Jeezas mi teech dat fi hihn falowaz noh fi bee laik “di peepl a dis werl.” (Jan 15:19) Dat meenz dehn noh fi geh involv eena di tingz a dis werl. Wan way how dehn du dat da wen dehn stay nyoochral—dehn noh tek said eena palitiks ahn waar. Bot fi bee aanis dis noh aalwayz eezi. Ahn pahn tap a dat, peepl mait mek fon a wi bikaaz a dis. How wi ku stay nyoochral ahn laayal tu Jehoava Gaad?

1. How chroo Kristyanz si di govament dehn?

Chroo Kristyanz rispek di govament. Wi du jos laik weh Jeezas seh ahn “pay bak Seeza tingz tu Seeza.” Dat meenz dat wi obay di laaz a di konchri, laik di laa weh seh wi fi pay taks. (Maak 12:17) Di Baibl teech dat di hyooman govament dehn onli di rool bikaaz Jehoava alow dehn fi du dat. (Roamanz 13:1) Soh wi andastan dat dehnya govament noh ga az moch atariti az Gaad. Wi noa dat da onli wi Gaad ahn fi hihn Kingdom da hevn weh ku fiks aala di prablemz weh wi fays.

2. How wi ku shoa da wi nyoochral?

Jos laik Jeezas, wi noh tek paat eena palitiks. Wahn taim, afta sohn peepl mi si wan a fi hihn mirakl, dehn mi chrai mek hihn bee dehn king, bot hihn neva mek dehn du dat. (Jan 6:15) Wai? Bikaaz, laik how hihn mi seh laytaraan, “mai Kingdom noh bilangz tu dis werl.” (Jan 18:36) Bikaaz wi fala Jeezas wi nyoochral ahn wi shoa dis eena difrent wayz. Fi egzampl, wi noh goh da waar. (Reed Micah 4:3.) Wi rispek di nashanal simbolz, laik di flag, bot wi noh wership dehn. (1 Jan 5:21) Ahn wi noh sopoat er goh gens eni paati er persn eena palitiks. Wen wi du tingz laik dehnya, wi shoa dat wi kompleetli laayal tu Gaad Kingdom, er govament.

 SAACH FI MOA

3. Chroo Kristyanz stay nyoochral

Jeezas ahn fi hihn falowaz set wahn gud egzampl fi wi. Reed Roamanz 13:1, 5-7 ahn 1 Peeta 2:13, 14. Den, play di VEEDYO ahn diskos di kweschan dehn.

• Wai wi fi rispek di govament dehn?

• Wat da sohn wayz wi shoa dat wi obay dehn?

Joorin wahn waar, sohn konchri mait seh dehn nyoochral, bot dehn stil help di too said weh di fait. Weh ih reeli meen fi bee nyoochral? Reed Jan 17:16. Den, play di VEEDYO ahn diskos di kweschan.

• Weh ih meen fi bee nyoochral?

Wat if di govament waahn mek wi du sohnting weh goh gens Gaad laa? Reed Aks 5:28, 29. Den, play di VEEDYO ahn diskos di kweschan dehn.

• If di govament tel wi fi du sohnting weh goh gens Gaad laa, da hoo wi fi obay?

• Yoo ku tink bowt sohn tingz weh wuda mek Kristyanz noh obay di govament dehn?

 4. Shoa dat yu nyoochral eena di way yu tink an ak

Reed 1 Jan 5:21. Den, play di VEEDYO ahn diskos di kweschan dehn.

• Eena di veedyo, wai Ayenge neva jain di politikal paati er tek paat eena serimoniz laik fi saloot di flag?

• Yu tink hihn mi mek wahn gud disizhan?

Eena weh ada wayz ih ku bee haad fi stay nyoochral? Play di VEEDYO, ahn den diskos di kweschan dehn.

• How wi ku stay nyoochral wen wi wach difrent konchri kompeet gens eech ada eena wahn gaym er spoat?

• How wi ku stay nyoochral eevn wen peepl eena palitiks mek wahn disizhan weh ku eeda bee gud er bad fi wi?

• How di nyooz er di peepl weh wi deh rong ku mek it haad fi wi stay nyoochral?

 WEH WI LAAN?

Chroo Kristyanz werk haad fi noh tek said eena palitiks ahn fi stay nyoochral eena di way dehn tink, weh dehn taak bowt, ahn how dehn ak.

Mek Wi Rivyoo:

• Weh wi fi gi di hyooman govament dehn?

• Wai wi stay nyoochral wen ih kohn tu palitiks?

• Wat da sohn tingz weh ku mek it haad fi wi stay nyoochral?