CHAPTA 8
Di Kangrigayshan “Mi Injai Pees fi Wahn Wail”
Paal, hoo yoostu persikyoot Kristyanz, geh fi bee wahn zelos preecha a di gud nyooz
Dis chapta bays pahn Aks 9:1-43
1, 2. Weh Saal mi plan fi goh du da Damaskos?
DEHN mi ga wahn groop a man weh mi-di goh da Damaskos fi du sohnting eevl. Dehn mi hayt Jeezas disaipl dehn soh moch dat dehn mi-di plan fi foas dehn owta dehn hows, tai dehn op, ahn shaym dehn. Ahn dehn jreg dehn fronta di Jooish Sopreem Koat soh dat dehn ku geh ponish.
2 Saal, di leeda a di groop, mi don involv eena wahn merda. a Hihn mi wach wen di ada man dehn weh mi deh wid ahn stoan tu det wan a Jeezas faytful disaipl—Steeven. (Aks 7:57–8:1) Saal neva hapi jos di persikyoot Jeezas disaipl dehn da Jeroosalem, bot hihn mi aalso mek it ih bizniz fi fain ahn persikyoot ada Kristyanz fahn ada sitiz. Saal plan da-mi fi kompleetli dischrai di daynjaros rilijos groop weh dehn kaal “Di Way.”—Aks 9:1, 2; reed di baks weh naym “ Di Atariti Weh Saal Mi Ga da Damaskos.”
3, 4. (a) Weh mi hapm tu Saal? (b) Weh kweschanz wi wahn diskos?
3 Sodn-wan, wahn brait lait flash rong Saal. Di man dehn weh mi-di chravl lang wid ahn si di lait ahn dehn mi soh sopraiz dat dehn neva noa weh fi seh. Saym taim Saal gaahn blain, ih jrap da grong, an ih hyaa wahn vais fahn hevn seh: “Saal, Saal, wai yu di persikyoot mi?” Saal mi shak, soh ih aks: “Da hoo yoo, Laad?” Saal mi kyaahn bileev weh dehn ansa ahn: “Ai da Jeezas, di wan weh yoo di persikyoot.”—Aks 9:3-5; 22:9.
4 Mek wi diskos dehnya kweschan: Weh wi ku laan fahn weh Jeezas mi tel Saal? How wee ku benifit wen wi stodi bowt wen Saal mi geh fi bee wahn Kristyan? Weh wi ku laan fahn how di kangrigayshan mi yooz di taim a pees weh dehn mi ga afta Saal mi geh fi bee wahn Kristyan?
“Wai Yu Di Persikyoot Mi?” (Aks 9:1-5)
5, 6. Weh wi ku laan fahn weh Jeezas tel Saal?
5 Wen Jeezas mi stap Saal pahn di road kloas tu Damaskos, Jeezas neva aks ahn: “Wai yu di persikyoot mi disaiplz?” Insted, ih mi aks ahn: “Wai yu di persikyoot [mee]?” (Aks 9:4) Dis shoa wi dat wen Jeezas disaipl dehn di sofa, da laik if Jeezas di sofa tu.—Mach. 25:34-40, 45.
6 If yoo di goh chroo wahn chraiyal er persikyooshan bikaaz yu da wan a Jeezas falowaz, yu ku bee shoar dat Jehoava ahn Jeezas di si weh yu di goh chroo. (Mach. 10:22, 28-31) Da chroo, Jehoava mait noh tek weh di prablemz weh yu di fays rait away. Bot, memba weh mi hapm wen dehn mi stoan Steeven tu det? Ahn memba wen Saal mi jreg owt di disaipl dehn fahn owta dehn oan hows da Jeroosalem? (Aks 8:3) Jeezas neva stap non a dehndeh ting fahn hapm. Bot, Jehoava ahn Jeezas mi gi Steeven ahn di ada disaiplz di help ahn schrent weh dehn mi need fi stay faytful.
7. Weh yu mos du fi help yu bayr op wen yu di fays persikyooshan?
7 Weh yu mos du fi bayr op wen yu di fays persikyooshan? (1) Mek op yu main fi stay laayal, noh mata weh hapm. (2) Aks Jehoava fi help yu. (Fil. 4:6, 7) (3) If sohnbadi du yu sohnting bad, lef it eena Gaad han. (Roam. 12:17-21) (4) Chros dat Jehoava wahn gi yu di schrent fi bayr op til hihn si dat da di rait taim fi tek weh di chraiyal.—Fil. 4:12, 13.
“Saal, Mi Brada, di Laad Jeezas . . . Sen Mi” (Aks 9:6-17)
8, 9. How Ananaiyas mi feel bowt ih asainment?
8 Afta Jeezas ansa Saal kweschan, “Da hoo yoo, Laad?” Jeezas mi tel ahn: “Get op ahn goh da di siti, ahn wahn man wahn tel yu weh fi du.” (Aks 9:6) Sins Saal mi blain, di man dehn weh mi deh wid ahn mi kehr ahn da Damaskos. Rait deh, Saal mi pray an ih mi faas fi chree dayz. Meenwail, Jeezas mi taak bowt Saal tu Ananaiyas, wahn Kristyan weh “aala di peepl weh mi liv deh mi taak gud bowt.”—Aks 22:12.
9 Yoo ku imajin how Ananaiyas mosi mi feel? Tink bow dis. Jeezas, di Hed a di kangrigayshan, mi-di taak dairekli tu hihn, an ih chooz ahn fi wahn speshal asainment! Jeezas tel ahn dat hihn da-mi di wan weh mi haftu goh taak tu Saal. Da chroo, dis da wahn speshal asainment, bot da wahn fraitnin wan tu. Soh Ananaiyas tel ahn: “Laad, lata peepl tel mi bowt dis man, bowt aala di kruwil tingz ih du tu yu hoali peepl da Jeroosalem. Ahn hihn ga atariti fahn di cheef prees dehn fi ares aala dehn wan weh bileev eena yoo.”—Aks 9:13, 14.
10. Weh wi laan bowt Jeezas fahn di way how hihn mi chreet Ananaiyas?
10 Jeezas neva skoal Ananaiyas wen Ananaiyas tel ahn how ih mi feel bowt Saal. Insted, ih mi giv ahn gud inschrokshanz bowt weh fi du, an ih mi kain tu ahn wen ih eksplayn tu ahn wai ih giv ahn da asainment. Dis da weh Jeezas mi seh bowt Saal: “Ah don chooz dis man fi bayr witnis eena mai naym tu di nayshanz, tu di king dehn, ahn tu di peepl a Izrel. Kaaz Ai wahn shoa ahn playn-wan humoch tingz ih wahn haftu sofa eena mai naym.” (Aks 9:15, 16) Ananaiyas mi obay Jeezas an ih hori gaahn du weh Jeezas koman ahn fi du. Ih gaahn luk fi Saal an ih tel ahn: “Saal, mi brada, di Laad Jeezas, weh mi apyaa tu yu pahn di road wen yu mi-di kohn lang di way, sen mi soh dat yu ku si agen ahn geh ful op a hoali spirit.”—Aks 9:17.
11, 12. Weh wi laan fahn di akonk bowt Jeezas, Ananaiyas, ahn Saal?
11 Wi laan lata tingz fahn di akonk bowt Jeezas, Ananaiyas, ahn Saal. Fi egzampl, wi laan dat Jeezas di dairek di preechin werk, jos laik weh ih mi pramis ih wahn du. (Mach. 28:20) Aalso, Jeezas noh taak tu wee di saym way ih mi taak tu Ananaiyas ahn Saal, bot hihn di dairek di preechin werk chroo di faytful ahn waiz slayv. (Mach. 24:45-47) Di Govanin Badi in chaaj fi sen owt poblishaz ahn painyaaz fi fain peepl weh waahn laan moa bowt Jeezas. Laik weh wi laan eena chapta sevn, wahn lata dehnya peepl pray fi mek Gaad help dehn, ahn noh lang afta dat Jehoava Witnisiz goh preech tu dehn.—Aks 9:11.
12 Ananaiyas mi aksep ih asainment an ih mi geh bles bikaaz ih obay. Yoo obay di koman fi gi wahn gud witnis bowt Gaad Kingdom, eevn if ih mek yu feel nervos? Som a wi feel nervos ahn frayd wen wi preech tu peepl weh wi noh noa. Ada bradaz ahn sistaz fain it haad fi preech tu peepl da dehn bizniz plays, pahn di schreet, oava di foan, er chroo letaz. Ananaiyas mi geh di korij fi preech tu Saal, ahn hihn mi ga di privilij fi help Saal geh di hoali spirit. b Ananaiyas mi ga sokses bikaaz ih mi chros Jeezas an ih mi si Saal az ih fyoocha brada. Saym way soh, jos laik Ananaiyas, wi ku chros dat Jeezas da di wan weh di dairek di preechin werk. Aalso, wi need fi shoa peepl dat wi kay bowt dehn, wi waahn put wiself eena fi dehn sichuwayshan, an wi waahn si dehn az wi fyoocha bradaz ahn sistaz.—Mach. 9:36.
