Imajin wahn lovin ma di help ih lee bwai geh redi fi skool. Shee mek shoar dat ih bayd ahn dat ih kloaz luk nais ahn neet. Dis kip ahn helti an ih shoa di peepl rong ahn dat fi hihn payrents tek gud kayr a ahn. Saym way soh, wi lovin Faada, Jehoava, waahn mek wi bee kleen eena aal paats a wi laif. Wen wi kleen, wi benifit wiself ahn wi bring aana tu Jehoava.

1. How wi ku bee fizikali kleen?

Jehoava tel wi: “Unu fi bee hoali.” (1 Peeta 1:16) Fi bee hoali, wi need fi bee fizikali ahn moarali kleen. Wi ku bee fizikali kleen wen wi bayd evriday ahn wen wi kip wi kloaz, hows, ahn veekl neet ahn kleen. Wi ku aalso help kip wi Kingdom Haal kleen. Wen wi kip wiself kleen eena dehnya wayz, wi bring aana tu Jehoava.—2 Korintyanz 6:3, 4.

2. Weh bad habits wi need fi avoid fi kip wiself kleen?

Di Baibl inkorij wi fi “kip wiself kleen fahn eniting weh ku mek wi badi er wi spirit doti.” (2 Korintyanz 7:1) Dis meenz dat wi shuda werk haad fi avoid eniting weh wuda damij wi badi er di way wi tink. Di tingz weh wi tink bowt shuda pleez Jehoava, soh wi du wi bes fi rijek eni tinkin weh noh kleen. (Psalm 104:34) Wi aalso werk haad fi noh yooz bad langwij.—Reed Koloashanz 3:8.

Wat els ku mek wi noh bee fizikali er moarali kleen? Dehn ga sohn tingz weh ku haam wi badi. Soh, wi noh yooz tubaako, choo betel not er coca leef, tek jrogz, er yooz medisn eena di rang way. Wen wi avoid dehnya tingz, wi wahn kip wiself helti ahn shoa dat wi rispek di gif a laif. Wi aalso werk haad fi kip wiself kleen wen wi fait gens eni habit weh noh kleen, laik fi maastabayt ahn wach poarnografi. (Psalm 119:37; Ifeezhanz 5:5) Ih ku bee haad fi get oava dehnya habit, bot Jehoava ku help wi fi du dat.—Reed Isaiah 41:13.

 SAACH FI MOA

3. Wi aana Jehoava wen wi kip wi badi an ada tingz rong wi kleen

Wen wi reed bowt di laaz weh Jehoava gi di nayshan a Izrel, wi laan dat ih impoatant fi mek fi hihn peepl bee kleen. Reed Exodus 19:10 ahn 30:17-19, ahn den diskos dehnya kweschan:

• Fahn weh wi laan eena dehnya vers, Jehoava tink ih impoatant fi mek wi kip wiself kleen? Wai yu wuda seh dat?

• Weh da sohn tingz yu ku du fi kip yu badi an ada tingz kleen?

Ih tek taim ahn werk fi bee kleen. Bot wi ku du dis noh mata wehpaat wi liv er weda wi rich er poa. Play di VEEDYO, ahn den diskos di kweschan.

• Wai peepl wahn rispek wi preechin werk wen dehn si dat wi kip wi tingz neet ahn kleen?

4. Stap eni bad habit weh yu gat

If yu smoak er tek jrogz, yu mait noa dat ih haad fi get oava da habit. Weh ku help yu? Tink bowt how di habit afek yoo. Reed Machyu 22:37-39, ahn den diskos how tubaako er jrogz afek . . .

• wahn persn frenship wid Jehoava.

• wahn persn famili an ada peepl rong ahn.

Plan weh yu wahn du fi stap wahn bad habit. a Play di VEEDYO.

Reed Filipiyanz 4:13, ahn den diskos dis kweschan:

• How regyula pryaa, Baibl stodi, ahn di goh da meetin giv wahn persn di schrent weh dehn need fi stap wahn bad habit?

 5. Fait gens eni tinkin ahn kandok weh noh kleen

Reed Koloashanz 3:5, ahn den diskos dehnya kweschan:

• How wi noa dat poarnografi, di sen imoaral teks mesij, pichaz, er veedyo, ahn di maastabayt da tingz weh noh kleen tu Jehoava?

• Yu tink Jehoava ekspek tu moch fahn wi wen ih seh wi need fi bee moarali kleen? Wai yu wuda seh dat?

Fain owt how fi fait gens eni tinkin weh noh kleen. Play di VEEDYO.

Jeezas mi yooz wahn iloschrayshan fi shoa wi weh wi haftu du fi stay moarali kleen. Reed Machyu 5:29, 30, ahn den diskos dis kweschan:

• Jeezas neva mi-di seh dat wi shuda hert wiself, bot hihn mi did seh dat wi need fi tek akshan. Wat da sohn tingz weh wahn persn need fi du fi avoid eni tinkin weh noh kleen? b

If yu di fait gens eni tinkin weh noh kleen, memba dat Jehoava hapi wid how haad yu di chrai fi du weh rait. Reed Psalm 103:13, 14, ahn den diskos dis kweschan:

• If yu di schrogl fi get oava wahn bad habit, how dis skripcha inkorij yu fi kip aan di fait it?

 WEH WI LAAN?

Wi mek Jehoava hapi wen wi kip wi badi, wi tinkin, ahn wi kandok kleen.

Mek Wi Rivyoo:

• Wai ih soh impoatant fi bee kleen?

• How yu ku bee fizikali kleen?

• How yu ku kip yu tinkin ahn yu kandok kleen?