LESN 30
Yu Famili ahn Frenz Ku Liv Agen!
Wen sohnbadi weh wi lov ded, ih ku mek wi feel reeli sad. Dat da wai di Baibl seh dat det da wahn enimi. (1 Korintyanz 15:26) Eena Lesn 27, yu mi laan dat Jehoava wahn geh rid a da enimi. Bot weh wahn hapm tu peepl weh don ded aredi? Eena dis lesn, yu wahn laan moa bowt di wandaful pramis weh Jehoava mek fi rezorek bilyanz a peepl weh ded fi mek dehn injai laif fareva! Yu tink dat ku reeli hapm? Dehn wahn geh rezorek bak tu laif da hevn er pahn ert?
1. Weh Jehoava waahn du fi wi famili ahn frenz weh ded?
Jehoava di luk faawod fi bring peepl weh ded bak tu laif. Wahn faytful man weh naym Joab mi shoar dat Gaad neva mi wahn ferget ahn wen ih ded. Hihn mi tel Gaad: “Yu wahn kaal mi, an Ah wahn ansa yu [fahn di Grayv].”—Reed Job 14:13-15.
2. How wi noa dat peepl weh ded ku geh rezorek bak tu laif?
Wen Jeezas mi deh pahn ert, Gaad mi giv ahn di powa fi rezorek peepl. Jeezas mi bring bak tu laif wahn lee gyal weh mi 12 yaaz oal ahn wahn wido son. (Maak 5:41, 42; Look 7:12-15) Laytaraan, Jeezas fren Lazaros mi ded. Eevn doa Lazaros mi don ded an ih mi eena di grayv fi foa dayz, Jeezas mi bring ahn bak tu laif. Afta Jeezas mi pray tu Gaad, ih fays di toom ahn hala owt: “Lazaros, kom owt!” Ahn “di man weh mi ded kom owt.” Lazaros mi alaiv! (Jan 11:43, 44) Jos imajin how hapi Lazaros famili ahn frenz mi feel!
3. Yu tink yu famili ahn frenz weh ded ku liv agen?
Di Baibl pramis wi dat “Gaad wahn rayz op [peepl] bak fahn di ded.” (Aks 24:15) Dehn wan weh Jeezas mi rezorek wen hihn mi deh pahn ert neva gaahn da hevn. (Jan 3:13) Hihn mi rezorek dehn bak tu laif rait ya pahn ert, ahn dehn mi hapi bowt dat. Saym way soh, Jeezas wahn soon rezorek bilyanz a peepl fi injai laif fareva pahn wahn paradais ert. Hihn mi seh dat “aala di wan dehn weh deh eena di memoaryal toom dehn” wahn geh rezorek. Eevn if peepl ferget bowt dehn, Jehoava wahn memba dehn ahn rezorek dehn.—Jan 5:28, 29, futnoat.
SAACH FI MOA
Laan moa bowt di proof weh di Baibl gi wi dat Jeezas ga di powa fi rezorek di ded ahn dat da pramis wahn kohn chroo. Ahn si how di rezorekshan ku gi yoo komfert ahn hoap.
4. Jeezas mi proov dat hihn ku rezorek peepl weh ded
Laan moa bowt weh Jeezas mi du fi ih fren Lazaros. Reed Jan 11:14, 38-44, ahn den diskos dehnya kweschan:
-
How wi noa dat Lazaros mi reeli ded?—Si vers 39.
-
If Lazaros mi gaahn da hevn, yu tink Jeezas mi-di du ahn wahn fayva fi bring ahn bak tu laif pahn ert?
5. Jeezas wahn rezorek lata peepl!
Reed Psalm 37:29, ahn den diskos dis kweschan:
-
Wehpaat di bilyanz a peepl weh Jeezas wahn rezorek wahn liv?
Jeezas noh onli wahn rezorek peepl weh mi wership Jehoava. Hihn wahn bring lat moa peepl bak tu laif. Reed Aks 24:15, ahn den diskos dis kweschan:
-
Hoo yu wuda waahn si kohn bak tu laif?
Tink bowt dis: Ih eezi fi Jeezas rezorek sohnbadi, jos laik how ih eezi fi wahn pa wayk op ih pikni
6. Di rezorekshan ku gi yu komfert ahn hoap
Di Baibl pasij bowt Jairos daata inkorij ahn komfert wahn lata peepl weh feel sad bikaaz sohnbadi weh dehn lov ded. Reed da chroo stoari da Look 8:40-42, 49-56.
Bifoa Jeezas mi rezorek Jairos daata, hihn mi tel Jairos: “Noh frayd, jos ga fayt.” (Si vers 50.) How di rezorekshan hoap ku help yu . . .
-
wen sohnbadi yu lov ded?
-
wen yu laif deh eena daynja?
Play di VEEDYO, ahn den diskos di kweschan.
-
How di rezorekshan hoap komfert an inkorij Phelicity payrents?
WEH YU WUDA SEH IF SOHNBADI TEL YU: “Wen peepl ded dehn goh da hevn.”
-
Weh skripcha yu ku yooz fi shoa dehn dat moas peepl weh ded wahn geh rezorek pahn ert?
WEH WI LAAN?
Di Baibl pramis dat bilyanz a peepl weh ded wahn geh rezorek. Jehoava waahn mek dehn liv agen, ahn hihn don gi Jeezas di powa fi rezorek dehn.
Mek Wi Rivyoo:
-
How wi noa dat Jehoava ahn Jeezas di luk faawod fi bring di ded bak tu laif?
-
Wehpaat di bilyanz a peepl weh wahn geh rezorek wahn liv—da hevn er pahn ert? Wai yu seh dat?
-
Weh kanvins yoo dat yu famili ahn frenz weh ded ku liv agen?
FAIN OWT MOA
Laan how fi deel wid di sadnis yu feel wen sohnbadi weh yu lov ded.
“Help fi Dehn Wahn Weh Looz Sohnbadi Weh Dehn Lov Eena Det” (Awayk! No. 3 2018)
Yu tink Baibl prinsiplz ku reeli help sohnbadi weh feel sad bikaaz sohnbadi weh dehn lov ded?
How chiljren ku deel wid di sadnis weh dehn feel wen sohnbadi dehn lov ded?
Yu tink enibadi wahn geh rezorek ahn goh da hevn? Hoo noh wahn geh rezorek?
