1-3. (a) Hoo Paal pik fi chravl lang wid ahn, an weh kaina persn hihn? (b) Weh wi wahn laan eena dis chapta?

 JOS imajin Paal ahn Timoti di waak fahn wan tong tu di neks. Az dehn di goh lang, Paal luk pan ih lee fren—ih soh yong ahn ful a enerji. Ih praabli mi deh eena ih 20ʼs er lee oalda. Eech futstep weh Timoti mi tek mi-di kehr ahn ferda ahn ferda fahn Lischra an Aikoanyom, weh da fi hihn hoam. How yu tink dis chrip gwehn? Sins dis da-mi Paal sekant mishineri chrip, hihn mi noa dat dehn mi wahn fays prablemz. Yu tink Timoti mi wahn ku handl dehndeh prablemz?

² Paal mi ga lata kanfidens eena Timoti, praabli moa kanfidens dan Timoti mi gat eena ih oanself. Ahn Paal mi noa dat ih mi need fi ga di rait paadna fi chravl lang wid ahn. Sins Paal ahn Timoti mi gwehn goh vizit an inkorij di kangrigayshan dehn, Paal mi noa dat dehn mi wahn need fi werk haad ahn ga di saym tinkin pahn tingz. Weh mi mek Paal feel dis way? Wan reezn da-mi praabli bikaaz Paal ahn Baarnabas mi get eena wahn big aagyument noh tu lang bifoa dis chrip.

³ Eena dis chapta, wi wahn laan bowt weh wi ku du wen prablemz kom op wid wi bradaz. Wi wahn si wai Paal mi pik Timoti fi chravl lang wid ahn. Pahn tap a dat, wi wahn laan moa bowt di impoatant rispansabiliti weh serkit oavaseeyaz gat tudeh.

 4. Wai Paal mi waahn goh pahn wahn sekant mishineri chrip?

⁴ Eena di laas chapta, wi mi laan dat Paal, Baarnabas, Joodas, ahn Sailas mi inkorij di kangrigayshan da Antiyak wen dehn mi tel dehn bowt di disizhan weh di govanin badi mi mek bowt di serkomsizhan ishu. Afta dat, Paal staat tu plan wahn nyoo chrip, an ih gaahn tel Baarnabas bowt it. Ih tel ahn: “Mek wi goh bak tu aala di siti dehn weh wi mi preech di werd a Jehoava, ahn si how di bradaz di du.” (Aks 15:36) Paal neva mi-di tel Baarnabas fi mek dehn jos goh heng owt  wid di wan dehn weh mi jos ton Kristyanz. Bot eena Aks, ih tel wi wai Paal mi plan dis sekant mishineri chrip. Fers, Paal mi-di plan fi vizit di kangrigayshan dehn fi tel dehn di disizhan weh di govanin badi mi mek. (Aks 16:4) Sekant, laik how Paal mi deh eena di chravlin werk, fi hihn goal da-mi fi bil op di kangrigayshan dehn, fi help dehn groa spirichwali, ahn fi help dehn fayt geh schranga tu. (Roam. 1:11, 12) How di aaganaizayshan a Jehoava Witnisiz kapi di govanin badi eena di fers senchri fi schrentn di kangrigayshan dehn?

 5. How di Govanin Badi tudeh gaid an inkorij di kangrigayshan dehn?

⁵ Tudeh, Jeezas yooz di Govanin Badi fi gaid an inkorij di kangrigayshan dehn. Dehnya faytful anointid bradaz du dis chroo letaz, haad kapi an onlain poblikayshanz, meetinz, an ada tingz. Pahn tap a dat, di Govanin Badi apoint towznz a rispansabl bradaz rong di werl az serkit oavaseeyaz ahn sen dehn goh vizit di kangrigayshan dehn. Dehn yooz dis araynjment bikaaz dehn waahn stay kloas tu eech kangrigayshan.

6, 7. Wat da som a di rispansabiliti weh wahn serkit oavaseeya gat?

