LESN 53

Mek Yu Entataynment Pleez Jehoava

PLAY

Jehoava da “di hapi Gaad.” (1 Timoti 1:11) Ahn hihn waahn wi bee hapi an injai laif. Soh hihn laik wen wi tek owt sohn taim fahn werk fi rilaks ahn ga fon. Eena dis lesn, wi wahn si how wi ku yooz dis taim fi injai wiself, feel satisfai, ahn mek Jehoava hapi.

1. Weh wi fi memba wen wi di chooz wi entataynment?

Weh yoo laik du fi rilaks ahn ga fon? Som a wi laik stay hoam ahn reed wahn buk, wach wahn moovi, lisn tu myoozik, er goh pahn di Intanet. Wail ada peepl waahn deh owtsaid wid dehn frenz ahn goh swim, raid dehn baik, er play baal. Bot noh mata weh wi chooz, wi need fi mek shoar dat “di Laad wahn pleez wid weh [wi] du.” (Ifeezhanz 5:10) Ih reeli impoatant dat wi andastan dis bikaaz moas a di tingz nowadayz weh peepl laik wach, lisn tu, er du, ga fi du wid tingz weh Jehoava hayt, laik vailens, imoraliti, er spiritizm. (Reed Psalm 11:5.) Soh weh wahn help wi fi chooz di rait kaina entataynment?

If di frenz wi chooz lov Jehoava, den dehn ku bee wahn gud egzampl fi wi ahn help wi chooz di rait kaina entataynment. Jos laik weh wi mi laan eena Lesn 48, “di persn weh di waak wid waiz peepl wahn geh waiz.” Bot if wi mek it wahn habit fi deh rong peepl weh noh lov Jehoava, den “tingz noh gwehn gud” fi wi.—Proverbs 13:20.

2. Wai ih impoatant fi limit di amonk a taim wi spen pahn entataynment?

Eevn if di entataynment weh wi chooz da sohnting gud, wi haftu mek shoar dat wi noh spen tu moch taim pan it. Bikaaz if wi spen wahn lata taim pahn entataynment wi mait noh ga nof taim fi du di tingz weh moa impoatant eena wi laif. Dat da wai di Baibl tel wi fi “mek di bes yoos a [wi] taim.”—Reed Ifeezhanz 5:15, 16.

SAACH FI MOA

Laan how yu ku mek gud disizhanz bowt yu entataynment.

3. Stay weh fahn entataynment weh bad

Wai wi need fi bee kyaaful wen wi di chooz wi entataynment? Play di VEEDYO, ahn den diskos di kweschan dehn.

VEEDYO: Da Weh Kaina Entataynment Ah Shuda Chooz? (4:39)

How di faitin gaymz eena di taim a di Roamanz da laik som a di entataynment tudeh?
Eena di veedyo, weh Danny mi laan bowt entataynment?

Reed Roamanz 12:9, ahn den diskos dis kweschan:

How dis skripcha ku help yu chooz di rait kaina entataynment?

Weh da sohn tingz Jehoava hayt? Reed Proverbs 6:16, 17 ahn Galayshanz 5:19-21. Afta yu reed eech skripcha, diskos dis kweschan:

Di tingz weh geh menshan eena dehnya vers kaman eena entataynment tudeh? Weh da som a dehn?

How yu ku chooz gud entataynment?

Aks yuself dehnya kweschan:

Dis ga eniting fi du wid tingz weh Jehoava hayt?
Dis tek weh taim fahn moa impoatant tingz?
Dis mek Ah geh kloas tu er spen wahn lata taim wid peepl hoo noh lov Jehoava?

Wi ku kip wiself sayf wen wi stay far fahn daynja. Dats wai wi noh waahn ga notn fi du wid eni kaina entataynment weh wi tink ku hert wi

4. Mek gud yoos a yu taim

Play di VEEDYO, ahn den diskos di kweschan.

VEEDYO: Da Weh Di Kanchroal Yu Taim? (2:45)

Eevn doa di brada eena di veedyo neva di wach notn bad, weh da-mi di prablem?

Reed Filipiyanz 1:10, ahn den diskos dis kweschan:

How dis skripcha ku help wi disaid humoch taim wi fi spen pahn entataynment?

5. Chooz entataynment weh gud fi yu

Dehn ga soh moch tingz weh yu ku du fi fon weh noh wahn hert Jehoava. Reed Ecclesiastes 8:15 ahn Filipiyanz 4:8, ahn den diskos dis kweschan:

Weh kaina gud entataynment yoo laik du fi fon?

Yoo ku injai gud entataynment

WEH YU WUDA SEH IF SOHNBADI TEL YU: “Az lang az Ai noh di du it, Ai noh si notn rang wid entataynment weh ga fi du wid vailens, imoraliti, er spiritizm.”