Jehoava mi mek di ert fi hyoomanz. Dis da fi wee hoam. Soh den, Adam ahn Eev ahn dehn pikni mi fi liv pahn di ert, ahn noh da hevn. Gaad mi don mek di aynjel dehn fi liv op dehsoh. (Job 38:4, 7) Hihn mi tek di fos man ahn put ahn fi liv eena wahn byootiful paradais weh naym di gyaadn a Eedn. (Genesis 2:15-17) Jehoava gi hihn ahn ih fyoocha pikni dehn di chaans fi injai laif fareva pahn di ert.​—Reed Aks 17:26; 1 Jan 2:17.

Eena di biginin, onli di gyaadn a Eedn da-mi wahn paradais. Adam ahn Eev mi fi ful op di hoal ert wid dehn pikni. Dehn mi fi tek kyaa a di hoal ert, ahn lee bit bai lee bit, ton it intu wahn paradais. (Genesis 1:28) Di ert wahn neva geh dischrai. Ih wahn aalwayz bee fi wee hoam.​—Reed Psalm 104:5.

Wach di veedyo Wai Gaad Mek di Ert?

Adam ahn Eev neva lisn tu Gaad, soh Jehoava put dehn owta di gyaadn. Dehn looz owt pahn paradais, ahn fahn den no hyooman kuda neva bring it bak agen. Di Baibl seh dat “wikid peepl ahn dehn wan weh di lai” di tek kanchroal a di werl.—2 Timoti 3:13.​—Reed Genesis 3:23, 24.

Dis noh meen seh dat Jehoava giv op pahn fi hihn orijinal perpos fi wee. Hihn da di Almaiti ahn hihn kyaahn fayl. (Isaiah 45:18) Hihn wahn bring bak di hyooman famili tu how hihn mi waahn ih bee fahn di biginin.​—Reed Psalm 37:11, 34.

Jeezas di rool az King eena Gaad Kingdom, ahn Gaad wahn yooz hihn fi bring bak di Paradais. Fos, Jeezas ahn di  aynjel dehn wahn dischrai aala dehn wan weh deh gens Gaad, eena wahn waar weh di Baibl kaal Armagedon. Jeezas wahn gaid ahn protek Gaad peepl, soh dehn wahn geh sayv fahn da dischrokshan. Afta dat, Jeezas wahn lak op Saytan fi 1,000 yaaz. Den, Gaad peepl wahn injai laif fareva eena Paradais pahn ert.​—Reed Revilayshan 20:1-3; 21:3, 4.

Wen Gaad wahn put wahn en tu aala di wikidnis pahn di ert? Jeezas mi giv wahn sain fi shoa dat di en soon kohn. If dehnya ting kantinyu fi hapm, dehn ku dischrai evribadi weh deh pahn di ert. Dis mek wi noa dat da soon “taim fi di werl kohn tu wahn en.”​—Reed Machyu 24:3, 7-14, 21, 22.

Jeezas wahn en sofarin wen ih di rool fahn hevn oava di ert fi 1,000 yaaz. (Isaiah 9:6, 7; 11:9) Hihn noh jos wahn bee wahn King. Hihn wahn bee wahn Hai Prees tu. Ih wahn waip weh sin fahn dehn wan weh lov Gaad. Soh Gaad wahn yooz Jeezas fi geh rid a siknis, oal ayj, ahn det.​—Reed Isaiah 33:24; 1 Korintyanz 15:26.

Peepl weh obay Gaad wahn liv eena Paradais. (1 Jan 2:17) Jeezas mi sen ih falowaz fi saach fi hombl peepl ahn teech dehn how fi bee rait wid Gaad. Tudeh, Jehoava di pripyaa milyanz a peepl fi liv eena di fyoocha Paradais pahn ert. (Zephaniah 2:3) Da di Kingdom Haal a Jehoava Witnisiz, peepl di laan how dehn ku bee wahn beta hozban er pa ahn wahn beta waif er ma. Chiljren wership lang wid dehn ma ahn pa, ahn tugeda dehn laan how di gud nyooz ku help dehn eena dehn laif.​—Reed Revilayshan 15:4.