Wi Dyaa Preecha a di Gud Nyooz:

Imajin dat yoo da-mi wan a di apasl dehn weh mi-di stan op pahn di Mongt a Alivz ahn Jeezas mi apyaa fronta unu. Ahn lee bit bifoa ih gaahn bak da hevn, ih tel unu: “Unu wahn geh powa wen di hoali spirit kohn pahn unu, an unu wahn gi wahn witnis bowt mee da Jeroosalem, eena aala Judeeya ahn Samayrya, an aal oava di ert.” (Aks 1:8) How yu tink yu mi wahn feel?

Maybi yu wuda mi feel laik Jeezas mi-di aks yu fi du sohnting impasabl. Yu wuda mi praabli aks yuself, ‘How dis smaal groop a disaiplz wahn ku preech “aal oava di ert”?ʼ Maybi yu mi memba di waanin weh Jeezas mi gi di nait bifoa ih ded: “Wahn slayv noh moa impoatant dan ih maasta. Soh if dehn mi persikyoot mee, dehn wahn persikyoot unu tu. If dehn lisn tu weh Ai seh, dehn wahn lisn tu weh unu seh tu. Bot dehn wahn du aala dehnya tingz tu unu sayka weh unu da mai disaipl, kaaz dehn noh noa di Wan weh sen mee.” (Jan 15:20, 21) Az yu mi tink bowt dehndeh werdz, yu mi praabli aks yuself, ‘How Ai ku gi wahn gud witnis bowt Gaad Kingdom eevn if peepl deh gens mi an Ah fays terabl persikyooshan?ʼ

Az Jehoava Witnisiz, wi ga simila kweschanz bikaaz wee tu need fi gi wahn gud witnis “aal oava di ert,” tu “peepl fahn aala di nayshan dehn.” (Mach. 28:19, 20) Bot, how wi ku du dis werk eevn if peepl deh gens wi ahn dehn persikyoot wi?

Di buk a Aks ga wahn eksaitin stoari bowt how Jehoava mi help di apasl dehn an ada Kristyanz eena di fers senchri C.E fi du di preechin werk. Dis buk weh yu di reed wahn help yu laan bowt di eksaitin ivents weh mi hapm tu dehndeh Kristyanz, ahn yu wahn feel how dehn mi feel fi si di preechin werk groa soh faas. Yu wahn fain it inchrestin fi si how wee ahn di Kristyanz eena di fers senchri ga lata tingz in kaman. Da noh onli di werk weh wi du simila, bot di way wi aaganaiz fi du da werk simila tu. Wen yu tink bowt dehnya tingz, yu wahn bee eevn moa shoar dat Jehoava di dairek ih aaganaizayshan rait ya pahn ert.

Wi hoap ahn pray dat az yu stodi di buk a Aks, yu wahn bee moa kanvins dat Jehoava wahn help yu ahn dat hihn wahn yooz fi hihn hoali spirit fi gi yu di schrent fi noh giv op. Soh mek dis stodi inkorij yu fi kantinyu gi wahn gud witnis bowt Gaad Kingdom az yu help adaz geh fi noa Jehoava ahn ga di hoap fi liv fareva.—Aks 28:23; 1 Tim. 4:16.