CHAPTA 22
“Da Jehoava Wil, Soh Mek Ih Hapm”
Paal mi don mek op ih main fi du Jehoava wil, soh ih gaahn da Jeroosalem
Dis chapta bays pahn Aks 21:1-17
1-4. Wai Paal gwehn da Jeroosalem, ahn weh mi wahn hapm tu ahn wen ih reech deh?
AZ DEHN mi-di lef Maileetos, da mi wahn sad sad taim fi Paal ahn Look, bikaaz dehn mi-di lef di eldaz fahn Efisos. Dis neva eezi, bikaaz dehn mi lov dehn wahn lat. Paal ahn Look mi-di stan op eena di boat wid dehn logij pak ahn redi fi di chrip. Dehn mi aalso ga di moni weh dehn mi kalek fi help di bradaz eena Judeeya. Ahn dehn mi kyaahn wayt fi mek shoar di doanayshanz reech di bradaz.
2 Wahn nais saaf breez mi-di bloa az di ship mi-di sayl weh fahn di naizi pyaa. Paal, Look, lang wid sevn bradaz, mi-di wayv gudbai tu di bradaz hoo mi deh pahn shoar. Dehn mi luk soh sad! (Aks 20:4, 14, 15) Dehn mi wayv tu dehn til dehn kudn si dehn nohmoh.
3 Fi bowt chree yaaz, Paal mi-di werk kloas-wan wid di eldaz da Efisos. Bot now di hoali spirit mi-di sen ahn da Jeroosalem. Hihn mi ga wahn lee aidyaa a weh mi wahn hapm tu hihn. Dis da weh hihn mi tel di eldaz bifoa ih lef: “Di spirit di gaid mi fi goh da Jeroosalem, eevn doa Ah noh noa weh wahn hapm tu mi deh. Di hoali spirit mi stay di waan mi seh dat Ah wahn fays chribyulayshan eena wan siti afta di neks ahn goh da prizn.” (Aks 20:22, 23) Eevn doa ih mi daynjaros, Paal mi feel dat ‘di spirit di gaid ahnʼ fi goh da Jeroosalem, ahn hihn mi wilin fi goh. Hihn neva waahn sofa er eevn ded, bot hihn mi noa dat fi du weh Jehoava waahn da di moas impoatant ting.
4 Yoo feel di saym way laik Paal? Wen wee dedikayt wi laif tu Gaad, wi pramis Jehoava wi wahn du weh hihn waahn. Eena dis chapta, wi wahn laan moa bowt di apasl Paal ahn how wee ku kapi fi hihn egzampl.
Dehn Paas “di Ailan a Saipros” (Aks 21:1-3)
5. Wich rowt Paal an ih frenz dehn tek fi chravl tu Taiya?
5 Di ship weh Paal an ih frenz mi deh pan “sayl schrayt tu Kos.” Dat meenz dat dehn mi ga jos di rait amonk a breez fi mek dehn reech da Kos laytaraan da saym day. (Aks 21:1) Ih luk laik dehn mi stay deh oavanait, ahn den di neks day dehn sayl tu Roadz ahn den tu Patara. Den wen dehn reech Patara, weh deh pahn di sowt said a Aysha Maina pahn di koas, di bradaz get pahn di neks ship weh kehr dehn schrayt da Taiya, weh deh eena Foneesha. Pahn di way deh, Look seh: “Pahn di lef han said, wi kuda mi si di ailan a Saipros, bot wi mi jos paas bai.” (Aks 21:3) Wai Look mi menshan dat?
6. (a) Wai ih mi praabli inkorij Paal wen ih si Saipros? (b) Wen yu tink bowt how Jehoava help yu ahn bles yu, how dat mek yu feel?
