1-6. Yooz di ekspeeryens dehn eena di paragraaf dehn fi shoa difrent wayz how Jehoava Witnisiz preech di gud nyooz.

 REBECCA, wahn yong Witnis fahn Ghana, mi kansida ih skool fi bee ih oan preechin teritori. Dat da wai shee mi aalwayz ga Baibl lichricha eena ih bag. Ahn joorin ih brayk taim, ih wuda luk fi eni apachooniti fi preech. In fak, ih staat stodi di Baibl wid som a ih klaasmayt dehn.

² Pahn di ailan a Madagascar, weh noh deh faar fahn di ees koas a Africa, dehn mi ga wahn marid kopl weh da painyaaz. Dehn yoostu waak bowt 15 mailz eena di brailin son hat fi get tu wahn faar vilij fi stodi di Baibl wid peepl weh waahn laan moa.

³ Witnisiz weh liv da Paraguay ahn sohn Witnisiz fahn 15 ada konchri mi bil wahn big boat soh dat dehn ku preech tu peepl weh liv dong di Paraguay ahn Paraná riva dehn. Dis big boat ga inof spays fi mek 12 peepl liv eena it. Tanks tu dis, dehnya Witnisiz ga di privilij fi kehr di gud nyooz a Gaad Kingdom da sohn ayrya weh noh eezi fi chravl tu.

⁴ Witnisiz da Alaska mi tek advantij a wahn speshal apachooniti fi preech. Joorin soma taim, wahn lata tooris fahn difrent konchri wuda kohn pahn krooz ship fi vizit Alaska. Soh, di Witnisiz wuda aaganaiz poblik witnisin kloas tu di ship dehn ahn ga poblikayshan avaylabl eena difrent langwij fi hoosoeva inchrestid. Da da ayrya, di bradaz mi haftu yooz wahn playn fi chravl tu sohn faar vilij fi preech tu di Aleut, Athabascan, Tsimshian, ahn Tlingit peepl.

⁵ Wahn brada weh naym Larry weh liv da Texas, U.S.A., mi ga wahn speshal teritori da di nersin hoam wehpaat hihn mi liv. Eevn doa hihn mi en op eena wahn weelchyaa bikaaz a wahn aksident, hihn mi aalwayz luk fi difrent wayz fi preech. Hihn mi taak tu adaz bowt Gaad Kingdom, ahn hihn mi tel dehn dat eena di nyoo werl hihn wahn ku waak agen.—Isa. 35:5, 6.

⁶ Wahn groop a Witnisiz mi chravl fi chree dayz pahn boat fahn Mandalay fi goh da wahn asembli da di naat a Myanmar. Bikaaz dehn mi soh eega fi preech, dehn kehr sohn Baibl lichricha fi aafa tu di ada pasinjaz  pahn di boat. Evri taim di boat mi stap da wahn tong er wahn vilij, dehn wuda get aafa di boat ahn waak rong di ayrya az kwik az pasabl fi aafa lichricha tu di peepl weh dehn meet. Ahn wen dehn wuda kohn bak pahn di boat, dehn wuda meet wahn hoal nyoo set a peepl fi preech tu.

7. Eena weh wayz Jehoava Witnisiz preech bowt Gaad Kingdom, ahn wat da dehn goal?

⁷ Dehnya da jos sohn fyoo egzampl weh shoa dat aal rong di werl dehn ga zelos servants a Jehoava weh eega fi “eksplayn . . . gud gud bowt di Kingdom a Gaad.” (Aks 28:23) Dehn goh preech tu peepl da dehn hows, pahn di schreet, oava di foan, an eevn rait letaz. Ahn dehn noh mis no apachooniti fi taak tu peepl wen dehn deh pahn bos, wen dehn di waak da paak, er wen dehn di tek dehn brayk da werk. Dehn eega di luk fi difrent apachooniti fi gi wahn gud witnis bowt Gaad Kingdom. Wi mait preech eena difrent wayz, bot wi ga di saym goal weh da fi preech di gud nyooz noh mata wehpaat peepl deh.—Mach. 10:11.

