1-3. Weh mi hapm wen Jeezas mi lef ih apasl dehn, ahn weh kweschanz kom op?

 WEN Jeezas mi ded, ih apasl dehn mi veri sad. Bot wen ih geh rezorek, di apasl dehn mi veri hapi an eksaitid aal oava agen! Fi 40 dayz Jeezas mi apyaa fronta ih falowa dehn fi teech an inkorij dehn. Dehn mi lov deh wid Jeezas ahn dehn neva waahn hihn lef dehn. Bot di day mi kohn wen dehn mi si Jeezas fi di laas taim.

² Wail dehn mi-di stan op pahn di Mongt a Alivz, di apasl dehn mi-di lisn tu evri werd weh Jeezas mi seh. Wen Jeezas mi finish taak, hihn mi lif op ih han ahn bles dehn. Dehn mi waahn hihn kantinyu teech dehn, bot dat da-mi di day wen dehn si Jeezas fi di laas taim. Soh afta hihn mi taak tu dehn, hihn mi staat tu goh op da hevn. Den wahn klowd mi kova  ahn, an dehn kudn si ahn agen. Bot dehn stil kudn stap gayz eena di skai wail hihn mi-di goh op.—Look 24:50; Aks 1:9, 10.

³ Dis impoatant ivent mi chaynj di laif a Jeezas apasl dehn. Weh dehn mi wahn du sins dehn Maasta, Jeezas Krais, gaan op da hevn? Wi ku bee shoar dat Jeezas mi pripyaa dehn fi kantinyu du di werk weh hihn mi staat. How hihn mi chrayn dehn? How dehn mi rispan tu dis chraynin? Ahn weh Kristyanz tudeh ku laan fahn dehnya ivents? Az wi diskos di fers chapta a di buk a Aks, wi wahn fain di inkorijin ansaz.

 4. How Look staat aaf ih akonk a di buk a Aks?

⁴ Eena di buk a Aks, Look mi staat aaf di rait tu Tiyofilos, di saym persn hoo hihn mi rait ih Gaspl akonk tu sohn yaaz erliya. a Di fak dat Look staat aaf di gi wahn somari a di ivents weh deh da di en a ih Gaspl proov dat di buk a Aks di kantinyu da akonk. Hihn mi yooz difrent werdin an ih mi ad sohn moa deetayl soh dat ih reedaz noa dat hihn wahn rait bowt weh mi hapm afta Jeezas ded.

5, 6. (a) Weh mi help Jeezas falowaz fi kip dehn fayt schrang? (b) Wat da sohn proof weh help Kristyanz fi ga schrang fayt tudeh?

⁵ Weh mi mek Jeezas falowaz kip dehn fayt schrang? Da Aks 1:3, wi reed dat dehn mi si ahn fi 40 dayz ahn dat “ih apyaa tu dehn lata taimz fi kanvins dehn dat hihn mi alaiv.” Sohntaim ih mi apyaa tu wan ahn too a dehn, sohntaim tu aala dehn, ahn wahn taim tu moa dan 500 bradaz ahn sistaz. (1 Kor. 15:3-6) Jeezas mi proov dat hihn mi alaiv fi chroo!

⁶ Di fayt a chroo Kristyanz tudeh aalso bays pahn pazitiv proof. Yu tink eni proof deh dat Jeezas mi liv pahn ert? Dat hihn mi ded fi wi sin dehn? Ahn dat hihn mi geh rezorek? Af koars! Gaad Werd ga di akonk a peepl weh mi witnis dehnya ivent, ahn dat gi wi aal di proof weh wi need. Wen wi stodi dehnya akonk ahn pray fi Jehoava help fi andastan weh wi reed, wi ku schrentn wi fayt. Memba dat reel fayt bays pahn klyaa proof. An if wi waahn liv fareva, ih impoatant fi ga schrang fayt.—Jan 3:16.

 7. How wi ku fala Jeezas egzampl wen wi di preech ahn teech?

⁷ Jeezas mi aalso “taak wid dehn bowt di Kingdom a Gaad.” Fi egzampl, hihn mi eksplayn sohn prafesi bowt how di Mesaiya mi wahn haftu sofa ahn ded. (Look 24:13-32, 46, 47) Soh wen hihn mi-di eksplayn ih roal az di Mesaiya, hihn mi-di foakos pahn Gaad Kingdom, sins hihn mi wahn bee di fyoocha King. Di Kingdom da-mi aalwayz di mayn foakos a  Jeezas preechin werk, ahn dat da di saym ting ih falowaz foakos pahn wen dehn di preech.—Mach. 24:14; Look 4:43.

8, 9. (a) Weh too rang aidyaa Jeezas apasl dehn mi ga? (b) How Jeezas mi help ih apasl dehn fi karek dehn tinkin? (c) Weh Kristyanz ku laan tudeh fahn weh Jeezas mi seh?

