LESN 22

How Yoo Ku Shayr di Gud Nyooz?

PLAY

Az yu geh fi laan di chroot fahn di Baibl, yu mait seh tu yuself, ‘Evribadi shuda noa bowt dis!ʼ Da chroo, evribadi need fi noa bowt it! Bot, yu mait stil feel nervos fi tel ada peepl bowt weh yu di laan. Mek wi diskos how yu ku get oava da nervos feelin ahn feel hapi fi preech di gud nyooz tu peepl.

1. How yoo ku shayr weh yu laan wid peepl weh yu noa?

Jeezas disaipl dehn mi seh: “Wi kyaahn stap taak bowt di tingz wi mi si ahn hyaa.” (Aks 4:20) Dehn mi lov di chroot soh moch dat dehn mi waahn tel evribadi bowt it. Yoo feel di saym way? If dat da di kays, luk fi eni chaans fi taak tu yu famili ahn frenz ahn tel dehn eena wahn rispekful way bowt weh yu laan.—Reed Koloashanz 4:6.

Chrai dehnya sojeshan:

Wen yu di taak wid wan a yu relitiv, yu ku staat wahn kanvasayshan bowt di Baibl if yu seh sohnting laik: “Ah laan sohnting inchrestin dis week.”
Reed wahn inkorijin skripcha fi wan a yu fren weh sik er weh ga woriz.
Wen yu werkmayt dehn aks yu how tingz di goh, tel dehn bowt weh yu mi laan fahn yu Baibl stodi er da di kangrigayshan meetin dehn.
Shoa yu fren dehn di jw.org websait.
Invait adaz fi jain yu pahn yu Baibl stodi, er shoa dehn how fi aks fi dehn oan Baibl stodi pahn jw.org.

2. Wai ih impoatant fi mek it wahn goal fi preech lang wid di kangrigayshan?

Jeezas disaipl dehn neva jos preech di gud nyooz tu peepl weh dehn mi noa. Jeezas mi “sen dehn owt too bai too heda hihn intu evri siti ahn vilij” fi preech. (Look 10:1) Di way how hihn mi aaganaiz di preechin werk mi gi wahn lat moa peepl wahn chaans fi hyaa di gud nyooz. Di disaipl dehn mi onli hapi wen dehn mi preech tugeda. (Look 10:17) Yu tink yu ku mek it fi yoo goal fi preech lang wid di kangrigayshan?

SAACH FI MOA

Fain owt weh ku help yu fi noh feel soh nervos, ahn si how yu ku feel hapi wen yu preech di gud nyooz tu peepl.

3. Jehoava wahn deh wid yu

Sohnbadi weh waahn preech mait feel nervos bowt weh adaz wahn seh er du wen dehn preech tu dehn.

Yoo feel nervos fi tel peepl bowt weh yu laan? Wai, er wai nat?

Play di VEEDYO, ahn dehn diskos di kweschan.

VEEDYO: Ah Pray tu Jehoava fi Korij (4:05)

Weh mi help dehnya yong peepl fi noh feel soh frayd?

Reed Isaiah 41:10, ahn den diskos dis kweschan:

How pryaa ku help yu if yu feel frayd fi preech?

Yu mi noa?

Wahn lata Jehoava Witnisiz mi tink dat dehn kuda neva ga di korij fi preech di gud nyooz tu peepl. Fi egzampl, Sergey mi feel laik hihn neva wert notn ahn hihn mi fain it haad fi taak tu ada peepl. Bot den hihn mi staat stodi di Baibl. Hihn seh: “Eevn doa Ah mi frayd, Ah mi staat taak tu peepl bowt weh Ah mi-di laan. Ah mi sopraiz fi si dat wen Ah taak tu peepl bowt di Baibl, ih akchwali help mi fi ga moa kanfidens eena miself. Ih mi schrentn mi fayt tu.”

4. Shoa rispek

Bifoa yu preech tu sohnbadi, noh onli tink bowt weh yu wahn seh bot tink bowt how yu wahn seh it tu. Reed 2 Timoti 2:24 ahn 1 Peeta 3:15, ahn den diskos dehnya kweschan:

How yu ku yooz weh yu laan fahn dehndeh skripchaz wen yu di taak tu peepl bowt di Baibl?
Som a yu famili membaz er frenz mait noh agree wid yu. Weh yu ku du if dat hapm? Ahn weh yu noh fi du?
Wai ih mait bee beta fi aks kweschanz eena wahn rispekful way insteda tel peepl weh dehn fi bileev?

5. Wen yu preech di gud nyooz ih mek yu hapi

Jehoava mi sen Jeezas fi preech di gud nyooz. How Jeezas mi feel bowt da werk? Reed Jan 4:34, ahn den diskos dehnya kweschan:

Wen wi eet gud food, ih help wi fi stay alaiv an ih mek wi hapi. Jeezas mi seh dat wen wi du Gaad wil, inkloodin di preechin a di gud nyooz, da laik wi di eet food. Wai hihn seh dat?
Weh yoo wuda seh da sohn blesinz weh yu ku geh wen yu preech di gud nyooz?

Tips

Joorin di midweek meetin, luk fi ways how yu ku staat wahn kanvasayshan.
Taak tu yu teecha bowt how yu ku bee wahn styoodent pahn di midweek meetin proagram. Wateva styoodent asainment yu geh wahn help yu fi pripyaa yuself fi tel ada peepl bowt weh yu di laan.
Yooz di “Weh Yu Wuda Seh if Sohnbadi Tel Yu” er di “Weh Yu Wuda Seh if Sohnbadi Aks Yu” sekshan eena dis buk fi praktis how yu kuda ansa peepl wen dehn aks kweschanz er wen dehn noh agree wid di mesij weh wi preech.

WEH YU WUDA SEH IF SOHNBADI AKS YU: “How laif di chreet yu?”