8, 9. (a) Wai yu wuda seh dat di preechin werk da laik wahn mirakl? (b) Weh kweschan kom op sins wi preechin werk kantinyu fi groa, ahn weh wi need fi du fi fain di ansa?

⁸ Jehoava Witnisiz di preech eena moa dan 235 lan tudeh. Yoo ku bee hapi if yu di du dis werk tu bikaaz yu di gi yu lee too sehn fi help peepl laan di gud nyooz aal oava di werl. Wai wi seh dat di werk weh Jehoava peepl di du aal oava di werl da laik wahn mirakl? Bikaaz eevn doa wi fays chalenjiz, laik persikyooshan ahn wi werk geh ban, wi mek shoar dat wi gi wahn gud witnis bowt Gaad Kingdom tu peepl a aala di nayshan dehn.

⁹ Tink bowt dis. Wi preechin werk kantinyu groa eevn doa wi fays lata chalenjiz ahn Saytan di chrai stap wi. Bot how dat pasabl? Fi ansa da kweschan, wi need fi si weh hapm eena di fers senchri C.E. Aftaraal, wee az Jehoava Witnisiz tudeh di kantinyu di preechin werk weh mi staat way bak den.

10. (a) Wat da-mi di moas impoatant werk weh Jeezas mi du pahn ert? (b) Weh Jeezas mi noa gud-wan bowt dis werk?

¹⁰ Jeezas, di wan weh mi staat di Kristyan kangrigayshan, mi si di preechin a di gud nyooz a Gaad Kingdom az di moas impoatant werk pahn ert. In fak, wahn taim hihn mi seh: “Ai haftu preech di gud nyooz a di Kingdom a Gaad eena di ada siti dehn tu, bikaaz dis da di reezn wai Gaad sen mi.” (Look 4:43) Bot Jeezas mi noa gud-wan dat hihn neva mi wahn ku finish dis werk pan ih oan. Lee bit bifoa hihn mi ded, hihn mi seh dat di Kingdom mesij wuda geh preech “aal oava di werl.” (Maak 13:10) Bot, hoo aal wuda du dis werk, ahn how dehn wuda du it?

11. Weh impoatant werk Jeezas mi giv ih disaipl dehn, ahn how dehn mi wahn geh di sopoat weh dehn need?

 ¹¹ Afta Jeezas mi ded ahn geh rezorek, hihn mi apyaa fronta ih disaiplz an ih gi dehn wahn impoatant werk fi du; ih tel dehn: “Soh den, goh ahn teech peepl fahn aala di nayshan dehn fi bee mai disaipl. Baptaiz dehn eena di naym a di Faada, di Son, ahn di hoali spirit. Unu mos teech dehn fi obay aal di tingz weh Ai mi koman unu. Ahn memba, Ah wahn deh wid unu evri day til di en a dis sistem a tingz.” (Mach. 28:19, 20) Wen Jeezas mi tel dehn “Ah wahn deh wid unu,” hihn akchwali mi-di tel dehn dat hihn wuda ga dehn bak eena di preechin ahn teechin werk. Dehn wuda need da sopoat fahn hihn bikaaz Jeezas ihself mi seh dat peepl wahn “hayt [dehn].” (Mach. 24:9) Bot di disaiplz mi memba di pramis weh Jeezas mi gi dehn jos bifoa ih gaan op da hevn. Hihn mi tel dehn dat di hoali spirit mi wahn sopoat dehn soh dat dehn ku gi wahn gud witnis “aal oava di ert.”—Aks 1:8.

