1. Weh wee ahn wi bradaz fahn di fers senchri ga eena kaman?

 WI BRADAZ ahn sistaz eena di fers senchri mi preech di gud nyooz wid wahn lata eeganis. Bot dehn neva pen pahn dehnself. Dehn mi alow Jehoava hoali spirit fi help dehn fi preech. Ahn yu tink persikyooshan mi wahn shet dehn op? Noh man! Dehn mi kantinyu preech noh mata wat. Ahn dehn kuda mi si how Jehoava mi bles dehn fi aal weh dehn mi du. Wee ku seh di egzak saym tingz bowt Jehoava Witnisiz tudeh!

2, 3. Wai di buk a Aks soh speshal?

² Wahn lata eksaitin tingz mi hapm eena di buk a Aks. Soh wid aal weh yu don reed bowt ahn laan, ih neva inkorij yu ahn bil op yu fayt? Ahn dis da wahn speshal buk, bikaaz dis da di onli buk eena Gaad Werd weh taak bowt how di Kristyan kangrigayshan mi staat op.

³ Di buk a Aks menshan 95 peepl bai dehn naym. An ih taak bowt 32 konchri, 54 siti, ahn 9 ailan. Da wahn eksaitin stoari bowt aadineri peepl ahn peepl weh neva serv Jehoava; bowt peepl weh wuda du eniting fi stap di preechin werk, ahn roolaz weh mi onli ful op a dehnself. Bot reeli, dis stoari da bowt fi wee bradaz ahn sistaz bak den weh mi tek wahn lata lik eena laif ahn stil kantinyu preech di gud nyooz.

4. Wai wi feel wahn kloasnis tu wi faytful bradaz ahn sistaz fahn di fers senchri?

⁴ Eena di buk a Aks, wi geh fi meet sohn wandaful peepl. Fi egzampl, di apasl Paal ahn Peeta mi werk haad eena di minischri, Look da-mi wahn dakta weh evribadi mi lov, Baarnabas mi onli jenaros, Steeven mi ga lata korij, Tabita da-mi wahn sweet lee sista, ahn Lidya mi laik invait di frenz da ih hows. Ahn wi ku goh aan an aan bowt di res a wi bradaz ahn sistaz bak den. Eevn doa aalmoas 2,000 yaaz don paas sins dehn mi alaiv, wi stil feel wahn kloasnis tu dehn. Wai wi feel soh? Bikaaz wi ga di saym asainment laik dehn fi preech ahn mek disaiplz. (Mach. 28:19, 20) Wi ga wahn speshal privilij, noh chroo?

5. Wehpaat Jeezas disaiplz mi staat preech?

⁵ Tink bowt di werk weh Jeezas mi gi ih falowaz fi du. Ih mi seh: “Unu wahn geh powa wen di hoali spirit kohn pahn unu, an unu wahn gi wahn witnis bowt mee da Jeroosalem, eena aala Judeeya ahn Samayrya, an aal  oava di ert.” (Aks 1:8) Fers, di hoali spirit mi help di disaiplz fi gi wahn witnis “da Jeroosalem.” (Aks 1:1–8:3) Afta dat, di hoali spirit mi gaid dehn fi gi wahn witnis “eena aala Judeeya ahn Samayrya.” (Aks 8:4–13:3) Den dehn staat preech di gud nyooz “aal oava di ert.”—Aks 13:4–28:31.

6, 7. Weh wee gat weh wi fers-senchri bradaz neva gat?

⁶ Wi bradaz ahn sistaz fahn di fers senchri neva ga di hoal Baibl ner poblikayshanz fi lef wid peepl wail dehn mi-di preech di gud nyooz. Fi egzampl, dehn neva ga di buk a Machyu til 41 C.E. Ahn bifoa Look mi finish rait Aks eena 61 C.E., Paal mi onli rait som a ih letaz. Bifoa som a di Jooish bradaz mi staat fala Jeezas, dehn yoostu goh da di sinagag fi hyaa dehn reed di Heebroo Skripchaz. (2 Kor. 3:14-16) Moas a dehn neva ga dehn oan kapi a di Heebroo Skripchaz. Soh dehn mi haftu memoraiz di Skripchaz wen dehn mi goh preech.

⁷ Tudeh, wi soh hapi dat moas a wi ga wahn kapi a di Baibl ahn wahn hoal lata Baibl lichricha. Ahn wi di preech ahn mek disaiplz eena 240 difrent lan an eena wahn lata langwij.

8, 9. (a) Weh di hoali spirit mi help Jeezas disaiplz fi du? (b) Weh aal di hoali spirit help di faytful ahn waiz slayv fi du?

