LESN 35

How Wi Ku Mek Gud Disizhanz?

PLAY

Aala wi need fi mek disizhanz. Ahn wahn lata di tingz weh wi disaid fi du ku afek wee ahn wi frenship wid Jehoava. Fi egzampl, wi haftu disaid wehpaat wi wahn liv, weh kaina jab wi wahn du, er weda er nat wi wahn geh marid. Wen wi mek gud disizhanz bowt tingz laik dehnya, wi ku ga wahn hapi laif ahn wi wahn pleez Jehoava.

1. How yu ku yooz di Baibl fi help yu mek gud disizhanz?

Bifoa wi mek wahn disizhan, pray fi Jehoava help ahn yooz di Baibl fi fain owt how hihn feel bowt weh yu di disaid fi du. (Reed Proverbs 2:3-6.) Sohntaim, Jehoava wahn tel wi egzakli weh fi du. Wen dat hapm, di bes disizhan yu ku mek da fi obay ahn.

Bot wat if di Baibl noh tel yu egzakli weh fi du? Jehoava wahn stil gaid yu “eena di way how yu shuda waak.” (Isaiah 48:17) How hihn du dat? Dehn ga Baibl prinsiplz weh ku gaid yu. Dehnya prinsiplz da baysik Baibl teechinz weh help wi andastan how Jehoava tink ahn feel. Lata taim wen wi reed wahn Baibl pasij wi laan how Jehoava feel bowt sertn tingz. Wen wi andastan how Jehoava feel, wi wahn ku mek disizhanz weh pleez ahn.

2. Weh yu shuda tink bowt bifoa yu mek wahn disizhan?

Di Baibl seh: “Di waiz persn tink gud bifoa ih du eniting.” (Proverbs 14:15) Dis meenz dat bifoa wi mek wahn disizhan, wi shuda tek di taim fi tink bowt di difrent tingz weh wi ku du. An az yu di tink bowt dehn, aks yuself: ‘Weh Baibl prinsiplz Ah ku yooz? How dis wahn mek Ai feel? How mai disizhan wahn afek adaz? Ahn moa impoatant, dis wahn mek Jehoava feel hapi?ʼ—Deuteronomy 32:29.

Jehoava ga di rait fi tel wi weh gud ahn weh bad. Wen wi geh fi noa fi hihn laaz ahn prinsiplz ahn wi mek op wi main fi fala dehn, ih wahn help wi fi ga wahn gud kanshans. Wi kanshans da weh tel wi if sohnting rait er rang. (Roamanz 2:14, 15) Wen wi chrayn wi kanshans, ih wahn help wi fi mek gud disizhanz.

SAACH FI MOA

Laan how Baibl prinsiplz ahn wi kanshans ku help wi mek gud disizhanz.

3. Mek di Baibl gaid yu

How Baibl prinsiplz ku gaid wi wen wi di mek wahn disizhan? Play di VEEDYO, ahn den diskos di kweschan dehn.

VEEDYO: Mek Baibl Prinsiplz Gaid Yu (5:54)

Wat da free wil?
Wai Jehoava gi wi free wil?
Weh Jehoava gi wi soh dat wi ku yooz wi free wil fi mek gud disizhanz?

Fi si wahn egzampl a wahn Baibl prinsipl, reed Ifeezhanz 5:15, 16. Den diskos how yu ku “mek di bes yoos a [yu] taim” fi . . .

reed di Baibl evriday.
bee wahn beta hozban, waif, payrent, son, er daata.
goh da di kangrigayshan meetinz.

4. Chrayn yu kanshans fi mek gud disizhanz

Wen di Baibl tel wi egzakli weh fi du, ih ku bee eezi fi mek di rait disizhan. Bot wat if dehn noh ga wahn dairek koman fi mek wi fala? Play di VEEDYO, ahn den diskos di kweschan.

VEEDYO: ‘Ga Wahn Klyaa Kanshansʼ (5:13)

Eena di veedyo, weh di sista mi du fi chrayn ih kanshans soh dat ih kuda mi mek wahn disizhan weh pleez Jehoava?

Wai wi noh fi aks adaz fi mek wahn disizhan weh wee need fi mek? Reed Heebrooz 5:14, ahn den diskos dehnya kweschan:

Eevn if ih eezi fi aks sohnbadi els fi mek wahn disizhan fi wi, weh wee need fi du fi wiself?
Weh ku help yu fi chrayn yu kanshans ahn mek gud disizhanz?

Wi kanshans da laik wahn map weh ku gaid wi eena laif

5. Rispek ada peepl kanshans

Sins aala wi mek difrent disizhanz, how wi ku shoa rispek fi ada peepl kanshans? Tink bowt dehnya too egzampl:

Egzampl 1: Wahn sista weh laik put aan maykop moov da wahn kangrigayshan wehpaat ih bada wahn lata di sistaz fi si peepl wid maykop.

Reed Roamanz 15:1 ahn 1 Korintyanz 10:23, 24, ahn den diskos dehnya kweschan:

Fahn dehnya vers, weh di sista mait disaid fi du? Weh yoo wuda du if yu deh wid sohnbadi hoo kanshans stap dehn fahn du sohnting weh noh bada fi yoo kanshans?

Egzampl 2: Wahn brada noa dat di Baibl noh seh dat ih rang fi jrink alkohol, bot hihn disaid noh fi jrink. Dehn invait ahn tu wahn get-tugeda an ih si som a di bradaz di jrink alkohol.

Reed Ecclesiastes 7:16 ahn Roamanz 14:1, 10, ahn den diskos dehnya kweschan:

Fahn dehnya vers, weh di brada mait disaid fi du? Weh yoo wuda du if yu si sohnbadi di du sohnting weh bada yu kanshans?

Weh steps wahn help wi fi mek gud disizhanz?

1. Aks Jehoava fi help yu disaid weh fi du.—Jaymz 1:5.

2. Du risaach eena di Baibl ahn wi poblikayshan dehn fi fain prinsiplz weh yu ku yooz. Yu ku eevn taak tu machoar bradaz ahn sistaz bowt it.

3. Tink bowt how yu disizhan wahn afek fi yoo kanshans an ada peepl wan tu.

WEH YU WUDA SEH IF SOHNBADI TEL YU: “Yoo ga di rait fi disaid wateva yoo waahn du, ih noh mata weh ada peepl tink.”

Wai wi shuda tink bowt how Gaad feel, an eevn how ada peepl feel?

WEH WI LAAN?

Wi mek gud disizhanz wen wi fain owt how Jehoava feel bowt sohnting ahn den tink bowt weda er nat ih wahn help er hert adaz.

Mek Wi Rivyoo:

How yu ku mek disizhanz weh pleez Jehoava?
How yu ku chrayn yu kanshans?
How yu ku shoa dat yu rispek ada peepl kanshans?

Dayt Ah kompleet dis lesn:

Weh Ah Ku Werk Pan

Tink bowt wahn disizhan weh yu haftu mek soon. Fala di chree steps eena di baks fahn dis lesn, weh naym “ Weh Steps Wahn Help Wi fi Mek Gud Disizhanz?”

Sohnting els fi werk pan:

Your other goal