Saal Mi Staat tu “Preech Bowt Jeezas” (Aks 9:18-30)
13, 14. Weh yu ku laan fahn Saal egzampl if yu di stodi di Baibl ahn yu noh geh baptaiz yet?
13 Di tingz weh Saal mi laan mi moov ahn fi noh ways taim ahn fi mek di chaynjiz eena ih laif. Soh afta ih staat tu si agen, ih geh baptaiz an ih staat meet wid di kangrigayshan da Damaskos. Bot dat da neva aal weh hihn mi du. Di Baibl seh dat “rait away ih gaan da di sinagag dehn fi preech bowt Jeezas; an ih mi-di preech dat Jeezas da Gaad Son.”—Aks 9:20.
14 Yoo di stodi di Baibl bot yu noh baptaiz yet? Maybi yu ku bee laik Saal ahn noh ways taim fi aplai weh yu di laan ahn mek chaynjiz eena yu laif. Da chroo, Saal mi witnis wahn mirakl weh Jeezas mi du, ahn dat mi toch ih haat. Fi shoar dis mi moov ahn fi geh baptaiz. Bot ada peepl mi geh fi si sohn mirakl weh Jeezas mi du tu. Fi egzampl, wahn groop a Farisee mi wach wen Jeezas mi kyoar wahn man wid wahn kripl han. Ahn lata Jooz mi noa dat Jeezas mi rezorek Lazaros. Stilyet, wahn lata dehn neva kay fi fala Jeezas, ahn som a dehn mi eevn deh gens ahn. (Maak 3:1-6; Jan 12:9, 10) Bot Saal da neva laik dehn. Wai Saal kuda mi mek chaynjiz wail adaz neva waahn chaynj? Hihn kuda mi du dis onli bikaaz hihn mi ga moa rispek fi Gaad dan fi man, ahn bikaaz ih mi reeli tankful fi di mersi weh Jeezas mi shoa ahn. (Fil. 3:8) Soh, weh wi laan fahn Saal egzampl? If wi noh di preech di gud nyooz er if wi noh baptaiz yet, wi noh waahn notn hoal wi bak fahn du dehnya ting ahn reech wi goal.
15, 16. (a) Weh Saal mi du wen ih gaan da di sinagag dehn? (b) How di Jooz da Damaskos mi rispan?
15 Yoo ku picha how di peepl mosi mi gaan aan wen dehn si Saal staat tu preech bowt Jeezas da di sinagag dehn? Som a dehn mi soh shak ahn beks dat dehn aks: “Dis da noh di saym man weh yoostu persikyoot dehn wan eena Jeroosalem weh kaal pahn Jeezas naym?” (Aks 9:21) Wen Saal mi eksplayn wai hihn mi chaynj ih atichood bowt Jeezas, “hihn mi-di proov dat Jeezas da di Krais.” (Aks 9:22) Bot eevn if wi chrai eksplayn sohnting az gud az pasabl, wi mait stil kyaahn kanvins evribadi. Ih haad fi chaynj peepl weh prowd er di tinkin a peepl weh liv dehn laif akaadn tu chradishan. Bot Saal neva giv op, hihn mi kantinyu preech.
16 Chree yaaz layta, di Jooz da Damaskos stil mi deh gens Saal, ahn dehn mi-di plan fi kil ahn anaal. (Aks 9:23; 2 Kor. 11:32, 33; Gal. 1:13-18) Wen Saal mi fain owt bowt di Jooz plan, hihn mi mek op ih main fi lef di siti widowt kaal tu moch atenshan. Look mi seh dat joorin di nait, “ih [Saal] disaipl dehn” mi help ahn eskayp chroo wahn windo eena di waal. (Aks 9:25) Soh, di skripcha proov dat eevn doa peepl mi deh gens ahn, som peepl mi did rispan tu di gud nyooz ahn geh fi bee Kristyan.
