LESN 07

Weh Kaina Persn Jehoava?

PLAY

Wen yu tink bowt Jehoava Gaad, weh kohn tu yu main? Yu tink dat hihn wandaful ahn grayt bot ih deh faar away fahn yu dat yu kyaahn geh fi noa ahn? Er yu tink dat hihn jos powaful wid no kaina feelinz? Soh reeli, da weh kaina persn hihn? Chroo fi hihn Werd di Baibl, ih tel wi weh da som a Jehoava kwalitiz an ih aalso tel wi dat hihn kay bowt yoo.

1. Wai wi kyaahn si Gaad?

“Gaad da wahn Spirit.” (Jan 4:24) Jehoava noh ga wahn fizikal badi. Hihn da wahn Spirit weh liv eena hevn, wahn plays weh wi kyaahn si.

2. Wat da som a Jehoava kwalitiz?

Wee kyaahn si Jehoava, bot wen wi geh fi noa hihn, wi geh fi lov ahn bikaaz hihn da wahn reel Persn wid wandaful kwalitiz. Di Baibl seh: “Jehoava lov jostis, ahn hihn noh wahn abandan fi hihn laayal wan dehn.” (Psalm 37:28) Hihn aalso “ful a mersi ahn kompashan,” espeshali tuwaadz dehn wan weh di sofa. (Jaymz 5:11) “Jehoava kloas tu dehn wan weh sad eena dehn haat; hihn sayv di wan dehn weh feel diskorij.” (Psalm 34:18) Yu mi noa dat di tingz weh wi du afek Jehoava? If wahn persn chooz fi du bad tingz, ih mek Jehoava sad. (Psalm 78:40, 41) Bot if wahn persn chooz fi du weh rait, ih mek Jehoava hapi.—Reed Proverbs 27:11.

3. How Jehoava shoa dat ih lov wi?

Wan a di kwaliti weh stan owt di moas fahn Jehoava da lov. In fak, di Baibl tel wi dat, “Gaad da lov.” (1 Jan 4:8) Jehoava shoa ih lov noh onli chroo di Baibl, bot aalso chroo di tingz hihn mi kriyayt. (Reed Aks 14:17.) Fi egzampl, tink bowt how hihn kriyayt wi. Hihn gi wi di abiliti fi si di byootiful kalaz, fi hyaa an injai myoozik, ahn tays nais food. Dis shoa wi dat hihn waahn mek wi injai laif.

SAACH FI MOA

Fain owt weh Jehoava yooz fi du amayzin tingz. Den si how Jehoava shoa wi fi hihn wandaful kwalitiz.

4. Di hoali spirit—Gaad aktiv foas

Jos laik how wi yooz wi han dehn fi du werk, saym way soh Jehoava yooz fi hihn hoali spirit. Di Baibl tel wi dat di hoali spirit da noh wahn persn, bot da wahn powaful foas weh Gaad yooz fi get tingz don. Reed Look 11:13 an Aks 2:17, ahn den diskos dehnya kweschan:

Gaad wahn “poar owt” ih spirit pahn dehn wan weh aks ahn far it. Soh yu tink di hoali spirit da wahn persn, er da Gaad aktiv foas? Wai yu seh dat?

Jehoava yooz ih hoali spirit fi du amayzin tingz. Reed Psalm 33:6 ahn 2 Peeta 1:20, 21, ahn den diskos dis kweschan:

Eena weh wayz Jehoava mi yooz ih hoali spirit?

5. Jehoava ga wahn wandaful persnaliti

Moaziz da-mi wahn faytful servant a Jehoava, bot hihn mi waahn noa moa bowt ih Kriyayta. Soh Moaziz seh tu Jehoava: “Teech mi yu wayz, soh dat Ah ku noa yu.” (Exodus 33:13) Jehoava mi ansa Moaziz an ih mi tel ahn weh kaina persn Hihn. Reed Exodus 34:4-6, ahn den diskos dehnya kweschan:

Weh Jehoava mi tel Moaziz bowt fi Hihn persnaliti?
Weh kwaliti fahn Jehoava yoo laik di moas?

6. Jehoava kay bowt peepl

Eena aynshent taim, di Heebrooz dehn da-mi Gaad peepl ahn dehn da-mi slayv da Eejip. How Jehoava mi feel bowt fi dehn sofarin? Play di AADYO RIKAADN ahn fala lang wid it, er reed Exodus 3:1-10. Den diskos di kweschanz.

AADYO RIKAADN: Jehoava Mi Kay Bowt Dehn Sofarin (2:45)

Weh dis akonk teech yoo bowt how Jehoava feel wen hyoomanz sofa?—Si vers 7 ahn 8.
Yu tink Jehoava reeli waahn help hyoomanz, ahn yu tink hihn ga di powa fi du dat? Wai?