Jehoava mek wi wid di wandaful gif fi taak tu ada peepl. Yoo tink hihn kay bowt di way wi yooz dis gif? Fi shoar! (Reed Jaymz 1:26.) Soh how wee ku yooz it eena di rait way fi mek hihn hapi?

1. How wi fi yooz dis gif weh Jehoava gi wi?

Di Baibl tel wi fi “kip aan di inkorij wan anada ahn di bil op wan anada.” (1 Tesaloanyanz 5:11) Hoo aal yoo ku tink bowt weh need inkorijment? Weh yoo ku du fi help dehn feel beta? Mek dehn noa dat yu lov dehn ahn di tink bowt dehn. Maybi yu ku tel dehn bowt di gud tingz yu si eena dehn. Fahn aala di skripchaz eena di Baibl, wich wan yoo ku yooz fi inkorij sohnbadi yu noa? Aalwayz memba fi taak eena wahn kain ahn jentl way, bikaaz weh mata tu adaz da noh jos weh yu seh bot da how yu seh it.—Proverbs 15:1.

2. How wi noh fi taak?

Di Baibl seh: “Unu noh fi mek nat eevn wan ratn werd kom owta unu mowt.” (Reed Ifeezhanz 4:29.) Soh wi noh yooz doti langwij er kos bad werd ahn wi noh seh tingz fi hert adaz er shaym dehn. Pahn tap a dat, wi noh fi taak bad bowt peepl, seh tingz bowt dehn weh da noh chroo, ner taak dehn bizniz.—Reed Proverbs 16:28.

3. How wi ku mek shoar dat weh wi seh inkorij adaz?

Wahn lata taimz weh wi seh shoa how wi di tink ahn feel. (Look 6:45) Soh bikaaz a dat wi need fi chrayn wiself fi tink bowt pazitiv tingz, laik tingz weh raichos, weh pyoar, weh moov peepl fi lov, ahn weh dizerv prayz. (Filipiyanz 4:8) Fi du dat, wi haftu bee kyaaful bowt weh wi di wach, reed, lisn tu, ahn di kaina frenz wi chooz. (Proverbs 13:20) An if wi tink bifoa wi taak dat wahn help wi tu. Wi ku aks wiself, how dis wahn mek sohnbadi els feel? Di Baibl seh: “Wen yu taak widowt tink, da laik wahn stab fahn wahn soad, bot di tong a di waiz wan ku heel.”—Proverbs 12:18.

 SAACH FI MOA

4. Kanchroal how yu taak

Aala wi seh tingz weh wi sari bowt layta. (Jaymz 3:2) Reed Galayshanz 5:22, 23, ahn den diskos dehnya kweschan:

• Fi help yu kanchroal weh yu seh ahn how yu seh it, weh kwalitiz eena dis skripcha yoo wuda aks Jehoava fa? How yu tink dehnya kwalitiz ku help yoo?

Reed 1 Korintyanz 15:33, ahn den diskos dis kweschan:

• How yu frenz an entataynment ku afek di way yu taak?

Reed Ecclesiastes 3:1, 7, ahn den diskos dis kweschan:

• Wen yoo tink wuda bee wahn gud taim fi kip kwaiyet er wayt fi wahn beta taim fi taak?

 5. Seh gud tingz bowt peepl

6. Taak tu yu famili eena wahn kain way

 WEH WI LAAN?

Di tingz weh wi seh kud eeda hert ada peepl er inkorij dehn. Soh wi need fi stap ahn tink bowt weh wi seh, wen wi seh it, ahn how wi seh it.

Mek Wi Rivyoo:

• Eena weh wayz wi ku yooz dis gif weh Jehoava gi wi fi help adaz?

• How wi noh waahn yooz dis gif?

• Weh wahn help wi fi aalwayz bee kain an inkorijin tu adaz wen wi taak?