LESN 55

Sopoat Yu Kangrigayshan

PLAY

Dehn ga milyanz a peepl aal rong di werl weh injai di wership Jehoava eena towznz a kangrigayshanz. Dehn tankful fi di inschrokshan ahn dairekshan weh dehn get. Ahn dehn werk haad fi sopoat di kangrigayshan eena lata wayz. Dat da how yoo feel bowt yu kangrigayshan?

1. How yoo ku yooz yu taim an enerji fi sopoat di kangrigayshan?

Aala wi ku help owt eena di kangrigayshan. Fi egzampl, dehn ga enibadi weh oalda, sik, er kyaahn tek kayr a dehnself eena yu kangrigayshan? Yoo ku help dehn geh da meetin? Er help dehn wid ada tingz weh dehn need, laik di goh bai fi dehn er help dehn rong di hows? (Reed Jaymz 1:27.) Wahn nada ting wi ku du da help kleen ahn fiks op di Kingdom Haal soh ih stay eena gud kandishan. Nobadi noh foas wi fi du dehnya tingz. Wee “wilin fi serv” bikaaz a di lov wi gat fi Jehoava ahn wi bradaz ahn sistaz.—Psalm 110:3.

Dehn wan weh baptaiz ku sopoat di kangrigayshan eena moa wayz. Fi egzampl, bradaz weh meet di kwalifikayshans eena di Baibl ku help di kangrigayshan az ministeeryal servants ahn layta az eldaz. Ahn bradaz ahn sistaz ku sopoat di preechin werk moa wen dehn painyaa. Wail adaz ku help bil difrent plays weh wi yooz fi wership er moov sohnweh els fi help owt wahn nada kangrigayshan.

2. How wi ku yooz wi moni ahn tingz wi oan fi sopoat di kangrigayshan?

Wi ku “aana Jehoava wid [wi] tingz weh ga valyu.” (Proverbs 3:9) Soh ih mek wi hapi wen wi yooz wi moni ahn tingz wi oan fi sopoat di kangrigayshan ahn di preechin werk rong di werl. (Reed 2 Korintyanz 9:7.) Wi doanayshan dehn eevn sopoat dehn wan weh need help bikaaz a wahn dizaasta. Fi mek wi ku help owt eena wayz laik dehnya, lata wi mek it wahn habit fi “set sohnting wan said.” (Reed 1 Korintyanz 16:2.) Wi ku yooz di kanchribyooshan baks wehpaat wi meet fi wership fi gi wi doanayshan er goh onlain da donate.pr418.com. Jehoava gi wi di apachooniti fi yooz di tingz wi oan fi shoa hihn dat wi lov ahn.

SAACH FI MOA

Fain owt weh da sohn tingz yoo ku du fi sopoat di kangrigayshan.

3. Wi ku yooz di tingz wi oan

Jehoava ahn Jeezas lov peepl weh hapi fi giv. Fi egzampl, Jeezas mi ga gud tingz fi seh bowt wahn wido weh mi poa bot shee mi stil gi sohnting tu Jehoava. Reed Look 21:1-4, ahn den diskos dehnya kweschan:

Wi need fi doanayt wahn lata moni fi mek Jehoava hapi?
How Jehoava ahn Jeezas feel wen wi hapi fi giv?

Fi si how wi doanayshan geh yooz, play di VEEDYO. Den diskos di kweschan.

VEEDYO: ‘Giv Jehoava Wahn Gif Eena Ih Hanʼ (4:47)

How wi doanayshanz geh yooz fi help kangrigayshanz rong di werl?

4. Wee ku valantyaa fi help

Jehoava peepl eena Baibl taimz mi werk haad fi mek shoar dat di plays wehpaat dehn mi wership mi stay eena gud kandishan. Bot dis neva jos meen di gi moni. Reed 2 Chronicles 34:9-11, ahn den diskos dis kweschan:

Weh aala di Izrelaits mi du fi help tek kayr a Jehoava hows er di plays wehpaat dehn mi wership?

Fi si how Jehoava Witnisiz fala da saym Baibl egzampl, play di VEEDYO. Den diskos di kweschan dehn.

VEEDYO: How fi Tek Kayr a di Plays Dehn Wehpaat Wi Wership (3:31)

Wai ih impoatant fi kip wi Kingdom Haal kleen an eena gud kandishan?
Wat da sohn tingz yoo ku du fi help?

5. Bradaz ku werk haad fi kwalifai fi du moa eena di kangrigayshan

Di Baibl inkorij bradaz fi werk haad fi kwalifai ahn du az moch az dehn kud fi sopoat di kangrigayshan. Fi si wahn egzampl, play di VEEDYO. Den ansa di kweschan.

VEEDYO: Bradaz—Werk Haad fi Du Wahn Gud Werk (5:19)

How di veedyo shoa dat Ryan mi werk haad fi du moa ahn sopoat di kangrigayshan?

Di Baibl tel wi weh bradaz ku du fi kwalifai fi serv az ministeeryal servants an eldaz. Reed 1 Timoti 3:1-13, ahn den diskos dehnya kweschan:

Weh bradaz need fi du if dehn di chrai reech di goal fi serv az ministeeryal servants an eldaz?
How dehn famili membaz sopoas tu ak? —Si vers 4 ahn 11.
How evribadi eena di kangrigayshan benifit wen bradaz werk haad fi sopoat di kangrigayshan eena dehnya wayz?