LESN 10

How Yoo Ku Benifit Fahn di Meetin Dehn a Jehoava Witnisiz?

PLAY

Yu eva geh invaitid fi aten wahn meetin fahn Jehoava Witnisiz? If yu neva yet aten, yu mait feel nervos fi aten di fers taim. Yu mait wanda: ‘Weh dehn du da dehnya meetinz? Wai dehn soh impoatant? Wai Ai shuda aten?ʼ Eena dis lesn, yu wahn laan dat wen yu meet wid adaz yu ku jraa kloasa tu Gaad ahn ih ku help yu persnali.

1. Wai Jehoava Witnisiz dehn meet tugeda?

Noatis how wahn Baibl raita mi ekspres di moas impoatant reezn fi meet tugeda wid adaz. Hihn mi seh: “Eena di grayt kangrigayshan, Ai wahn prayz Jehoava.” (Psalm 26:12) Tudeh, Jehoava Witnisiz dehn injai fi meet tugeda. Aal oava di werl dehn meet tugeda evri week fi prayz Gaad, fi sing, ahn fi pray. Wahn fyoo taimz fi di yaa, dehn aalso gyada tugeda az wahn big groop fi wership.

2. Weh yu wahn laan da di meetin dehn?

Da di meetinz, dehn teech fahn Gaad Werd, “dehn eksplayn it klyaa-wan ahn [dehn] put meenin tu it.” (Reed Nehemiah 8:8.) Da di meetin dehn, yu wahn laan bowt Jehoava ahn fi hihn wandaful kwalitiz. Az yu geh fi noa moa bowt di lov weh hihn ga fi yoo, yu wahn jraa kloasa tu hihn. Yu wahn aalso laan how hihn ku help yu fi ga wahn beta laif.—Isaiah 48:17, 18.

3. How yoo ku benifit if yu spen taim wid adaz da di meetin dehn?

Jehoava aks wi fi “tink bowt wan anada soh dat wi ku inkorij wan anada fi shoa lov ahn du gud werks” ahn noh “niglek wi meetin dehn.” (Heebrooz 10:24, 25) Da di meetin dehn yu wahn meet peepl weh ga lov fi eech ada ahn weh waahn laan moa bowt Gaad jos laik yoo. Yu wahn hyaa sohn inkorijin taak ahn koments weh dehn shayr fahn di Baibl. (Reed Roamanz 1:11, 12.) Yu wahn aalso geh fi noa adaz weh eeda singl er marid hoo hapi eevn doa dehn mait di fays prablemz. Dehnya da jos som a di reezn wai Jehoava waahn mek wi meet tugeda regyula!

SAACH FI MOA

Fain owt weh aal hapm da wahn meetin fahn Jehoava Witnisiz ahn wai ih gud fi mek wi chrai haad fi aten dehnya meetin.

4. Di meetin dehn a Jehoava Witnisiz

Eena di dayz a di apaslz, dehn mi meet tugeda regyula fi wership Jehoava. (Roamanz 16:3-5) Reed Koloashanz 3:16, ahn den diskos dis kweschan:

Eena di dayz a di apaslz, how dehn mi wership Jehoava?

Tudeh, Jehoava Witnisiz dehn du di saym, dehn meet tugeda regyula da dehn plays a wership weh dehn kaal Kingdom Haal. Fi si weh aal hapm da wahn meetin, play di VEEDYO. Den luk pan di picha a wahn kangrigayshan meetin ahn diskos dehnya kweschan.

VEEDYO: Weh Aal Hapm da Wahn Kingdom Haal? (2:12)

Weh di veedyo ga in kaman wid weh yu jos reed da Koloashanz 3:16?
Yu mi noatis eniting els bowt di meetin dehn weh yu mi laik eena di veedyo er eena di picha?

Reed 2 Korintyanz 9:7, ahn den diskos dis kweschan:

Wai Jehoava Witnisiz noh aks fi moni da dehn meetin?

Lang wid yu teecha, rivyoo weh dehn wahn diskos da di neks meetin.

Wich paat a di meetin yu tink wahn bee moa inchrestin tu yoo?

Yu mi noa?

Pahn jw.org, yu ku fain wen ahn wehpaat wi ga wi meetin dehn aal oava di werl.

Di meetinz inklood difrent taak, sohn demonschrayshan a how wi ku diskos di Baibl wid adaz, ahn sohn veedyo. Di meetin dehn staat an en wid wahn sang ahn wahn pryaa
Joorin sohn paats a di meetin dehn invait di aadyans fi shayr wahn koment
Ih noh mata if yu ga wahn famili er if yu singl, weda yu yong er oal—evribadi welkom fi aten di meetinz
Di meetin dehn free. Wi noh chaaj notn fi kom een ahn wi noh tek op kalekshan

5. Mek wahn efoat fi aten di meetin dehn

Kansida di egzampl a Jeezas famili. Evri yaa dehn mi haftu waak fi bowt 60 mailz chroo sohn mongtin fahn Nazaret tu Jeroosalem fi goh da di templ fi du dehn wership. Reed Look 2:39-42, ahn den diskos dehnya kweschan:

Yu tink dat dis jerni tu Jeroosalem mi tek wahn lata efoat pahn fi dehn paat?
Wai yu tink yu mait need fi chrai haad fi aten di meetin dehn?
Yu tink ih wert it fi mek da efoat? Wai?

Di Baibl seh ih veri impoatant fi mek wi meet tugeda fi wership Jehoava. Reed Heebrooz 10:24, 25, ahn den diskos dis kweschan:

Wai wi shuda aten di meetin dehn moa regyula?

WEH YU WUDA SEH IF SOHNBADI TEL YU: “Yu noh need fi meet wid adaz fi wership Gaad. Ih inof fi reed di Baibl hoam.”

Weh skripcha er Baibl egzampl shoa wi weh Jehoava waahn mek wi du?

WEH WI LAAN?

Wen yu aten di meetin dehn ih wahn help yu fi laan moa bowt Jehoava, yu frenship wid hihn wahn geh schranga, ahn yu wahn di wership hihn lang wid adaz.