LESN 44
Gaad Pleez Wid Aal Selibrayshan?
Jehoava waahn wi injai wi laif an eevn selibrayt sohntaim. Bot yu tink hihn pleez wid aal selibrayshan ahn haliday? How wi ku shoa dat wi lov Jehoava wen ih kohn tu dehnya tingz?
1. Wai Jehoava noh pleez wid wahn lata selibrayshan?
Ih mait sopraiz yu fi laan dat wahn lata selibrayshan kohn fahn paygan kostomz er fahn teechinz weh noh deh eena di Baibl. Dehnya selibrayshan mait ga fi du wid faals rilijan, spiritizm, er di teechin dat sohnbadi soal kip aan di liv afta dehn ded. Ahn sohn selibrayshan eevn kohn fahn soopastishan er ga fi du wid lok. (Isaiah 65:11) Jehoava waan ih peepl: “Separayt unuself . . . [ahn] stap toch eniting weh noh kleen.”—2 Korintyanz 6:17. a
2. How Jehoava feel bowt selibrayshanz weh gi tu moch aana tu peepl?
Jehoava waan wi noh fi “chros eena peepl,” bikaaz dat da wahn chrap. (Reed Jeremiah 17:5.) Sohn haliday da fi aana roolaz er soaljaz weh don ded, wail sohn da fi selibrayt wahn konchri nashanal simbol er indipendens. (1 Jan 5:21) An adaz da fi selibrayt wahn politikal paati er wahn groop weh waahn bring chaynj. How yu tink Jehoava wuda feel if wi giv tu moch prayz an aana tu wahn persn er aaganaizayshan, espeshali if dehn sopoat tingz weh goh gens fi Hihn perpos?
3. Weh kaina bihayvya ku mek sohn selibrayshan rang?
Di Baibl seh dat ih rang fi “geh jronk, goh da wail paati, [ahn] goh da jrinkin paati jos fi si hoo ku jrink moa dan evribadi els.” (1 Peeta 4:3) Da sohn selibrayshan, peepl geh owta kanchroal ahn bihayv eena wahn imoaral way. Fi kantinyu bee Jehoava fren, wi need fi stay faar fahn dehnya kaina doti tingz.
SAACH FI MOA
Laan how yu ku pleez Jehoava wen yu mek gud disizhanz bowt haliday ahn selibrayshanz.
4. Noh tek paat eena selibrayshanz weh disrispek Jehoava
Reed Ifeezhanz 5:10, ahn den diskos dehnya kweschan:
-
Wen wi di chooz weda er nat wi wahn selibrayt wahn haliday, weh wi need fi mek shoar wi du?
-
Weh kaina haliday peepl lov di moas wehpaat yu liv?
-
Yu tink dehn kaina haliday pleez Jehoava?
Fi egzampl, yu eva wanda weh Gaad tink bowt bertday? Dehn noh ga no way eena di Baibl weh seh dat peepl weh wership Jehoava mi selibrayt bertday, bot ih doo taak bowt too bertday selibrayshanz fahn peepl weh neva serv Hihn. Reed Jenisiz 40:20-22 ahn Machyu 14:6-10. Den diskos dehnya kweschan:
-
Weh mi hapm da di too a dehnya bertday?
-
Fahn weh wi laan eena dehnya Baibl egzampl, how yu tink Jehoava feel bowt bertday?
Bot maybi yu stil aks yuself, ‘Jehoava reeli kay if Ai tek paat eena wahn bertday selibrayshan er eni ada selibrayshan weh di Baibl noh gree wid?ʼ Reed Exodus 32:1-8. Den, play di VEEDYO ahn diskos di kweschan dehn.
-
Wai ih impoatant fi mek shoar dat weh wi du pleez Jehoava?
-
How wi ku fain owt weh Jehoava waahn wi du?
How fi noa weh selibrayshanz Gaad noh laik
-
Di selibrayshan bays pahn teechinz weh noh deh eena di Baibl? Fi geh di ansa, fain owt weh ih kohn fram.
-
Di selibrayshan di gi tu moch aana tu eni hyooman, aaganaizayshan, er wahn nashanal simbol? Jehoava da di wan wi fi aana moa dan enibadi els ahn wi chros eena hihn fi fiks aala di prablemz eena di werl.
-
Di selibrayshan ga eni kostom ahn praktis weh goh gens Baibl standadz? Wi need fi du weh rait ahn kip wi laif kleen.
5. Help ada peepl rispek weh yu bileev
Ih noh eezi fi seh no wen ada peepl presha yu fi tek paat eena wahn selibrayshan weh Gaad noh laik. Bee payshent ahn kain wen yu eksplayn weh yu disaid fi du. Fi si wahn egzampl how fi du dis, play di VEEDYO.
Reed Machyu 7:12, ahn den diskos dehnya kweschan:
-
Fahn weh wi laan eena dis skripcha, yu tink yu fi tel yu famili weh noh serv Jehoava dat dehn kyaahn selibrayt wahn haliday?
-
Weh yu ku du fi mek yu famili noa dat yu lov ahn kay bowt dehn eevn doa yu noh selibrayt wahn haliday wid dehn?
6. Jehoava waahn wi bee hapi
Jehoava waahn wi spen taim ahn ga fon wid wi famili ahn frenz. Reed Ecclesiastes 8:15, ahn den diskos dis kweschan:
-
How dis vers shoa wi dat Jehoava waahn wi bee hapi?
Jehoava waahn fi hihn peepl ga fon an injai di spen taim tugeda. Play di VEEDYO fi si how wi intanashanal kanvenshan dehn proov dat dis da chroo.
Reed Galayshanz 6:10, ahn den diskos dehnya kweschan:
-
Wi need fi selibrayt wahn haliday weh peepl laik soh dat wi “du gud” tingz fi dehn?
-
Ih wuda mek yu moa hapiya fi giv tu ada peepl jos bikaaz da wahn haliday er fi giv bikaaz da sohnting weh yu waahn du?
-
Wahn lata Witnisiz wuda du sohnting speshal fi dehn pikni an eevn sopraiz dehn wid wahn gif fahn taim tu taim. If yoo ga chiljren, wat da sohn speshal tingz yu ku du fi dehn?
WEH YU WUDA SEH IF SOHNBADI TEL YU: “Ih noh mata weh wahn haliday kohn fram. Weh impoatant da fi spen taim wid yu famili ahn frenz.”
WEH WI LAAN?
Jehoava waahn mek wi ga fon ahn spen taim wid wi famili ahn frenz. Bot hihn aalso waahn mek wi stay weh fahn selibrayshanz weh noh pleez hihn.
Mek Wi Rivyoo:
-
Weh kweschanz wi ku aks wiself fi figa owt if wahn selibrayshan noh pleez Jehoava?
-
How wi ku help wi famili ahn frenz andastan weh wi disaid fi du bowt difrent haliday?
-
How yu noa dat Jehoava waahn mek wi ga fon ahn bee hapi?
FAIN OWT MOA
Reed bowt sohn haliday weh Kristyanz noh selibrayt.
“Wai Jehoava Witnisiz Noh Selibrayt Sertn Haliday?” (Web aatikl)
Laan bowt foa reezn weh mek wi bileev dat Jehoava noh pleez wid bertdayz.
Si how chiljren hoo lov Jehoava ku mek hihn hapi wen adaz rong dehn di selibrayt halidayz.
Milyanz a Kristyanz disaid noh fi selibrayt Krismos. How dehn feel bowt dehn disizhan?