6 Ih ku bee dat wen Paal mi si Saipros, ih mi memba weh mi hapm wen ih mi deh pan ih fers mishineri chrip nain yaaz agoa. Hihn mosi mi tel di bradaz bowt wen ih mi-di chravl lang wid Baarnabas ahn Jan Maak, ahn how ih mi meet di oabyaman weh naym Elimas, hoo mi chrai stap dehn fahn preech. (Aks 13:4-12) Soh wen ih mi si di ailan, ih staat tu memba aal weh mi hapm tu ahn deh. Dat mi praabli inkorij ahn an schrentn ahn fi fays di tingz weh mi wahn hapm tu ahn da Jeroosalem. Wee wahn benifit if wi stap ahn tink bowt how Jehoava bles wi ahn help wi chroo difrent chraiyalz, ahn dat mek wi feel di saym way how Dayvid mi feel wen ih seh: “Di raichos persn goh chroo lata haad taimz, bot Jehoava reskyu ahn fahn aala dehn.”—Saa. 34:19.
“Wi Saach fi di Disaipl Dehn, ahn . . . Wi Fain Dehn” (Aks 21:4-9)
7. Weh Paal an ih frenz du wen dehn reech Taiya?
7 Paal mi si dat ih impoatant fi spen taim wid ada Kristyanz, ahn hihn mi onli hapi fi deh wid dehn. Wen dehn mi fainali reech da Taiya, Look mi rait: “Wi saach fi di disaipl dehn, ahn . . . wi fain dehn.” (Aks 21:4) Sins dehn mi noa dat dehn mi ga Kristyanz da Taiya, dehn mi disaid fi gaahn saach fi dehn, an ih ku bee dat dehn mi stay wid dehn. Saym ting hapm tudeh. Wan a di bigis blesin eva da fi deh eena di chroot, bikaaz noh mata wehpaat yu goh, dehn wahn aalwayz ga bradaz deh fi welkom yu. Ahn bikaaz wee lov Jehoava ahn wership ahn, wi ga frenz aal rong di werl.
8. Weh Aks 21:4 reeli meen?
8 Wen Look mi taak bowt di fers sevn dayz dehn mi spen da Taiya, hihn rait bowt sohnting weh kuda mi song kanfyoozin. Hihn mi rait: “[Di bradaz da Taiya] mi chrai haad fi kanvins Paal noh fi goh da Jeroosalem bikaaz a weh di hoali spirit mi tel dehn.” (Aks 21:4) Soh dis meen dat Jehoava mi chaynj ih main? Yu tink hihn mi-di tel Paal noh fi goh da Jeroosalem? No. Ih luk laik chroo di hoali spirit, di bradaz da Taiya mi geh fi andastan dat Paal mi wahn fays wahn lata chraiyalz da Jeroosalem. Soh dehn mi-di reeli wori bowt ahn, dats wai dehn mi bayg ahn noh fi goh. Bot Paal mi don mek op ih main fi du Jehoava wil, an ih kantinyu ih planz fi goh da Jeroosalem.—Aks 21:12.
9, 10. (a) Weh Paal mosi mi tink bowt wen di bradaz fahn Taiya bayg ahn noh fi goh da Jeroosalem? (b) Weh tinkin wahn lata peepl ga tudeh, bot how Jeezas waahn ih falowaz tink?
9 Wen di bradaz bayg Paal noh fi goh da Jeroosalem, Paal praabli memba how Jeezas disaiplz dehn mi gaan aan wen hihn mi tel dehn dat hihn mi gwehn da Jeroosalem, dat ih mi wahn sofa wahn lata tingz, ahn dat dehn mi wahn eevn kil ahn. Bikaaz Peeta mi kay soh moch bowt Jeezas, ih tel Jeezas: “Ga mersi pahn yuself, Laad; dehnya tingz noh wahn hapm tu yu ataal.” Bot Jeezas tel ahn: “Get bihain mi, Saytan! Yoo di chrai stap mi fahn du di wil a Gaad, bikaaz yoo tink di way peepl tink ahn noh di way Gaad tink.” (Mach. 16:21-23) Jeezas mi don mek op ih main fi du weh Jehoava aks ahn fi du, ahn fi giv op ih laif az wahn sakrifais. Ahn Paal mi ga da saym atichood. Soh jos laik how di apasl Peeta neva waahn notn bad hapm tu Jeezas, da rait soh di bradaz da Taiya neva waahn notn bad hapm tu Paal. Bot dehn neva andastan dat da mi Gaad wil fi mek Paal goh da Jeroosalem.