⁸ Wen di apasl dehn mi gyada pahn di Mongt a Alivz, dat da-mi di laas taim dehn mi meet wid Jeezas rait ya pahn ert. Bot dehn mi reeli waahn di ansa tu dis kweschan: “Laad, yoo wahn gi bak di kingdom tu Izrel rait now?” (Aks 1:6) Da kweschan shoa dat di apasl dehn mi ga too rang aidyaa. Fers, dehn mi tink dat Gaad wuda gi bak di Kingdom tu di nayshan a Izrel rait ya pahn ert. Ahn sekant, wen dehn mi seh “rait now,” ih shoa dat dehn mi ekspek da Kingdom fi staat tu rool rait away. How Jeezas mi help karek dehn tinkin?

⁹ Jeezas neva did taak bowt dehn fers rang aidyaa, praabli bikaaz hihn mi noa dat dehn mi wahn soon geh di karek ansa. In fak, jos ten dayz layta, ih disaipl dehn wuda si di biginin a wahn nyoo nayshan—di Izrel a Gaad! Di speshal rilayshanship bitween Gaad ahn di nayshan a Izrel mi-di kohn tu wahn en. Bot eena wahn kain way Jeezas mi karek dehn sekant rang aidyaa. Hihn mi rimain dehn: “Onli mai Faada ga di atariti fi set taimz ahn dayz wen tingz wahn hapm, soh unu noh need fi wori bowt dat.” (Aks 1:7) Onli Jehoava ga di atariti fi disaid wen fi hihn wil wahn tek plays. Bifoa Jeezas mi ded, hihn ihself mi seh dat nat eevn hihn mi noa “di day ner di owa” wen di en wahn kohn, bot “onli di Faada noa wen.” (Mach. 24:36) Tudeh tu, az Kristyanz wi noh sopoas tu wori tu moch bowt wen di en wahn kohn. Bikaaz if wi du dat, wi wahn di wori bowt tingz weh wi noh need fi wori bowt.

10. How di apasl dehn da gud egzampl fi wee tudeh, ahn wai wi shuda waahn kapi fi dehn egzampl?

¹⁰ Wi noh waahn joj Jeezas apasl dehn. Dehn man mi ga schrang fayt ahn dehn mi hombl inof fi aksep karekshan. An eevn doa dehn kweschan shoa dat dehn mi ga rang aidyaaz, ih aalso shoa sohnting gud bowt dehn. Lata taim Jeezas mi tel dehn: “Kip pahn di lukowt.” (Mach. 24:42; 25:13; 26:41) Eena wahn spirichwal way, dehn mi kip pahn di lukowt fi si weh Jehoava wahn du neks. Wee need fi du di saym ting tudeh, espeshali sins di laas dayz di geh kloasa ahn kloasa.—2 Tim. 3:1-5.

11, 12. (a) Weh werk Jeezas koman ih falowaz fi du? (b) Wai Jeezas mi rimain ih falowaz bowt di hoali spirit bifoa ih mi sen dehn fi preech?

¹¹ Jeezas mi rimain ih apasl dehn bowt weh shuda bee dehn mayn foakos. Hihn mi tel dehn: “Unu wahn geh powa wen di hoali spirit kohn pahn unu, an unu wahn gi wahn witnis bowt mee da Jeroosalem, eena aala Judeeya ahn Samayrya, an aal oava di ert.” (Aks 1:8) Di apasl dehn  mi fers haftu preech bowt Jeezas rezorekshan da Jeroosalem, wehpaat dehn mi kil ahn. Den, dehn wuda goh da Judeeya, den da Samayrya, til dehn reech aal oava di ert.

¹² Bifoa Jeezas mi sen ih disaipl dehn fi preech, hihn mi rimain dehn bowt di pramis dat di hoali spirit wahn help dehn. Ahn di werdz “hoali spirit” kom op moa dan 40 taimz eena di buk a Aks. Lata taim, dis eksaitin buk shoa dat wi kyaahn du Jehoava wil widowt di help a di hoali spirit. Soh, ih veri impoatant dat wi kip di pray far it! (Look 11:13) Wi need Jehoava hoali spirit now moa dan eva bifoa.