⁸ Wen Jeezas mi giv ih disaiplz di asainment fi preech, ih mi tel dehn: “Unu wahn geh powa wen di hoali spirit kohn pahn unu.” Di hoali spirit mi gi dehn di powa weh dehn mi need fi gi wahn witnis aal oava di ert. An ih mi eevn gi Peeta ahn Paal di powa fi kyoar sik peepl, chays owt deemonz, ahn rayz peepl fahn di ded! Bot di hoali spirit mi help dehn fi du sohnting eevn moa impoatant. Ih mi help di apasl ahn disaipl dehn fi teech peepl di chroot soh dat dehn ku ga di hoap fi liv fareva.—Jan 17:3.

⁹ Pahn Pentikaas 33 C.E., Jeezas disaiplz mi taak “eena difrent langwij akaadn tu di gaidans a Gaad hoali spirit.” Dehn mi gi wahn witnis bowt “di powaful tingz weh Gaad du.” (Aks 2:1-4, 11) Hoali spirit noh mek wi taak wahn nada langwij sodn-wan laik bak den. Insteda dat, ih help di faytful ahn waiz slayv fi mek Baibl poblikayshanz eena lata difrent langwij. Fi egzampl, dehn print milyanz a Di Wachtowa an Awayk! evri mont. Ahn pahn tap a dat, wi ga wi jw.org websait. Rait deh, wi ga difrent poblikayshanz ahn veedyoz eena oava 1,000 langwij. Aala dis help wi fi preech bowt “di powaful tingz weh Gaad du” tu peepl fahn owta aala di nayshan dehn ahn chraib ahn rays ahn peepl weh taak difrent langwij.—Rev. 7:9.

10. Sins 1989, weh di hapm wid Baibl chranslayshan?

¹⁰ Sins 1989, di faytful ahn waiz slayv mayn foakos da fi mek di Nyoo Werl Chranslayshan avaylabl eena lata langwij. Soh now, di Baibl avaylabl eena moa dan 200 langwij, ahn dehn don print moa dan 240 milyan kapiz. Ahn ges wat? Dehn stil di print moa! Ih klyaa fi si dat aala dis onli pasabl wid di help a Jehoava hoali spirit.

11. How di chranslayshan werk pasabl?

 ¹¹ Towznz a wi bradaz ahn sistaz fahn moa dan 150 difrent plays di help owt eena di chranslayshan werk. Yu tink dis shuda sopraiz wi? Noh man! Bikaaz Jehoava spirit di bak wee op, ahn dehn noh ga no ada aaganaizayshan weh ku seh dis. Da dis sayhn hoali spirit di help wi fi gi wahn gud witnis bowt Jehoava, fi hihn Kingdom weh hihn don set op da hevn, ahn Jeezas, di King a da Kingdom.—Aks 28:23.

12. Weh mi help Paal ahn di ada Kristyanz bak den fi gi wahn gud witnis?

¹² Pahn Paal fers mishineri chrip, hihn mi preech tu Jooz ahn peepl weh da noh Jooz da Antiyak weh deh da Pisidya. Ahn di akonk tel wi dat “dehn wan weh mi ga di rait haat kandishan fi get evalastin laif staat tu bileev.” (Aks 13:48) Now, tuwaadz di en a di buk a Aks, Paal mi-di preech da Roam, weh da-mi di werl powa joorin da taim. Ahn Look tel wi dat Paal mi “preech tu dehn bowt di Kingdom a Gaad an ih neva frayd fi teech dehn . . . ahn nobadi neva chrai fi stap ahn.” (Aks 28:31) Soh onli wid di help a Jehoava hoali spirit, Jeezas falowaz bak den mi aybl fi gi wahn gud witnis. Ih noh mata if dehn mi du it chroo sohn poblik taak er eni ada way, dehn mi get di werk don.

13. Wai wi need fi pray wen wi fays persikyooshan?

¹³ Bak den, Jeezas falowaz mi pray tu Jehoava fi gi dehn korij wen peepl mi persikyoot dehn. How Jehoava mi ansa dehn pryaa? Jehoava mi gi dehn hoali spirit soh dat dehn ga korij ahn noh stap preech. (Aks 4:18-31) Jos laik dehn, wen wi fays persikyooshan, wi need fi pray fi wizdom ahn korij fi kantinyu preech. (Jay. 1:2-8) No kaina persikyooshan ku stap wi, noh eevn wen peepl vailent wid wi, bikaaz Jehoava di bles wi an ih gi wi ih hoali spirit fi kip aan di preech. Soh wen peepl persikyoot wi, aalwayz memba fi pray fi hoali spirit soh wi ku ga wizdom ahn korij fi kip aan di preech di gud nyooz.—Look 11:13.