If wi waahn fala Jeezas, wi need fi bee wilin fi mek sakrifais
10 Tudeh, wahn lata peepl prifaa fi tek di eezi way owt. Dat da wai dehn chooz wahn rilijan weh alow dehn fi du wateva dehn waahnt insteda fala weh di Baibl seh. Bot Jeezas mi waahn mek ih disaipl dehn ga wahn difrent tinkin. Soh hihn neva beet rong di bush wen ih tel dehn: “If enibadi waahn fala mi, ih haftu disoan ihself ahn pik op ih taacha stayk ahn kip aan di fala mi.” (Mach. 16:24) Fi fala eena Jeezas futstep da di bes ting fi du, da di smaat ting fi du. Bot dat noh meenz dat da di eezi ting fi du.
11. How di disaiplz da Taiya mi shoa dat dehn lov ahn sopoat Paal?
11 Da mi soon taim fi mek Paal, Look, ahn dehn frenz lef Taiya. Ahn di akonk shoa wi dat di bradaz mi reeli lov Paal ahn dat dehn mi hapi fi sopoat ahn eena ih minischri. Soh di bradaz, sistaz, ahn dehn pikni gaahn lang wid Paal dehn da di beech. Aala dehn neel dong tugeda ahn pray, den dehn seh gudbai. Afta dat Paal, Look, ahn dehn frenz weh mi-di chravl wid dehn get pahn wahn boat ahn sayl da Tolemayas. Wen dehn get deh, dehn luk fi di bradaz ahn stay wid dehn fi wan day.—Aks 21:5-7.
12, 13. (a) Weh Filip mi du aal chroo ih laif? (b) How Kristyan bradaz weh ga pikni ku fala Filip egzampl?
12 Dis da weh Look tel wi hapm neks. Paal, Look, ahn dehn frenz aal gaahn da Seezareeya. Wen dehn reech deh, dehn “gaan da Filip hows.” a (Aks 21:8) Dehn mosi mi onli hapi fi si Filip. Memba dat bowt 20 yaaz bifoa, di apaslz da Jeroosalem mi apoint hihn lang wid sohn ada bradaz fi shayr owt food eena di kangrigayshan. Ahn wen persikyooshan mi brok owt da Jeroosalem, Filip mi lef ahn gaahn da Samayrya ahn staat preech deh. Laytaraan, hihn mi preech tu di Eetiyopyan hai ofishal ahn baptaiz ahn. (Aks 6:2-6; 8:4-13, 26-38) Filip mi faytful, an ih mi spen wahn lata yaaz eena di preechin werk. Hihn mi ful op a zeel, an ih mi lov preech!
13 Now, Filip mi liv da Seezareeya, ahn hihn mi stil bizi eena di preechin. Dat da wai Look mi kaal ahn “wahn preecha a di gud nyooz.” Ahn now hihn mi ga foa daata, ahn wi noa dat aala dehn mi praabli fala fi hihn egzampl, bikaaz dehn mi ga di gif fi prafesai. b (Aks 21:9) Fi shoar Filip mi werk haad fi help ih famili fi lov ahn serv Jehoava. Kristyan bradaz weh ga chiljren shuda chrai haad fi fala Filip egzampl. Dehn ku du dis wen dehn tek di leed eena di minischri ahn help dehn pikni ga wahn schrang lov fi di preechin werk tu.