⁶ Serkit oavaseeyaz tudeh fala Paal egzampl wen dehn vizit di kangrigayshan dehn. How dehn du dis? Dehn werk haad fi shoa inchres eena eech persn ahn chrai schrentn dehn fayt. Paal tel Timoti, ih chravlin paadna: “Kip aan di preech di werd joorin gud taimz an joorin bad taimz. Teech peepl gud, karek dehn, ahn waan dehn, bot du it eena wahn payshent way soh dat yu ku inkorij dehn. . . . Kip aan di preech di gud nyooz.”—2 Tim. 4:2, 5.

⁷ Wahn serkit oavaseeya—lang wid ih waif if ih marid—chrai dehn bes fi fala weh da skripcha seh. Dehn werk lang wid di poblishaz eena difrent ayryaz a di minischri. Bikaaz dehn da gud teechaz ahn dehn lov di minischri, dehn set wahn gud egzampl weh di bradaz waahn kapi. (Roam. 12:11; 2 Tim. 2:15) Dehn wan eena di serkit werk shoa how dehn lov adaz moa dan dehnself kaaz dehn wilin fi goh da sohn plays wehpaat di weda da noh weh dehn yoostu er dehn eevn put dehn laif eena daynja. (Fil. 2:3, 4) Pahn tap a dat, wen di serkit oavaseeya dehn goh vizit wahn kangrigayshan, dehn gi sohn taak weh bays pahn di Baibl fi inkorij ahn teech di kangrigayshan dehn. Aala wi waahn chrai haad fi kapi dehn fayt.—Heeb. 13:7.

 8. How Baarnabas mi feel bowt Paal invitayshan?

⁸ Baarnabas mi laik di apasl Paal aidyaa fi goh “si how di bradaz di du.” (Aks 15:36) Sins dehn mi don werk tugeda bifoa, ahn dehn mi don noa di ayrya ahn di bradaz ahn sistaz wehpaat dehn mi-di plan fi goh,  ih mi onli mek sens fi mek dehn goh pahn dis asainment tugeda. (Aks 13:2–14:28) Bot wahn prablem kom op. Aks 15:37 seh: “Baarnabas mi-di insis fi kehr Jan, weh dehn kaal Maak, lang wid dehn.” Baarnabas neva mi-di gi Paal wahn sojeshan. Di skripcha seh ih “mi-di insis” fi kehr Maak lang wid dehn pahn dis mishineri chrip.

 9. Wai Paal neva waahn kehr Maak pahn di chrip?

⁹ Wai Paal neva waahn kehr Maak lang wid dehn? Di Baibl tel wi wai. Ih seh: “Paal neva gree wid dat, kaaz [Maak] mi lef dehn wen dehn mi deh da Pamfilya, insteda gaahn help dehn preech.” (Aks 15:38) Soh Maak mi don gaahn pahn wahn mishineri chrip wid Paal ahn Baarnabas. Bot ih neva stay wid dehn fi di hoal chrip. (Aks 12:25; 13:13) Lee bit afta di chrip staat, wail dehn mi stil deh da Pamfilya, hihn lef dehn ahn gaahn bak hoam da Jeroosalem. Di Baibl noh tel wi wai hihn mi lef dehn, bot ih luk laik Paal neva tink ih rait fi mek Maak jos lef dehn rait deh. Ahn dis mi mek Paal wanda if dehn kuda reeli pen pahn Maak.

10. Weh mi hapm afta Paal ahn Baarnabas mi ga wahn big aagyument?

¹⁰ Bot Baarnabas stil mi-di insis fi kehr Maak lang wid ahn. Bot Paal neva waahn kehr ahn non ataal. Aks 15:39 seh: “Sayka dis, big aagyument brok owt, ahn di too a dehn gaahn dehn oan way; Baarnabas kehr Maak wid ahn an sayl tu Saipros.” Soh Baarnabas gaahn hoam da Saipros, an ih mi kehr Maak lang wid ahn. Ahn Paal gaahn hed wid di mishineri chrip weh hihn mi plan. Di neks vers seh: “Paal mi chooz Sailas fi goh wid ahn, an afta di bradaz mi pray tu Jehoava fi tek kayr a ahn, ih gaan.” (Aks 15:40) Paal ahn Sailas “mi chravl chroo Siriya ahn Silaisya di schrentn di kangrigayshan dehn.”—Aks 15:41.

