LESN 03
Yoo Tink Yu Ku Chros di Baibl?
Di Baibl mek wahn lata difrent pramis ahn gi wi wahn lata gud advais. Ahn yoo praabli waahn laan weh di Baibl seh, bot sayhn taim yu noh tu shoar if dat da di bes ting fi du. Yu tink yu shuda chros di advais ahn pramis dehn weh deh eena wahn buk weh soh oal? Yu tink yu ku reeli bileev weh di Baibl seh bowt how fi injai laif now an eena di fyoocha? Milyanz a peepl tink soh. Bot wi di invait yu fi fain owt wai dehn tink da way ahn si weh yoo tink.
1. Di stoari dehn eena di Baibl mi reeli hapm?
Di Baibl tel wi dat ih gat een “karek werdz a chroot.” (Ecclesiastes 12:10) Ih taak bowt reel tingz weh mi hapm tu reel peepl. (Reed Look 1:3; 3:1, 2.) Lata peepl weh stodi hischri fain proof dat tingz weh di Baibl seh bowt sohn impoatant dayt, peepl, plays, an ivent dehn da chroo.
2. How wi noa dat wi ku chros di Baibl eevn doa da wahn oal buk?
Di Baibl gat een lata infamayshan weh peepl neva noa bowt joorin di taim wen ih mi geh rait. Fi egzampl, di Baibl taak bowt wahn lata tingz weh ga fi du wid saiyens. Bak den, lata peepl neva bileev weh di Baibl seh bowt dehndeh tingz. Bot di saiyentis dehn eena fi wee taim proov dat weh di Baibl seh da chroo. Di Baibl da wahn buk weh wi ku “aalwayz chros, now an fareva.”—Psalm 111:8.
3. Wai wi ku chros weh di Baibl seh bowt di fyoocha?
Di Baibl gat een lata prafesi a weh taak bowt “tingz weh noh hapm yet.” (Isaiah 46:10) Di Baibl prafesai bowt wahn lata difrent ivent eena hischri way bifoa dehn mi eevn hapm. Di Baibl aalso tel wi deetaylz bowt di kandishan a di werl tudeh. Eena dis lesn, wi wahn luk pahn som a dehndeh Baibl prafesi. Ih amayzin fi si how evriting weh di Baibl seh kohn chroo!
SAACH FI MOA
Mek wi si how saiyens gree wid weh di Baibl seh, ahn mek wi fain owt moa bowt som a di amayzin Baibl prafesi dehn.
4. Saiyens gree wid weh di Baibl seh
Way bak eena di paas, moas peepl mi bileev dat sohnting mi-di hoal op di ert. Play di VEEDYO.
Noatis weh di Baibl seh eena di buk a Job, wahn buk weh mi geh rait bowt 3,500 yaaz agoa. Reed Job 26:7, ahn den diskos dis kweschan:
-
Wat soh inchrestin bowt weh di Baibl seh dat di ert noh di heng “pahn notn”?
Da neva til di 1800ʼs dat peepl mi andastan gud how di waata saikl werk. Bot noatis weh di Baibl mi seh towznz a yaaz agoa. Reed Job 36:27, 28, ahn den diskos dehnya kweschan:
-
Wai ih soh amayzin fi reed bowt di way how di Baibl eksplayn di waata saikl?
-
Yu feel laik di skripchaz weh yu jos reed help yu fi chros di Baibl moa?
5. Di Baibl prafesai bowt sohn veri impoatant ivent
Reed Isaiah 44:27–45:2, ahn den diskos dis kweschan:
-
Weh di Baibl mi prafesai 200 yaaz bifoa Babilan geh dischrai?
Hischri proov dat Sairos, di king a Perzha, ahn fi hihn aami mi wahn kanka Babilan eena 539 B.C.E. b Dehn dig wahn big jrayn soh dat di waata levl kuda mi goh dong mek dehn ku waak kraas di riva weh mi-di protek di siti. Afta dehn get eena di siti chroo di gayt dehn weh mi lef oapm, dehn kanka di siti widowt eevn haftu fait. Tudeh, moa dan 2,500 yaaz layta, Babilan da notn bot rooinz. Noatis weh di Baibl mi prafesai.
Reed Isaiah 13:19, 20, ahn den diskos dis kweschan:
-
How dis prafesi mi kohn chroo?
Dis da how Babilan luk tudeh, da Iraq
6. Di Baibl tel wi bowt tingz weh wi si di hapm tudeh
Di Baibl tel wi dat wi di liv eena “di laas dayz.” (2 Timoti 3:1) Noatis weh di Baibl seh mi wahn hapm joorin dis taim.
Reed Machyu 24:6, 7, ahn den diskos dis kweschan:
-
Wat da sohn tingz weh di Baibl seh wahn hapm joorin di laas dayz?
Reed 2 Timoti 3:1-5, ahn den diskos dehnya kweschan:
-
How di Baibl seh peepl mi wahn bihayv joorin di laas dayz?
-
How yoo si peepl di bihayv nowadayz?
WEH YU WUDA SEH IF SOHNBADI TEL YU: “Di Baibl da loan lai ahn stoari.”
-
Weh mek yoo tink dat wi ku chros di Baibl?
WEH WI LAAN?
Hischri, saiyens, ahn prafesi shoa wi dat wi ku chros weh di Baibl seh.
Mek Wi Rivyoo:
-
Di stoari dehn eena di Baibl mi reeli hapm?
-
Wat da sohn egzampl weh shoa wi dat saiyens ahn di Baibl gree?
-
Yu tink dat di Baibl tel wi weh wahn hapm eena di fyoocha? Wai yu seh dat?
FAIN OWT MOA
Di Baibl gat een tingz weh kanchradik saiyens?
Weh di Baibl seh mi wahn hapm joorin “di laas dayz”?
“6 Baibl Prafesi Weh Yu Si Di Kohn Chroo Tudeh” Paat 2, 3, 4, 5, 6, 7, ahn 8 (Di Wachtowa, May 1, 2011)
Fain owt how di Baibl prafesi dehn bowt di aynshent nayshan a Grees mi kohn chroo.
Fain owt how di Baibl prafesi dehn mi chaynj di way how wahn man vyoo di Baibl.
