn Jan frayd. Eena wahn rispekful way, dehn mi tel dehndeh rich ahn powaful man: “If unu bileev dat Gaad tink ih raichos fi lisn tu unu insteda hihn, dat op tu unu. Bot az tu wee, wi kyaahn stap taak bowt di tingz wi mi si ahn hyaa.”—Aks 4:19, 20.

12. Weh ku help wi fi ga moa korij ahn schranga fayt?

¹² Yu tink yu ku shoa korij laik di apasl dehn? How yu feel wen yu ga di apachooniti fi preech tu sohnbadi rong weh yu liv weh rich, weh ga wahn gud ejukayshan, er weh ga wahn hai pozishan eena atariti? Wat if yu famili memba, skoolmayt, er werkmayt dehn mek fon a yu fi weh yu bileev eena? Yoo wuda feel frayd? If yes, noh onli yoo feel da way. Wen Jeezas mi deh pahn ert, hihn mi teech ih apasl dehn fi difen dehn bileefs wid kanfidens ahn rispek. (Mach. 10:11-18) Afta Jeezas geh rezorek, hihn mi pramis ih disaiplz dat hihn wahn deh wid dehn “evri day til di en a dis sistem a tingz.” (Mach. 28:20) Ahn tudeh, Jeezas di yooz “di faytful ahn waiz slayv” fi teech wi how fi difen fi wee fayt. (Mach. 24:45-47; 1 Peet. 3:15) Wi geh dis chraynin da wi kangrigayshan meetin dehn, laik wi midweek meetin, ahn chroo poblikayshanz weh bays pahn di Baibl, laik di aatikl dehn eena di sekshan weh naym “Ansaz tu Kweschanz Bowt di Baibl” pahn di jw.org websait. Yoo di goh da dehnya meetin ahn yu di yooz dehnya poblikayshan? If yu di du dat, yu wahn ga moa korij ahn yu fayt wahn geh schranga. Ahn laik di apasl dehn, notn wahn stap yu fahn taak bowt di wandaful Baibl chroot dehn weh yu laan.

13, 14. Weh wi shuda du wen peepl deh gens wi, ahn wai?

¹³ Soon afta Peeta ahn Jan mi geh rilees fahn koat, dehn mi meet op wid di res a di kangrigayshan. Ahn, “dehn staat tu pray tugeda tu Gaad.” Dehn mi pray fi korij fi kantinyu preech. (Aks 4:24) Peeta mi noa gud-wan dat ih foolish fi tink dat wee ku du Gaad wil pahn wi oan. Jos wahn fyoo weeks erliya, hihn mi tel Jeezas dat ih wahn neva lef ahn. In fak, ih tel ahn: “Eevn doa aala dehn wahn ron lef yu bikaaz a weh wahn  hapm tu yu, Ai wahn neva disoan yu!” Bot laik weh Jeezas mi prafesai, Peeta mi disoan ih fren ahn teecha. Da day, Peeta mi laan ih lesn.—Mach. 26:33, 34, 69-75.

¹⁴ Soh ih noh inof fi jos mek op wi main fi obay Jeezas koman fi preech. Wen peepl weh deh gens wi chrai mek wi stap serv Jehoava, wi waahn fala di egzampl a Peeta ahn Jan. Neva ferget fi pray tu Jehoava fi help yu. Aalso, aks di bradaz ahn sistaz eena di kangrigayshan fi help. Ahn taak tu di eldaz an ada spirichwali machoar bradaz ahn sistaz bowt weh yu di goh chroo. Wen adaz pray fi yu, Jehoava hyaa dehn pryaaz an ih gi yu di schrent weh yu need.—Ifee. 6:18; Jay. 5:16.

15. Weh egzampl ku help yu if yu mi stap preech fi wahn wail eena di paas?

¹⁵ If yu mi en op di stap preech sayka presha fahn adaz, noh mek dat diskorij yu. Memba, afta Jeezas mi ded, aala di apasl dehn mi stap preech fi wahn lee wail. Bot noh tu lang afta dat, dehn mi staat preech agen. (Mach. 26:56; 28:10, 16-20) Noh mek di mistayks weh yu mi du eena di paas diskorij yu. Insted, yooz di lesn dehn weh yu laan fahn dehndeh ekspeeryens fi bil op adaz.

16, 17. Weh di pryaa weh Jeezas disaipl dehn mi seh da Jeroosalem teech wi?

