LESN 04
Hoo Da Di Chroo Gaad?
Fi az lang az hyoomanz egzis dehn wership difrent gaadz. Bot di Baibl taak bowt wan Gaad hoo “grayta dan aal di ada gaad dehn.” (2 Chronicles 2:5) Da hoo hihn? Ahn weh mek hihn grayta dan aal di ada gaad dehn weh peepl wership? Eena dis lesn yu wahn laan weh dis Gaad waahn yoo fi noa bowt hihn.
1. Wat da Gaad naym, ahn weh shoa wi dat hihn waahn mek wi noa ih naym?
Eena di Baibl Gaad inchrojoos ihself tu wi. Hihn seh: “Ai da Jehoava. Dat da mai naym.” (Reed Isaiah 42:5, 8.) Di naym “Jehoava” da di chranslayshan a wahn Heebroo naym weh meen “Hihn Wahn Mek Ih Bee er Hapm.” Jehoava waahn mek wi noa fi hihn naym. (Exodus 3:15) How wi ku bee shoar a dat? Eena di Baibl, Gaad persnal naym apyaa moa dan 7,000 taimz! a Di naym Jehoava bilangz tu “di chroo Gaad eena di hevnz abov ahn dong pahn di ert.”—Deuteronomy 4:39.
2. Weh di Baibl tel wi bowt Jehoava?
Di Baibl seh dat bisaid aal di ada Gaad dehn weh hyoomanz wership, Jehoava da di onli chroo Gaad. Wai? Dehn ga difrent reezn. Jehoava ga aal di atariti an onli hihn “da di Moas Hai oava aal di ert.” (Reed Psalm 83:18.) Hihn da “di Almaiti” wich meenz dat hihn ga di powa fi du wateva hihn chooz fi du. Hihn “mek evriting”—di yoonivers an evriting weh ga laif pahn ert. (Revilayshan 4:8, 11) Jehoava da di onli Gaad weh mi aalwayz egzis eena di paas ahn hihn wahn aalwayz egzis eena di fyoocha.—Psalm 90:2.
SAACH FI MOA
Fain owt di difrens bitween Gaad taitl dehn ahn fi hihn persnal naym. Den fain owt how ahn wai hihn tel yoo bowt fi hihn naym.
3. Gaad ga difrent taitl bot onli wan naym
Fi si di difrens bitween wahn persn taitl an ih naym, play di VEEDYO, ahn den diskos di kweschan.
-
Wat da di difrens bitween wahn taitl, laik “Laad,” ahn wahn naym?
Di Baibl seh dat peepl wership lata gaad ahn lata laad. Reed Psalm 136:1-3, ahn den diskos dis kweschan:
-
Hoo da di “Gaad a di gaad dehn” ahn di “Laad a di laad dehn”?
4. Jehoava waahn mek yu noa ahn yooz ih naym
Weh shoa dat Jehoava waahn mek yu noa ih naym? Play di VEEDYO, ahn den diskos di kweschan.
-
Wai yu tink Jehoava waahn mek wi noa ih naym?
Jehoava waahn mek peepl yooz ih naym. Reed Roamanz 10:13, ahn den diskos dehnya kweschan:
-
Yu tink ih impoatant fi yooz Gaad persnal naym, Jehoava?
-
How yoo feel wen sombadi memba yu naym ahn yooz it?
-
How yu tink Jehoava feel wen yu yooz fi hihn naym?
5. Jehoava waahn mek yu bee fi hihn fren
Wahn laydi fahn Cambodia weh naym Soten seh dat wen shee mi laan Gaad naym, dat da-mi “di bes feelin pan ert.” Play di VEEDYO, ahn den diskos di kweschan.
-
Eena di veedyo, how Soten mi feel wen shee mi laan Gaad naym?
If yu waahn bee sohnbadi fren, di fers ting yu yoozhwali laan bowt da persn da ih naym. Reed Jaymz 4:8a, ahn den diskos dehnya kweschan:
-
Weh Jehoava waahn yu du?
-
How yu wahn feel kloasa tu Gaad if yu geh fi noa an yooz ih naym?
WEH YU WUDA SEH IF SOHNBADI TEL YU: “Dehn onli ga wan Gaad, soh ih no reeli mata how ih naym.”
-
Yoo bileev dat Gaad persnal naym da Jehoava?
-
How yu wuda eksplayn tu sohnbadi dat Gaad waahn mek wi yooz ih naym?
WEH WI LAAN?
Jehoava da di naym a di onli chroo Gaad. Hihn waahn mek wi noa ahn yooz da naym soh dat wi ku jraa kloas tu hihn.
Mek Wi Rivyoo:
-
How Jehoava difrent fahn aal di ada gaad dehn weh peepl wership?
-
Wai wi shuda yooz Gaad persnal naym?
-
Weh shoa dat Jehoava waahn mek yu jraa kloas tu Hihn?
FAIN OWT MOA
Stodi faiv reezn wai wi ku bee shoar dat Gaad egzis.
Kansida wai ih mek sens fi bileev dat Gaad mi aalwayz egzis.
Fain owt wai wi shuda yooz Gaad naym eevn doa wi noh noa di orijinal way a how dehn mi prononks it.
Yu tink ih mek sens fi mek wi yooz Gaad naym? Noatis wai wi ku seh dat hihn ga jos wan persnal naym.
a Fi fain moa infamayshan bowt di meenin a Gaad naym ahn wai sohn Baibl chranslayshan noh gat it, si Appendix A4 eena di New World Translation of the Holy Scriptures.
