LESN 7
Wat da di Kingdom a Gaad?
1. Wat da di Kingdom a Gaad?
Weh mek Jeezas di bes King? —MAAK 1:40-42.
Di Kingdom a Gaad da wahn govament weh di rool fahn hevn. Ih wahn tek di plays a aal ada govament ahn mek evribadi obay Gaad pahn ert jos laik how evribadi obay ahn da hevn. Dis da gud nyooz. Wi need wahn gud govament, ahn Gaad Kingdom da di onli wan weh ku gi wi dat. Ih wahn bring evribadi weh liv pahn di ert bak tugeda.—Reed Daniel 2:44; Machyu 6:9, 10; 24:14.
Wahn kingdom hafu ga wahn king. Jehoava don pik fi hihn Son, Jeezas Krais, fi bee di King a fi Hihn Kingdom.—Reed Revilayshan 11:15.
Wach di veedyo Wat Da di Kingdom a Gaad?
2. Wai Jeezas da di bes King?
Jeezas da di bes King bikaaz hihn da wahn kain persn, ahn ih stan op schrang-wan fi weh rait. (Machyu 11:28-30) Sins hihn wahn rool oava di hoal ert fahn hevn, hihn wahn ga nof powa fi help peepl. Afta hihn mi geh rayz op bak, ih gaan op da hevn ahn wayt bai di rait han said a Gaad. (Heebrooz 10:12, 13) Den, Gaad gi ahn di powa fi staat rool.—Reed Look 1:32, 33.
3. Hoo wahn rool wid Jeezas?
Wahn groop a peepl wahn rool lang wid Jeezas da hevn. Di Baibl kaal da groop “di hoali wan dehn.” (Daniel 7:27) Jeezas faytful apasl dehn da-mi di fos set fi geh pik fi da groop. Jehoava di kantinyu pik faytful man ahn uman fi bee paat a da groop dong tu tudeh day. Wen dehnya wan ded, dehn geh rayz op bak wid wahn spirichwal badi jos laik Jeezas.—Reed Jan 14:1-3; 1 Korintyanz 15:42-44.
Humoch peepl gwehn da hevn? Jeezas mi tel ih apasl dehn da jos “wahn lee bit.” (Look 12:32) Da nomba da 144,000. Dehn wahn rool lang wid Jeezas oava di ert.—Reed Revilayshan 14:1.
4. Weh mi hapm wen Jeezas staat rool?
Gaad Kingdom mi staat rool eena 1914. * Di fos ting Jeezas mi du wen ih staat rool da-mi chroa Saytan ahn ih deemonz dehn owta hevn dong pahn di ert. Dis mi mek Saytan beks bad, ahn ih staat mek chrobl aal oava di ert. (Revilayshan 12:7-10, 12) Bikaaz a dat, aala fi wee prablem dehn di geh wers. Waar, staavayshan, siknis, ahn ertkwayk da paat a di sain weh shoa wi dat di Kingdom wahn soon tek oava di ert.—Reed Look 21:7, 10, 11, 31.
5. Weh Gaad Kingdom di du?
Gaad Kingdom di yooz di preechin a di gud nyooz fi bring wahn big big krowd a peepl fahn aal nayshan tugeda eena pees. Milyanz a hombl peepl di kohn fi sopoat Jeezas az King. Gaad Kingdom wahn protek dehn wen ih dischrai dis wikid sistem a tingz pahn di ert. Enibadi weh waahn injai di blesin weh di Kingdom wahn bring, hafu laan fi obay Jeezas.—Reed Revilayshan 7:9, 14, 16, 17.
Ih wahn tek 1,000 yaaz fi mek di Kingdom du evriting weh Gaad mi perpos fi peepl fahn di biginin. Ih wahn ton di hoal ert intu wahn paradais. Den, Jeezas wahn han oava di Kingdom bak tu Jehoava. (1 Korintyanz 15:24-26) Yu noa enibadi weh yu wuda waahn tel bowt Gaad Kingdom?—Reed 2 Peeta 3:13.
^ par. 6 Fi moa deetayl bowt how di yaa 1914 fulfil Baibl prafesi, si di noat Wai di Yaa 1914 Soh Impoatant? a di buk Weh di Baibl Ku Teech Wi?