14, 15. (a) Wahn lata persikyooshan brok owt afta Steeven mi geh kil. Weh mi hapm sayka dat? (b) How wahn lata peepl da Siberia mi geh fi laan di chroot?

¹⁴ Bifoa Steeven enimiz dehn mi kil ahn, ih mi aybl fi gi dehn wahn gud witnis. (Aks 6:5; 7:54-60) Fahn da day, wahn “lata persikyooshan” mi brok owt da Jeroosalem. Sayka dat, aala di disaipl dehn, eksep di apaslz, mi skyata bowt chroo Judeeya ahn Samayrya. Bot dat neva stap di preechin werk ataal. Filip mi en op da Samayrya, an ih mi “preech tu di peepl weh mi dehdeh bowt di Krais” ahn wahn lata dehn mi ton disaiplz. (Aks 8:1-8, 14, 15, 25) Pahn tap a dat, di akonk seh: “Dehn mi skyata eena difrent ayryaz; dehn mi reech az far az Foneesha, Saipros, an Antiyak, bot dehn mi onli preech di gud nyooz tu di Jooish peepl. Bot som a di man dehn fahn monks dehn da Saipros ahn Saireeni gaan da Antiyak fi preech bowt di gud nyooz a di Laad Jeezas tu di peepl weh taak di Greek langwij.” (Aks 11:19, 20) Soh bak den, sayka di persikyooshan, di Kristyanz mi haftu ron tu ada ayryaz, ahn da soh di gud nyooz mi spred.

 ¹⁵ Eena fi wee taim, sohnting simila mi hapm tu wi bradaz weh mi liv eena di konchriz weh da-mi paat a di Soviet Union. Fi egzampl, eena di 1950ʼs, di govament mi en op di foas towznz a wi bradaz fi goh da Siberia. Siberia da wahn big konchri, ahn sins di govament mi skyata wi bradaz aal oava, ih mi help spred di gud nyooz aal chroo Siberia. Dis mi amayzin bikaaz wi bradaz neva mi ga di moni fi chravl aal di way deh fi goh preech! Fi get deh, som a dehn mi wahn haftu chravl bowt 6,000 mailz. Soh eevn doa di govament mi-di persikyoot dehn wen ih sen dehn da Siberia, da laik if dehn sayhn wan mi-di chaata wahn chrip fi mek wi bradaz preech deh. Wan brada seh, “Da di govament mi en op di help towznz a peepl fi geh fi noa di chroot da Siberia.”

16, 17. Wat da sohn egzampl eena di buk a Aks weh shoa dat Jehoava mi-di bles di preechin werk?

¹⁶ Wi noh haftu wanda if Jehoava mi-di bles wi bradaz ahn sistaz eena di fers senchri. Wi noa fi shoar dat Jehoava mi bles dehn, bikaaz di Baibl seh dat Paal ahn sohn ada bradaz mi plaant di chroot eena peepl haat ahn waata it, “bot da Gaad mek ih groa.” (1 Kor. 3:5, 6) Wen wi luk eena di buk a Aks, wi si lat moa proof dat Jehoava mi-di bles dis werk. Fi egzampl, Look mi rait dat “di werd a Gaad kantinyu fi spred, ahn di nomba a disaiplz mi kip aan di groa eena Jeroosalem.” (Aks 6:7) An az di preechin werk staat tu spred aal oava, “aala di Kristyanz eena di ayrya a Judeeya, Gyalilee, ahn Samayrya mi injai pees fi wahn wail. Dehn groa schrang ahn di amonk a disaiplz mi-di groa kaaz dehn mi fyaa Jehoava an alow di schrent fahn di hoali spirit fi gaid di way dehn mi liv.”—Aks 9:31.

¹⁷ Da Antiyak weh deh da Siriya, di Jooz ahn peepl weh taak Greek mi geh fi hyaa di chroot fahn Kristyanz weh shayr di mesij wid dehn. How Jehoava mi bles dehn? Di akonk tel wi: “Jehoava mi-di sopoat dehn, ahn wahn lata peepl mi bileev an ton tu di Laad.” (Aks 11:21) Ahn Jehoava mi kantinyu fi bles dehn. Di akonk kantinyu fi tel wi dat “di werd a Jehoava mi kantinyu fi spred, ahn wahn lata peepl staat tu bileev.” (Aks 12:24) Jehoava blesinz neva stap deh needa! Di witnisin werk weh Paal an adaz mi du monks di peepl weh da neva Joo mi-di goh deh schrang. Ahn “di werd a Jehoava mi kip aan di groa, bikaaz a fi hihn powa.”—Aks 19:20.

18, 19. (a) How wi noa dat Jehoava di sopoat wi? (b) Gi wahn egzampl weh proov dat Jehoava sopoat fi hihn peepl.

