LESN 60

Kantinyu fi Geh Kloasa tu Jehoava

PLAY

Yoo geh fi laan wahn lat bowt Jehoava eena dehnya Baibl lesn. Ahn bikaaz a dat, ih mek yu lov fi hihn groa soh moch dat yu mosi don dedikayt yu laif tu ahn, an geh baptaiz. Er maybi, yu di tink bowt du dat soon. Bot eevn afta dat yu need fi kantinyu mek proagres. In fak, yu ku kantinyu jraa kloasa tu Jehoava fareva. Mek wi si how.

1. Wai yu fi kantinyu mek yu frenship wid Jehoava geh schranga?

Wai wi need fi werk haad fi kantinyu mek wi frenship wid Jehoava geh schranga? Wi need fi du dis “soh dat wi noh jrif weh” fahn hihn. (Heebrooz 2:1) Ahn weh ku help wi stay faytful ahn serv Jehoava? Wi ku stay bizi di preech ahn luk fi ada wayz fi du moa fi wi Gaad. (Reed Filipiyanz 3:16.) Dehn noh ga notn beta eena laif dan fi serv Jehoava!—Psalm 84:10.

2. Wat els yu need fi kantinyu du?

Da chroo yu di finish dehnya Baibl lesn, bot yu laif az wahn Kristyan jos di staat. Di Baibl seh dat wi need fi “put aan di nyoo way a laif.” (Ifeezhanz 4:23, 24) Yu wahn geh fi laan moa bowt Jehoava ahn fi hihn kwalitiz wen yu kantinyu stodi di Baibl ahn goh da di meetin dehn. Luk fi wayz fi bee moa ahn moa laik Jehoava ahn kantinyu fi mek chaynjiz fi pleez hihn.

3. How Jehoava wahn help yu fi geh kloasa tu ahn?

Di Baibl seh: “Gaad . . . wahn finish unu chraynin. Ahn hihn wahn mek unu schrang, hihn wahn help unu fi stay faytful, ahn hihn wahn put unu pahn wahn salid fongdayshan.” (1 Peeta 5:10) Aala wi haftu deel wid temtayshan, bot Jehoava gi wi weh wi need fi mek wi stay schrang. (Psalm 139:23, 24) Hihn pramis fi gi yu di dizaiya ahn di powa fi stay faytful tu ahn.—Reed Filipiyanz 2:13.

SAACH FI MOA

Laan how yu ku kantinyu geh kloasa tu Jehoava ahn si how hihn wahn bles yu wen yu du dat.

4. Kantinyu fi taak ahn lisn tu yu bes fren

Pryaa ahn Baibl stodi mi help yu fi bee Jehoava fren. How dehnya tingz ku help yu fi geh eevn moa kloasa tu hihn?

Reed Psalm 62:8, ahn den diskos dis kweschan:

How yu ku mek yu pryaaz bee beta soh dat yu frenship wid Jehoava geh schranga?

Reed Psalm 1:2, ahn den diskos dis kweschan:

How yu ku geh moa owta yu Baibl reedin soh dat yu frenship wid Jehoava geh schranga?

Weh yu ku du fi geh moa owta yu persnal stodi? Fi si sohn egzampl, play di VEEDYO, ahn den diskos di kweschan dehn.

VEEDYO: Geh Moa Owta Yu Persnal Stodi (5:22)

Weh da sohn tingz eena di veedyo yoo ku chrai?
Weh tapiks yoo wuda laik fi stodi bowt?

5. Set goalz fi du moa fi Jehoava

Wen yu set goalz fi du moa fi Jehoava ih wahn help yu fi kantinyu geh kloasa tu hihn. Play di VEEDYO, ahn den diskos di kweschan.

VEEDYO: Di Bes Laif Eva (3:31)

How di veedyo shoa dat Cameron mi benifit wen ih set goalz fi du moa fi Jehoava?

Noh evribadi ku moov da wahn nada konchri fi goh preech. Bot aala wi ku set goalz weh wee ku reech. Reed Proverbs 21:5, ahn den taak bowt weh kaina goalz yoo wuda waahn set . . .

eena di kangrigayshan.
eena di preechin werk.

How di prinsipl fahn dis skripcha ku help yu reech yu goalz?

Goalz weh yu ku chrai reech

Werk haad fi mek yu pryaaz bee beta.
Reed di hoal Baibl.
Geh fi noa evribadi eena yu kangrigayshan.
Staat ahn kandok wahn Baibl stodi.
Serv az wahn agzilari er regyula painyaa.
If yu da wahn brada, werk haad fi kwalifai fi bee wahn ministeeryal servant.

6. Injai laif now ahn fareva!

Reed Psalm 22:26, ahn den diskos dis kweschan:

Weh yoo ku du fi injai laif now ahn fareva?

WEH WI LAAN?

Kantinyu fi mek yu frenship wid Jehoava geh schranga ahn set goalz fi du moa fi hihn. If yu du dehnya tingz, den yu wahn ku injai laif now ahn fareva!

Mek Wi Rivyoo:

Wai yoo ku bee shoar dat Jehoava wahn help yu fi stay faytful tu ahn?
How yu ku mek yu frenship wid Jehoava geh schranga?
If yu set goalz fi du moa fi Jehoava, how dat wahn help yu fi geh kloasa tu hihn?

Dayt Ah kompleet dehnya Baibl lesn:

Weh Ah Ku Werk Pan

Eena di neks yaa, reed di buk dehn weh naym Draw Close to Jehovah ahn “Come Be My Follower.” Dehnya buk wahn help yu fi kantinyu geh kloasa tu yu hevnli Faada ahn fi hihn Son.