12. Weh impoatant kweschanz kom op, ahn wai ih impoatant fi fain di ansa tu dehndeh kweschan?

¹² Now, sohn impoatant kweschan kom op bowt Jeezas apasl ahn disaipl dehn weh mi liv eena di fers senchri: Yu tink dehn mi du evriting weh dehn kud fi obay Jeezas koman fi preech? Yu tink dis smaal groop a Kristyanz mi gi wahn gud witnis bowt Gaad Kingdom eevn doa dehn mi-di goh chroo terabl persikyooshan? Yu tink dehn mi reeli geh help fahn Jehoava ahn di sopoat a di hoali spirit az dehn mi-di du dis impoatant werk? Wi ku fain di ansa tu dehnya an ada kweschanz eena di buk a Aks. Wai yu tink ih impoatant fi mek wi fain di ansa tu dehnya kweschan? Bikaaz Jeezas mi pramis dehn dat di werk weh hihn koman dehn fi du wuda kantinyu “til di en a dis sistem a tingz.” Soh aal chroo Kristyanz need fi obay Jeezas koman fi preech, inkloodin wee weh liv joorin di en a dis sistem. Dat da di reezn wai wi eega fi stodi di hischri weh geh rait dong eena di buk a Aks.

13, 14. (a) Hoo mi rait di buk a Aks, ahn fahn weh hihn mi geh dis infamayshan? (b) Weh aal wi ku fain eena di buk a Aks?

¹³ Hoo mi rait di buk a Aks? Di raita naym noh geh menshan. Bot, da di biginin, ih shoa klyaa-wan dat di buk a Aks mi geh rait bai di saym persn weh mi rait di Gaspl a Look. (Look 1:1-4; Aks 1:1, 2) In fak, fi wahn lang taim, peepl andastan dat di hischri weh geh rait dong eena di buk a Aks kohn fahn Look, di dakta “weh [dehn] onli lov.” (Kol. 4:14) Di buk kova wahn peeryad a bowt 28 yaaz, fahn wen Jeezas gaan op da hevn eena 33 C.E. tu di taim wen di apasl Paal geh put eena prizn da Roam rong 61 C.E. Di fak dat Look mi yooz di werd “wi” insteda “dehn” proov dat hihn mi deh da lata di ivents weh hihn mi rait bowt. (Aks 16: 8-10; 20:5; 27:1) Bikaaz Look mi noa fi du risaach, moa dan laikli hihn mi taak tu Paal, Baarnabas, Filip, an adaz bifoa hihn mi rait di buk a Aks.

¹⁴ Weh aal wi ku fain eena di buk a Aks? Erliya, eena ih Gaspl, Look mi rait bowt weh Jeezas mi seh ahn du. Bot, eena di buk a Aks, hihn rait bowt weh Jeezas falowaz mi seh ahn du. Soh di buk a Aks da wahn stoari bowt peepl weh mi du wahn speshal werk, eevn doa lata ada peepl mi kansida dehn az “man wid onli wahn baysik ejukayshan.” (Aks 4:13) Dis buk weh Look mi rait wid di help a Gaad hoali spirit tel wi how di Kristyan kangrigayshan mi staat op ahn how ih mi groa. Ih shoa di difrent metodz di Kristyanz mi yooz fi preech, ahn di eeganis weh dehn mi du dis werk wid. (Aks 4:31; 5:42) Ih diskraib how di hoali spirit mi help fi spred di gud nyooz. (Aks 8:29, 39, 40; 13:1-3; 16:6; 18:24, 25) Jos laik di res a di buks a di Baibl, di buk a Aks foakos pahn di teem a di Baibl, weh ga fi du wid how Krais Kingdom wahn mek Jehoava naym hoali. Ih aalso shoa how di disaiplz mi aybl fi preech di gud nyooz a di Kingdom eevn doa lata peepl mi deh gens dehn.—Aks 8:12; 19:8; 28:30, 31.

15. How wi wahn benifit wen wi stodi di buk a Aks?

¹⁵ Wen wi stodi di buk a Aks, wi wahn feel eksaitid ahn wi fayt wahn geh schranga! Wen wi meditayt pahn how di disaiplz mi preech wid zeel ahn korij eena di fers senchri, ih wahn toch wi haat. Ih wahn aalso moov wi fi waahn kapi dehn fayt. Dat wahn help wi fi obay Jeezas koman fi “goh ahn teech peepl . . . fi bee [fi hihn] disaipl.” Dis buk weh yu di stodi dizain fi help yu andastan di buk a Aks eevn beta.