¹⁸ Tudeh, wi shoar dat Jehoava di sopoat wi tu. Fi egzampl, wahn lata peepl di dedikayt dehn laif tu Jehoava ahn geh baptaiz. Sohntaim, wen peepl persikyoot wi ih geh reeli bad, da onli wid Jehoava help wi ku kantinyu di preechin werk. (Aks 14:19-21) Jehoava wahn aalwayz sopoat wi wen wi goh chroo chraiyalz. (Deut. 33:27) Ahn wi haftu memba dat Jehoava waahn liv op tu fi hihn naym. Soh wi ku bee shoar dat hihn wahn neva lef wi pahn wi oan.—1 Sam. 12:22; Saa. 94:14.

 ¹⁹ Mek wi luk pahn di egzampl a Brada Harald an Sista Elsa Abt. Joorin Werl Waar II, dehn mi ares Brada Harald ahn sen ahn da wahn layba kyamp bikaaz hihn mi rifyooz fi stap preech. Den eena May 1942 di Gestapo (seekrit polees) mi gaahn da dehn hows an ares Sista Elsa ahn tek weh dehn lee daata. Ahn dehn sen Sista Elsa da soh moch difrent kyamp. Dis da weh Sista Elsa seh: “Bifoa dehn mi ares mi, Ah geh wahn lee leta fahn wahn sista. Eena di leta, di sista tel mi dat Jehoava spirit ku help yu feel kaam kaam wen yu di goh chroo wahn tof chraiyal. Wel, Ah neva reeli bileev weh ih seh, bikaaz da sohnting weh haad fi mek yu imajin anles yu reeli feel it fi yuself. Bot wen Ai gaahn chroo mi oan chraiyalz, Ai mi feel da kaam. Soh Ah si dat weh shee mi seh da chroo.” Sista Elsa kantinyu fi seh, “Fahn aal di yaaz weh Ai mi deh eena di layba kyamp, ih teech mi wahn impoatant lesn: Jehoava wahn giv yu di schrent weh yu need wen yu di goh chroo wahn tof chraiyal.”

20. Weh Paal mi du wail hihn da-mi wahn prizna? Ahn how dat ku inkorij som a wi lee bradaz ahn sistaz?

²⁰ Tuwaadz di en a di buk a Aks, Paal lov fi di minischri stil az schrang az eva! Ih en aaf wid hihn di “preech . . . bowt di Kingdom a Gaad.” (Aks 28:31) Laik how Paal da-mi wahn prizna, hihn kudn preech fahn hows tu hows da Roam. Soh ih mi preech tu dehn wan weh mi goh da di hows fi vizit ahn. Ahn tudeh, wi ga lata wi lee bradaz ahn sistaz weh kyaahn lef dehn hows bikaaz dehn sik, dehn oal, er maybi dehn kyaahn moov laik how dehn yoostu. Bot jos laik Paal, dehn lov fi Jehoava ahn di minischri stil az schrang az eva. Wi waahn kip dehn eena wi pryaaz, ahn wi ku eevn aks wi lovin Pa Jehoava fi help dehn fi meet peepl weh waahn laan di chroot.

21. Wai wi waahn du aal wi kud fi preech di gud nyooz?

²¹ Moas a wi ku preech fahn hows tu hows an eena difrent wayz. Soh mek eech wan a wi du evriting weh wi kud fi preech di gud nyooz bowt Gaad Kingdom “aal oava di ert.” Yu si, dis werk veri impoatant, kaaz wi ku si “di sain” dat wi di liv eena di laas dayz. (Mach. 24:3-14) Soh dis da noh di taim fi jreg wi fut. Wi ga “plenti fi du eena di werk weh di Laad gi wi fi du.”—1 Kor. 15:58.

22. Weh wi shuda werk haad fi du wail wi di wayt fi Jehoava day?

²² Wail wi di wayt fi “di grayt ahn wandaful day a Jehoava,” wi waahn ga korij ahn werk haad fi kantinyu fi gi wahn gud witnis. (Joel 2:31) Wi ku stil fain lata peepl laik di wan dehn fahn Bereeya weh mi “aksep di werd a Gaad wid eeganis.” (Aks 17:10, 11) Wi kyaahn stap fi notn! Mek wi kantinyu fi du aal wi kud fi gi wahn gud witnis. Den wen dis werk finish, da laik wi wahn ku hyaa Jehoava di tel wi: “Yu du gud; yoo da wahn gud ahn faytful slayv!” (Mach. 25:23) If wi kantinyu fi du fi wee paat fi mek disaiplz ahn wi stay faytful tu Jehoava dong tu di en, fi wee hapinis wahn laas fareva bikaaz wi mi gat di privilij fi gi wahn gud witnis bowt Gaad Kingdom!