Blod reeli impoatant. Non a wi ku liv widowt it. Sins Gaad da di wan weh mek wi, hihn ga di rait fi tel wi how fi yooz blod. Weh Gaad seh bowt blod? Wi ku eet it, put it eena wi badi, er gi wi blod tu sombadi els fi yooz? Ahn how wi ku mek gud disizhanz weh ga fi du wid blod?

1. How Jehoava feel bowt blod?

Eena Baibl taimz, Jehoava tel dehn wan weh wership ahn: “Di laif a evri livin ting deh eena ih blod.” (Leviticus 17:14) Soh tu Jehoava, blod stan fi laif. Sins laif da wahn hoali ahn preshos gif fahn Gaad, blod hoali tu.

2. How Gaad seh wi noh fi yooz blod?

Lee bit afta di Flod, Jehoava mi koman ih servant dehn noh fi eet blod. (Reed Jenisiz 9:4 ahn Leviticus 17:10.) Hihn mi gi dis koman agen wen di govanin badi mi tel di Kristyanz fi “kip weh . . . fahn blod.”—Reed Aks 15:28, 29.

Weh ih meen fi kip weh fahn blod? If wahn dakta tel yu fi stay weh fahn alkohol, yu noh wahn jrink it. Bot yoo wuda eet food weh gat een alkohol er put it eena yu badi chroo yu vayn? Af koars nat. Saym way soh, di koman weh Gaad gi wi fi kip weh fahn blod meenz dat wi noh fi jrink blod er eet meet weh noh bleed gud. Ahn wi noh fi eet eni kaina food weh geh miks wid blod.

How bowt wen blod di geh yooz fi medikal reezn? Ih klyaa fi si dat dehn ga sohn medikal proseeja weh goh gens Gaad laa. Dis inklood hoal blod chransfyoozhan er eni a di mayn paats a blod, weh da red blod sel, wait blod sel, playtlet, ahn plazma. Bot wid ada proseeja ih mait noh bee klyaa weda er nat ih goh gens Gaad laa. Fi egzampl, dehn ga sohn proseeja weh yooz frakshanz a wan a di mayn paats a blod, wail ada proseeja yooz wahn persn oan blod. Wen wi di tink bowt dehnya opshanz, eech wan a wi need fi mek wi oan disizhan. a—Galayshanz 6:5.

 SAACH FI MOA

3. Mek medikal disizhanz weh pleez Jehoava

How yu ku mek medikal disizhanz weh goh lang wid di way how Gaad si blod? Play di VEEDYO, ahn den diskos wai ih impoatant fi fala dehnya steps.

• Pray fi wizdom.—Jaymz 1:5.

• Du risaach fi fain Baibl prinsiplz ahn si how yu ku yooz dehn.—Proverbs 13:16.

• Fain owt weh kaina medikal proseeja dehn ku du wehpaat yoo liv.

• Fahn dehndeh opshanz, figa owt wich wanz yoo wuda neva tek.

• Mek shoar dat weh yu disaid fi du wahn lef yu wid wahn kleen kanshans.—Aks 24:16. b

• Memba dat nobadi ku tel yu weh disizhan fi mek bowt yu kanshans; noh di persn yu marid tu, wahn elda, er yu Baibl teecha.—Roamanz 14:12.

• Rait dong yu disizhanz soh dat ada peepl wahn noa bowt it.

4. Jehoava Witnisiz luk fi di bes way fi tek kayr a dehn helt

Wi noa dat ih pasabl fi fala Gaad laa bowt blod ahn stil fain di bes way fi tek kayr a wi helt. Play di VEEDYO.

Reed Taitos 3:2, ahn den diskos dis kweschan:

• Wai wi fi aalwayz shoa rispek ahn bee kaam wen wi di taak tu daktaz?

 5. Blod frakshanz

Blod mek op a foa mayn paats, weh da red blod sel, wait blod sel, playtlet, ahn plazma. Dehnya foa mayn paats ku brok dong ahn separayt eena smaala paats weh wi kaal blod frakshanz. c Dehn yooz som a dehnya blod frakshanz eena sohn medisn weh help fait dizeez er weh help wahn persn fi stap looz blod.

Wen ih kohn tu blod frakshanz, eech Kristyan haftu mek dehn oan disizhan bays pahn Baibl prinsiplz ahn mek shoar weh dehn disaid fi du noh wahn bada dehn kanshans. Sohn peepl mait disaid noh fi tek wahn medikal chreetment, serjri, medisn, er tes weh gat een eevn di smaalis frakshanz a blod, wail ada Kristyanz mait mek wahn difrent disizhan bikaaz dehn kanshans alow dehn fi du dat.

Wen yu di disaid weh fi du, tink bowt dis kweschan:

• How Ah ku eksplayn tu wahn dakta wai Ah aksep er noh aksep sertn blod frakshanz?

 WEH WI LAAN?

Jehoava waahn mek wi chreet blod az sohnting hoali.

Mek Wi Rivyoo:

• Wai blod hoali tu Jehoava?

• How wi noa dat Gaad koman fi kip weh fahn blod eevn meen dat wi noh fi tek er giv blod?

• How yu ku mek gud disizhanz bowt blod fi wahn medikal chreetment?