16. Wat da di perpos a dis buk?

¹⁶ Wat da di perpos a dis buk? Ih dizain (1) fi mek wi kanvins dat Jehoava di yooz ih hoali spirit fi sopoat di preechin werk ahn di werk fi mek disaiplz tudeh, (2) fi mek wi ga dis eeganis bowt di preechin werk az wi stodi di gud egzampl a Krais falowaz eena di fers senchri, ahn (3) fi help wi ga deep rispek fi Jehoava aaganaizayshan ahn fi di bradaz weh di tek di leed eena di preechin werk an eena aala di kangrigayshan dehn.

17, 18. How dis buk set op, ahn weh feechaz wahn help wi wail wi di du wi persnal Baibl stodi?

¹⁷ How dis buk set op? Laik weh yu ku si, ih divaidid eena ayt sekshan, an eech sekshan diskos wahn paat a di buk a Aks. Di perpos a di chapta dehn eena dehndeh sekshan da noh fi rivyoo di buk a Aks vers bai vers, bot fi help wi laan fahn di ivents ahn fi si how wi ku persnali aplai di teechinz eena wi laif. Da di biginin a eech chapta, yu wahn si di mayn point a di chapta ahn di vers dehn a di buk a Aks weh da chapta bays pahn.

 ¹⁸ Dis buk ga ada feechaz weh wahn help yu eena yu persnal Baibl stodi. Di byootiful pichaz eena dis buk wahn help yu imajin di ivents weh yu reed bowt eena di buk a Aks. Eena lata chaptaz yu wahn si sohn baks weh ga adishanal infamayshan. Sohn baks gi infamayshan bowt sohn faytful peepl eena di Baibl weh wi waahn kapi. Ahn sohn ada baks gat een infamayshan bowt difrent plays, ivents, kostom, er peepl weh geh menshan eena di buk a Aks.

19. How dis buk ku help wi egzamin wiself eena wahn spirichwal way fahn taim tu taim?

¹⁹ Dis buk ku help wi egzamin wiself eena wahn spirichwal way. Noh mata how lang wi di preech di gud nyooz, ih gud fi stap fahn taim tu taim ahn chek wiself fi si weh wi di put fers eena wi laif ahn si how wi feel bowt di minischri. (2 Kor. 13:5) Wi ku aks wiself: ‘Ai stil di luk faawod fi goh preech laik wen Ah mi jos geh baptaiz? (1 Kor. 7:29-31) Ai di preech di gud nyooz wid zeel? Ai bileev dat weh Ah preech da di chroot? (1 Tes. 1:5, 6) Ai di tek paat az moch az Ah kud eena di preechin ahn teechin werk?ʼ—Kol. 3:23.

20, 21. Wai di preechin ahn teechin werk soh impoatant now moa dan eva bifoa, ahn weh wi waahn kantinyu du?

²⁰ Mek wi neva ferget bowt di impoatant asainment weh wi ga fi preech ahn mek disaiplz. Az di dayz paas bai, dis werk moa ahn moa impoatant bikaaz di en deh kloas ahn soh moch peepl laif dehn pahn di lain. Now, moa dan eva bifoa, peepl need fi hyaa weh dehn haftu du fi servaiv Armagedon. Wi noh noa humoch peepl wahn aksep di mesij, bot wi doo noa dat da fi wee rispansabiliti fi help dehn bifoa ih tu layt.—Aks 13:48; 1 Tim. 4:16.

²¹ Bikaaz a dis, ih veri impoatant dat wi kapi di zelos egzampl a di fers-senchri Kristyanz. Az yu stodi dis buk, fain wayz how yu ku preech wid moa zeel ahn korij. An az yu stodi di buk a Aks, mek ih moov yu fi kantinyu gi wahn gud witnis bowt Gaad Kingdom.—Aks 28:23.