17. (a) How sohn peepl rispan wen dehn hyaa di mesij fahn di Baibl? (b) Weh wi shuda kantinyu du, ahn wai?
17 Wen yoo mi fers staat tel yu frenz ahn famili bowt di tingz yu mi laan fahn di Baibl, yu praabli mi ekspek dehn fi aksep er bileev weh yu di tel dehn bikaaz weh di Baibl seh mek sens. Ih ku bee dat som a dehn mi aksep di mesij, bot noh aala dehn. Maybi som a yu famili membaz mi eevn ton gens yu. (Mach. 10:32-38) Bot, az yu kantinyu laan fi bee wahn beta teecha a di Baibl ahn werk haad fi set wahn gud egzampl az wahn Kristyan, dehn wan weh mi ton gens yu mait chaynj dehn tinkin.—Aks 17:2; 1 Peet. 2:12; 3:1, 2, 7.
18, 19. (a) Weh mi hapm wen Baarnabas mi difen Saal? (b) How wi ku kapi Baarnabas ahn Saal egzampl?
18 Wi ku andastan wai di disaipl dehn neva bileev dat Saal da-mi wahn Kristyan wen ih mi reech Jeroosalem. Bot wen Baarnabas mi difen Saal, ih mi help di ada apasl dehn fi bileev dat Saal da-mi reeli wan a Jeezas disaipl. Soh, dehn mi aksep Saal ahn hihn mi stay wid dehn fi wahn lee wail. (Aks 9:26-28) Saal mi kyaaful wen ih mi preech, bot dat neva meen dat hihn mi shaym bowt di gud nyooz. (Roam. 1:16) An eevn doa hihn yoostu kruwil ahn persikyoot di Kristyanz da Jeroosalem, ih mi shoa korij wen ih mi preech. Wen di Jooz da Jeroosalem mi hyaa dat Saal, di wan weh mi wahn help dehn geh rid a aala di Kristyanz, mi ton wan a Jeezas falowaz, dehn mi bloo beks! Soh dehn disaid fi kil ahn. Di Baibl seh dat “wen di bradaz geh fi fain owt bowt dis, dehn kehr ahn da Seezareeya, ahn den dehn sen ahn da Tarsos.” (Aks 9:30) Saal ahn di Kristyan kangrigayshan mi benifit bikaaz hihn mi obay di dairekshan weh Jeezas mi giv ahn chroo di bradaz.
19 Baarnabas mi kain, ahn hihn da-mi di wan weh mi help Saal. Fi shoar dis mi mek Saal ahn Baarnabas ga wahn kloas frenship. Yoo shoa di saym kainis laik Baarnabas? Yoo wilin fi help di nyoo poblishaz eena di kangrigayshan, preech wid dehn, ahn help dehn geh kloasa tu Jehoava? If yu du dat, yu wahn geh lata blesinz. If yu da wahn nyoo poblisha, yoo aksep di help weh adaz di gi yu, jos laik Saal? Wen yu werk lang wid bradaz ahn sistaz eena servis weh ga lata ekspeeryens ahn weh spirichwali machoar, ih wahn help yu bee wahn beta teecha a di gud nyooz. Yu wahn aalso bee hapiya, ahn yu wahn ga sohn kloas frenship weh wahn laas fareva.
“Lata Dehn Staat tu Bileev” (Aks 9:31-43)
20, 21. How Gaad servants eena di paas ahn tudeh mek gud yoos a di pees weh dehn injai fi wahn wail?
20 Afta Saal mi geh fi bee wahn disaipl an eskayp Jeroosalem, “di Kristyanz eena di ayrya a Judeeya, Gyalilee, ahn Samayrya mi injai pees fi wahn wail.” (Aks 9:31) How di disaiplz mi yooz da taim a pees? (2 Tim. 4:2) Di akonk seh dat dehn mi “groa schrang.” Di apasl dehn ahn di ada rispansabl bradaz mi help bil op di fayt a di disaiplz ahn help di kangrigayshan fi “fyaa Jehoava an alow di schrent fahn di hoali spirit fi gaid di way dehn mi liv.” Fi egzampl, Peeta mi yooz da taim fi help schrentn di fayt a di disaiplz da Lida ahn Sharon. Ahn dis mi mek lata peepl weh liv deh staat tu bileev “eena di Laad.” (Aks 9:32-35) Di disaipl dehn neva alow werk er dehn persnal laif fi dischrak dehn fahn tek kyaa a wan anada ahn fahn preech di gud nyooz. Bikaaz a dat, “di amonk a disaiplz mi-di groa.”
21 Rong 1990, Jehoava Witnisiz fahn lata konchri mi geh fi “injai pees fi wahn wail.” Sohn govament weh yoostu persikyoot Jehoava servants fi yaaz mi looz dehn powa sodn-wan ahn dat mi mek it eeziya fi preech wehpaat di preechin werk mi deh anda ban. Towznz a Jehoava Witnisiz mi yooz dis apachooniti fi preech eena poblik, ahn wahn lata peepl mi geh fi lisn tu di gud nyooz.
22. How yu ku yooz di freedom weh yu ga rait now?
22 Weh yu di du wid di freedom weh yu gat? If yu liv eena wahn konchri wehpaat evribadi free fi praktis dehn rilijan, fi shoar Saytan wahn chrai temp yu fi spen moa taim di geh mateeryal tingz insteda serv Jehoava. (Mach. 13:22) Noh mek notn dischrak yu! Yooz di freedom ahn pees weh yu ga rait now fi gi wahn gud witnis bowt Gaad Kingdom ahn fi inkorij di kangrigayshan. Memba, yu sichuwayshan ku chaynj sodn-wan.
23, 24. (a) Weh wi laan fahn di akonk bowt Tabita? (b) Weh wi mek op wi main fi du?
23 Mek wi luk pahn di egzampl a wahn disaipl weh naym Tabita, er Dorkas. Shee mi liv da Japa, wahn tong weh noh tu faar fahn Lida. Shee da-mi wahn faytful sista. Ih mi yooz ih taim ahn di tingz ih mi ga fi “du wahn lata gud tingz ahn shee mi help poa peepl.” Bot sodn-wan shee mi geh sik an ih mi ded. c Wen Dorkas mi ded, di disaiplz da Japa mi soh sad, espeshali di wido dehn weh shee yoostu help. Wen Peeta mi reech wehpaat dehn mi-di geh fi shee badi redi fi beri, hihn mi du wahn mirakl weh di apasl dehn neva du bifoa. Peeta mi seh wahn pryaa den ih bring bak Tabita tu laif! Yoo ku imajin how di disaiplz ahn di wido dehn mosi mi feel wen dehn si dat Tabita mi alaiv? Dehnya ivent mosi mi schrentn dehn fayt fi di chraiyalz weh dehn mi wahn soon fays. Ahn di akonk tel wi dat “peepl aal chroo Japa mi hyaa bowt dis, ahn lata dehn staat tu bileev eena di Laad.”—Aks 9:36-42.
How yu ku kapi Tabita fayt?
24 Wi laan too impoatant tingz fahn weh mi hapm tu Tabita. (1) Wi laif ku chaynj kwik-wan. Soh wans wi ga laif, ih veri impoatant fi ga wahn gud naym wid Gaad! (Eccl. 7:1) (2) Jehoava wahn kip ih pramis bowt di rezorekshan. Jehoava mi si aal di kain tingz weh Tabita mi du, an ih mi bles ahn. Saym way soh, hihn wahn memba aal weh wi du far ahn, an ih wahn rezorek wi if wi ded bifoa Armagedon kohn. (Heeb. 6:10) Soh, eevn if wi di goh chroo “bad taimz” er if wi di “injai pees fi wahn wail,” mek wi kantinyu gi wahn gud witnis bowt Jeezas.—2 Tim. 4:2.
a Reed di baks weh naym “ Saal di Farisee.”
b Moas a di taim, onli di apasl dehn mi ga di powa fi gi adaz di gif dehn weh kohn fahn di hoali spirit. Eena dis kays, doh, ih mi difrent bikaaz Jeezas mi gi Ananaiyas di powa fi gi Saal di gif dehn weh kohn fahn di hoali spirit. Afta Saal mi geh fi bee wahn Kristyan, hihn neva kip kantak wid eni a di 12 apasl dehn fi wahn lang taim. Bot, moa dan laikli hihn mi-di preech joorin da taim. Soh Jeezas mi mek shoar dat Saal mi ga di powa weh ih mi need fi noh giv op eena ih asainment.
c Reed di baks weh naym “ Tabita Mi Du ‘Lata Gud Tingz.ʼ”
