LESN 18
How Wi Ku Noa Hoo Da Reel Kristyanz
Bilyanz a peepl rong di werl klaym seh dehn da Kristyanz. Bot aala dehn noh bileev di saym ting, ahn dehn noh liv bai di saym standadz. Soh how wi ku noa hoo da reel Kristyanz?
1. Weh ih meenz fi bee wahn Kristyan?
Kristyanz da disaiplz, er falowaz, a Jeezas Krais. (Reed Aks 11:26.) How dehn proov dat dehn da Jeezas disaiplz? Jeezas mi seh: “Unu da mi disaipl fi chroo if unu obay mi teechinz.” (Jan 8:31) Dis meenz dat reel Kristyanz need fi obay Jeezas teechinz. Ahn jos laik how Jeezas mi aalwayz teech weh di Baibl seh, chroo Kristyanz bays dehn bileef dehn pahn di Baibl tu.—Reed Look 24:27.
2. How reel Kristyanz shoa lov?
Jeezas mi tel ih falowaz: “Unu mos lov wan anada jos laik how Ai lov unu.” (Jan 15:12) How Jeezas mi shoa dat hihn lov ih disaiplz? Hihn mi spen taim wid dehn, inkorij dehn, ahn help dehn. Hihn mi eevn giv op ih laif fi dehn. (1 Jan 3:16) Sayhn way soh, reel Kristyanz noh onli taak bowt lov, bot dehn shoa dat dehn lov wan anada bai di tingz weh dehn seh ahn du.
3. Wat da di mayn werk weh reel Kristyanz du?
Jeezas mi gi ih disaipl dehn werk fi du. “Ih sen dehn owt fi preech bowt di Kingdom a Gaad.” (Look 9:2) Kristyanz eena di fers senchri neva onli preech da di plays dehn wehpaat dehn mi wership Gaad, bot aalso da ada poblik plays ahn da peepl hows. (Reed Aks 5:42; 17:17.) Jos laik di Kristyanz eena di fers senchri, reel Kristyanz tudeh preech di chroot fahn di Baibl noh mata wehpaat peepl deh. Dehn lov peepl, soh dehn hapi fi yooz dehn taim an enerji fi shayr di mesij a hoap ahn komfert weh deh eena di Baibl.—Maak 12:31.
SAACH FI MOA
Fain owt how reel Kristyanz difrent fahn peepl weh noh fala Jeezas teechinz an egzampl.
4. Dehn saach fi Baibl chroot
Di Kristyanz weh mi liv eena di fers senchri mi cherish Gaad Werd
Noh evribadi weh klaym seh dehn da Kristyanz tink ih impoatant fi laan di chroot fahn di Baibl ahn yooz it eena dehn laif. Play di VEEDYO, ahn den diskos di kweschan.
-
How sohn cherch weh klaym seh dehn da Kristyanz mi stap peepl fahn laan di chroot weh Jeezas mi teech?
Jeezas mi teech di chroot fahn Gaad Werd. Reed Jan 18:37, ahn den diskos dis kweschan:
-
Akaadn tu Jeezas, how wi ku noa hoo da di Kristyanz “weh liv akaadn tu di chroot”?
5. Dehn preech di chroot weh deh eena di Baibl
Di Kristyanz weh mi liv eena di fers senchri mi preech tu adaz
Bifoa Jeezas gaahn bak da hevn, hihn mi gi ih disaiplz werk fi du weh kantinyu op tu tudeh. Reed Machyu 28:19, 20 an Aks 1:8, ahn den diskos dis kweschan:
-
Til wen ahn how faar Jeezas disaiplz mi wahn haftu preech?
6. Dehn praktis weh dehn preech
Weh mi kanvins wahn man weh naym Tom dat hihn mi fain di chroo Kristyan rilijan? Play di VEEDYO, ahn den diskos di kweschanz.
-
Akaadn tu di veedyo, wai Tom neva inchrestid eena rilijan nohmoh?
-
Weh kanvins hihn dat ih fain di chroot?
Akshanz speek lowda dan werdz. Reed Machyu 7:21, ahn den diskos dis kweschan:
-
Weh moa impoatant tu Jeezas—weh wi klaym seh wi bileev, er weh wi shoa chroo wi akshanz?
7. Dehn lov wan anada
Di Kristyanz weh mi liv eena di fers senchri mi lov wan anada
Yu tink Kristyanz eva giv op dehn laif fi dehn Kristyan bradaz ahn sistaz? Play di VEEDYO, ahn den diskos di kweschanz.
-
Akaadn tu di veedyo, wai Brada Lloyd ris ih laif fi Brada Johansson?
-
Yu tink hihn mi du weh wahn reel Kristyan sopoas tu du?
Reed Jan 13:34, 35, ahn den diskos dehnya kweschan:
-
How Jeezas disaiplz (reel Kristyanz) wuda chreet peepl fahn wahn nada konchri er kolcha?
-
How dehn wuda du dis joorin wahn waar?
WEH YU WUDA SEH IF SOHNBADI AKS YU: “Lata rilijan seh dehn da Kristyan. Wich wan da di chroo rilijan?”
-
Weh skripcha yu ku shayr weh shoa how wi ku noa hoo da chroo Kristyanz?
WEH WI LAAN?
Reel Kristyanz fala Baibl teechinz, dehn lov wan anada, ahn dehn preech di chroot fahn di Baibl.
Mek Wi Rivyoo:
-
Weh reel Kristyanz bays dehn bileef pan?
-
Weh kwaliti reel Kristyanz gat?
-
Weh werk reel Kristyanz du?
FAIN OWT MOA
Laan moa bowt wahn groop a peepl weh du dehn bes fi fala Jeezas Krais egzampl an ih teechinz.
Laan how wahn uman weh da-mi wahn non fain “wahn chroo spirichwal famili.”
“Dehn Mi Yooz di Baibl fi Ansa Aala Mi Kweschanz!” (Di Wachtowa, Aypril 1, 2014)
Si how chroo Kristyanz shoa lov fi dehn bradaz ahn sistaz weh need help.
How Wi Help Wi Bradaz Wen Wahn Dizaasta Hapm—Veedyo Klip (3:57)
Fain owt how Kristyanz eena di fers senchri ahn reel Kristyanz tudeh du weh Jeezas seh reel Kristyanz fi du.
“How Wi Noa Hoo Da Chroo Kristyanz?” (Di Wachtowa, Maach 1, 2012)
