LESN 46

Wai Dedikayt Yu Laif tu Gaad ahn Geh Baptaiz?

PLAY

Wen yu dedikayt yu laif tu Jehoava, yu di pramis hihn eena wahn pryaa dat yu onli wahn wership hihn ahn dat di moas impoatant ting eena yu laif wahn bee fi du weh hihn waahn. (Psalm 40:8) Den, yu geh baptaiz fi shoa ada peepl dat yu dedikayt yu laif tu Jehoava. Di dedikayt wi laif tu Jehoava da di moas impoatant ting wi ku eva disaid fi du. Dis disizhan soh impoatant dat ih wahn chaynj wi laif fareva. Da weh ku mek yoo waahn du dis?

1. Weh mek sombadi waahn dedikayt dehn laif tu Jehoava?

Wi dedikayt wi laif tu Jehoava bikaaz wi lov ahn. (1 Jan 4:10, 19) Di Baibl tel wi: “Lov Jehoava yu Gaad wid yu hoal haat ahn wid yu hoal soal ahn wid yu hoal main ahn wid yu hoal schrent.” (Maak 12:30) Wi shoa dat wi lov Gaad noh jos bai weh wi seh bot bai weh wi du tu. Jos laik how wahn man ahn wahn laydi disaid fi geh marid bikaaz dehn reeli lov eech ada, fi wee lov fi Jehoava mek wi waahn dedikayt wiself tu hihn ahn geh baptaiz.

2. Wat da sohn blesinz weh Jehoava giv ih servants weh baptaiz?

Wen yu geh baptaiz, yu geh fi bee paat a Jehoava hapi famili. Den eena lata difrent wayz yu wahn geh fi si ahn feel humoch hihn lov yu, ahn yu wahn geh eevn moa kloasa tu ahn. (Reed Malachi 3:16-18.) Yu noh onli wahn ga Jehoava az yu Pa, bot yu wahn eevn ga wahn spirichwal famili a bradaz ahn sistaz rong di werl weh lov yoo ahn Jehoava tu. (Reed Maak 10:29, 30.) Bot bifoa yu geh baptaiz, dehn ga sohn tingz weh yu haftu du. Yu need fi laan bowt Jehoava, lov ahn, an put fayt eena ih Son. Afta dat, yu need fi dedikayt yu laif tu Jehoava. If yu du dehnya tingz ahn den geh baptaiz, yu wahn deh pahn di road fi injai evalastin laif. Di Baibl seh: “Baptizm . . . di sayv unu now.”—1 Peeta 3:21.

SAACH FI MOA

Laan wai ih impoatant fi dedikayt yu laif tu Jehoava ahn geh baptaiz.

3. Aala wi haftu chooz hoo wi wahn serv

Eena di taim a di Izrelaits, som mi tink dat dehn ku wership Jehoava ahn wership di faals gaad Bayal. Bot Jehoava sen ih prafit Ilaija fi chaynj how dehn mi-di tink. Reed 1 Kings 18:21, ahn den diskos dis kweschan:

Weh disizhan di Izrelait dehn mi haftu mek?

Wee haftu chooz hoo wi wahn serv jos laik di Izrelait dehn. Reed Look 16:13, ahn den diskos dehnya kweschan:

Wai wi kyaahn di wership Jehoava ahn di wership sohnting er sombadi els?
Weh wi ku du fi shoa Jehoava dat da onli hihn wi wahn serv?

4. Tink bowt humoch Jehoava lov yoo

Weh wee ku giv tu Jehoava sins hihn gi wi wahn lata wandaful tingz? Play di VEEDYO.

VEEDYO: Giv Yu Gif tu Gaad (3:04)

Weh da sohn wayz Jehoava shoa dat ih lov yoo? Reed Psalm 104:14, 15 ahn 1 Jan 4:9, 10, ahn den diskos dehnya kweschan:

Weh da sohn tingz weh Jehoava gi yu weh yoo reeli tankful fa?
Wen yoo tink bowt di gif dehn weh Jehoava gi yu, how dat mek yu feel bowt hihn?

Wen wi geh wahn gif weh wi reeli laik, wi waahn shoa di persn weh giv it tu wi dat wi apreeshiayt it. Reed Deuteronomy 16:17, ahn den diskos dehnya kweschan:

Wen yu tink bowt evriting weh Jehoava don du fi yu, yoo wuda waahn giv ahn sohnting? Weh yoo wuda waahn giv ahn?

5. Wi geh lata blesinz wen wi dedikayt wi laif tu Jehoava

Wahn lata peepl tink dat dehn wahn bee hapi if dehn faymos, ga moni, er ga wahn gud jab. Yoo tink dat da chroo? Play di VEEDYO, ahn den diskos di kweschan dehn.

VEEDYO: Futbaal Da-Mi di Moas Impoatant Ting Eena Mai Laif (5:45)

Eena di veedyo, eevn doa di futbaal playa mi lov di gaym, wai ih mi lef da laif bihain?
Yoo tink hihn mi mek di rait chois wen ih disaid fi dedikayt ih laif tu Jehoava ahn noh tu futbaal? Wai yu wuda seh dat?

Bifoa di apasl Paal mi ton wahn Kristyan, hihn mi-di chrai mek wahn big naym fi ihself. Ih mi stodi di Jooish laa wid wahn faymos teecha. Bot ih mi lef aala dat bihain fi bee wahn Kristyan. Paal mi eva feel laik ih mek wahn mistayk? Reed Filipiyanz 3:8, ahn den diskos dehnya kweschan:

Wai Paal seh dat di tingz weh ih mi giv op wen ih ton wahn Kristyan da-mi “loan gyaabij”?
Weh hihn mi geh wen ih lef aala dehndeh tingz bihain?
Yu tink yu laif wahn bee beta if yu chooz fi serv Jehoava? Wai yu wuda seh dat?