¹⁶ Weh wi shuda pray fa wen peepl weh ga atariti persikyoot wi? Noatis dat di disaipl dehn neva pray fi mek dehn noh fays persikyooshan. Dehn mi memba gud-wan weh Jeezas mi seh: “If dehn mi persikyoot mee, dehn wahn persikyoot unu tu.” (Jan 15:20) Dehnya laayal disaipl a Krais mi aks Gaad fi “pleez hyaa” how di peepl weh deh gens dehn di chretn dehn. (Aks 4:29) Di disaipl dehn mi si di biga picha, ahn dehn mi andastan dat di persikyooshan weh dehn mi-di fays mi-di mek prafesi kohn chroo. Jeezas mi teech dehn fi pray fi mek Gaad wil “tek plays pahn di ert.” Soh dehn mi noa dat ih mi wahn hapm noh mata weh hyooman roolaz seh.—Mach. 6:9, 10.

¹⁷ Fi mek dehn ku du Gaad wil, di disaipl dehn mi pray: “Gi yu slayv dehn di korij fi neva stap taak bowt yu werd tu adaz.” Ahn noatis how Jehoava mi ansa dehn kwik-wan: “Di hows weh dehn mi deh  staat tu shayk, an aala dehn geh ful op wid di hoali spirit ahn dehn mi-di taak di werd a Gaad wid korij.” (Aks 4:29-31) Notn ku stap Gaad wil fahn kohn chroo. (Isa. 55:11) Wi ku bee shoar dat hihn wahn gi wi di schrent weh wi need fi kip di preech wid korij eevn if wi enimi dehn powaful an ih luk laik ih noh pasabl fi mek Gaad wil kohn chroo.

18. Weh di bradaz ahn sistaz eena di kangrigayshan da Jeroosalem mi du fi wan anada?

¹⁸ Di nyoo kangrigayshan da Jeroosalem mi groa soh faas dat eena no taim ih mi ga moa dan 5,000 membaz. d Eevn doa dehn mi kohn fahn difrent plays, dehn mi ga “di saym way a tinkin ahn di saym feelin.” Soh dehn mi yoonaitid. (Aks 4:32; 1 Kor. 1:10) Dehn neva onli pray fi mek Jehoava bles dehn, bot dehn mi aalso help eech ada eena wahn spirichwal way. Dehn mi aalso shayr weh dehn mi gat. (1 Jan 3:16-18) Fi egzampl, di disaipl weh mi naym Joazef, hoo dehn mi aalso kaal Baarnabas, mi sel wahn lan weh ih mi oan an ih gi aal di moni tu di apasl dehn. Dehn mi yooz da moni fi help di nyoo disaiplz weh mi kohn fahn faar ahn weh mi stay lee langa da Jeroosalem fi schrentn dehn fayt.

19. Wai Jehoava mi kil Ananaiyas ahn Safaira?

¹⁹ Wahn kopl weh naym Ananaiyas ahn Safaira mi aalso sel wahn pees a lan ahn gi moni tu di apasl dehn. Dehn mi priten fi giv aala di moni weh dehn sel di lan fa. Bot dehn mi akchwali “hoal bak som a di moni.” (Aks 5:2) Sayka dis Jehoava mi kil dehn, noh bikaaz dehn neva giv inof moni, bot bikaaz dehn mi lai tu di apasl dehn. In fak, di Baibl seh dat dehn “neva jos lai tu man, [dehn] lai tu Gaad tu.” (Aks 5:4) Jos laik di hipokrit dehn weh Jeezas mi kandem, Ananaiyas ahn Safaira mi kay moa bowt di aana weh dehn ku geh insteda pleez Gaad.—Mach. 6:1-3.

20. Weh wi need fi kip in main wen wi gi tu Jehoava?

²⁰ Laik di faytful disaiplz da Jeroosalem eena di fers senchri, milyanz a Jehoava Witnisiz tudeh shoa how jenaros dehn jenaros. Dehn wilin fi gi doanayshan fi sopoat di preechin werk aal rong di werl. Nobadi foas dehn fi gi dehn taim er moni fi sopoat dis grayt werk. In fak, Jehoava noh waahn wi tink haad fi giv, an ih noh foas wi needa. (2 Kor. 9:7) Wi need fi memba dat di moas impoatant ting tu Jehoava da noh di amonk a moni weh wi giv, bot di reezn wai wi giv. (Maak 12:41-44) Wi noh waahn bee laik Ananaiyas ahn Safaira ahn serv Gaad fi selfish reezn. Insted, laik Peeta, Jan, ahn Baarnabas, wi waahn serv Jehoava bikaaz wi reeli lov Gaad ahn peepl.—Mach. 22:37-40.