LESN 36

Yu fi Bee Aanis Eena Evriting Weh Yu Du

PLAY

Evribadi waahn bee frenz wid peepl weh aanis. Ahn Jehoava ekspek ih fren dehn fi bee aanis tu. Bot dis da noh sohnting eezi fi du, bikaaz wi liv eena wahn werl weh lata peepl noh aanis. Weh gud tingz kohn fahn di bee aanis eena evriting weh wi du?

1. Wat da di moas impoatant reezn fi bee aanis?

Wen wi aanis wid ada peepl, wi shoa Jehoava dat wi lov ahn rispek hihn. Tink bowt dis: Jehoava noa aal weh wi tink bowt ahn du. (Heebrooz 4:13) Hihn si wen wi disaid fi bee aanis, ahn dat mek hihn hapi. Fi hihn Werd seh: “Jehoava hayt wahn chriki persn, bot Hihn da kloas fren wid di raichos persn.”—Proverbs 3:32.

2. Weh da sohn tingz wi ku du evriday fi shoa dat wi aanis?

Jehoava waahn mek wi “taak di chroot wid wan anada.” (Zechariah 8:16, 17) Dat meenz dat weda wi di taak tu wi famili, di peepl weh wi werk wid, wi bradaz ahn sistaz, er peepl weh werk eena govament, wi noh tel lai er gi dehn rang infamayshan. Peepl weh aanis noh teef er chrik peepl fi tek dehn moni. (Reed Proverbs 24:28 ahn Ifeezhanz 4:28.) Ahn dehn pay aal dehn taks weh dehn oa. (Roamanz 13:5-7) Wen wi di du tingz laik dehnya, wi wahn bee “aanis eena evriting weh wi du.”—Heebrooz 13:18.

3. Weh gud tingz kohn fahn di bee aanis?

Wen wi aanis peepl wahn ku chros wi. Wi wahn help evribadi eena di kangrigayshan feel sayf jos laik wahn famili weh lov eech ada. Wi wahn hapi wen wi ga wahn kleen kanshans. Ahn pahn tap a dat, wi ku “shoa peepl how byootiful di teechinz a Gaad, wi Sayvya,” ahn dat ku mek dehn waahn serv Jehoava.—Taitos 2:10.

SAACH FI MOA

Laan how yu ku bee aanis eena difrent sichuwayshan weh yu fays eena laif, ahn si how dis wahn mek yoo ahn Jehoava feel.

4. Jehoava feel hapi wen wi aanis

Reed Psalm 44:21 ahn Malachi 3:16, ahn den diskos dehnya kweschan:

Wai ih noh mek sens fi tink dat wi ku haid di chroot?
How yu tink Jehoava feel wen wi tel di chroot, eevn wen ih noh eezi fi du dat?

Wen chiljren tel di chroot, dehn mek dehn payrents hapi. Wen wee tel di chroot, wi mek Jehoava hapi

5. Aalwayz bee aanis

Wahn lata peepl bileev dat ih noh mek sens fi aalwayz bee aanis. Bot mek wi si wai wi need fi bee aanis aal di taim. Play di VEEDYO.

VEEDYO: Tingz Weh Ku Mek Wi Rijais—Wahn Kleen Kanshans (2:32)

Reed Heebrooz 13:18, ahn den taak bowt how wi ku bee aanis . . .

wid wi famili.
wen wi deh da werk er skool.
eena ada sichuwayshanz weh kom op eena laif.

6. Wi ga wahn beta laif wen wi aanis

Sohntaim wen wi aanis ih ku kaaz prablemz fi wi. Bot eena di en, tingz aalwayz werk owt beta wen yu aanis. Reed Psalm 34:12-16, ahn den diskos dis kweschan: