LESN 05
Di Baibl Da Gaad Mesij tu Wee
Jehoava gi wi wahn wandaful gif—di Baibl. Ih ga 66 lee buks. Bot yu mait wanda: ‘Weh di Baibl kohn fram? Hoo da di raita?ʼ Fi ansa dehnya kweschan, mek wi diskos how Gaad mesij eena di Baibl reech tu wee.
1. How Gaad ku bee di Raita a di Baibl if da man mi rait it?
Bowt 40 difrent man mi rait di buks a di Baibl. Ih mi tek dehn bowt 1,600 yaaz, fahn 1513 B.C.E. tu bowt 98 C.E. Eevn doa difrent man mi rait di Baibl, di buk dehn noh kanchradik wan anada. How dat pasabl? Bikaaz di Baibl da di Werd a Gaad. (Reed 1 Tesaloanyanz 2:13.) Di raita dehn neva rait fi dehn oan aidyaaz, rada di Baibl seh dat “Gaad mi yooz fi hihn hoali spirit fi gaid di prafit dehn.” a (2 Peeta 1:21) Gaad mi yooz fi hihn hoali spirit fi gaid dehn soh dat dehn kuda mi rait dong fi hihn tinkin.—2 Timoti 3:16.
2. Hoo aal ku benifit fahn di Baibl?
“Evri nayshan ahn chraib, ahn peepl fahn difrent rays, ahn peepl weh taak aal difrent kaina langwij” ku benifit fahn di gud nyooz weh deh eena di Baibl. (Reed Revilayshan 14:6.) Eena tudeh day, di Baibl da wahn buk weh peepl chranslayt moa dan eni ada buk eena hischri. Aalmoas evribadi ku reed di Baibl eena dehn oan langwij, noh mata weh dehn liv er weh langwij dehn taak.
3. How Jehoava mi protek di Baibl?
Di Baibl mi geh rait pahn sohn mateeryal weh eezi fi geh dischrai, laik papairos paypa. Bot dehn mi ga sohn man hoo mi lov di Baibl soh dehn mi du lata kapiz a di Baibl. Eevn doa powaful peepl mi chrai fi dischrai di Baibl, adaz mi wilin fi giv op dehn laif fi protek it. Dis shoa wi dat Jehoava di protek di Baibl ahn hihn noh wahn mek nobadi ner notn stap wee fahn jraa kloas tu hihn. Di Baibl seh: “Di werd a fi wee Gaad wahn laas fareva.”—Isaiah 40:8.
SAACH FI MOA
Fain owt how Gaad mi gaid man fi rait di Baibl, how hihn mi protek it ahn how ih pasabl fi mek hyoomanz yooz it tudeh.
4. Di Baibl tel wi hoo ih kohn fram
Play di VEEDYO. Den reed 2 Timoti 3:16, ahn diskos dehnya kweschan.
-
If man mi rait di Baibl, wai dehn kaal it di Werd a Gaad?
-
Yoo tink ih mek sens fi bileev dat Gaad mi gaid dehn soh dat dehn kuda mi rait dong fi Hihn tinkin?
Wahn sekiteri mait rait di leta, bot di mesij kohn fahn di persn hoo tel ahn weh fi rait. Sayhn way soh, hyoomanz mi rait di Baibl, bot di mesij kohn fahn Gaad
5. Di Baibl mi servaiv
If di Baibl kohn fahn Gaad, ih shudn sopraiz wi dat hihn protek it. Chroo owt hischri lata powaful man mi chrai fi dischrai di Baibl, eevn di rilijos leedaz dehn mi chrai fi haid it fahn di peepl. Bot lata peepl mi stil wilin fi giv op dehn laif fi protek di Baibl. Fi laan bowt sombadi laik dat, play di VEEDYO, ahn den diskos di kweschan.
-
Yu tink yu inchrestid fi reed di Baibl now dat yu noa weh aal dehn mi du fi protek it?
Reed Psalm 119:97, ahn den diskos dis kweschan:
-
Weh mi moov aala dehnya peepl fi put dehn laif eena daynja fi chranslayt ahn projoos di Baibl?
6. Wahn buk fi aal kaina peepl
Di Baibl da wahn buk weh peepl chranslayt ahn projoos moa dan eni ada buk eena hischri. Reed Aks 10:34, 35, ahn den diskos dehnya kweschan:
-
Wai Gaad waahn mek dehn chranslayt ahn projoos fi Hihn Werd eena evri langwij?
-
Weh yoo laik bowt di Baibl?
Nayli
100%
a di werl papyulayshan
ku reed di Baibl eena wahn langwij weh dehn andastan
Di hoal Baibl er paat a it
deh eena moa dan
3,000
langwij
5,000,000,000
kapiz a di Baibl deh aal oava di werl,
dat da moa dan eni ada buk
WEH YU WUDA SEH IF SOHNBADI TEL YU: “Di Baibl da jos wahn oal buk weh man mi rait.”
-
Weh yoo tink?
-
Weh proov tu wee dat di Baibl da Gaad Werd?
WEH WI LAAN?
Di Baibl da Gaad Werd, ahn hihn mek shoar dat evribadi ku reed it eena dehn oan langwij.
Mek Wi Rivyoo:
-
Weh ih meen wen wi seh dat Gaad mi gaid man fi rait di Baibl?
-
Weh yu fain inchrestin bowt di way how di Baibl mi servaiv, ahn di way how dehn mi chranslayt ahn projoos it?
-
How yu feel now dat yu noa dat Gaad wilin fi jraa kloas tu yoo?
FAIN OWT MOA
Reed bowt Baibl hischri—fahn di orijinal manyuskrip dong tu fi wee day chranslayshan.
“Weh Aal di Baibl Gaahn Chroo fi Deh Ya Tudeh” (Awayk!, Novemba 2007)
Laan bowt chree tingz weh mi chretn di Baibl ahn how ih servaiv.
Si how peepl mi put dehn laif eena daynja fi chranslayt di Baibl.
How yu ku bee shoar dat di Baibl mesij noh chaynj eevn doa dehn don kapi ahn chranslayt it lata taimz?
