LESN 8
Wai Gaad Talarayt Wikidnis ahn Sofarin?
1. How wikidnis mi staat?
Gaad alow man fi rool lang inof fi shoa dat dehn kyaahn fiks dehn oan prablemz
Wikidnis mi staat pahn di ert wen Saytan tel di fos lai. Hihn da-mi wahn perfek aynjel, bot laytaraan ih neva “waahn ga notn fi du wid di chroot.” (Jan 8:44) Hihn mi reeli waahn di wership weh bilangz onli tu Gaad. Saytan tel Eev wahn lai, ahn kanvins ahn fi obay hihn insteda Gaad. Adam jain op wid Eev ahn gaan gens Gaad. Fi hihn disizhan da weh kaaz sofarin ahn det.—Reed Roamanz 5:19; 2 Korintyanz 11:3.
Wen Saytan tel Eev fi stap lisn tu Gaad, hihn mi-di staat op wahn ribelyan gens Gaad pozishan az di Moas Hai. Moas a di peepl pahn di ert jain op wid Saytan ahn rijek Gaad az dehn Roola. Soh, Saytan da “di wan weh di rool dis werl.”—Reed Jan 14:30; 1 Jan 5:19.
2. Yu tink eniting mi rang wid weh Gaad mek?
Evriting weh Gaad du perfek. Soh, wen hihn mek Adam ahn Eev ahn di aynjel dehn, dehn neva ga no reezn wai dehn kudn bee obeedyant tu ahn. (Deuteronomy 32:4, 5) Gaad mi mek wi wid di freedom fi chooz if wi waahn du gud er bad. Da sayhn freedom gi wi di apachooniti fi reeli shoa wi lov fi Gaad.—Reed Jaymz 1:13-15; 1 Jan 5:3.
3. Wai Gaad di talarayt sofarin op tu now?
Fahn bak eena di gyaadn a Eedn, Jehoava di talarayt dis ribelyan gens fi hihn roolaship. Ih du dat fi shoa dat wen hyoomanz chrai rool widowt hihn, ih noh wahn werk owt gud fi dehn. (Ecclesiastes 7:29; 8:9) Wi ku si di proof a dis. Afta 6,000 yaaz a hyooman roolaship, dehn fayl fi geh rid a waar, kraim, injostis, ahn siknis.—Reed Jeremiah 10:23; Roamanz 9:17.
Gaad roolaship da noh laik hyooman roolaship; ih wahn benifit evribadi weh alow hihn fi rool oava dehn. (Isaiah 48:17, 18) Soon, Jehoava wahn geh rid a aala di hyooman govament dehn. Den, onli peepl weh chooz fi mek hihn rool oava dehn wahn liv pahn di ert.—Isaiah 11:9. Reed Revilayshan 11:15.
Wach di veedyo Wai Gaad Talarayt Sofarin?
4. Weh apachooniti wi ga bikaaz Gaad payshent?
Saytan mi seh dat wi noh serv Jehoava bikaaz wi lov ahn, bot bikaaz a weh ih gi wi. Bot if yu waahn, yu ku proov dat Saytan laiyad. Bikaaz Gaad payshent, aala wi ga di apachooniti fi shoa if wi waahn Gaad rool oava wi, er man rool oava wi. Di way wi liv wi laif shoa wich wan wi prifaa.—Reed 2 Peeta 3:9; Revilayshan 12:10.
5. How wi ku chooz Gaad fi bee wi Roola?
Di disizhan dehn weh wi mek shoa if wi waahn Gaad bee wi Roola
Wen wi saach fi di chroot fahn di Baibl ahn praktis weh ih seh, wi di chooz Gaad az wi Roola. (Machyu 7:21) Wen wi stay owta palitiks ahn waar, jos laik Jeezas, wi di rijek Saytan az wi roola.—Reed Jan 17:14.
Saytan yooz fi hihn powa fi mek tingz weh reeli bad luk gud, laik loos laif ahn ada bad habit. Wen wi rijek dehn kaina ting deh, som a wi fren ahn famili dehn mait mek fon a wi er ton gens wi. (1 Peeta 4:3, 4) Soh wi hafu aks wiself: ‘Hoo da fi wee frenz? Da peepl weh lov Gaad? How wi feel bowt Gaad laa? Dehn lovin ahn waiz, er dehn tu schrik?’ Yu si, if wi chooz fi obay Gaad, wi wahn proov dat Saytan mi lai wen ih seh dat nobadi wahn du weh Gaad seh wen taim geh haad.—Reed 1 Korintyanz 6:9, 10; 15:33.
Di lov weh Gaad ga fi wi mek wi noa fi shoar dat wikidnis ahn sofarin wahn en. Dehn wan weh shoa dehn fayt eena dis ahn chooz Gaad az dehn Roola, wahn injai laif pahn di ert fareva.—Reed 1 Jan 4:9, 10.
