LESN 11

Weh Da di Bes Way fi Stodi di Baibl

PLAY

Yoo eva waahn staat wahn big proajek, bot jos di tink bowt it yu tink dat da tu moch? Maybi fi mek it eeziya yu staat du it lee bit bai lee bit. Da sohnting jos laik dat wen yu waahn reed di Baibl. Yu mait aks, ‘How Ah ku staat dis big proajek?ʼ Eena dis lesn, wi wahn kansida sohn tingz weh yu ku du weh wahn help yu fi injai di reed ahn stodi di Baibl.

1. Wai wi fi reed di Baibl regyula?

Wahn persn weh reed di Baibl regyula, er “di laa a Jehoava,” wahn bee hapi an ih wahn ga sokses. (Reed Psalm 1:1-3.) Fi help yu staat, chrai reed fi jos wahn fyoo minits eech day. Di moa yu geh fi noa Gaad Werd, di moa yu wahn injai yu Baibl reedin.

2. Weh wahn help yu fi benifit fahn yu Baibl reedin?

Fi geh di bes owta wi Baibl reedin, wi need fi paaz ahn tink bowt weh wi di reed. Wi shuda reed ahn “meditayt pahn [it].” (Psalm 1:2) Az yu di reed, aks yuself dehnya kweschan: ‘Weh dis tel mi bowt Jehoava Gaad? How Ah ku yooz dis eena mi laif? How Ah ku yooz dehnya vers fi help adaz?ʼ

3. How yu ku mek taim fi reed di Baibl?

Wahn lata wi schrogl fi fain taim fi reed di Baibl. Dat hapm tu yoo tu? Chrai fi mek “di bes yoos a [yu] taim.” (Ifeezhanz 5:16) Yu ku du dis if yu set wahn spesifik taim pahn di said fi reed di Baibl evriday. Sohn peepl mek taim fi reed di Baibl erli da maanin. Adaz chooz fi du it layta eena di day, maybi joorin dehn lonch brayk. An adaz wuda chooz fi du it way eena di eevnin bifoa dehn goh sleep. Wen wuda bee di bes taim fi yoo?

SAACH FI MOA

Laan how fi mek yu Baibl reedin moa inchrestin. Si how yu ku pripyaa gud soh dat yu ku geh di bes owta yu Baibl stodi.

Jos laik how wi ku laan fi laik eet difrent food, wi ku laan fi injai di reed di Baibl

4. Weh yu ku du fi injai yu Baibl reedin

Ih noh mait bee eezi fi staat reed di Baibl. Bot yu ku laan fi injai yu Baibl reedin, jos laik how yu ku laan fi injai di eet wahn food weh yu neva yet tays. Reed 1 Peeta 2:2, ahn den diskos dis kweschan:

Yu tink dat if yu reed di Baibl evriday, ih ku bee sohnting yu wuda injai ahn waahn reed eevn moa?

Play di VEEDYO fi si how sohn peepl mi staat tu injai dehn Baibl reedin. Den diskos dehnya kweschan.

VEEDYO: Sohn Yoots Weh Di Laan fi Lov di Werd a Gaad (5:33)

Eena di veedyo, weh chalenjiz di yong peepl dehn mi fays?
Weh mi help dehn fi stik tu dehn goal fi reed di Baibl evriday?
Weh dehn mi du fi mek dehn Baibl reedin moa inchrestin?

Sohn tip fi help yu staat:

Chooz wahn klyaa chranslayshan a di Baibl eena di langwij weh yu andastan. Chrai di New World Translation if ih deh avaylabl eena yu langwij.
Reed wahn sekshan a di Baibl weh yoo tink wuda bee moa inchrestin. Fi sohn aidyaaz, si di chaat “How fi Injai Yu Baibl Reedin.”
Kip chrak a weh yu reed. Yooz di “Kip Chrak a Yu Baibl Reedin” chaat eena dis poblikayshan.
Yooz di JW Library^®ap. If yu di yooz wahn smaat foan er eni ada divais, yu ku reed ahn lisn tu di Baibl eniway yu deh.
Yooz di apendiks dehn eena di New World Translation. Ih ga sohn map, sohn chaat, ahn wahn glasari weh ku mek yu Baibl reedin moa inchrestin.

5. Pripyaa fi yu Baibl stodi

Reed Psalm 119:34, ahn den diskos dis kweschan:

Wai ih gud fi pray bifoa yu reed di Baibl er bifoa yu pripyaa fi yu Baibl stodi?

Weh yoo ku du fi benifit eech taim yu stodi? Az yu pripyaa fi wahn lesn, chrai dehnya sojeshan:

Reed di fers sekshan fahn di lesn.
Luk op ahn reed di skripchaz, ahn chrai fi andastan how dehn rilayt tu weh yu di reed eena di lesn.
Maak eni kee werdz er frayz weh ansa di kweschan; dis wahn help yu fi diskos di lesn wid yu teecha.

Yu mi noa?

Jehoava Witnisiz yooz difrent Baibl chranslayshan. Bot wi reeli apreeshiayt di New World Translation of the Holy Scriptures bikaaz ih eezi ahn klyaa fi andastan, an ih yooz Gaad persnal naym.—Si di Web aatikl “Jehoava Witnisiz Ga Dehn Oan Baibl?”

WEH YU WUDA SEH IF SOHNBADI TEL YU: “Ai noh ga di taim ner di enerji fi stodi di Baibl.”