LESN 41

Weh di Baibl Seh Bowt Seks?

PLAY

Wahn lata peepl noh feel komfatabl di taak bowt seks. Bot dis da sohnting di Baibl taak bowt. Di Baibl rispekful ahn schrayt op wen ih di taak bowt seks ahn weh ih seh da fi wi oan gud. Dat mek sens bikaaz di Baibl kohn fahn Jehoava, ahn hihn da di wan weh mek wi. Soh hihn noa weh bes fi wee. Hihn mek wi noa weh wi ku du fi pleez hihn ahn weh wahn help wi fi injai laif now ahn fareva.

1. Weh Jehoava seh bowt seks?

Seks da wahn gif fahn Jehoava, ahn hihn waahn ih bee sohnting weh wahn man ahn wahn wuman weh marid tu eech ada ku injai tugeda. Hihn noh onli gi dehn dis gif fi ga chiljren, bot ih mek it soh dat dehn ku shoa dehn lov an afekshan fi eech ada eena wahn nachral way weh aalso gi dehn plezha. Dat da wai Gaad Werd seh: “Rijais wid yu waif weh yu marid wen yu mi yong.” (Proverbs 5:18, 19) Jehoava ekspek Kristyanz weh marid fi bee laayal tu eech ada ahn bikaaz dis da weh hihn ekspek, Kristyanz noh komit adolchri.—Reed Heebrooz 13:4.

2. Wat da sekshwal imoraliti?

Di Baibl tel wi dat “peepl weh praktis sekshwal imoraliti . . . noh wahn bee no paat a Gaad Kingdom.” (1 Korintyanz 6:9, 10) Di Baibl raita dehn weh mi rait eena di Greek langwij mi yooz di werd por·neiʹa fi diskraib sekshwal imoraliti. Da werd meenz (1) seks a bitween peepl weh noh marid tu eech ada, (2) seks bitween man ahn man er wuman ahn wuman, ahn (3) seks bitween hyoomanz an animalz. Wi mek Jehoava hapi ahn wee wiself benifit wen wi “kip weh fahn sekshwal imoraliti.”—1 Tesaloanyanz 4:3.

SAACH FI MOA

Fain owt weh wahn help yu fi stay weh fahn sekshwal imoraliti ahn si how tingz wahn ton owt gud fi yu wen yu obay weh Jehoava seh bowt seks.

3. Ron weh fahn sekshwal imoraliti

Joazef, wahn faytful man tu Jehoava, mi rifyooz fi ga seks wid sohnbadi weh ih neva marid tu. Reed Jenisiz 39:1-12, ahn den diskos dehnya kweschan:

Weh mi mek Joazef ron weh fahn Potifa waif?—Si vers 9.
Yoo tink Joazef mi du di rait ting? Wai yu seh dat?

How yong peepl ku kapi Joazef egzampl ahn ron weh fahn sekshwal imoraliti? Play di VEEDYO.

VEEDYO: Ron Fahn Eni Kaina Sin Weh Ga fi Du Wid Seks (5:06)

Jehoava waahn mek aala wi stay weh fahn imoraliti. Reed 1 Korintyanz 6:18, ahn den diskos dehnya kweschan:

Weh sichuwayshanz eena sohnbadi laif ku mek dehn komit sekshwal imoraliti?
How yu ku ron weh fahn imoraliti?

4. Yoo ku fait gens temtayshan

Wai ih ku bee haad fi fait gens di temtayshan fi komit sekshwal imoraliti? Play di VEEDYO, ahn den diskos di kweschan.

VEEDYO: Baibl Reedin Ku Help Yu Fait Temtayshan (3:02)

Weh di brada eena di veedyo mi du wen hihn riyalaiz dat di tingz weh ih mi-di du ahn tink bowt kuda mi mek hihn cheet pan ih waif?

Sohntaim, eevn faytful Kristyanz schrogl fi kip dehn tinkin kleen. How yu ku stap yuself fahn tink bowt tingz weh imoaral? Reed Filipiyanz 4:8, ahn den diskos dehnya kweschan:

Weh kaina tingz wi fi tink bowt?
Wen wi reed di Baibl ahn kip wiself bizi di du tingz fi Jehoava, how dat ku help wi fi fait gens di temtayshan fi sin?

5. Jehoava standadz mek wi laif moch beta

Jehoava noa weh bes fi wee. Hihn tel wi how wi ku kip wiself moarali kleen, ahn humoch beta wi laif wahn bee wen wi du dat. Reed Proverbs 7:7-27 er play di VEEDYO, ahn den diskos di kweschan dehn.

VEEDYO: Sombadi Weh Noh Ga Gud Sens (9:31)

How di yong man mi en op eena wahn sichuwayshan weh get ahn eena chrobl?—Si Proverbs 7:8, 9.
Proverbs 7:23, 26 shoa wi dat sekshwal imoraliti ku kaaz seeryos prablemz. Weh kaina prablemz wi noh wahn gat if wi kantinyu obay weh Jehoava seh bowt seks?
How di liv wahn kleen laif ku help wi injai laif fareva?

Sohn peepl tink dat weh di Baibl seh bowt homosekshwaliti noh lovin. Bot Jehoava, di Gaad a lov, waahn mek evribadi injai laif fareva. Fi mek dat ku hapm, wi need fi liv di way how hihn waahn. Reed 1 Korintyanz 6:9-11, ahn den diskos dis kweschan:

Fahn weh wi reed eena dehnya skripcha, homosekshwal dizaiyaz da di onli ting weh Gaad seh rang?

Fi pleez Gaad aala wi need fi mek chaynjiz eena wi laif, bot dat noh eezi fi du. Yu tink ih mek sens fi du dat? Reed Psalm 19:8, 11, ahn den diskos dehnya kweschan: