Sohnbadi weh yu lov eva ded? Joorin wahn paynful taim laik dat, yu mait wanda: ‘Weh hapm tu wi wen wi ded? Eni hoap deh fi mi frenz ahn famili weh ded? Ah wahn ku eva si dehn agen?ʼ Eena dis lesn ahn di neks wan, wi wahn fain komfertin ansaz fahn di Baibl.

1. Weh hapm tu wi wen wi ded?

Jeezas mi seh dat wen sohnbadi ded da laik dehn di sleep haad. Wahn persn weh di sleep haad noh noa weh di hapm rong ahn. Sayhn way soh, afta sohnbadi ded, dehn noh feel payn nohmoh ahn dehn noh sofa eena eni kaina way. Di Baibl seh dat “di ded noh noa notn ataal.”​—Reed Ecclesiastes 9:5.

2. How wi benifit wen wi laan di chroot bowt det?

Lata peepl frayd fi ded, ahn dehn frayd fi ded peepl tu. Bot yu ku geh komfert fahn weh di Baibl seh bowt det. Jeezas mi seh: “Di chroot wahn set [yu] free.” (Jan 8:32) Sohn rilijan teech dat wen sohnbadi ded dehn soal kantinyu liv, bot dat da noh weh di Baibl teech. Dis meenz dat nobadi sofa afta dehn ded. Ahn sins di ded noh noa notn ataal, dehn kyaahn hert wi. Soh wi noh need fi wership ded peepl er du eniting fi chrai pleez dehn, ahn wi noh need fi seh pryaaz fi dehn.

Sohn peepl seh dat dehn ku kamyoonikayt wid peepl weh ded, bot dat noh pasabl. Laik weh wi jos laan, ded peepl “noh noa notn ataal.” Dehn wan weh tink dat dehn di kamyoonikayt wid dehn famili membaz er frenz weh ded mait akchwali di kamyoonikayt wid deemonz weh priten fi bee peepl weh ded. Soh wen wi laan di chroot bowt det, ih protek wi fahn di deemonz. Jehoava waan wi fi noh eevn chrai kamyoonikayt wid ded peepl bikaaz hihn noa dat eni kaina kantak wid deemonz wahn hert wi.​—Reed Deuteronomy 18:10-12.

3. Weh reeli hapm wen sohnbadi ded?

Aal rong di werl, peepl ga difrent bileef bowt weh hapm wen wi ded. Af koars, noh aala dehndeh bileef ku bee chroo.

• Weh lata peepl eena fi yoo ayrya bileev bowt det?

 4. Di chroot bowt det help wi

Wen wi noa di chroot bowt det, ih help wi fi noh bee frayd fi ded peepl. Reed Ecclesiastes 9:10, ahn den diskos dis kweschan:

• Ded peepl ku hert wi?

Di chroot fahn di Baibl protek wi fahn di faals bileef dat wi haftu wership di ded er du tingz fi mek dehn hapi. Reed Isaiah 8:19 ahn Revilayshan 4:11, ahn den diskos dis kweschan:

• How yu tink Jehoava feel bowt sohnbadi weh wership ded peepl er chrai geh help fahn dehn?

5. Di chroot bowt det komfert wi

Lata peepl bileev dat wen dehn ded, dehn wahn geh ponish bikaaz a di bad tingz weh dehn du eena di paas. Bot ih komfertin fi noa dat nobadi sofa afta dehn ded​—nat eevn peepl weh mi du reeli bad tingz. Reed Roamanz 6:7, ahn den diskos dis kweschan:

• Di Baibl seh dat det set peepl free fahn dehn sinz. Soh yu tink enibadi weh ded di sofa bikaaz a di mistayk dehn weh dehn mek eena di paas?

Di moa wi geh fi noa Jehoava, di moa wi andastan dat hihn wuda neva alow di ded fi sofa. Reed Deuteronomy 32:4 ahn 1 Jan 4:8, ahn den diskos dehnya kweschan:

• Yu tink wahn Gaad weh ga kwalitiz laik weh dehndeh vers taak bowt wuda eva tink dat ih aarait fi ponish peepl weh don ded?

• Yu tink di chroot bowt det komfertin? Wai?

 WEH WI LAAN?

Wen wahn persn ded, ih noh noa notn ataal. Peepl weh ded noh di sofa, ahn dehn kyaahn hert nobadi.

Mek Wi Rivyoo:

• Weh hapm tu wi wen wi ded?

• How wee benifit wen wi laan di chroot bowt det?

• How di chroot bowt det komfert wi?