14. How Paal vizits mi benifit di bradaz, ahn how wee ku du sohnting simila tudeh?
14 Wi mi si dat evriway Paal mi gaan, hihn mi luk fi di bradaz ahn hihn mi eega fi spen taim wid dehn. Ahn fi shoar di bradaz dehn mi hapi fi welkom Paal an ih frenz da dehn hows. Wi noa fi wahn fak dat weneva dehn mi ga dehndeh kaina vizit, dehn mi reeli “inkorij wan anada.” (Roam. 1:11, 12) Tudeh, wi ku du sohnting simila. Fi egzampl, eevn if wi hows smaal er noh fansi, wi ku stil invait di serkit oavaseeya an ih waif bikaaz wi wahn ku inkorij wan anada.—Roam. 12:13.
“Ah . . . Redi fi Ded” (Aks 21:10-14)
15, 16. Weh di prafit Agabos mi tel dehn, ahn weh dehn mi du?
15 Wail Paal mi-di stay da Filip hows, di prafit weh naym Agabos mi kohn vizit. Hihn da-mi di saym wan weh pridik di famin da Jeroosalem weh mi hapm wen Empera Klaadiyos mi-di rool. (Aks 11:27, 28) Dehn wan da Filip hows mosi mi wanda: ‘Wai Agabos kohn vizit, ahn weh mesij hihn wahn tel wi?ʼ Wail evribadi mi-di wach kloas-wan, Agabos tek di belt fahn rong Paal ways. Dis belt mi mek owta klaat, ahn yu kuda mi put moni an ada tingz een deh. Agabos mi yooz di belt fi tai op ih fut an ih han dehn. Aftawodz, ih gi dehn wahn impoatant mesij. “Dis da weh di hoali spirit seh, ‘Di Jooz eena Jeroosalem wahn tai op di man weh oan dis belt jos laik dis, ahn dehn wahn han ahn oava tu di peepl fahn ada nayshanz.ʼ”—Aks 21:11.
16 Da prafesi mek dehn noa fi shoar dat Paal mi gwehn da Jeroosalem, an ih mi mek dehn noa dat di Jooz rait deh mi wahn “han ahn oava tu di peepl fahn ada nayshanz.” Evribadi weh mi deh da Filip hows mi staat wori wen dehn hyaa da prafesi. Look tel wi weh mi hapm neks: “Now wen wi hyaa dis, wee ahn di wan dehn weh mi dehdeh staat tu bayg Paal noh fi goh da Jeroosalem. Den Paal ansa dehn ahn seh: ‘Wai unu di baal ahn chrai diskorij mi? Ai noh onli redi fi goh da prizn bot Ah aalso redi fi ded da Jeroosalem fi di naym a di Laad Jeezas.ʼ”—Aks 21:12, 13.
17, 18. How Paal mi shoa dat ih mek op ih main fi du Jehoava wil, ahn how di bradaz mi riyak?
17 Wee ku picha di komoashan da Filip hows. Di bradaz, inkloodin Look, mi-di beg Paal fi noh goh da Jeroosalem. Som a dehn mi eevn di krai anaal. Dat mi reeli toch Paal haat, kaaz hihn mi si dat dehn mi reeli lov ahn. Soh Paal mi jentl wid dehn wen ih tel dehn dat dehn mi-di “diskorij” ahn. Sohn ada Baibl chranslayshan seh da laik if dehn mi-di “brok ih haat.” Bot dat neva mek ih chaynj ih main ataal. Hihn eksplayn tu dehn wai hihn mi need fi goh da Jeroosalem, jos laik how ih mi du wid di bradaz da Taiya. Jos laik weh Jeezas mi du, Paal mi stil mek op ih main fi goh da Jeroosalem. (Heeb. 12:2) Paal neva waahn ded, bot if ih mi kohn tu dat, hihn mi wilin fi ded bikaaz hihn da-mi wan a Jeezas disaipl. Dat mi shoa wahn lata korij, noh chroo?
