LESN 50
How Payrents ahn Chiljren Ku Bee Hapi?
Chiljren da wahn gif fahn Jehoava, soh hihn waahn payrents tek gud kyaa a dehn. Di bes advais weh ku help payrents fi du dat, kohn fahn Jehoava. Ahn fi hihn advais eevn shoa chiljren weh dehn ku du fi help dehn famili bee hapi.
1. Weh Jehoava aks payrents fi du?
Jehoava waahn payrents lov dehn chiljren ahn spen az moch taim az dehn kud wid dehn. Hihn waahn payrents protek dehn chiljren fahn daynja ahn mek dehn yooz di Baibl fi chrayn dehn. (Proverbs 1:8) Hihn tel di hed a di hows: “Unu mos rayz [unu chiljren] op . . . akaadn tu di gaidans weh kohn fahn Jehoava.” (Reed Ifeezhanz 6:4.) Ih mek Jehoava hapi wen payrent fala fi hihn gaidans fi rayz dehn pikni ahn dehn noh lef da rispansabiliti fi sohnbadi els du.
2. Weh Jehoava aks chiljren fi du?
Jehoava tel chiljren: “Bee obeedyant tu unu payrents.” (Reed Koloashanz 3:20.) Wen chiljren rispek an obay dehn payrents dehn mek Jehoava ahn dehn payrents feel hapi. (Proverbs 23:22-25) Jeezas da-mi wahn gud egzampl wen ih da-mi wahn lee bwai. Eevn doa hihn mi perfek an ih payrents neva perfek, hihn mi stil rispek an obay dehn.—Look 2:51, 52.
3. How yu famili ku geh kloasa tu Gaad?
If yoo ga chiljren, fi shoar yu waahn dehn lov Jehoava jos laik how yoo lov hihn. Yu ku help dehn du dis, if yu du weh di Baibl seh: “Yu need fi teech [Jehoava werdz] tu yu chiljren oava ahn oava, ahn taak bowt dehn wen yu di sidong eena yu hows ahn wen yu di waak pahn di road.” (Deuteronomy 6:7) Di sayhn way how yu noa dat moas a di taim yu need fi tel yu chiljren sohnting oava ahn oava fi mek dehn memba it. Dis skripcha shoa dat yu fi aalwayz luk fi wahn chaans fi taak tu yu chiljren bowt Jehoava. Ih aalso gud fi mek di hoal famili tek owt taim evri week fi wership Jehoava tugeda. Eevn if yu noh ga no pikni, wen yu tek owt taim eech week fi stodi di Baibl ih wahn benifit yu.
SAACH FI MOA
Fain owt weh ku help evribadi eena di famili fi feel sayf ahn hapi.
4. Chrayn yu chiljren wid lov
Ih noh aalwayz eezi fi chrayn wi chiljren. How di Baibl ku help wi? Reed Jaymz 1:19, 20, ahn den diskos dehnya kweschan:
-
How payrents ku shoa lov wen dehn di taak tu dehn chiljren?
-
Wai payrents noh fi disiplin dehn pikni wen dehn beks? a
5. Protek yu pikni
Ih reeli impoatant fi mek yu taak tu eech wan a yu pikni bowt seks soh dat yu ku protek dehn. Bot maybi dis feel laik sohnting haad fi du. Play di VEEDYO, ahn den diskos di kweschan dehn.
-
Wai ih haad fi mek sohn payrents taak tu dehn pikni bowt seks?
-
How sohn payrents help dehn pikni fi andastan wat da seks?
Jos laik weh di Baibl seh mi wahn hapm, Saytan werl di geh moa ahn moa wikid. Reed 2 Timoti 3:1, 13, ahn den diskos dis kweschan:
-
Som a di wikid peepl weh vers 13 taak bowt, da peepl weh abyooz chiljren sekshwali. Soh wai ih impoatant fi mek payrents teech dehn pikni bowt seks ahn how fi protek dehnself fahn peepl laik dat?
Yu mi noa?
