LESN 01

How di Baibl Ku Mek Yu Laif Beta?

PLAY

Aala wi waahn noa moa bowt laif, wai wi sofa, wai wi ded, ahn weh wahn hapm eena di fyoocha. Wi aalso wori bowt tingz weh ga fi du wid evriday laif, laik how fi mek wahn livin er how fi ga wahn hapi famili. Lata peepl fain dat di Baibl help dehn fi ansa di moas impoatant kweschan dehn eena laif. An ih aalso gi dehn gud advais weh dehn ku yooz evri day. Yoo tink di Baibl ku help wee tudeh?

1. Wat da sohn kweschan weh di Baibl ku help wi ansa?

Di Baibl ansa dehnya impoatant kweschan: How laif mi staat? Wat da di perpos a laif? Wai inosent peepl sofa? Weh hapm wen sombadi ded? If evribadi waahn pees, wai wi ga soh moch waar? Weh di ert wahn bee laik eena di fyoocha? Di Baibl inkorij wi fi luk fi di ansaz tu dehndeh kaina kweschan. Ahn di ansaz weh wi fain eena di Baibl mek wahn lata peepl veri hapi.

2. How di Baibl ku help wi fi injai wi evriday laif?

Di Baibl gi wi gud advais. Fi egzampl, ih teech wi weh wi ku du fi mek wi famili bee reeli ahn chrooli hapi. Ih aalso gi wi advais pahn how fi deel wid schres ahn how fi injai di werk weh wi du. Mek wi diskos dis infamayshan tugeda ahn mek wi laan weh di Baibl teech bowt dehnya tapik ahn moch moa. Yu mait eevn agree wid weh di Baibl seh wen ih tel wi dat “evriting weh deh eena di Skripchaz . . . gud.”—2 Timoti 3:16.

Dis poblikayshan noh tek di plays a di Baibl, bot ih help yu fi andastan it. Wi inkorij yu fi reed aala di skripchaz weh deh eena di lesn dehn ahn kompyaa dehn wid weh yu di laan.

SAACH FI MOA

Fain owt how di Baibl help lata peepl, how yoo ku injai Baibl reedin, ahn wai ih gud fi geh help fi andastan it.

3. Di Baibl ku help wi

Di Baibl da laik wahn brait flashlait. Ih ku shoa wi how fi mek gud disizhanz, an ih ku help wi si weh wahn hapm eena di fyoocha.

Reed Psalm 119:105, ahn den diskos dehnya kweschan:

How di persn weh mi rait dis skripcha feel bowt di Baibl?
How yoo feel bowt di Baibl?

4. Di Baibl ku ansa wi kweschanz

Wahn laydi mi ga lata kweschan pan ih main fi meni yaaz weh shee kudn ansa pan ih oan. Shee mi fain owt dat di Baibl gat een di ansaz tu dehndeh kweschan. Play di VEEDYO, ahn den diskos dehnya kweschan:

VEEDYO: Noh Giv Op Hoap! (1:48)

Eena di veedyo, weh kaina kweschanz di laydi mi gat weh ih kudn ansa pan ih oan?
How di Baibl help ahn wen ih mi stodi it?

Di Baibl inkorij wi fi aks kweschanz. Reed Machyu 7:7, ahn den diskos dis kweschan:

Weh kweschanz yoo gat weh yu tink di Baibl ku ansa fi yu?

5. Yoo ku laan fi injai reed di Baibl

Lata peepl injai reed di Baibl ahn dehn benifit wahn lat fan it. Play di VEEDYO, ahn den diskos dehnya kweschan:

VEEDYO: Baibl Reedin (2:05)

How di yong peepl eena di veedyo feel bowt reedin?
Eevn doa dehn noh laik reed, wai dehn laik reed di Baibl?

Di Baibl seh dat ih ku teech wi, komfert wi, ahn gi wi hoap. Reed Roamanz 15:4, ahn den diskos dis kweschan:

Yoo waahn noa moa bowt di komfert ahn hoap weh di Baibl pramis yu?

6. Adaz ku help wi fi andastan di Baibl

Lata peepl reed di Baibl pahn dehn oan, bot dehn fain owt dat wen dehn diskos it wid adaz ih help dehn moa. Reed Aks 8:26-31, ahn den diskos dis kweschan:

Weh wee ku du fi andastan di Baibl beta?—Si vers 30 ahn 31.

Di Eetiyopyan man mi need help fi andastan di Skripchaz. Lata peepl fain owt dat wen dehn diskos di Baibl wid adaz ih help dehn moa.

WEH YU WUDA SEH IF SOHNBADI TEL YU: “Da loan ways a taim fi stodi di Baibl.”

Wai yu wuda seh dat?

WEH WI LAAN?

Wi laan dat di Baibl gat een advais weh ku help wi eena wi evriday laif. Ih ku aalso help wi fi ansa impoatant kweschanz weh wi mait gat, ahn gi wi komfert ahn hoap.