LESN 3
Yu Tink di Gud Nyooz Da Reeli Fahn Gaad?
1. Da hoo di Baibl kohn fram?
Di Baibl gat een gud nyooz. Ih tel wi dat peepl wahn liv fareva pahn di ert. (Machyu 5:5) Di Baibl mek op a 66 lee buk put tugeda, ahn Gaad yooz bowt 40 man weh mi faytful tu hihn fi rait dehn dong. Da bowt 3,500 yaaz sins Moaziz mi rait di fos faiv buk, ahn bowt 1,900 yaaz sins di apasl Jan mi rait di laas buk. How dehn mi noa weh fi rait? Gaad mi mek dehn noa chroo fi hihn hoali spirit. (2 Samuel 23:2) Dehn mi rait onli weh Gaad tel dehn fi rait, ahn noh fi dehn oan aidyaa. Soh dis meen dat di Baibl kohn fahn Jehoava.—Reed 2 Timoti 3:16; 2 Peeta 1:20, 21.
Wach di veedyo Da Hoo di Baibl Kohn Fram?
2. How wi ku bee shoar dat di Baibl kohn fahn Gaad?
Evriting di Baibl seh bowt di fyoocha aalwayz kohn chroo, rait dong tu di leelis deetayl. Onli di Almaiti Gaad ku si egzakli weh wahn hapm eena di fyoocha. Nobadi els ku du dat. (Joshua 23:14) Soh wi ku bee shoar di Baibl kohn fahn Gaad.—Reed Taitos 1:2, 3.
Bikaaz di Baibl kohn fahn Gaad, ih difrent fahn evri ada buk. Yu kud fain bilyanz a kapi a di Baibl eena honjridz a langwij. Eevn doa di Baibl da wahn oal buk, ih noh goh gens weh saiyens don proov. Ahn di 40 man weh mi rait di Baibl neva kanchradik wan anada needa. * Pahn tap a dat, di Baibl shoa wi dat Gaad lov wi, ahn ih ga di powa fi chaynj peepl laif fi di beta. Dehnya da jos som a di ting dehn weh kanvins milyanz a peepl dat di Baibl da di Werd a Gaad.—Reed 1 Tesaloanyanz 2:13.
Wach di veedyo How Wi Ku Bee Shoar Dat di Baibl Kohn Fahn Gaad?
3. Da weh di Baibl taak bowt?
Di Baibl foakos pahn di gud nyooz dat Gaad ga wahn wandaful perpos fi aala wi. Ih eksplayn how erli eena hischri Adam ahn Eev mi looz owt pahn di privilij fi liv eena wahn paradais pahn di ert, ahn how di ert wahn bee wahn paradais agen.—Reed Revilayshan 21:4, 5.
Di Baibl gat een lata laa ahn advais weh ku help wi liv wahn beta laif. Lang wid dat, ih hav een sohn egzampl a how Gaad chreet peepl eena di paas. Dis teech wi bowt Jehoava wayz. Soh, di Baibl ku help wi noa bowt Gaad ahn ih eksplayn how wi ku bee fi hihn fren.—Reed Roamanz 15:4; Jaymz 2:23; 4:8.
4. How yoo ku andastan di Baibl?
Di way Jeezas mi yoostu teech ku help yu andastan di Baibl. Hihn mi eksplayn di skripcha dehn wan bai wan soh peepl “kuda mi andastan weh di Skripcha seh.” Dis broashoar fala da sayhn way how Jeezas mi teech.—Reed Look 24:27, 45.
Di gud nyooz fahn Gaad da wan a di moas inchrestin ting yu kuda eva laan bowt. Stilyet, sohn peepl noh waahn hyaa it, ahn ada peepl geh beks wen yu tel dehn bowt it. Bot noh mek dat diskorij yu. Onli if yu geh fi noa Gaad yu wahn ku ga di hoap fi liv fareva.—Reed 1 Timoti 2:4.
^ par. 3 Si di broashoar A Book for All People.