11. Weh wahn help wi fi stay frenz wid sohnbadi eevn if dehn hert wi?

¹¹ Weh mi hapm wid Paal ahn Baarnabas rimain wi dat wee imperfek tu. Di govanin badi mi sen dehn fi vizit difrent kangrigayshan. Ahn laytaraan, ih pasabl dat eevn Paal mi geh fi bee paat a di govanin badi. Bot eevn doa Paal ahn Baarnabas da-mi gud bradaz, dehn looz dehn tempa wid eech ada. Bot yu tink dis sichuwayshan mi brok op dehn frenship? Eevn doa Paal ahn Baarnabas mi imperfek, dehn mi hombl ahn chrai tink laik Jeezas. Fi shoar, oava taim dehn mi fergiv eech ada ahn fiks bak dehn frenship. (Ifee. 4:1-3) Ahn laytaraan, Paal ahn Maak mi geh fi werk tugeda agen. a—Kol. 4:10.

12. How oavaseeyaz tudeh ku kapi Paal ahn Baarnabas egzampl?

¹² Jos bikaaz Paal ahn Baarnabas mi geh beks wid eech ada da wan taim, dat noh meenz dat da-mi how dehn naamali bihayv. Evribadi mi  noa Baarnabas fi bee wahn kain persn weh mi redi fi help di bradaz ahn sistaz. In fak, dat da wai insteda kaal ahn bai ih naym, Joazef, di apasl dehn mi gi ahn di naym Baarnabas, weh meenz “Son a Komfert.” (Aks 4:36) Evribadi mi noa Paal az wahn jentl ahn lovin persn tu. (1 Tes. 2:7, 8) Evri elda, inkloodin serkit oavaseeyaz, shuda chrai fala Paal ahn Baarnabas egzampl fi bee hombl ahn chreet di bradaz ahn sistaz eena wahn kain way.—1 Peet. 5:2, 3.

13, 14. (a) Hoo da-mi Timoti, ahn how Paal mi geh fi meet ahn? (b) Weh mi mek Paal noatis Timoti? (c) Weh asainment Timoti mi get?

¹³ Pahn Paal sekant mishineri chrip, ih gaahn vizit di kangrigayshan dehn da Galaysha, weh mi deh anda Roaman roolaship. Laytaraan, “Paal reech da Derbi ahn den ih gaan da Lischra. Ahn wahn disaipl weh naym Timoti mi dehdeh; fi hihn ma da-mi wahn Jooish uman weh mi ga fayt eena Jeezas, bot ih pa da-mi wahn Greek man.”—Aks 16:1. b

¹⁴ Ih luk laik Paal mi don meet Timoti famili wen ih gaan pan ih fers mishineri chrip rong 47 C.E. Now chree yaaz layta, Paal mi-di vizit Timoti kangrigayshan pan ih sekant mishineri chrip an ih staat tu noatis Timoti. Wai wi seh dat? Dis ku bee bikaaz di bradaz “mi onli ga gud tingz fi seh bowt Timoti.” Hihn neva onli ga wahn gud repyutayshan eena ih kangrigayshan, bot eevn bradaz fahn Lischra an Aikoanyom, weh mi deh wahn gud wayz fahn wehpaat hihn mi liv, mi ga gud tingz fi seh bowt hihn tu. (Aks 16:2) Hoali spirit mi gaid di eldaz fi sen Timoti fi help Paal ahn Sailas pahn dehn mishineri chrip.—Aks 16:3.

15, 16. Wai Timoti mi ga wahn gud repyutayshan?