18 How di bradaz mi riyak tu weh Paal mi seh? Di akonk tel wi: “Wen wi riyalaiz dat wi kudn chaynj ih main, wi giv op ahn seh: ‘Da Jehoava wil, soh mek ih hapm.ʼ” (Aks 21:14) Dehn bradaz weh mi-di chrai stap Paal fahn goh da Jeroosalem mi lisn tu Paal, ahn dehn mi andastan dat da mi Jehoava wil. Dehn mi rispek ih disizhan ahn stap chrai diskorij ahn. Paal mi don mek op ih main eevn doa ih mi noa dat ih mi wahn en op di ded. An ih mi wahn mek ih laif eeziya if dehn wan weh mi lov ahn stap chrai diskorij ahn, an chrai tel ahn weh fi du.
19. Weh di akonk bowt Paal teech wi?
19 Di akonk bowt Paal teech wi dat wi neva waahn diskorij adaz fahn du moa eena Jehoava servis. Fi egzampl, eevn doa sohn Kristyan payrents fain it haad fi si dehn pikni lef hoam ahn serv sohnweh faar, dehn hapi fi dehn ahn du aal dehn kud fi sopoat dehn. Phyllis da wan a dehnya payrents. Shee da fahn England ahn shee memba wen fi shee daata mi gaahn serv az wahn mishineri da Africa. “Ih mi mek Ah feel sad dat shee mi deh soh faar fahn mi, bot Ah mi prowd a ahn. Ah pray wahn lat bowt it. Da mi fi shee disizhan an Ah mi neva chrai stap ahn. Ahn da mee saym wan mi teech ahn fi put di Kingdom fers eena ih laif eniwayz! Shee don serv eena difrent asainment fi 30 yaaz now, an Ah tank Jehoava dat shee stay faytful tu ahn.” Da wahn wandaful ting fi inkorij di bradaz fi bee wilin fi mek sakrifais fi du moa eena Jehoava servis!
Ih aalwayz gud fi inkorij bradaz ahn sistaz weh mek lata sakrifais
Aks 21:15-17)
“Di Bradaz Mi Gi Wi Wahn Waam Welkom” (20, 21. Weh mi shoa dat Paal mi reeli waahn spen taim wid di bradaz, ahn weh hihn mi waahn du fi help dehn?
20 Paal geh redi an ih kantinyu pan ih way lang wid di bradaz weh sopoat ahn wid aala dehn haat. Wi mi si dat joorin di hoal chrip, Paal an ih frenz mi luk fi di bradaz ahn sistaz da di difrent plays weh dehn mi stap. Da Taiya, dehn mi fain di disaiplz ahn stay wid dehn fi sevn dayz. Dehn mi spen wan day wid di sistaz ahn bradaz da Tolemayas. Ahn dehn mi stay wahn fyoo dayz wid di disaiplz da Seezareeya da Filip hows. Afta dat, som a di bradaz fahn Seezareeya gaahn lang wid Paal an ih frenz da Jeroosalem, wehpaat dehn mi stay wid wahn disaipl weh naym Manaysn. Wen dehn fainali reech da Jeroosalem, dis da weh Look tel wi: “Di bradaz mi gi wi wahn waam welkom.”—Aks 21:17.
21 Ih mi klyaa dat Paal mi reeli waahn deh wid ih bradaz ahn sistaz, ahn dehn mi inkorij hihn wahn lat. Tudeh, wi waahn deh monks wi bradaz weh inkorij wi tu. Fi shoar, di inkorijment weh Paal mi get fahn di frenz mi help ahn bayr op anda persikyooshan fahn di peepl weh mi wahn chrai kil ahn.
a Reed di baks weh naym “ Seezareeya—di Kyapital a Judeeya.”
b Reed di baks weh naym “ Wahn Kristyan Wuman Ku Bee Wahn Teecha?”