Jehoava Witnisiz ga wahn lata buk, magazeen, ahn veedyo weh ku help payrents fi teech dehn pikni bowt seks ahn how fi protek dehnself fahn peepl weh waahn hert dehn eena wahn sekshwal way. Dehnya da sohn egzampl:
-
Protek Yu Pikni Dehn (veedyo)
-
Laan Fahn di Bes Teecha Weh Eva Liv Pahn di Ert, chapta 10 ahn 32
-
“Teech Yu Pikni Dehn Bowt Seks” (Awayk! No. 5 2016)
6. Rispek yu payrents
Chiljren ahn yong peepl ku shoa rispek fi dehn payrents bai di way dehn taak tu dehn. Play di VEEDYO, ahn den diskos di kweschan dehn.
-
Wai ih impoatant fi mek chiljren er yong peepl taak tu dehn payrents wid rispek?
-
How chiljren er yong peepl ku chreet dehn payrents wid rispek wen dehn taak tu dehn?
Reed Proverbs 1:8, ahn den diskos dis kweschan:
-
How chiljren er yong peepl fi bihayv wen dehn payrents tel dehn weh fi du?
7. Wahn famili fi wership Jehoava tugeda
Familiz hoo da Jehoava Witnisiz tek owt taim evri week fi wership Jehoava tugeda. Weh famili wership ku bee laik? Play di VEEDYO, ahn den diskos di kweschan dehn.
-
Weh ku help wahn famili fi noh mis dehn famili wership?
-
Weh payrents ku du soh dat famili wership ku bee fon ahn stil help evribadi eena di famili?—Luk pahn di fers picha eena dis lesn.
-
Weh da sohn tingz weh ku mek it haad fi yu famili stodi tugeda?
Fahn way bak eena di Izrelait dehn taim, Jehoava mi aalwayz waahn familiz kohn tugeda ahn taak bowt di Skripchaz. Reed Deuteronomy 6:6, 7, ahn den diskos dis kweschan:
-
How yoo ku praktis weh dis skripcha seh?
Sohn tingz yu ku du fi famili wership:
-
Pripyaa fi di meetin dehn.
-
Reed ahn taak bowt paat a di Baibl weh yu famili wahn laik.
-
If yu ga yong pikni, yu ku dongload er print owt wahn proajek fi pikni fahn jw.org.
-
If yu ga teenayjaz, goh oava wahn aatikl fi yoots pahn jw.org.
-
Ak owt wahn Baibl stoari wid yu chiljren.
-
Wach wahn veedyo pahn jw.org ahn den taak bowt it tugeda.
WEH YU WUDA SEH IF SOHNBADI TEL YU: “Ai tu bizi fi teech mi pikni dehn bowt di Baibl.”
WEH WI LAAN?
Jehoava waahn payrents lov, chrayn, ahn protek dehn chiljren. Hihn waahn chiljren rispek an obay dehn payrents. Ahn hihn waahn evribadi eena di famili wership hihn tugeda.
Mek Wi Rivyoo:
-
How payrents ku chrayn ahn protek dehn chiljren?
-
How chiljren ku shoa rispek fi dehn payrents?
-
Wai ih gud fi tek owt taim evri week fi wership Jehoava wid wi famili?
FAIN OWT MOA
Weh da sohn lesn yu ku teech yu pikni fi help ahn wen ih geh oalda?
Laan weh advais di Baibl gat fi help peepl weh di tek kayr a oalda wanz.
“Di Baibl Seh Dat Wi Hafu Tek Kayr a Wi Payrents Wen Dehn Geh Oalda?” (Web aatikl)
Si how wahn man weh neva noa how fi rayz pikni mi laan how fi bee wahn gud pa.
Fain owt how wahn pa ku mek ih rilayshanship wid ih son geh schranga.
“How Wahn Pa Ku Stay Kloas tu Ih Son?” (Di Wachtowa, Novemba 1, 2011)
a Wen di Baibl taak bowt “disiplin,” ih meen fi teech, gaid, ahn help yu chiljren fi chaynj di rang way dehn tink er bihayv. Dis noh meenz dat yu wahn di abyooz dehn er rof dehn op.—Ifeezhanz 6:4.