¹⁵ Wai Timoti mi ga wahn gud repyutayshan? Da neva bikaaz a how ih mi luk er kaaz ih mi soh smaat er ih mi ga lata skilz. Dehndeh da tingz weh peepl yoozhwali fokoas pan. Wan taim, eevn di prafit Samwel mi fokoas pahn how wahn persn mi luk. Bot Jehoava mi rimain ahn: “Di way peepl si tingz da noh di saym way how Gaad si tingz, kaaz peepl onli si how wahn persn luk pahn di owtsaid, bot Jehoava si weh deh eena dehn haat.” (1 Sam. 16:7) Soh eevn doa Timoti mi yong, ih mi ga wahn gud repyutayshan monks di bradaz ahn sistaz. Da neva bikaaz a weh ih kuda mi du, bot da mi bikaaz a ih gud Kristyan kwalitiz.

¹⁶ Yaaz dong di road, di apasl Paal mi taak bowt Timoti gud kwalitiz.  Paal mi taak bowt how Timoti mi kay moa bowt di bradaz dan bowt ih oanself, an ih mi werk haad eena wateva asainment ih mi geh. (Fil. 2:20-22) Di bradaz mi noa Timoti az wahn persn weh mi ga schrang fayt ahn weh mi “chros Gaad wid aala [ih] haat.”—2 Tim. 1:5.

17. How yong peepl tudeh ku bee laik Timoti?

¹⁷ Tudeh, wahn lata yong peepl di werk haad fi bee jos laik Timoti. Dehn ga wahn gud naym wid Jehoava an ih peepl, eevn doa dehn soh yong. (Prav. 22:1; 1 Tim. 4:15) Dehn shoa dat dehn chros Gaad wid aala dehn haat, ahn dehn noh bihayv wan way wid di kangrigayshan ahn bihayv wahn difrent way wen dehn deh wid dehn frenz. (Ps. 26:4) Ahn bikaaz dehn ga wahn gud naym, dehn ku bee yoosful eena di kangrigayshan, jos laik Timoti. Dehn mek evribadi hapi eena di kangrigayshan wen dehn ton poblisha, dedikayt dehn laif tu Jehoava, ahn geh baptaiz!

18. (a) How Paal ahn Timoti mi help owt di govanin badi? (b) How di kangrigayshan dehn mi benifit?

¹⁸ Paal ahn Timoti mi werk tugeda eena di chravlin werk fi yaaz, ahn dehn mi du weh di govanin badi mi tel dehn fi du. Dis da weh di akonk tel wi: “Az dehn mi chravl chroo dehndeh siti, dehn tel di bradaz bowt weh di apasl dehn ahn di eldaz fahn Jeroosalem mi disaid, soh dat dehn wuda aksep di inschrokshanz an obay.” (Aks 16:4) Ih luk laik di kangrigayshan dehn mi aksep aal di inschrokshanz fahn di apaslz ahn di elda dehn da Jeroosalem fi chroo. Ahn bikaaz dehn mi obay dehndeh inschrokshanz, “dis mi schrentn di fayt a di kangrigayshan dehn, ahn di nomba a bileevaz mi-di groa evri day.”—Aks 16:5.

19, 20. Wai wi waahn obay “di wan dehn weh di tek di leed”?

¹⁹ Tudeh, wen Jehoava Witnisiz wilin fi aksep aala di inschrokshanz weh kohn fahn dehn wan “weh di tek di leed,” dehn geh lata blesinz. (Heeb. 13:17) Bikaaz di werl kip aan di chaynj, ih impoatant fi mek wi pay atenshan ahn fi mek wi aplai di inschrokshanz weh “di faytful ahn waiz slayv” gi wi. (Mach. 24:45; 1 Kor. 7:29-31) Wen wi du dis, ih help wi fi noh mek notn fahn dis werl mek wi doti, an ih help wi ga schrang fayt.—Jay. 1:27.

²⁰ Paal, Baarnabas, Maak, ahn di ada eldaz eena di fers senchri da neva perfek peepl. Tudeh, Kristyan oavaseeyaz, inkloodin membaz a di Govanin Badi, noh perfek needa. (Roam. 5:12; Jay. 3:2) Bot bikaaz di Govanin Badi fala weh Gaad Werd seh ahn fala di egzampl weh di apasl dehn mi set, dat mek wi noa fi shoar dat wi ku chros dehn. (2 Tim. 1:13, 14) Ahn dis schrentn di fayt a di kangrigayshan dehn.