13. How faar Jehoava peepl di preech tudeh, ahn wai wi waahn stay bizi eena dis wandaful werk?

¹³ Fi di apasl dehn, “aal oava di ert” da-mi jos sertn paats a di werl. Bot tudeh, wee preech aal rong di werl. Soh, laik weh wi si eena chapta wan, Jehoava Witnisiz aksep da grayt asainment fi preech bikaaz dehn noa dat Gaad waahn aal kaina peepl fi hyaa di gud nyooz a di Kingdom. (1 Tim. 2:3, 4) Yoo di tek paat eena dis wandaful werk weh ku sayv peepl laif? No ada werk deh weh ku mek yu feel hapiya! Jehoava wahn gi yu di schrent weh yu need fi du da werk. Az yu reed di buk a Aks, ih wahn teech yu bowt di metodz weh yu ku yooz fi du dis werk gud, ahn yu wahn laan bowt di pazitiv atichood weh wahn help yu ga gud rizolts.

14, 15. (a) Weh di aynjelz mi seh bowt wen Krais kohn bak, ahn weh dehn mi meen? (Koment pahn di futnoat.) (b) Wai wi ku seh dat Krais mi kohn bak “eena di saym way” az wen ih gaan op da hevn?

¹⁴ Laik weh wi menshan da di biginin a dis chapta, Jeezas mi staat tu goh op da hevn den wahn klowd mi kova ahn, bot di 11 apasl dehn stil kudn stap gayz eena di skai. Sodn-wan, too aynjel apyaa ahn gi dehn dis kain kongsl: “Unu man fahn Gyalilee, wai unu di luk op eena di skai? Dis Jeezas weh don gaan op eena di skai wahn kohn bak eena di saym way how unu si ih gaan op.” (Aks 1:11) Yu tink di aynjel dehn mi meen dat Jeezas wahn kohn bak eena di saym badi, laik how ada rilijan teech? No, dat da neva weh dehn mi meen. How wi noa dat?

¹⁵ Di aynjelz neva seh dat Jeezas mi wahn kohn bak eena di saym kaina badi, bot dat ih wahn kohn bak “eena di saym way.” b Eena weh way hihn gaan op da hevn? Wen di aynjel dehn mi-di kongsl di apasl dehn, di apasl dehn kudn si Jeezas nohmoh kaaz a di klowd dehn. Onli dehn man mi noa dat Jeezas mi lef di ert ahn dat ih gaan op tu ih Pa da hevn. Soh Krais wuda kohn bak da saym way. Ahn dat da egzakli weh di hapm. Tudeh, onli di peepl weh ga di karek andastandin a di Baibl noa dat Jeezas di rool az King a Gaad Kingdom. (Look 17:20) Wee need fi fain proof dat Krais kohn bak ahn dat ih di rool az King. Ahn wi waahn help adaz fi si dat ih impoatant fi mek dehn aalso staat tu serv Gaad now.

16-18. (a) Weh wi laan bowt Kristyan meetinz fahn Aks 1:13, 14? (b) Weh wi ku laan fahn Jeezas ma egzampl? (c) Wai wi Kristyan meetinz impoatant fi wee tudeh?

¹⁶ Ih noh sopraiz wi dat di apasl dehn mi “gaahn bak da Jeroosalem wid lata jai.” (Look 24:52) Bot, weh dehn mi wahn du fi fala Krais gaidans ahn teechinz? Eena Aks 1:13, 14, wi reed dat dehn mi meet tugeda “opstayz eena di room” ahn wi laan sohn inchrestin tingz fahn dehndeh meetin. Rong dehn taim, sohn hows da Palestain wuda ga wahn opstayz room. Dehndeh hows wuda ga wahn step owtsaid weh goh op tu di room. Laik weh Aks 12:12 menshan, dis opstayz room kuda mi bilangz tu Maak ma. Wateva di kays, di plays neva fansi, an ih mi yoosful fi mek Krais falowaz meet tugeda. Bot hoo aal mi meet pahn da day, ahn weh dehn mi du?

¹⁷ Ih inchrestin dat da neva onli di apasl dehn, er di man dehn weh mi gyada da da meetin. “Sohn laydi” mi dehdeh tu, inkloodin Jeezas ma, Mayri. Dis da di laas taim di Baibl kaal shee bai naym. Ih inkorijin fi picha shee pahn da gyadarin, ahn fi si ahn az wahn hombl persn di wership Jehoava wid ih bradaz ahn sistaz widowt di kaal atenshan tu ihself. Mayri mosi mi veri hapi dat ih foa son dehn mi deh wid ahn, eevn doa dehn neva fala Krais wen hihn mi deh pahn ert. (Mach. 13:55; Jan 7:5) Bot afta Jeezas ded ahn geh rezorek, dehn atichood chaynj.—1 Kor. 15:7.

¹⁸ Noatis wai dehnya disaipl mi gyada tugeda pahn da day: “Aala dehn mi yoonaitid, ahn dehn mi kantinyu fi pray tugeda.” (Aks 1:14) Az Kristyanz, wi meetinz da wahn impoatant paat a wi wership. Wi gyada tugeda fi inkorij wan anada, fi geh gaidans ahn kongsl, bot moa impoatant, fi wership wi hevnli Faada, Jehoava. Wen wi pray ahn sing da dehnya meetinz, ih mek hihn veri hapi ahn wee benifit tu. Mek wi neva niglek dehnya meetinz weh mek wi fayt geh schranga!—Heeb. 10:24, 25.

