LESN 42
Weh di Baibl Seh Bowt Singl ahn Marid Laif?
Eena sohn kolcha, peepl bileev dat wahn persn kyaahn bee hapi if ih noh marid. Bot dat da noh chroo. Weda wi marid er nat wi ku bee hapi, ahn di Baibl seh dat eeda wan da wahn gif fahn Jehoava.
1. Weh da sohn gud tingz wahn persn ku du if ih noh marid?
Di Baibl seh: “Enibadi weh geh marid du gud, bot enibadi weh noh geh marid du beta.” (Reed 1 Korintyanz 7:32, 33, 38.) Eena weh way wahn persn weh noh marid ku “du beta”? Wahn Kristyan weh noh marid noh ga di rispansabiliti fi tek kayr a wahn hozban er waif. Soh dehn wuda ga moa taim fi du ada tingz. Som ku du moa fi Jehoava. Fi egzampl, dehn ku moov tu wahn nada konchri fi preech di gud nyooz. Bot moa dan eniting els, dehn ku spen moa taim di jraa kloasa tu Jehoava.
2. How yu benifit wen yu leegali marid?
Marid peepl ku benifit eena difrent wayz tu. Di Baibl seh dat “too beta dan wan.” (Ecclesiastes 4:9) Dis da chroo wen Kristyanz fala Baibl prinsiplz eena dehn marij. Koplz weh leegali marid pramis fi lov, rispek, ahn cherish eech ada. Bikaaz a dat, dehn feel moa sikyoar dan koplz weh jos di liv tugeda. Ahn pahn tap a dat, dehn pikni wahn groa op di feel sayf tu.
3. Weh standad Jehoava set fi marid peepl?
Wen Jehoava marid di fers kopl, hihn seh: “Wahn man wahn lef ih pa an ih ma, an ih wahn stik tu ih waif.” (Jenisiz 2:24) Jehoava waahn wahn hozban ahn waif fi lov eech ada ahn stay tugeda fi az lang az dehn liv. Hihn onli alow wahn divoas wen di hozban er di waif komit adolchri—ga seks wid sohnbadi els. Wen sohnting laik dat hapm, Jehoava gi di inosent hozban er waif di rait fi disaid if dehn wahn get wahn divoas. a (Machyu 19:9) Jehoava noh alow wahn Kristyan fi ga moa dan wan hozban er waif at di saym taim.—1 Timoti 3:2.
SAACH FI MOA
Laan how yoo ku bee hapi, ahn mek Jehoava hapi, weda yu marid er nat.
4. Yooz yu laif eena di bes way wen yu noh marid
Jeezas mi seh dat singl laif da wahn gif. (Machyu 19:11, 12) Reed Machyu 4:23, ahn den diskos dis kweschan:
-
Bikaaz Jeezas neva marid, how hihn mi yooz ih laif fi serv ih Faada ahn fi help adaz?
Kristyanz weh noh marid ku injai dehn laif jos laik Jeezas. Play di VEEDYO, ahn den diskos di kweschan.
-
Weh da sohn tingz Kristyanz weh noh marid ku du weh wahn mek dehn hapi?
Yu mi noa?
Di Baibl noh tel wi egzakli how oal wahn persn need fi bee fi geh marid. Bot, ih inkorij yong peepl fi wayt til ‘di taim a dehn yoot don paas.ʼ Dis da di taim wen wahn yong persn ku fain it haad fi mek waiz disizhanz bowt marij bikaaz ih ga schrang sekshwal dizaiyaz.—1 Korintyanz 7:36.
5. Bee waiz wen yu di chooz hoo yu wahn marid
Hoo yu wahn marid da wan a di moas impoatant disizhan yu wahn eva mek. Reed Machyu 19:4-6, 9, ahn den diskos dis kweschan:
-
Wai wahn Kristyan noh fi hori fi geh marid?
Di Baibl ku help yu noa weh kwalitiz fi luk fa eena wahn persn wen yu waahn geh marid. Di moas impoatant ting da fi luk fi sombadi weh lov Jehoava. b Reed 1 Korintyanz 7:39 ahn 2 Korintyanz 6:14. Den diskos dehnya kweschan:
-
Wai wi fi onli marid sombadi hoo di serv Jehoava?
-
How yoo tink Jehoava wahn feel if wi geh marid tu sombadi weh noh lov Hihn?
If dehn wuda put too difrent animal fi werk tugeda anda di saym yoak, dehn wuda sofa. Saym way soh, if sombadi hoo wership Jehoava marid sombadi weh noh serv Jehoava, dehn wahn en op wid wahn lata prablemz
6. Si marij laik how Jehoava seeʼt
Eena di Izrelait dehn taim, sohn man mi divoas dehn waif fi no gud reezn. Reed Malachi 2:13, 14, 16, ahn den diskos dis kweschan:
-
Wai Jehoava hayt wen peepl geh divoas fi reeznz weh noh deh eena di Baibl?
Adolchri ahn divoas hert di inosent marij paadna ahn di chiljren
Play di VEEDYO, ahn den diskos di kweschan.
-
If yu marid tu sombadi weh noh serv Jehoava, weh yoo ku du fi ga wahn hapi marij?
7. Obay Jehoava standadz fi marij
Wahn persn mait need fi werk reeli haad soh dat dehn ku obay Jehoava standadz fi marij. c Bot Jehoava wahn bles peepl weh du dat. Play di VEEDYO.
Reed Heebrooz 13:4, ahn den diskos dehnya kweschan:
-
Yoo tink ih pasabl fi obay Jehoava standadz fi marij? Wai yu wuda seh dat?
Jehoava waahn aal Kristyanz rejista wen dehn get marid er get divoas, bikaaz dis da weh moas govament tel peepl fi du eena dehn konchri. Reed Taitos 3:1, ahn den diskos dis kweschan:
-
If yoo marid, yu shoar dat yu marij leegal wid di govament?
WEH YU WUDA SEH IF SOHNBADI AKS YU: “Wai yu need fi geh marid? Wahn man ahn wahn laydi kyaahn jos liv tugeda?”
WEH WI LAAN?
Weda wi marid er nat da wahn gif fahn Jehoava. Eeda wan ku mek wi hapi ahn satisfai wen wi du tingz di way how Jehoava waahn.
Mek Wi Rivyoo:
-
How sohnbadi weh noh marid ku mek di bes yoos a ih laif?
-
Wai di Baibl seh wi fi onli marid sombadi weh serv Jehoava?
-
Wat da di onli reezn di Baibl giv fi geh wahn divoas?
FAIN OWT MOA
Weh ih meen wen di Baibl seh fi marid “wahn falowa a di Laad”?
Fi help yu mek gud disizhanz bowt daytin ahn marij, wach dehnya too shaat veedyo.
Laan wai wahn brada feel dat hihn mi geh moch moa fahn Jehoava dan eniting weh hihn mi giv op.
Bifoa wahn persn tink bowt separayt er geh wahn divoas, wat da sohn tingz ih fi kansida?
“Aana ‘Weh Gaad Don Jain Tugedaʼ” (Di Wachtowa, Disemba 2018)
b Eena sohn kolcha, di payrents chooz hoo dehn son er daata wahn marid. Eena da kays, di fers ting weh wahn lovin payrent wahn luk fa da if di persn lov Jehoava. Dis fi bee moa impoatant tu dehn dan if di persn ga moni er wahn impoatant pozishan.
c If yu di liv wid sombadi weh yu noh marid tu, da yoo need fi disaid if yu wahn geh marid er yu wahn lef di rilayshanship.
