LESN 56

Du Yu Paat fi Kip di Yooniti Eena di Kangrigayshan

PLAY

Wen wi deh wid wi bradaz ahn sistaz, wi feel jos laik King Dayvid wen ih seh: “Da wahn gud ahn plezant ting wen bradaz liv tugeda eena yooniti!” (Psalm 133:1) Bot dis noh hapm jos laik dat. Fi mek wi stay yoonaitid aala wi haftu du wi paat.

1. Weh speshal bowt Jehoava peepl?

Wai yu stil feel komfatabl eevn if yu goh da wahn meetin da wahn nada konchri ahn yu mait noh andastan di langwij? Dat da bikaaz noh mata wehpaat wi deh wi yooz di sayhn poblikayshanz fi stodi di Baibl. Ahn wi werk haad fi shoa eech ada lov. Ih noh mata wehpaat wi liv, aala wi “kaal pahn di naym a Jehoava fi wership ahn eena yooniti.”—Zephaniah 3:9.

2. Weh yoo ku du fi help kip di yooniti eena di kangrigayshan?

“Unu mos kantinyu fi ga deep lov fi wan anada.” (1 Peeta 1:22) How yoo ku du weh dis skripcha seh? Luk fi di gud kwalitiz eena ada peepl insteda di foakos pahn dehn weeknis. Noh jos spen taim wid dehn wan weh laik di sayhn tingz laik yoo, bot chrai get fi noa ada bradaz ahn sistaz weh difrent fahn yoo. Ahn wi waahn werk haad fi geh rid a eni prejudis weh mait deh eena wi haat.—Reed 1 Peeta 2:17. a

3. Weh yu wahn du wen yu ga wahn prablem wid wahn brada er sista?

Eevn doa wi yoonaitid, wi stil mek mistayks. Soh sohntaim wi let dong er eevn hert wan anada. Dats wai di Baibl tel wi fi “kantinyu . . . fergiv wan anada,” ih eevn seh: “Jos laik how Jehoava fergiv unu wid aala fi hihn haat, unu mos fergiv wan anada di saym way.” (Reed Koloashanz 3:13.) Wee hert Jehoava moa taimz dan wi ku konk, bot hihn stil fergiv wi. Soh hihn ekspek wi fi fergiv wi bradaz ahn sistaz tu. An if yu fain owt dat yu du sohnting weh hert sombadi, tek di fos step fi werk owt di prablem.—Reed Machyu 5:23, 24. b

SAACH FI MOA

Si weh yoo ku du fi kip di yooniti ahn pees eena di kangrigayshan.

Weh steps yu wahn tek fi mek pees?

4. Geh rid a prejudis

Wi waahn lov aala wi bradaz ahn sistaz. Bot sohntaim ih ku bee haad fi lov sohnbadi weh difrent fahn wi. Weh ku help wi? Reed Aks 10:34, 35, ahn den diskos dehnya kweschan:

Jehoava chooz aal difrent kaina peepl fi bee fi hihn Witnisiz. Wen yu tink bowt dat, how yu fi feel bowt bradaz ahn sistaz weh difrent fahn yoo?
Weh kaina prejudis kaman eena yu ayrya? Wai yu noh fi ak laik dat?

Reed 2 Korintyanz 6:11-13, ahn den diskos dis kweschan:

How yoo tink yu ku geh kloasa tu bradaz ahn sistaz weh difrent fahn yoo?

5. Fergiv wid aala yu haat ahn mek pees

Jehoava fergiv wi wid aala ih haat eevn doa hihn wahn neva need wi fi fergiv ahn. Reed Psalm 86:5, ahn den diskos dehnya kweschan:

Weh dis skripcha teech wi bowt how Jehoava fergiv?
Yoo tankful fi Jehoava fergivnis? Wai yu wuda seh dat?
Weh kaina tingz ku mek it haad fi geh lang wid ada peepl?

How wi ku fala Jehoava egzampl ahn stay yoonaitid wid wi bradaz ahn sistaz? Reed Proverbs 19:11, ahn den diskos dis kweschan:

Wen sombadi ofen wi er get wi beks, weh wi ku du fi mek tingz beta?

Sohntaim wi du tingz fi ofen ada peepl. Weh wi fi du wen dat hapm? Play di VEEDYO, ahn den diskos di kweschan.

VEEDYO: Yu Geh Lata Blesinz Wen Yu Mek Pees (6:01)

Weh di sista eena di veedyo mi du fi mek pees?

6. Luk fi di gud eena yu bradaz ahn sistaz

Wen wi geh kloasa tu wi bradaz ahn sistaz, wi geh fi noa dehn gud kwalitiz ahn wi staat tu si dehn weeknis tu. How wi ku mek shoar dat wi foakos pahn di gud? Play di VEEDYO, ahn den diskos di kweschan.

VEEDYO: Ga Byootiful Kwalitiz! (5:10)

Weh ku help yu fi si di gud kwalitiz eena yu bradaz ahn sistaz?

Jehoava foakos pahn di gud kwalitiz weh wi gat. Reed 2 Chronicles 16:9a, ahn den diskos dis kweschan:

How ih mek yoo feel fi noa dat Jehoava foakos pan di gud eena yoo?

Eevn doa wahn goal ring ga sohn skrach pan it, ih stil wert wahn lat. Sayhn way soh, wi bradaz ahn sistaz preshos tu Jehoava eevn doa dehn mek mistayks

WEH YU WUDA SEH IF SOHNBADI TEL YU: “Bifoa Ah fergiv sombadi, dehn need fi tel mee dat dehn sari.”