Jehoava da wahn Gaad a aada. (1 Korintyanz 14:33) Soh wi wuda ekspek dat fi hihn peepl du tingz eena wahn aadali way. How di Kristyan kangrigayshan aaganaiz tudeh? How wee ku help mek di kangrigayshan stay aaganaiz?

1. Hoo da di hed a di kangrigayshan?

“Krais da di hed a di kangrigayshan.” (Ifeezhanz 5:23) Eevn doa Jeezas deh da hevn, hihn stil di gaid di werk weh Jehoava peepl di du aal rong di werl. Hihn mi apoint “di faytful ahn waiz slayv”, weh da wahn smaal groop a spirichwali machoar eldaz weh wi aalso noa az di Govanin Badi. (Reed Machyu 24:45-47.) Laik di fers-senchri apaslz an eldaz da Jeroosalem, di Govanin Badi gi dairekshan tu di kangrigayshanz aal rong di werl. (Aks 15:2) Bot dehnya man da noh di leedaz a wi aaganaizayshan. Dehn goh tu Jehoava an ih Werd di Baibl fi dairekshan, ahn dehn obay Jeezas az di hed a di kangrigayshan.

2. Hoo da di eldaz ahn weh dehn du?

Di elda dehn da spirichwali machoar Kristyanz weh teech fahn di Baibl, ahn dehn da laik shepadz weh help an inkorij Jehoava peepl. Dehn noh geh pay fi di werk weh dehn du. Insted, dehn du it “wid aala [dehn] haat, ahn noh bikaaz [dehn] greedi fi geh mateeryal tingz.” (1 Peeta 5:1, 2) Di elda dehn geh help fahn di ministeeryal servants eena di kangrigayshan. Di ministeeryal servant dehn ku kwalifai laytaraan fi serv az eldaz.

Di Govanin Badi apoint sohn eldaz fi serv az serkit oavaseeya. Dehnya serkit oavaseeya vizit difrent kangrigayshanz fi gaid ahn schrentn di bradaz ahn sistaz. Di serkit oavaseeya dehn yooz di kwalifikayshanz eena di Baibl fi noa weda er nat dehn shuda apoint wahn brada fi serv az wahn ministeeryal servant er az wahn elda eena di kangrigayshan.​—1 Timoti 3:1-10, 12; Taitos 1:5-9.

3. Weh rispansabiliti eech Witnis gat?

Evribadi eena di kangrigayshan “prayz Jehoava naym” wen dehn du dehn bes fi tek paat da di kangrigayshan meetinz an eena di minischri.​—Reed Psalm 148:12, 13.

 SAACH FI MOA

4. Jeezas da wahn kain leeda weh schrentn adaz

Jeezas aafa wi wahn byootiful invitayshan. Reed Machyu 11:28-30, ahn den diskos dis kweschan:

• Weh kaina leeda Jeezas, ahn how hihn waahn wi feel?

5. Di eldaz praktis weh dehn preech

1. Eldaz kip dehnself ahn dehn famili spirichwali schrang

2. Eldaz kay fi evribadi eena di kangrigayshan

3.   Eldaz preech regyula

4. Eldaz da teechaz, bot dehn aalso help kleen ahn du ada tingz eena di Kingdom Haal

6. Wi werk lang wid di eldaz

Di Baibl gi wi wahn impoatant reezn wai wi fi werk lang wid di eldaz. Reed Heebrooz 13:17, ahn den diskos dehnya kweschan:

• Yu tink ih mek sens dat di Baibl tel wi fi obay di bradaz weh di tek di leed? Wai?

Reed Look 16:10, ahn den diskos dis kweschan:

• Wai ih impoatant fi werk lang wid di eldaz, eevn wen ih kohn tu tingz weh wee tink noh impoatant?

 WEH WI LAAN?

Jeezas da di hed a di kangrigayshan. Wee hapi fi werk lang wid di eldaz bikaaz dehn kain, dehn schrentn wi, ahn dehn set wahn gud egzampl fi wi.

Mek Wi Rivyoo:

• Hoo da di hed a di kangrigayshan?

• How di eldaz help di kangrigayshan?

• Weh rispansabiliti eech Witnis gat?