LESN 28

Shoa Dat Yu Tankful fi Weh Jehoava ahn Jeezas Du fi Yoo

PLAY

How yoo feel wen wahn fren gi yu wahn byootiful gif? Ih mek yu hapi, noh chroo? Ahn yu waahn shoa yu fren dat yu apreeshiayt di gif. Jehoava ahn Jeezas gi wee di graytis gif wi kuda eva get. Wat da dis gif, ahn how wi ku shoa dat wi tankful far it?

1. Wat da wan way wi ku shoa dat wi tankful fi weh Gaad ahn Krais du fi wi?

Di Baibl pramis dat “evribadi weh shoa fayt eena [Jeezas]” ku liv fareva. (Jan 3:16) Weh ih meenz fi shoa fayt? Ih meenz wi haftu du moa dan jos bileev eena Jeezas. Wi haftu mek disizhanz ahn du tingz weh shoa dat wi ga fayt. (Jaymz 2:17) Wen wi shoa wi fayt bai weh wi seh ahn du, wi schrentn wi frenship wid Jeezas an ih Faada, Jehoava.—Reed Jan 14:21.

2. Weh speshal ivent help wi fi shoa Jehoava ahn Jeezas dat wi tankful fi weh dehn du?

Di eevnin bifoa Jeezas mi ded, hihn mi tel ih falowaz bowt wahn neks way how dehn ku shoa dat dehn tankful fi di sakrifais weh hihn mi wahn du. Hihn mi tel dehn fi kohn tugeda fi wahn speshal ivent weh di Baibl kaal “Krais Eevnin Meel,” weh wi aalso kaal di Memoaryal a Krais det. (1 Korintyanz 11:20) Jeezas mi waahn mek ih apasl dehn an aal chroo Kristyanz memba dat hihn mi giv op ih laif fi wi. Soh hihn mi tel dehn: “Kip aan di du dis fi memba mi.” (Look 22:19) Wen yu goh da di Memoaryal, yu shoa dat yu tankful fi di grayt lov weh Jehoava ahn Jeezas ga fi wi.

SAACH FI MOA

Laan moa wayz how yu ku shoa dat yu tankful fi di lov weh Jehoava ahn Jeezas shoa fi wi, ahn laan wai di Memoaryal a Krais det soh impoatant.

3. Weh wi ku du fi shoa dat wi tankful?

Imajin dat yu di jrongdid ahn sohnbadi sayv yu laif. Yu tink yu wuda ferget weh da persn du fi yu? Er yu wuda luk fi wayz fi shoa ahn dat yu tankful fi weh ih du fi yu?

Wi ga di chaans fi liv fareva bikaaz a Jehoava kainis. Reed 1 Jan 4:8-10, ahn den diskos dehnya kweschan:

Wai Jeezas sakrifais da wahn speshal gif?
How yoo feel bowt weh Jehoava ahn Jeezas du fi yu?

How wi ku shoa dat wi tankful fi weh Jehoava ahn Jeezas du fi wi? Reed 2 Korintyanz 5:15 ahn 1 Jan 4:11; 5:3. Afta yu reed eech skripcha, diskos dis kweschan:

Akaadn tu da skripcha, weh wi ku du fi shoa dat wi graytful?

4. Kapi Jeezas egzampl

Wahn neks way how wi ku shoa dat wi tankful da fi kapi Jeezas egzampl. Reed 1 Peeta 2:21, ahn den diskos dis kweschan:

Eena weh wayz yoo ku fala Jeezas egzampl kloas-wan?

Jeezas mi lov Gaad Werd, ih mi preech di gud nyooz, an ih mi help adaz

5. Selibrayt di Memoaryal a Krais det

Fi si weh mi hapm di fers taim dehn mi selibrayt Krais Eevnin Meel, reed Look 22:14, 19, 20. Den diskos dehnya kweschan:

Weh mi hapm joorin Krais Eevnin Meel?
Weh di bred ahn di wain stan fa?—Si vers 19 ahn 20.

Jeezas mi waahn mek ih disaiplz selibrayt Krais Eevnin Meel wans evri yaa, pahn di day hihn mi ded. Dat da wai Jehoava Witnisiz meet tugeda evri yaa fi memba Krais det di way hihn koman wi fi du it. Fi laan bowt dis impoatant meetin, play di VEEDYO. Den diskos di kweschan.