19-21. (a) Weh wi laan fahn di fak dat Gaad mi alow Peeta fi tek di leed fi deel wid wahn impoatant mata eena di kangrigayshan? (b) Wai sohnbadi mi haftu tek Joodas plays, ahn weh wi ku laan fahn di way dehn setl di mata?

¹⁹ Now, Krais falowaz mi ga wahn impoatant prablem fi deel wid eena di aaganaizayshan, ahn di apasl Peeta mi tek di leed fi chrai setl di mata. (Vers 15-26) Ih inkorijin fi si how Jehoava mi stil yooz Peeta eevn doa sohn weeks erliya hihn mi disoan Jeezas chree taim. Bot Jehoava mi yooz Peeta bikaaz ih mi mek chaynjiz eena ih laif. (Maak 14:72) Aala wi sin ahn mek mistayk, ahn wi need fi rimain wiself agen ahn agen dat Jehoava “gud ahn redi fi fergiv” enibadi weh ripent fahn dehn haat.—Ps. 86:5.

²⁰ Sins Joodas mi bichray Jeezas, Peeta mi andastan dat sombadi mi haftu tek di plays a Joodas. Bot hoo mi kwalifai fi tek aan da rispansabiliti? Dis nyoo apasl mi fi bee wahn man weh mi fala Jeezas joorin ih minischri pahn ert ahn weh mi witnis ih rezorekshan. (Aks 1:21, 22) Dat goh lang wid Jeezas pramis: “Unu wahn sidong pahn di 12 chroan ahn  joj di 12 chraib a Izrel bikaaz unu fala mi.” (Mach. 19:28) Di skripcha mi aalso seh dat Nyoo Jeroosalem mi wahn ga “12 fongdayshan stoan.” (Rev. 21:2, 14) Dis shoa dat Jehoava mi waahn 12 apasl fi bee da fongdayshan eena di fyoocha. Ahn dehn man mi haftu fala Jeezas eena ih minischri wen hihn mi deh pahn ert. Soh Gaad mi help Peeta andastan dat weh di prafesi seh fi “mek sombadi els tek ih pozishan az wahn oavaseeya” mi-di rifaa tu Joodas.—Ps. 109:8.

²¹ How dehn mi chooz di nyoo apasl? Dehn mi chroa sohnting laik wahn dais fi noa hoo fi pik. Dis da-mi sohnting kaman eena Baibl taimz. (Lev. 16:7-10) Bot dis da di laas taim di Baibl menshan di yoos a dais eena dis way. Soh ih luk laik wen hoali spirit mi geh poar owt pahn di apasl dehn, dehn neva need fi fala da metod nohmoh. Bot noatis wai dehn mi yooz dais. Di apasl dehn mi saach fi wahn sain fahn Gaad fi noa hoo fi pik, soh dehn pray: “Wi Gaad, Jehoava, yoo noa weh deh eena evribadi haat, soh pleez shoa wi wich wan a dehnya man yu pik.” (Aks 1:23, 24) Dehn mi waahn Jehoava disizhan pahn di mata. Ahn hihn chooz Mataiyas, hoo moa dan laikli da-mi wan a di 70 disaiplz weh Jeezas mi sen owt fi preech. Dis da how Mataiyas mi geh fi bee wan a “di 12 apasl dehn.” c—Aks 6:2.

22, 23. Wai wi shuda obay di bradaz weh di tek di leed eena di kangrigayshan tudeh?

²² Dis Baibl pasij rimain wi dat Gaad waahn ih peepl fi bee wel aaganaiz. Op tu dis day, rispansabl bradaz geh apointid fi serv az oavaseeya eena di kangrigayshan. Di eldaz eena di kangrigayshan pray fi hoali spirit az dehn rivyoo di kwalifikayshanz weh bays pahn di Baibl fi apoint oavaseeyaz. Bikaaz a dis, di kangrigayshan chros dat hoali spirit apoint dehndeh bradaz. Wen wi obay di dairekshan a di bradaz weh di tek di leed, wi help evribadi fi werk eena wahn yoonaitid way eena di kangrigayshan.—Heeb. 13:17.

²³ Di fayt a Jeezas disaiplz mi geh schranga afta dehn si Jeezas geh rezorek ahn wen dehn si di chaynjiz eena di aaganaizayshan. Soh dehn mi redi fi di chalenjiz ahn werk heda dehn. Di neks chapta wahn diskos da eksaitin ivent.